ESRA

1 Mu mwaka Sailasi imfumu+ ya ku Persia atendeke ukuteka, Yehova alicincishe umutima wakwe pa kuti ifyo Yehova alandile ukupitila muli Yeremia+ fifikilishiwe. Sailasi abilile imbila mu bufumu bwakwe bonse, kabili alembele+ iyi imbila ati:

2 “Ifi e fyo Imfumu Sailasi iya ku Persia yalanda, ‘Yehova Lesa wa ku muulu alimpeela amabufumu yonse aya pano isonde,+ kabili alinjeba ukuti imukuulile ing’anda mu musumba wa Yerusalemu+ uwaba mu Yuda. 3 Nani pali imwe uwaba pa bantu ba kwa Lesa? Shi Lesa wakwe abe nankwe, kabili mulekeni aleya ku musumba wa Yerusalemu* uwaba mu Yuda, kabili akuule cipya cipya ing’anda ya kwa Yehova Lesa wa kwa Israele. Uyu e Lesa wa cine uo ing’anda yakwe yali mu Yerusalemu. 4 Abena mupalamano* ba mulebeshi onse,+ konse uko ekala, bamupeele silfere, golde e lyo ne fintu fimbi. Bamupeele ne fitekwa no mutuulo wa kuitemenwa uwa ng’anda ya kwa Lesa wa cine,+ iyali mu Yerusalemu.’”

5 Lyena intungulushi sha ba mu mukowa wa kwa Yuda ne sha ba mu mukowa wa kwa Benjamini na bashimapepo na bena Lebi, bonse abo umupashi wa kwa Lesa wa cine wacincishe, bali-ipekenye ukuya mu kukuula cipya cipya ing’anda ya kwa Yehova iyali mu Yerusalemu. 6 Abena mupalamano babo bonse balitungilile* abalebwelelamo ku Yerusalemu. Babapeele ifipe fya silfere ne fya golde e lyo ne fintu fimbi. Balibapeele ifitekwa ne fintu fimbi ifisuma, e lyo no mutuulo wa kuitemenwa uwa ng’anda ya kwa Lesa wa cine.

7 Imfumu Sailasi nayo yaletele ifipe fya mu ng’anda ya kwa Yehova, ifyo Nebukadnesari afumishe ku Yerusalemu kabili ifyo ailebika mu ng’anda ya kwa lesa wakwe.+ 8 Imfumu Sailasi iya ku Persia yaebele Mitiridati uwalesunga indalama ukuti afifumye, afipende e lyo apeele Sheshebasari*+ intungulushi ya ba mu mukowa wa kwa Yuda.

9 Nomba ifi e fipe ifyo apendele: Ifipe ifyali nge miseke ifya golde fyali 30, ifipe ifyali nge miseke ifya silfere fyali 1,000, ifipe fimbi ifyali nge miseke fyali 29, 10 imbale ishinono ishafonka isha golde shali 30, imbale ishinono ishafonka isha silfere shali 410, ifipe fimbi fyali 1,000. 11 Ifipe fyonse ifya golde ne fya silfere fyali 5,400. Fyonse ifi Sheshebasari afibweseeshe ku Yerusalemu ilyo bankole+ bafumine ku Babiloni.

2 Aba e bantu ba mu citungu abafumine ku Babiloni uko bali bankole+ abo Imfumu Nebukadnesari iya Babiloni yasendele,+ lelo ababweleele ku Yerusalemu na ku Yuda, cila muntu ku musumba wakwe.+ 2 Abaletungulula aba bantu bali ni Serubabele,+ Yeshua,+ Nehemia, Seraya, Reelaya, Mordekai, Bilishani, Mispari, Bigibai, Rehumu na Baana.

Pa bena Israele abaume ababwelele pali:+ 3 abatuntwike muli Paroshe bali 2,172; 4 abatuntwike muli Shefatia bali 372; 5 abatuntwike muli Ara+ bali 775; 6 abatuntwike muli Pehati-moabu,+ abatuntwike muli Yeshua na Yoabu bali 2,812; 7 abatuntwike muli Elamu+ bali 1,254; 8 abatuntwike muli Satu+ bali 945; 9 abatuntwike muli Sakai bali 760; 10 abatuntwike muli Bani bali 642; 11 abatuntwike muli Bebai bali 623; 12 abatuntwike muli Asigadi bali 1,222; 13 abatuntwike muli Adonikamu bali 666; 14 abatuntwike muli Bigibai bali 2,056; 15 abatuntwike muli Adini bali 454; 16 abatuntwike muli Atere, abatuntwike muli Hisekia bali 98; 17 abatuntwike muli Besai bali 323; 18 abatuntwike muli Yora bali 112; 19 abatuntwike muli Hashumu+ bali 223; 20 abatuntwike muli Gibari bali 95; 21 abena Betelehemu bali 123; 22 abena Netofa bali 56; 23 abena Anatote+ bali 128; 24 abena Asimabete bali 42; 25 abena Kiriati-yearimu, abena Kefira na bena Beerote bali 743; 26 abena Rama+ na bena Geba+ bali 621; 27 abena Mikimasi bali 122; 28 abena Betele na bena Ai+ bali 223; 29 abena Nebo+ bali 52; 30 abena Magibishi bali 156; 31 abatuntwike muli Elamu umbi bali 1,254; 32 abatuntwike muli Harimu bali 320; 33 abaume abena Lode, abena Hadidi na bena Ono bali 725; 34 abaume abena Yeriko bali 345; 35 abaume abena Senaa bali 3,630.

36 Bashimapepo+ ababwelele ni aba: Abatuntwike muli Yedaya+ aba mu ng’anda ya kwa Yeshua+ bali 973; 37 abatuntwike muli Imere+ bali 1,052; 38 abatuntwike muli Pashihuri+ bali 1,247; 39 abatuntwike muli Harimu+ bali 1,017.

40 Abena Lebi+ ababwelele ni aba: Abatuntwike muli Yeshua na Kadmiele,+ aba mu lupwa lwa kwa Hodabiya bali 74. 41 Bakemba+ ababwelele ni aba: Abatuntwike muli Asafi+ bali 128. 42 Abalelinda impongolo+ ababwelele ni aba: Abatuntwike muli Shalumu, abatuntwike muli Atere, abatuntwike muli Talmone,+ abatuntwike muli Akubu,+ abatuntwike muli Hatita na batuntwike muli Shobai, bonse pamo bali 139.

43 Abalebombela pe tempele*+ ababwelele ni aba: Abatuntwike muli Siha, abatuntwike muli Hasufa, abatuntwike muli Tabaote, 44 abatuntwike muli Kerose, abatuntwike muli Siaha, abatuntwike muli Padone, 45 abatuntwike muli Lebana, abatuntwike muli Hagaba, abatuntwike muli Akubu, 46 abatuntwike muli Hagabu, abatuntwike muli Salmai, abatuntwike muli Hanani, 47 abatuntwike muli Gidele, abatuntwike muli Gahari, abatuntwike muli Reaya, 48 abatuntwike muli Resini, abatuntwike muli Nekoda, abatuntwike muli Gasamu, 49 abatuntwike muli Usa, abatuntwike muli Pasea, abatuntwike muli Besai, 50 abatuntwike muli Asina, abatuntwike muli Meunimu, abatuntwike muli Nefusimu; 51 abatuntwike muli Bakibuki, abatuntwike muli Hakufa, abatuntwike muli Harihuri, 52 abatuntwike muli Basiluti, abatuntwike muli Mehida, abatuntwike muli Harsha, 53 abatuntwike muli Barikose, abatuntwike muli Sisera, abatuntwike muli Tema, 54 abatuntwike muli Nesiya na batuntwike muli Hatifa.

