ESTERE

1 Ilyo Ahasuerusi* aleteka, e kutila, Ahasuerusi uwaleteka ifitungu+ 127 ukutendekela ku India ukufika ku Etiopia,* 2 pa nshita aletekela mwi sano mu Shushani,*+ 3 mu mwaka walenga butatu ukutula apo atendekeele ukuteka, apekanishishe bacilolo bakwe bonse na babomfi bakwe bonse umutebeto. Abashilika ba ku Persia+ na ba ku Madai,+ na bashimucindikwa na bacilolo ba mu fitungu fya calo cakwe nabo e ko bali, 4 kabili pa nshiku 180 alebalanga ifyuma fya bufumu bwakwe, amaka akwete ne fyo acindeme. 5 Kabili ilyo ishi nshiku shapwile, imfumu yapekanishishe abantu bonse abali kwi sano mu Shushani* umutebeto pa nshiku 7. Mu lubansa lwe sano lya mfumu mwali abantu abalumbwike e lyo na bantu yaweyawe. 6 Pa kuyemfya ulubansa babomfeshe insalu, ubutonge ubusuma ne nsalu ya bluu iisuma iyo bakakiile ne ntambo sha nsalu ishisuma, ubushishi bwakashikila ubo bapishishe mu twakukofyamo utwa silfere, inceshi sha marbele, ne fya kwikalapo ifya golde ne fya silfere ifyo babikile mu lubansa umwali amabwe ya porfri, aya marbele, aya bamargariti na ya marbele yafiita.

7 Balebapeelela umwangashi mu makapu* ya golde ayalekanalekana, kabili umwangashi uo imfumu yapekenye wali uwingi nga nshi, pantu yalikwete sana icuma. 8 Takwali uwale-eba umuntu ifyo alingile ukunwa, pantu imfumu na bacilolo bapekenye ukuti umuntu onse alingile ukunwa ukulingana ne fyo alefwaya.

9 Bashti+ namfumu na o alipekanishishe abanakashi umutebeto pa ng’anda ya Mfumu* Ahasuerusi.

10 Pa bushiku bwalenga 7 ninshi imfumu naisansamuka pa mulandu wa kuti yalinwene umwangashi, yaebele Mehumani, Bista, Haribona,+ Bigta, Abagta, Setari na Karikasi, abalashi ba kwi sano 7 abalebombela Imfumu Ahasuerusi, 11 ukuti balete Bashti namfumu ku mfumu ninshi nafwala ica kufwala ca ku mutwe ica bunamfumu,* pa kuti abantu bonse na bacilolo bamone ifyo ali uwayemba, pantu ali uwayemba nga nshi. 12 Lelo ilyo abalebombela kwi sano baile-eba Namfumu Bashti ifyo imfumu yabebele, atwalilile fye ukukaana. E ico imfumu yalifulilwe nga nshi kabili yalikalipe.

13 Lyena imfumu yaipwishe abaume abaishibe bwino ifya kupingula imilandu ya musango yu* (pantu lyonse nga kwaba umulandu uwakumine imfumu, imfumu yaleipusha bonse abaishibishe amafunde ne fya kupingula imilandu. 14 Imfumu yalikwete ne mpanda mano 7+ abena Persia na bena Madai abaleipanda amano ilingi line, ne shi impanda mano shali ni Karishena, Shetari, Adimata, Tarshishi, Merese, Marsena na Memukani. Ishi impanda mano e shalemonana ne mfumu kabili shalikwete ififulo ifikalamba mu bufumu). 15 Imfumu yashipwishe aiti: “Ukulingana ne funde, cinshi tulingile ukucita Namfumu Bashti, ifi akeene ukukonka ifyo Imfumu Ahasuerusi yaceba ababombela kwi sano ukuti bamwebe?”