55 Abatuntwike mu babomfi ba kwa Solomone ababwelele ni aba: Abatuntwike muli Sotai, abatuntwike muli Soferete, abatuntwike muli Peruda,+ 56 abatuntwike muli Yaala, abatuntwike muli Darkone, abatuntwike muli Gidele, 57 abatuntwike muli Shefatia, abatuntwike muli Hatili, abatuntwike muli Pokerete-hasebaimu na batuntwike muli Ami.

58 Bonse abalebombela pe tempele* na batuntwike mu babomfi ba kwa Solomone bali 392.

59 Abafumine ku Tele-mela, ku Tele-harisha, ku Kerubi, ku Adone na ku Imere, abafililwe ukwishiba indupwa sha bashibo kabili abafililwe ukushininkisha nga ca kuti bali bena Israele ni aba:+ 60 abatuntwike muli Delaya, abatuntwike muli Tobia, na batuntwike muli Nekoda, bali 652. 61 Kabili abatuntwike muli bashimapepo ababwelele ni aba: abatuntwike muli Habaya, abatuntwike muli Hakose+ na batuntwike muli Barsilai, uwaupile umwana wa kwa Barsilai+ umwina Gileadi kabili uo bainike ishina lya kwa shifyala. 62 Aba balifwaile ibuuku umo balembele intuntuko shabo pa kuti beshibe umo batuntwike, lelo tabalisangile. E ico tababasuminishe ukuba bashimapepo.*+ 63 Umulashi* abebele ukuti tabalingile ukulalyako ifya mushilo nga nshi+ mpaka kukabe shimapepo uukabepushishako kuli Lesa ukubomfya Urimu na Tumimu.+

64 Abantu bonse mu lukuta bali 42,360.+ 65 Tabapendeeleko abasha babo abaume na basha babo abanakashi abali 7,337 na bakemba abaume na bakemba abanakashi abali 200. 66 Bakabalwe babo bali 736, imfalashi shabo na sho shali 245, 67 ingamila shabo shali 435, ne mpunda shabo shali 6,720.

68 Ilyo bafikile pa ng’anda ya kwa Yehova mu Yerusalemu, bamo pa ntungulushi sha mayanda ya bashibo batuulile imituulo ya kuitemenwa+ iya ng’anda ya kwa Lesa wa cine, pa kuti iyi imituulo baibomfye pa kukuula ing’anda cipya cipya* pali cilya cine cifulo yalipo kale.+ 69 Indalama bapeele isha kubomfya ku kukuula ing’anda cipya cipya, shali amadrakima* ya golde 61,000 na ma maina* ya silfere 5,000.+ Bapeele ne mingila ya bashimapepo 100, kabili ifi fyonse bafipeele ukulingana ne fyo bakwete. 70 Kabili bashimapepo, abena Lebi, bakemba, abalelonda impongolo, abalebombela pe tempele* na bantu bambi abashala baikele mu misumba yabo. E fyo abena Israele bonse baikele mu misumba yabo.+

3 Ilyo umweshi walenga 7+ wafikile ninshi abena Israele* bekala mu misumba yabo, balongene pamo no mutima umo mu Yerusalemu. 2 Yeshua+ umwana wa kwa Yehosadaki na bashimapepo banankwe e lyo na Serubabele+ umwana wa kwa Shealtiele+ na bamunyina, balitendeke ukukuula iciipailo ca kwa Lesa wa kwa Israele, pa kuti baletuulilapo amalambo ya koca nga fintu amafunde ya kwa Mose+ umuntu wa kwa Lesa wa cine yalandile.

3 Nangu ca kuti baletiina abantu abali mu fyalo ifyali mupepi,+ balikuulile iciipailo pa ncende apo cali kale, kabili batendeke ukutuulilapo Yehova amalambo ya koca, e kutila amalambo ya koca aya lucelo na ya cungulo.+ 4 Lyena bakwete umutebeto wa nsakwe nga fintu amafunde yalandile.+ Cila bushiku baletuula amalambo ya koca ukulingana ne mpendwa iyo amafunde yalandile ukuti e yo balingile ukutuula cila bushiku.+ 5 Pa numa ya ifi balituulile umutuulo uo baletuula lyonse.+ Batuulile ne mituulo ya pa kutampa kwa mweshi+ e lyo ne mituulo yonse iyo baletuula pa mitebeto ya mushilo+ iya kwa Yehova. Balituulile ne mituulo iyo abantu baitemenwe+ ukupeela Yehova. 6 Ukutendekela pa bushiku bwa kubalilapo ubwa mweshi walenga 7,+ batampile ukutuulila Yehova amalambo ya koca, nangu ca kuti bali tabalapanga umufula we tempele lya kwa Yehova.

7 Bapeele indalama abakuputula amabwe+ na baishibe ifya kupangapanga.+ Bapeele na bena Sidone na bena Turi ifya kulya, ifya kunwa, na mafuta pantu baliletele ifimuti fya mikedari. Batemene ifi ifimuti fya mikedari mu Lebanone, bafipoosa pali bemba e lyo fyaya file-elela mpaka fyayafika ku Yopa,+ nga fintu Imfumu Sailasi iya ku Persia+ yalandile.

8 Mu mwaka walenga bubili ukutula apo baishiile ku ng’anda ya kwa Lesa wa cine ku Yerusalemu, mu mweshi walenga bubili, Serubabele umwana wa kwa Shealtiele, Yeshua umwana wa kwa Yehosadaki na bamunyinabo, bashimapepo, abena Lebi na bantu bonse abaishile ku Yerusalemu ukufuma ku calo uko bali bankole+ balitendeke ukukuula cipya cipya ing’anda ya kwa Lesa. Balisontele abena Lebi abali ne myaka 20 ukuya pa muulu ukuti baleangalila umulimo wa pa ng’anda ya kwa Yehova. 9 E ico Yeshua, abana bakwe na bamunyina, na Kadmiele na bana bakwe, abatuntwike muli Yuda na batuntwike muli Henadadi+ na bana babo na bamunyinabo abena Lebi, balebombela pamo umulimo wa kwangalila abalebomba imilimo pa ng’anda ya kwa Lesa wa cine.

10 Ilyo abalekuula bapangile umufula we tempele lya kwa Yehova,+ bashimapepo bali na mapenga+ ninshi nabafwala ifya kufwala fyabo, kabili abena Lebi abatuntwike muli Asafi bali na malimba. Baliimine balalumbanya Yehova nga fintu Davidi imfumu ya bena Israele alandile.+ 11 Kabili baleankulana+ pa kulumbanya no kutootela Yehova abati, “pantu musuma, ukutemwa uko alanga abena Israele kwa muyayaya.”+ Lyena abantu bonse baikatishe amashiwi pa kulumbanya Yehova pantu balipangile umufula wa ng’anda ya kwa Yehova. 12 Abengi pali bashimapepo, pa bena Lebi na pa ntungulushi sha mayanda ya bashibo, e kutila abakalamba abamweneko ing’anda ya pa kubala,+ balilooseshe ilyo bamwene umufula wa ng’anda, kabili abantu bambi nabo baliweleshe ninshi balesekelela.+ 13 E ico abantu balefilwa ukulekanya iciunda ca kusansamuka ne ca kuloosha pantu abantu balewelesha nga nshi, ica kuti iciunda calefika ukutali sana.

4 Ilyo abalwani ba baYuda na bena Benjamini+ baumfwile ukuti abo basendele mu kuyaba bankole+ balekuulila Yehova Lesa wa bena Israele itempele, 2 ilyo line fye baile kuli Serubabele ne ntungulushi sha mayanda ya bashibo, kabili babebele abati: “Lekeni tumwafweko ukukuula pantu na ifwe bene tupepa* Lesa wenu,+ kabili e o tutuulila amalambo ukutula fye mu nshiku sha kwa Esari-hadone+ imfumu ya ku Asiria, uwatuletele kuno.”+ 3 Lelo Serubabele, Yeshua ne ntungulushi sha mayanda ya bashibo isha bena Israele ba-aswike abati: “Te kuti tubombele pamo na imwe umulimo wa kukuulila Lesa wesu ing’anda,+ pantu nifwe fye tukakuulila Yehova Lesa wa kwa Israele ing’anda nga filya fine Sailasi imfumu ya ku Persia yatwebele.”+

4 Abantu bali mu fyalo fya mupepi balefuupula* abaYuda pa kuti baleke ukukuula.+ 5 Kabili bapeele impanda mano amafisakanwa pa kuti shifulunganye amapange yabo+ aya kukuula ing’anda ya kwa Lesa mu nshiku shonse isha kwa Sailasi imfumu ya ku Persia, ukufika fye na lintu Dariusi+ imfumu ya ku Persia yatendeke ukuteka. 6 Nomba ilyo Ahasuerusi atendeke ukuteka, abalwani babo balilembele kalata umwali ilyashi lya bufi pa baleikala mu Yuda na mu Yerusalemu. 7 Mu nshiku sha kwa Artakishashete* imfumu ya ku Persia, Bishilamu, Mitiridati, Tabeeli na bo aleumfwana nabo balembeele Artakishashete imfumu ya ku Persia kalata, iyi kalata baipilibwilile mu lulimi lwa ciAramaiki+ kabili pa kulemba babomfeshe ifilembo fya ciAramaiki.*

8 * Rehumu umulashi mukalamba uwa buteko na Shimshai kalemba, balembeele Imfumu Artakishashete kalata umo balandile ifyabipa pa baleikala mu Yerusalemu. 9 (Abalembele iyi kalata ni Rehumu umulashi mukalamba uwa buteko, na Shimshai kalemba na bo baleumfwana nabo, e kutila bakapingula, abalashi bambi, bakalemba, abena Ereke,+ abena Babiloni, abaleikala mu Susa,+ e kutila abena Elamu,+ 10 ne nko shimbi isho Asenapari imfumu ya maka kabili iyalumbuka asendele mu kuyaba bankole kabili isho aebele ukuti shileikala mu misumba ya Samaria,+ e lyo na bantu bambi abaleikala mu citungu ca kwi Shilya lya Mumana), nomba 11 aya e mashiwi yali muli kalata batumiine imfumu:

“Fwe babomfi benu aba kwi Shilya lya Mumana, twalembela imwe mwe Mfumu Artakishashete: 12 Mwe mfumu tulefwaya ukumwishibisha ukuti abaYuda abafuma kuli imwe balifika mu Yerusalemu, kabili balekuula umusumba cipya cipya. Abantu ba muli uyu musumba babi icine cine kabili ni bacipondoka. Balekuula amalinga cipya cipya,+ balewamya ne mifula ya kukuulapo. 13 Nomba mwe mfumu ishibeni ukuti nga bapwisha ukukuula cipya cipya uyu musumba na malinga ya uko, tabakalelipila umusonko, tabakaletuula umutuulo+ kabili tabakalesangula umusangulo. Ici cikalenga ifyuma fya mfumu fikacepe. 14 Apo tulya umucele wa kwi sano* te kuti tutemwe ifyabipa fyacitikila imfumu, e co twatumina na ino kalata pa kuti mwe mfumu mwishibe, 15 kabili mufwailishe mwi buuku lya kale umwaba ilyashi lya fikolwe fyenu.+ Nga mwafwailisha muli ili ibuuku mwalasanga ukuti abantu abekala muli uyu musumba ni bacipondoka kabili balalenga ifintu fyabipila imfumu na bantu ba mu fitungu. Ukufuma fye na kale abantu ba muli uyu musumba balalenga abantu baimina imfumu. E calengele uyu musumba baonaule.+ 16 Mwe mfumu tulefwaya mwishibe ukuti nga mwaleka aba bantu bapwisha ukukuula cipya cipya umusumba na malinga ya uko, tamwakakwatepo amaka pa citungu ca kwi Shilya lya Mumana.”+

17 Imfumu yatumiine Rehumu umulashi mukalamba uwa buteko kalata, e lyo na Shimshai kalemba na bantu bonse abo aleumfwana nabo abaleikala mu Samaria na baleikala mu citungu ca kwi Shilya lya Mumana. Yabalembeele aiti:

“Mwapoleni! 18 nabambelengela* kalata iyo mwatulembeele. 19 Nalyebele ababomfi bandi ukuti bafwailishe kabili basangile ukuti ukufuma fye na kale abantu ba muli uyu musumba balemina imfumu, kabili ni bacipondoka.+ 20 Mu Yerusalemu mwali imfumu sha maka ishaleteka icitungu conse ica kwi Shilya lya Mumana, kabili baleshipeela umusonko, umutuulo ne misangulo. 21 E ico ebeni aba bantu ukuti baleke ukukuula, tabafwile ukukuula uyu musumba mpaka nkabebe ukuti batendeke ukukuula. 22 E ico mubikeko sana amano ku fyo namweba pa kuti aba bantu betwalilila ukulenga ifintu fibipile mfumu.”+

23 Nomba ilyo Rehumu, Shimshai kalemba na bo baleumfwana nabo, bababelengeele kalata iyo imfumu Artakishashete yatumine, ilyo line fye baile ku baYuda abaleikala mu Yerusalemu no kubapatikisha ukuti baleke ukukuula. 24 E ico pali ilya nshita balilekele ukukuula ing’anda ya kwa Lesa iyali mu Yerusalemu, ukufika na mu mwaka walenga bubili ukutula apo Dariusi imfumu ya ku Persia+ yatendekeele ukuteka.

5 Lyena kasesema Hagai+ na kasesema Sekaria+ umwishikulu wa kwa Ido,+ baseseme ku baYuda abaleikala mu Yuda na mu Yerusalemu, mwi shina lya kwa Lesa wa bena Israele uwali nabo. 2 Pali ilya nshita Serubabele+ umwana wa kwa Shealtiele na Yeshua+ umwana wa kwa Yehosadaki, batendeke ukukuula cipya cipya ing’anda ya kwa Lesa+ iyali mu Yerusalemu. Kabili bashimapepo ba kwa Lesa bali nabo, kabili balebatungilila.+ 3 Lyena Tatinai umulashi wa kwi Shilya lya Mumana,* Shetari-bosenai na bo baleumfwana nabo baishile kuli bena kabili babepwishe abati: “Nani wamusuminishe ukukuula iyi ng’anda no kupwisha ici cikuulwa?”* 4 Babepwishe no kuti: “Ni bani abaleangalila abalekuula ici cikuulwa?” 5 Lelo Lesa ali na* bakalamba ba baYuda.+ E ico Tatinai na baume bambi tababakeenye ukukuula, lelo batalile batuma kalata kuli Dariusi e lyo balalolela ukuti abebe ifyo balingile ukucita.