16 E lyo Memukani alandile pa cinso ca mfumu na bacilolo ati: “Ifi Namfumu Bashti acitile talufyenye fye+ imfumu yeka, lelo nalufyanya na bacilolo bonse na bantu bonse aba mu fitungu fyonse ifyo Imfumu Ahasuerusi iteka. 17 Pantu abanakashi bonse abaupwa bakomfwa ifyo namfumu acitile kabili bakasuula abalume babo, kabili bakalalanda abati, ‘Imfumu Ahasuerusi yalitumine aba kuyaita Namfumu Bashti, lelo alikeene.’ 18 Kabili lelo line abakashi ba bacilolo ba ku Persia na ba ku Madai abeshibe ifyo namfumu acitile, balaya mukulandapo na bena mwabo, kabili ici cikalenga abantu mu calo bakakalipe kabili bakabe ne misuula. 19 Imfumu nga ilemona ukuti cili fye bwino, naibikeko icipope ica kuti Bashti ekatala esa ku Mfumu Ahasuerusi kabili ica kuti umwanakashi umbi umusuma ukumucila e o amupyane pali bunamfumu. Kabili ici cipope bacilembe mu mafunde ya mu Persia na ya mu Madai, ayo umuntu nangu umo ashingalula.+ 20 Kabili ilyo abantu bonse mu bufumu bakomfwa icipope ca mfumu, abanakashi bonse abaupwa bakacindika abalume babo, nampo nga balilumbuka nelyo tabalumbuka.”

21 Imfumu na bacilolo balitemenwe ifyo Memukani alandile, kabili ifi fine e fyo imfumu yacitile. 22 E ico imfumu yatumine amakalata ku fitungu+ fyonse ifyo yaleteka. Yatumine amakalata kuli cila citungu ukulingana ne fyo balelemba* kuli ico citungu kabili ukulingana no lulimi balelanda. Yalembelemo ukuti umulume onse alingile ukuba umukalamba* mu ng’anda yakwe, kabili alingile ukulanda ululimi lwa bantu bakwe.

2 Pa numa ya ifi fintu, ilyo ubukali bwa Mfumu Ahasuerusi+ bwacepeleko, yaibukishe ifyo Bashti acitile+ ne fyo bamupingwile.+ 2 Lyena abalebombela imfumu batile: “Lekeni bafwaile imfumu abakashana banacisungu abasuma. 3 Kabili imfumu isonte abantu mu fitungu fyonse ifyo iteka,+ nabo bayefwaya banacisungu abasuma no kubaleta kwi sano mu Shushani,* mu ng’anda ya banakashi.* Lekeni Hegee+ mutungwi wa mfumu uusunga abanakashi, akalebasakamana, kabili bakalebayemfya.* 4 Kabili umukashana uo imfumu ikatemwisha e ukapyana Bashti+ pali bunamfumu.” Imfumu yalitemenwe ifyo balandile, kabili ifi fine e fyo yacitile.

5 Kwali umwaume umuYuda uwalebombela kwi sano mu Shushani,*+ ishina lyakwe ali ni Mordekai+ umwana wa kwa Yairi umwana wa kwa Shimei umwana wa kwa Kishi, umwina Benjamini.+ 6 Kishi ali pa bo Nebukadnesari imfumu ya Babiloni yasendele mu kuyaba bankole ukufuma ku Yerusalemu pamo na Yekonia*+ imfumu ya baYuda. 7 Mordekai e wakushishe Hadasa, uo baleita no kuti Estere, umwana mwanakashi wa kwa munyina+ wa kwa wishi Mordekai, pantu takwete wishi na nyina. Estere ali mwanakashi uwayemba kabili alemoneka bwino. Ilyo bawishi na banyina bafwile, Mordekai alimusendele kabili alemusunga fye ngo mwana wakwe. 8 Ilyo abantu baumfwile ifyo imfumu yalandile ne funde ilyo yapangile, kabili ilyo abakashana abengi babalonganike kwi sano mu Shushani* pa kuti Hegee+ alebasakamana, Estere na o balimutwele ku ng’anda ya mfumu.*

9 Hegee alitemenwe Estere kabili ali ne cikuuku* kuli ena. E ico bwangu bwangu alisalile abakulamuyemfya*+ no kulamupeela ifya kulya ifisuma, kabili alimupeele abakashana 7 abalebombela mu ng’anda ya mfumu pa kuti balemusakamana, kabili amukuushiishe ku ncende iisuma sana mu ng’anda ya banakashi* pamo na bakashana abalemusakamana. 10 Estere talelandapo pa bantu bakwe nelyo pali balupwa lwakwe,+ pantu Mordekai+ alimukonkomeshe ukuti talingile ukwebako nangu umo.+ 11 Cila bushiku Mordekai alepita mupepi no lubansa lwa ng’anda umo abanakashi baleikala* pa kuti eshibe ifyo Estere ali ne fyo balemusunga.

12 Imyeshi 12 iyo baleyemfeshamo abakashana nga yapwa, cila mukashana aleya ku Mfumu Ahasuerusi. Pa kubayemfya* balebasuba amafuta ya muri*+ pa myeshi 6, e lyo pa myeshi imbi 6 balebasuba amafuta ya balsamu+ ne fintu fimbi ifyo balebomfya pa kubayemfya.* 13 Lyena umukashana aleya ku mfumu, kabili conse ico alelomba ilyo ashilaya ku ng’anda ya mfumu ukufuma ku ng’anda ya banakashi,* balemupeela. 14 Umukashana aleya ku mfumu icungulo, e lyo ulucelo abwelela ku ng’anda ya bubili ukwaleikala abakashi banono aba mfumu* abo Shaashgasi mutungwi+ wa mfumu alesakamana. Taali na kuya ku mfumu na kabili, kano fye nga ca kuti imfumu naimutemwa kabili pa kumwita yalumbula ishina lyakwe.+

15 Inshita ya kuti Estere aye ku mfumu yalifikile. Estere umwana wa kwa Abihaili munyina wa kwa wishi Mordekai, uo alesunga fye ngo mwana wakwe,+ talombele fimbi pa kuya ku mfumu ukucila pa fyo Hegee mutungwi wa mfumu uwalesunga abanakashi amwebele. (Abantu bonse abalemona Estere balemutemwa.) 16 Estere bamutwele ku Mfumu Ahasuerusi kwi sano mu mweshi walenga 10, e kutila umweshi wa Tebete,* mu mwaka walenga 7+ ukufuma apo yatendekeele ukuteka. 17 Imfumu yalitemenwe Estere ukucila abanakashi bambi, kabili yali ne cikuuku* kuli ena ukucila ifyo yali ne cikuuku kuli banacisungu bambi. E ico yalimufwikile ica kufwala ca ku mutwe ica bunamfumu,* kabili yamubikile pali bunamfumu+ pa kuti apyane Bashti.+ 18 Pa kucindika Estere, imfumu yapangiile bacilolo na babomfi ba iko bonse umutebeto uukalamba. Kabili imfumu yabilishe ukuti abantu bonse mu fitungu ifyo yaleteka balubuke, kabili yalitwalilile ukupeela abantu ifintu pantu yalikwete sana icuma.

19 Nomba ilyo balonganike banacisungu*+ pa muku walenga bubili, Mordekai aikele pa mpongolo ye sano lya mfumu. 20 Estere talelandapo pali balupwa lwakwe nelyo pa bantu bakwe,+ nga filya fine Mordekai amwebele, kabili Estere alitwalilile ukumfwila Mordekai nga filya fine alemumfwila ilyo alemusunga.+

21 Ilyo Mordekai aleikala pa mpongolo ye sano lya mfumu, ababomfi babili aba kwi sano, e kutila Bigtani na Tereshe, abalelonda pa fiibi, balikalipe kabili balepanga ukwipaya Imfumu Ahasuerusi. 22 Lelo Mordekai alishibe ifyo balepanga ukucita, kabili ilyo line alyebeleko Namfumu Estere. Lyena Estere alyebele imfumu ifyo Mordekai amwebele.* 23 E ico balifwailishe ili lyashi kabili basangile ukuti lya cine, lyena aba baume balibakulike pa fimuti; kabili ifyacitike balifilembele mwi buuku lya malyashi ya kale ninshi ne mfumu+ ilemonako.

3 Pa numa ya ifi fintu, Imfumu Ahasuerusi yalicindamike Hamani+ umwana wa kwa Hamedata umwina Agagi,+ pantu yalimupeele icifulo icikalamba pali bacilolo banankwe bonse.+ 2 Kabili ababomfi ba mfumu bonse abaleba pa mpongolo ye sano balekontamina Hamani no kumufukamina bafisha ne mpumi panshi, pantu e fyo imfumu yabebele. Lelo Mordekai ena alekaana ukumufukamina nelyo ukumukontamina. 3 E ico ababomfi ba mfumu abaleba pa mpongolo ye sano baipwishe Mordekai abati: “Cinshi ukaanina ukukonka ifunde lya mfumu?” 4 Ifi fine e fyo balemwipusha cila bushiku, lelo talebikako amano. Lyena baebele Hamani ifyo Mordekai alecita pa kuti bamone nga ali no kusuulako fye,+ pantu Mordekai alibebele ukuti ali muYuda.+

5 Ilyo Hamani amwene ukuti Mordekai alikeene ukulamukontamina no kulamufukamina, alikalipe nga nshi.+ 6 Nomba talefwaya ukwipaya fye Mordekai eka, pantu balimwebele ukuti Mordekai ali muYuda. E ico Hamani atendeke ukupanga ifyo ali no kwipaya abaYuda bonse, abantu ba kwa Mordekai, abali mu bufumu bwa kwa Ahasuerusi.