6 Iyi e kalata iyo Tatinai intungulushi ya ku citungu ca kwi Shilya lya Mumana na Shetari-bosenai ne ntungulushi shimbi isho aleumfwana nasho ishali ku citungu ca kwi Shilya lya Mumana, batumiine Imfumu Dariusi. 7 Aya e mashiwi balembele muli kalata:

“Ku Mfumu Dariusi:

“Umutende ube na imwe! 8 Tulefwaya mwe mfumu mwishibe ukuti, twaliya ku ng’anda ya kwa Lesa mukulu iyaba mu citungu ca Yuda. Abantu balekuula iyi ng’anda na mabwe ayakalamba, kabili balebika imbao mu fibumba. Abalebomba uyu mulimo bali abacincila kabili pa mulandu ne fyo balebombesha uyu mulimo uleilako fye pa ntanshi. 9 Lyena twaipwishe abakalamba ba baYuda ukuti: ‘Nani wamusuminishe ukukuula iyi ng’anda no kupwisha ici cikuulwa?’*+ 10 Twalibepwishe na mashina yabo pa kuti tulembe amashina ya baume abaleangalila uyu umulimo pa kuti mubeshibe.

11 “Batwaswike abati: ‘Tuli babomfi ba kwa Lesa wa mu muulu na pano isonde, kabili tulekuula cipya cipya ing’anda ya kwa Lesa iyo imfumu ya bena Israele iya lulumbi yakuulile kale.+ 12 Nomba apo ifikolwe fyesu fyalikalifye Lesa wa mu muulu,+ Lesa alengele Nebukadnesari+ imfumu ya ku Babiloni umwina Kaldi, abacimfya. Iyi mfumu yaonawile na ino ing’anda,+ yasenda na bantu mu kuyaba bankole ku Babiloni.+ 13 Na lyo line mu mwaka Imfumu Sailasi iya ku Babiloni yatendeke ukuteka, yalifumishe icipope ca kuti bakuule iyi ng’anda ya kwa Lesa cipya cipya.+ 14 Na kabili Imfumu Sailasi yalifumishe ifipe fya golde ne fya silfere ifyali mwi tempele lya mu Babiloni kabili yapeele ifi fipe Sheshebasari*+ uo yasontele ukuba umulashi.+ Ifi fipe, fipe fya mu ng’anda ya kwa Lesa ifyo Nebukadnesari afumishe mwi tempele ilyali mu Yerusalemu, afitwala mwi tempele lya ku Babiloni.+ 15 Sailasi aebele Sheshebasari ati: “Senda ifi fipe uleya ku Yerusalemu pa kuti ufibwekeshemo kwi tempele ilyo abantu bakakuula cipya cipya pa cifulo apo lyali kale.”+ 16 Lyena Sheshebasari alishile, kabili apangile umufula wa kukuulapo ing’anda ya kwa Lesa+ iyaba mu Yerusalemu. Abantu balakuula iyi ng’anda ukufika na lelo, nomba tabalapwisha.’+

17 “Nomba nga mwamona ukuti cili fye bwino mwe mfumu, lekeni bafwailikishe mu Babiloni mu cifulo umo imfumu isungila ifyuma ne fyalembwa, pa kuti twishibe nga ca kuti Imfumu Sailasi yalifumishe icipope ca kukuula cipya cipya ing’anda ya kwa Lesa mu Yerusalemu,+ kabili lekeni imfumu itwebe ifyo yalapingula.”

6 Pali ilya nshita Imfumu Dariusi yalifumishe icipope, kabili balifwailishe mu ng’anda umo balesungila ifyalembwa ne fintu fimbi ifyacindama mu Babiloni. 2 Kabili basangile icimfungwa mu cifulo icakwete ifibumba ifyo bakoseshe sana mu musumba wa Ekibatana, uwali mu citungu ca Madai, kabili aya e mashiwi balembele muli ici icimfungwa:

3 “Mu mwaka Imfumu Sailasi yatendeke ukuteka, yalifumishe icipope icakumine ing’anda ya kwa Lesa iyali mu Yerusalemu.+ Yalandile aiti: Lekeni abantu bakuule cipya cipya ing’anda pa kuti baletuulilapo amalambo, kabili bakoshe umufula wa iyi ng’anda. Ifwile ukusansama imikono 60,*+ kabili mu bwipi namo ifwile ukuba imikono 60. 4 Mukakuule ifibumba ne mitande itatu iya mabwe ayakalamba e lyo no mutande umo uwa mbao;+ kabili indalama mukalabomfya pa kukuula mukafumye mu cipao ca ng’anda ya mfumu.+ 5 Na kabili ifipe fya golde ne fya silfere ifya mu ng’anda ya kwa Lesa ifyo Nebukadnesari afumishe mwi tempele ilyali mu Yerusalemu kabili ifyo atwele ku Babiloni,+ mukafibweseshe ku Yerusalemu kabili mukafibike mulya mwine fyali mu ng’anda ya kwa Lesa+ iyaba mu Yerusalemu.

6 “Nomba iwe Tatinai we ntungulushi ya ku citungu ca kwi Shilya lya Mumana* na Shetari-bosenai ne ntungulushi shimbi isha ku citungu ca kwi Shilya lya Mumana,+ mwilapumfyanya abaYuda. 7 Mwilafulunganya abantu abalekuula ing’anda ya kwa Lesa. Umulashi wa baYuda na bakalamba ba baYuda bakakuula cipya cipya ing’anda ya kwa Lesa palya pene yali kale. 8 Na kabili nimfumya icipope pa fyo mukalapeela abakalamba ba baYuda pa kuti bakakuule cipya cipya ing’anda ya kwa Lesa: Mukalebapeela indalama ukufuma mu cipao ca mfumu,+ e kutila umusonko uo mukalapoka ku citungu ca kwi Shilya lya Mumana. Mukalebapeela bwangu ishi indalama pa kuti bakatwalilile ukukuula.+ 9 Kabili cila bushiku mukalepeela bashimapepo aba mu Yerusalemu fyonse ifyo balanda ukuti e fyo balekabila. Mukalebapeela abana ba ng’ombe abalume,+ impaanga ishilume+ e lyo no twana twa mpaanga+ ifya kutuulila Lesa wa mu muulu amalambo ya koca. Mukalebapeela ne ngano,+ umucele,+ umwangashi+ na mafuta,+ 10 pa kuti bakatwalilile ukutuula amalambo ayakalalenga Lesa wa mu muulu akalesekelela, kabili bakalepepelako imfumu na bana ba iko+ ukuti bale-enda umutende. 11 Nimfumya ne cipope ca kuti, onse uushakakonke ifi nalanda bakafumye umwalo ku ng’anda yakwe bakamupoopelepo, kabili bakasangule ing’anda yakwe icimbusu* ca cintubwingi. 12 Kabili Lesa uwalenga ishina lyakwe libe pali cilya cifulo+ akalofye imfumu yonse na bantu bonse abashakakonke ici icipope kabili abakafwaya ukonaula ing’anda ya kwa Lesa iyaba mu Yerusalemu. Ine, ne Dariusi nimfumya ici icipope. Mufwile ukucikonka nomba line.”

13 Lyena Tatinai umulashi wa ku citungu ca kwi Shilya lya Mumana, Shetari-bosenai+ na bo baleumfwana nabo bwangu bwangu balicitile fyonse ifyo Imfumu Dariusi yalandile. 14 Intungulushi sha baYuda shalitwalilile ukukuula,+ kabili umulimo waleilako fye pa ntanshi pantu ifyo kasesema Hagai+ ne fyo Sekaria+ umwishikulu wa kwa Ido baseseme fyalikoseleshe ishi intungulushi. Balipwishishe ukukuula ing’anda ya kwa Lesa nga fintu Lesa wa bena Israele+ abebele kabili nga fintu Sailasi,+ Dariusi+ ne Mfumu Artakishashete+ iya ku Persia balandile. 15 Bapwishishe ukukuula ing’anda pa bushiku bwalenga butatu mu mweshi wa Adari,* mu mwaka walenga 6 ukutula apo Imfumu Dariusi yatendekeele ukuteka.

16 Lyena abena Israele, bashimapepo, abena Lebi+ na bantu bonse abafumine ku calo uko bali bankole bapeele iyi ng’anda kuli Lesa ninshi balesekelela. 17 Pa kupeela iyi ng’anda kuli Lesa batuulile ing’ombe ishilume 100, impaanga ishilume 200, impaanga ishana ishilume 400 ne mbushi ishilume 12, isha mutuulo wa pa lubembu uwa bena Israele bonse. Ishi mbushi shalingene ne mpendwa ya mikowa ya bena Israele.+ 18 Babikile bashimapepo mu mabumba yabo na bena Lebi mu mabumba yabo, pa kuti balebomba umulimo wa kwa Lesa mu Yerusalemu,+ ukulingana ne fyalembelwe mwi buuku lya kwa Mose.+

19 Kabili abafumine ku calo uko bali bankole bakwete Icakucilila pa bushiku bwalenga 14 mu mweshi wa kubalilapo.+ 20 Bashimapepo na bena Lebi bonse bali-isangulwile,+ takwali nangu umo uushaisangulwile. Kabili baipaile bonse abafumine ku calo uko bali bankole, bashimapepo banabo e lyo na bene ilambo lya pa Cakucilila. 21 Lyena abena Israele abafumine ku calo uko bali bankole baliliile Icakucilila. Baliliile pamo na bonse abashalecitako ifyakowela ifyo abantu ba muli cilya calo balecita. Tabalecita ifyakowela pa kuti balepepa* Yehova Lesa wa kwa Israele.+ 22 Kabili balisekelele ilyo bakwete Umutebeto wa Mukate Uushatutumuka+ pa nshiku 7 pantu Yehova alengele basansamuka, kabili alengele ne mfumu ya ku Asiria ibatemwe+ ica kuti yalibafwile* ilyo balekuula ing’anda ya kwa Lesa wa cine, Lesa wa kwa Israele.

7 Ilyo papitile inshita, ninshi Artakishashete+ Imfumu ya Persia acili aleteka, Esra*+ alibwelele. Esra ali mwana wa kwa Seraya,+ umwana wa kwa Asaria, umwana wa kwa Hilkia+ 2 umwana wa kwa Shalumu, umwana wa kwa Sadoke, umwana wa kwa Ahitubu 3 umwana wa kwa Amaria, umwana wa kwa Asaria,+ umwana wa kwa Merayote 4 umwana wa kwa Serahia, umwana wa kwa Usi, umwana wa kwa Buki, 5 umwana wa kwa Abishua, umwana wa kwa Finehasi,+ umwana wa kwa Eleasari,+ umwana wa kwa Aarone+ shimapepo mukalamba. 6 Uyu Esra afumine ku Babiloni. Alekopolola amalembo* kabili alishibe sana* Amafunde ya kwa Mose+ ayo Yehova Lesa wa kwa Israele abapeele. Imfumu yalimupeele fyonse ifyo alombele pantu Yehova Lesa wakwe ali nankwe.

7 Abena Israele bamo, bashimapepo, abena Lebi,+ bakemba,+ abalelinda impongolo+ na balebombela pe tempele*+ baile ku Yerusalemu mu mwaka walenga 7 ukutula apo Imfumu Artakishashete yatendekeele ukuteka. 8 Kabili Esra aishile ku Yerusalemu mu mweshi walenga 5, mu mwaka walenga 7 ukutula apo Artakishashete atendekeele ukuteka. 9 Esra aimine ubulendo ukufuma ku Babiloni pa bushiku bwa kubalilapo mu mweshi wa kubalilapo kabili afikile ku Yerusalemu pa bushiku bwa kubalilapo mu mweshi walenga 5, pantu Lesa wakwe uwa cikuuku ali nankwe.+ 10 Esra aliteyenye umutima wakwe* pa kuti eshibe amafunde ya kwa Yehova no kulayakonka+ e lyo no kulasambilisha abantu mu Israele amafunde no bupingushi.+

11 Aya e mashiwi yali muli kalata iyo Imfumu Artakishashete yapeele Esra shimapepo uwaishibe sana ukukopolola amalembo,* kabili uwaishibe sana* amafunde ayo Yehova apeele abena Israele:

12 * “Artakishashete+ imfumu ya shamfumu, kuli Esra shimapepo, uukopolola* amafunde ya kwa Lesa wa mu muulu: Umutende ube na iwe. E ico nomba 13 nimfumya icipope ca kuti, abena Israele bonse abekala mu calo candi, bashimapepo na bena Lebi abalefwaya ukuya na iwe ku Yerusalemu kuti baya.+ 14 Pantu ine ne mfumu ne mpanda mano shandi 7 natukutuma ukuti uye ufwailishe nga ca kuti abekala mu Yuda na mu Yerusalemu balakonka amafunde ya kwa Lesa obe ayo uli nayo,* 15 kabili utwale silfere na golde ifyo ine ne mfumu ne mpanda mano shandi tuitemenwe ukupeela Lesa wa kwa Israele, uwikala mu Yerusalemu. 16 Utwale na silfere yonse na golde iyo aba mu citungu conse ica Babiloni bakupeele, e lyo no musangulo uo bashimapepo na bantu baitemenwe ukusangula uwa kubomfya pa ng’anda ya kwa Lesa wabo iyaba mu Yerusalemu.+ 17 Kabili muli ishi ndalama wangufyanye ukushitamo ing’ombe ishilume,+ impaanga ishilume,+ impaanga ishana ishilume+ na fyonse ifya kubomfya pa kutuula umutuulo wa ngano+ no wa mwangashi+ uwa kutuulila pamo ne shi inama, kabili ukafituule pa ciipailo pa ng’anda ya kwa Lesa obe iyaba mu Yerusalemu.

18 “Iwe na bashimapepo banobe, mukabomfye silfere na golde iikashalapo ku mulimo onse uo mukatemwa uukalingana no kufwaya kwa kwa Lesa wenu. 19 Kabili ifipe fyonse ifyo bakupeele ifya kubomfya pa ng’anda ya kwa Lesa obe, ukafibike pa cinso ca kwa Lesa mu Yerusalemu.+ 20 Kabili ifintu fimbi ifilekabilwa pa ng’anda ya kwa Lesa obe ifyo ulingile ukupeela, ukafishite ukubomfya ifyuma fya mu cipao ca ng’anda ya mfumu.+

21 “Ine ne mfumu Artakishashete, ninjeba bonse abasunga ifyuma aba ku citungu ca kwi Shilya lya Mumana* ukuti conse ico Esra+ shimapepo, uukopolola* amafunde ya kwa Lesa wa mu muulu amulomba, mukangufyanye ukumupeela. 22 Mukamupeele amatalanti* ya silfere ukufika kuli 100, amadalamu* ya ngano ukufika kuli 100, imitondo* ya mwangashi+ ukufika kuli 100, imitondo ya mafuta+ ukufika kuli 100, no mucele+ uwingi nga nshi. 23 Mukabe aba cishinka pa kucita fyonse ifyo Lesa wa mu muulu+ akamweba ukucita ifikumine ing’anda yakwe, pa kuti ekafulilwa abantu abekala mu calo ico imfumu iteka na bana ba iko.+ 24 Kabili mwishibe no kuti bashimapepo bonse na bena Lebi, bakemba,+ abalonda pa mwinshi, ababombela pe tempele,*+ na babomfi bambi aba pa ng’anda ya kwa Lesa, tamulingile ukubalipilisha umusonko, nelyo ukubeba ukutuula umutuulo+ nangu umusangulo.

25 “Kabili iwe we Esra, ukulingana na mano ayo Lesa obe akupeela,* usonte bashicilye na bakapingula pa kuti balepingula abantu bonse abekala ku citungu ca kwi Shilya lya Mumana, abantu bonse abaishiba amafunde ya kwa Lesa obe, kabili abashaishiba amafunde ya kwa Lesa+ mukabasambilishe. 26 Kabili umuntu onse uushakulakonka Amafunde ya kwa Lesa obe na mafunde ya mfumu, mukamupingule ilyo line, nampo nga kumwipaya, kumutamfya mu calo, kumulipilisha indalama nelyo kumukaka.”

27 Acindikwe Yehova Lesa wa fikolwe fyesu, uwalengele ukuti imfumu ifwaye ukuyemfya ing’anda ya kwa Yehova iyaba mu Yerusalemu!+ 28 Kabili alinangile ukutemwa ukushipwa ilyo alengele imfumu,+ impanda mano sha iko+ na bacilolo ba iko bonse aba maka babe ne cikuuku kuli ine. E ico nalishipile* pantu Yehova Lesa wandi ali na ine, kabili pa bena Israele nalisalilepo intungulushi shimo pa kuti shiye na ine ku Yerusalemu.

8 Nomba ishi e ntungulushi sha ba mu mayanda ya bashibo ishafumine na ine ku Babiloni ilyo Imfumu Artakishashete+ yaleteka. Kabili ifi e fyo bashilembele ukulingana ne ndupwa umo shatuntwike: 2 Pa bana ba kwa Finehasi,+ ni Gershomu; pa bana ba kwa Itamari,+ ni Daniele; pa bana ba kwa Davidi, ni Hatushi; 3 pa bana ba kwa Shekania na pa bana ba kwa Paroshe, ni Sekaria, kabili abaume abo balembele abo ali nabo bali 150; 4 pa bana ba kwa Pehati-moabu,+ ni Elihoenai umwana wa kwa Serahia, kabili abaume abo ali nabo bali 200; 5 pa bana ba kwa Satu,+ ni Shekania umwana wa kwa Yahasiele, kabili abaume abo ali nabo bali 300; 6 pa bana ba kwa Adini,+ ni Ebede umwana wa kwa Yonatani, kabili abaume abo ali nabo bali 50; 7 pa bana ba kwa Elamu,+ ni Yeshaya umwana wa kwa Atalia, kabili abaume abo ali nabo bali 70; 8 pa bana ba kwa Shefatia,+ ni Sebadia umwana wa kwa Mikaele, kabili abaume abo ali nabo bali 80; 9 pa bana ba kwa Yoabu ni Obadia umwana wa kwa Yehiele, kabili abaume abo ali nabo bali 218; 10 pa bana ba kwa Bani, ni Shelomiti umwana wa kwa Yosifia, kabili abaume abo ali nabo bali 160; 11 pa bana ba kwa Bebai,+ ni Sekaria umwana wa kwa Bebai, kabili abaume abo ali nabo bali 28; 12 pa bana ba kwa Asigadi,+ ni Yohanani umwana wa kwa Hakatani, kabili abaume abo ali nabo bali 110; 13 pa bana ba kwa Adonikamu,+ abalekelesheko ukubwela ni aba: Elifelete, Yeiele na Shemaya, kabili abaume abo bali nabo bali 60; 14 e lyo pa bana ba kwa Bigibai,+ ni Utai na Sabudi, kabili abaume abo bali nabo bali 70.

15 Naebele abantu ukuti balongane mu lulamba lwa mumana uwaya ku Ahaba,+ kabili kulya e ko twapangile inkambi kabili twaikeleko inshiku shitatu. Nomba ilyo naceeceetele abantu na bashimapepo, nasangile ukuti abena Lebi tabalipo. 16 E ico natumine aba kuyaita Eliesere, Ariele, Shemaya, Elnatani, Yaribu, Elnatani, Natani, Sekaria na Meshulamu abali intungulushi, e lyo na Yoyaribu na Elnatani, abali bakasambilisha. 17 Lyena nabakonkomeshe ukuti baye kuli Ido intungulushi ya mu Kasifia. Nabebele ukuti baye-eba Ido na bamunyina abatuntwike mu balebombela pe tempele* abali mu Kasifia, ukuti batuletele aba kubombela pa ng’anda ya kwa Lesa wesu. 18 Apo Lesa wesu ali na ifwe, batuleteele Sherebia+ umwaume uwaleiluka, umo pa bana ba kwa Maali+ umwishikulu wa kwa Lebi umwana wa kwa Israele. Batuleteele na bana bakwe abaume na bamunyina, kabili bonse pamo bali 18. 19 Baletele na Hashabia e lyo na Yeshaya abali abena Merari,+ na bamunyinabo na bana babo, bonse pamo bali 20. 20 Batumine na balebombela pe tempele* 220, kabili balilembele amashina yabo. Aba batuntwike mu balebombela pe tempele abo Davidi na bacilolo basontele ukuti baleafwilisha abena Lebi.

21 Lyena ilyo twali mu lulamba lwa mumana uwaya ku Ahaba, naebele abantu ukuti tufunge pa kuti tuicefye kuli Lesa wesu, kabili tumupaapaate ukuti akatutungulule ilyo tukalabwelelamo ku Yerusalemu kabili akatucingilile na bana besu ne fipe fyesu fyonse. 22 Nalyumfwile insoni sha kulomba ukuti imfumu itupeele abashilika na bale-endela pali bakabalwe aba kutucingilila ku balwani mu nshila, pantu twaebele imfumu atuti: “Lesa wesu uwaba ne cikuuku alafwa bonse abamufwaya,+ lelo amaka yakwe no bukali bwakwe fiisa pali bonse abamukaana.”+ 23 E ico twalifungile kabili twapaapeete Lesa wesu ukuti atutungulule ilyo twakulaya, na o alyumfwile ukupaapaata kwesu.+

24 Kabili nasalile intungulushi sha bashimapepo 12, e kutila Sherebia, Hashabia,+ na bamunyinabo 10. 25 Lyena nalipimine silfere, golde ne fipe e lyo nabapeela. Ifi fyali musangulo uo imfumu, bampanda mano ba iko, bacilolo ba iko na bena Israele bonse abali muli cilya citungu basangwile uwa kubomfya ku mulimo wa pa ng’anda ya kwa Lesa wesu.+ 26 Ilyo napwishishe ukupima nabapeele amatalanti* ya silfere 650, ifipe fya silfere 100 ifyafinine amatalanti yabili, amatalanti ya golde 100, 27 imbale shafonka ishinono isha golde 20 ishafinine badariki* 1,000, ne fipe fibili ifya mukuba uusuma uwalemoneka uwakashika, ifyali ifisuma sana nga golde.

28 Lyena nabebele nati: “Muli ba mushilo kuli Yehova,+ ne fipe ifi na fyo fya mushilo, kabili silfere na golde mutuulo wa kuitemenwa uwa kwa Yehova Lesa wa fikolwe fyenu. 29 Mulefisunga bwino mpaka mukafipime mu miputule* ya mu ng’anda ya kwa Yehova, ninshi intungulushi sha bashimapepo, abena Lebi na bacilolo ba ndupwa sha bena Israele mu Yerusalemu+ balemonako.” 30 Kabili bashimapepo na bena Lebi basendele silfere, golde ne fipe ifyo bapimine pa kuti bafitwale ku Yerusalemu ku ng’anda ya kwa Lesa wesu.

31 Pa bushiku bwalenga 12 ubwa mweshi wa kubalilapo,+ twafumine mu lulamba lwa mumana uwaya ku Ahaba+ e lyo twatendeka ukuya ku Yerusalemu, kabili Lesa ali na ifwe, alitupuswishe ku balwani na ku batubelamine mu nshila. 32 E ico twalifikile ku Yerusalemu+ kabili twatuushishe inshiku shitatu. 33 Kabili pa bushiku bwalenga 4 twapimine silfere, golde ne fipe mu ng’anda ya kwa Lesa wesu,+ lyena twapeele Mereemote+ umwana wa kwa Uriya shimapepo. Mereemote ali pamo na Eleasari umwana wa kwa Finehasi na bena Lebi, e kutila Yosabadi+ umwana wa kwa Yeshua na Noadia umwana wa kwa Binui.+ 34 Balipendele fyonse no kufipima, kabili balilembele ifyo fyafinine. 35 Abafumine ku calo uko bali bankole batuuliile Lesa wa kwa Israele amalambo ya koca. Batuuliileko na bena Israele bonse ing’ombe ishilume 12,+ kabili batuulile impaanga ishilume 96,+ impaanga ishana ishilume 77 ne mbushi ishilume 12+ isha mutuulo wa pa lubembu. Ishi nama shonse shali mutuulo wa koca uwa kwa Yehova.+

36 Lyena twapeele intungulushi shikalamba isha fitungu e lyo ne ntungulushi shimbi isha fitungu isha kwi Shilya lya Mumana*+ apo balembele ifipope fya mfumu.+ Ishi intungulushi shalyafwile abantu kabili shalisangwile ifya kubomfya pa kukuula ing’anda ya kwa Lesa wa cine.+

9 Kabili ilyo twapwishishe ukucita ifi fyonse, bacilolo baishile kuli ine e lyo banjeba abati: “Abena Israele, bashimapepo na bena Lebi tabaipaatula ku bantu ba muli ifi fyalo kabili balacitako ifya bunani+ ifyo abena Kanaani, abena Hiti, abena Perisi, abena Yebusi, abena Amone, abena Moabu, abena Egupti+ na bena Amore+ bacita. 2 Bena na bana babo abaume balyupa abena fyalo.+ Aba bantu* ba mushilo+ balisaakana na bantu ba muli ifi fyalo,+ kabili intungulushi ne nkonkani sha ntungulushi e baba pa ntanshi mu kucita ulu lubembu.”

3 Nomba ilyo fye naumfwile ifi, nalepwile ica kufwala candi ne ca kufwala candi icabula amaboko. Nanukwile no mushishi wandi umo no mwefu wandi, kabili naikele panshi ninshi nimpelenganishiwa. 4 Lyena bonse abatiinine ifyo Lesa wa kwa Israele alandile, baishilenshinguluka ninshi ninjikala pantu balyumfwile ububi pa mulandu wa lubembu ulo abafumine ku calo uko bali bankole bacitile. Naikele fye panshi ninshi nimpelenganishiwa mpaka inshita ya kutuula umutuulo wa ngano uwa cungulo yafika.+

5 Ilyo inshita ya kutuula umutuulo wa ngano uwa cungulo+ yafikile, naliimine apo naikele ninshi ndi no bulanda kabili ninshi nindepula ica kufwala candi ne ca kufwala candi icabula amaboko. Nalifukeme naimisha na maboko kuli Yehova Lesa wandi. 6 Kabili nalandile nati: “Mwe Lesa wandi ning’umfwa insoni kabili ninseebana, ica kuti nimfilwa no kwinuna icinso candi kuli imwe mwe Lesa wandi, pantu imembu shesu nashifula icine cine, kabili natucita ifyabipa ifingi ica kuti nafifika na ku muulu.+ 7 Ukufuma mu nshiku sha fikolwe fyesu ukufika na lelo, twaliba no mulandu uukalamba;+ kabili pa mulandu wa membu shesu, ifwe, imfumu shesu na bashimapepo balitwipaya ku lupanga,+ balitusenda mu kuba bankole,+ balitupoka ifipe+ kabili balituseebanya ku mfumu sha muli ici calo nga fintu cili lelo.+ 8 E ico nomba pa nshita iinono, mwe Yehova Lesa wesu, namutupaala pantu namulenga abashalapo bapusuke, kabili namutucingilila* mu cifulo cenu ica mushilo+ pa kuti amenso yesu yabengeshime pa mulandu ne nsansa, mwe Lesa wesu, kabili namutulubulako panono ku busha. 9 Pantu nangu ca kuti tuli basha,+ Lesa wesu tatulekelesha, lelo alitulanga ukutemwa kwakwe ukushipwa pantu alilenga imfumu sha ku Persia+ shaba ne cikuuku kuli ifwe, pa kuti tuyekuula cipya cipya ing’anda ya kwa Lesa+ iyaonaika na pa kuti atucingilile* mu Yuda na mu Yerusalemu.

10 “E ico nomba finshi twingalanda mwe Lesa wesu, apo ifi fintu fyalicitika? Pantu twalileka ukukonka amafunde yenu, 11 ayo mwatupeele ukupitila mu babomfi benu bakasesema amuti, ‘Icalo ico muleya mukupoka calikowela pa mulandu wa kuti abantu bekala muli ici calo balikowela pantu balacita ifya bunani. Balilenga icalo conse cakowela.+ 12 E ico nomba mwikoofya abana benu ku bana babo nelyo ukuleka abana benu bakoope abana babo,+ kabili mwikacita nangu cimo icikalenga bakabe no mutende nelyo icikalenga ifintu fikabawamine.+ Nga mwakonka ifi namweba mukalya ifya kulya ifisuma ifya muli ici calo kabili mukapoka ici calo pa kuti abana benu bakacipyane umuyayaya.’ 13 Apo ifi fyonse fyalitucitikila pa mulandu wa fyabipa ifyo twacita kabili twaliba no mulandu uukalamba, kabili apo imwe mwe Lesa wesu tamwatukanda ukulingana ne membu shesu+ kabili mwalitupususha,+ 14 bushe tufwile ukuleka ukukonka amafunde yenu na kabili no kulaufishanya* na bantu abacita ifya bunani?+ Kuti mwatufulilwa nga nshi no kutulofya ica kuti te kuti pashale umuntu nangu umo. 15 Mwe Yehova Lesa wa kwa Israele, mwalilungama+ pantu ifwe bamo twalipusuka kabili e po tuli ukufika na buno bushiku. Nomba tuli pa cinso cenu fwe babembu, nangu ca kuti tatulingile ukwiminina pa ntanshi yenu pa mulandu wa filubo twacita.”+

10 Ilyo Esra alepepa+ ninshi aleyebelela imembu, kabili alelila ninshi nalaala ubukupeme pa ntanshi ya ng’anda ya kwa Lesa wa cine, ibumba ilikalamba ilya bena Israele lyalishilemushinguluka. Muli ili ibumba mwali abaume, abanakashi na bana, kabili aba abena Israele balelila nga nshi. 2 Lyena Shekania umwana wa kwa Yehiele+ uwatuntwike muli Elamu+ aebele Esra ati: “Twalibembukila Lesa wesu pantu twaupa* abanakashi ba mu fyalo fimbi.+ Na lyo line abena Israele balikwata isubilo lya kuti Lesa akaba nabo. 3 E ico nomba natupangane icipangano na Lesa wesu+ ica kuti tutamfye abakashi besu bonse na bana twafyalamo nga fintu Yehova alandile, e lyo ne fyo abakonka* amafunde ya kwa Lesa wesu+ balandile. Natucite ifyo amafunde yalanda. 4 Ima, pantu mulimo obe ukweba abantu ifya kucita, kabili tulekutungilila. Shipa kabili citapo cimo.”

5 E ico Esra alimine kabili aebele intungulushi sha bashimapepo, abena Lebi na bena Israele bonse ukuti balape umulapo wa kuti balacita fyonse ifyo Shekania alandile.+ E ico balilapile. 6 Nomba Esra alifumine pa ntanshi ya ng’anda ya kwa Lesa wa cine, aya mu muputule* wa kwa Yehohanani umwana wa kwa Eliashibu. Nangu aile muli uyu muputule, taliile ifya kulya nelyo ukunwa amenshi, pantu aleloosha pa mulandu wa kuti abantu abafumine ku calo uko bali bankole tabali aba cishinka kuli Lesa wesu.+

7 Lyena babilile imbila mu Yuda na mu Yerusalemu monse iya kuti bonse abali bankole balongane mu Yerusalemu; 8 kabili nga fintu bacilolo na bakalamba bapingwile, onse uushali no kuyako mu nshiku shitatu bali no kumupoka ifipe kabili bali no kumutamfya mu lukuta lwa bali bankole.+ 9 E ico abaume bonse aba mu mukowa wa kwa Yuda no wa kwa Benjamini balilongene ku Yerusalemu mu nshiku shitatu, e kutila pa bushiku bwalenga 20 ubwa mweshi walenga 9. Abantu bonse baikele mu lubansa lwa ng’anda ya kwa Lesa wa cine, ninshi baletutuma ku mwenso pa mulandu wa fyo bali no kulandapo na pa mulandu wa kuti kwali imfula iikalamba.

10 Lyena Esra shimapepo alimine kabili abebele ati: “Tamwaba aba cishinka kuli Lesa pantu mwalyupa abanakashi aba mu fyalo fimbi,+ e ico namulenga umulandu abena Israele bakwata wakulilako. 11 E ico nomba yebeleleni kuli Yehova Lesa wa fikolwe fyenu kabili mucite ifyo alefwaya. Muipaatuleko ku bantu ba muli ici calo kabili mutamfye abanakashi ba mu fyalo fimbi abo mwaupa.”+ 12 E lyo ulukuta lonse lwa-aswike mwi shiwi ilikalamba aluti: “Twalacita fyonse ifyo mwalanda. 13 Nomba fwe babembuka tuli bengi, kabili ni nshita ya mainsa. Te kuti tutwalilile ukwiminina panse kabili te kuti tulanshanye ili lyashi mu bushiku bumo nelyo shibili pantu twalibembuka nga nshi. 14 E ico lekeni bacilolo besu bashale kuno kabili balandileko ulukuta lonse.+ Bonse aba mu misumba yesu abaupa abanakashi aba mu fyalo fimbi, bakaleisa kuno pa nshita iyo bakalabeba ukulaisa. Bakaleisa pamo ne ntungulushi sha musumba umo na umo na bakapingula, mpaka Lesa wesu akabweshemo ubukali bwakwe ububilima ngo mulilo.”

15 Lelo Yonatani umwana wa kwa Asaele na Yaaseya umwana wa kwa Tikba balikeene ukucita ifyo balandile, kabili Meshulamu na Shabetai+ abena Lebi bali ku lubali lwabo. 16 Lelo abali bankole bena balicitile ifyo basuminishenye kabili Esra shimapepo ne ntungulushi sha mayanda ya bashibo, bonse abo balembele amashina yabo, balikumene pa bushiku bwa kubalilapo ubwa mweshi uwalenga 10 pa kuti balande pali ili lyashi. 17 Kabili pa bushiku bwa kubalilapo ubwa mweshi wa kubalilapo balipwishishe ukufwailisha no kupingula abaume bonse abaupile abanakashi ba mu fyalo fimbi. 18 Kabili basangile ukuti abana bamo aba bashimapepo baupile abanakashi ba mu fyalo fimbi;+ pa bana ba kwa Yeshua+ umwana wa kwa Yehosadaki na bamunyina, abaupile abanakashi ba mu fyalo fimbi ni Maaseya, Eliesere, Yaribu na Gedalia. 19 Lelo balilaile ukuti bakatamfya abakashi babo, kabili apo balicitile ulu lubembu, cila muntu ali no kutuula impaanga iilume ukufuma pa mukuni wakwe.+

20 Bambi abaupile abanakashi ba mu fyalo fimbi ni aba: pa bana ba kwa Imere+ ni Hanani na Sebadia; 21 pa bana ba kwa Harimu,+ ni Maaseya, Eliya, Shemaya, Yehiele na Usia; 22 pa bana ba kwa Pashihuri,+ ni Elioenai, Maaseya, Ishmaele, Netanele, Yosabadi na Eleasa. 23 Pa bena Lebi, ni Yosabadi, Shimei, Kelaya (e kutila Kelita), Petahia, Yuda na Eliesere; 24 pali bakemba ni Eliashibu; pa balelinda impongolo, ni Shalumu, Telemu na Uri.

25 Pa bena Israele abana ba kwa Paroshe,+ ni Ramia, Isia, Malkiya, Miyamini, Eleasari, Malkiya na Benaya; 26 pa bana ba kwa Elamu,+ ni Matania, Sekaria, Yehiele,+ Abdi, Yeremote na Eliya; 27 pa bana ba kwa Satu,+ ni Elioenai, Eliashibu, Matania, Yeremote, Sabadi na Asisa; 28 pa bana ba kwa Bebai,+ ni Yehohanani, Hanania, Sabai, Atilai; 29 pa bana ba kwa Bani, ni Meshulamu, Maluki, Adaya, Yashubu, Sheali na Yeremote; 30 pa bana ba kwa Pehati-moabu,+ ni Adina, Kelali, Benaya, Maaseya, Matania, Besalele, Binui na Manase; 31 pa bana ba kwa Harimu,+ ni Eliesere, Ishiya, Malkiya,+ Shemaya, Shimeone, 32 Benjamini, Maluki na Shemaria; 33 pa bana ba kwa Hashumu,+ ni Matenai, Matata, Sabadi, Elifelete, Yeremai, Manase na Shimei; 34 pa bana ba kwa Bani, ni Maadai, Amramu, Uele, 35 Benaya, Bedia, Keluyi, 36 Bania, Mereemote, Eliashibu, 37 Matania, Matenai na Yaasu; 38 pa bana ba kwa Binui, ni Shimei, 39 Shelemia, Natani, Adaya, 40 Makenadebai, Shashai, Sharai, 41 Asarele, Shelemia, Shemaria, 42 Shalumu, Amaria na Yosefe; 43 pa bana ba kwa Nebo, ni Yeiele, Matitia, Sabadi, Sebina, Yadai, Yoele na Benaya. 44 Aba bonse baupile abanakashi ba mu fyalo fimbi,+ kabili balitamfishe abakashi babo kumo na bana bafyelemo.+