7 Mu mweshi wa kubalilapo, e kutila umweshi wa Nisani,* mu mwaka walenga+ 12 ukutula apo Imfumu Ahasuerusi yatendekeele ukuteka, balipendwile ukubomfya icipendwilo ca Puri+ ninshi na Hamani alemonako, pa kuti beshibe ubushiku no mweshi bali no kulofeshamo abaYuda, kabili icipendwilo caponene pa mweshi walenga 12, e kutila umweshi wa Adari.*+ 8 Lyena Hamani aebele Imfumu Ahasuerusi ati: “Kwaliba abantu abasalanganina mu fitungu fyonse ifyo muteka,+ abakonka amafunde ayapusana na yo abantu bonse+ bakonka. Tabakonka amafunde ya mfumu, kabili te kuti ciwame imfumu ibalekepo fye. 9 Nga mulemona ukuti cili fye bwino mwe mfumu, lekeni balembe icipope ca kuti aba bantu babepaye. Nkapeela bacilolo amatalanti* ya silfere 10,000 pa kuti bakayabike mu cipao ca mfumu.”*

10 E lyo imfumu yafuulile inindaminwe ya kufwatikilako+ no kupeela Hamani+ umwana wa kwa Hamedata umwina Agagi,+ uwali umulwani wa baYuda. 11 Imfumu yaebele Hamani aiti: “Nakupeela silfere na ba bantu, kuti wabacita ifyo ulefwaya.” 12 Lyena baitile bakalemba+ ba mfumu pa bushiku bwalenga 13 mu mweshi wa kubalilapo. E ico balilembele+ fyonse ifyo Hamani aebele intungulushi shikalamba isha mfumu, intungulushi shimbi isha fitungu na bacilolo ba bantu bonse. Kabili balembeele abantu ukulingana ne fyo balelemba* muli cila citungu no kulingana no lulimi balelanda muli cila citungu. Ici icipope bacilembeele mwi shina lya Mfumu Ahasuerusi kabili balifwatikepo ukubomfya inindaminwe ya kufwatikilako+ iya mfumu.

13 Batumine abakutwala amakalata ku fitungu fyonse ifyo imfumu yaleteka. Mu makalata balembelemo ukuti bepaye abaYuda bonse, abaice na bakalamba, abana na banakashi, no kubalofya mu bushiku bumo, ubushiku bwalenga 13 mu mweshi walenga 12, e kutila umweshi wa Adari,+ kabili basende ne fipe fyabo.+ 14 Balingile ukutuma amakalata umwali ili ifunde ku fitungu fyonse pa kuti abantu bonse bengaipekanya ilyo ubu bushiku bushilafika. 15 Abo baebele ukutwala amakalata balyangufyenye+ nga fintu imfumu yabebele. Ili ifunde balilisabankenye na mu Shushani*+ umwali isano. Lyena imfumu na Hamani balikeele balanwa, lelo abantu mu musumba wa Shushani* balipelenganishiwe pantu tabaishibe ifya kucita.

4 Ilyo Mordekai+ aishibe fyonse ifyo bacitile,+ alepwile ifya kufwala fyakwe, afwala ne nsamu e lyo aikuba imito. Lyena aile pa kati ka musumba ninshi alelila umusowa pa mulandu wa kuti ali no bulanda. 2 Ailefika fye pa mpongolo ye sano lya mfumu, pantu takwali nangu umo uwaleingila mwi sano nga nafwala insamu. 3 Kabili abaYuda abaleikala mu fitungu+ fyonse ifyo imfumu yaleteka umo batwele amashiwi ya mfumu ne cipope, baleloosha nga nshi, balefunga+ kabili balelila imisowa. Abengi balelaala pa nsamu isho bakubilepo imito.+ 4 Ilyo ababomfi banakashi aba kwa Estere na bamutungwi* baingile umwali Estere bamweba ne fyalecitika, namfumu alyumfwile ububi sana. Lyena atumine abakutwalila Mordekai ifya kufwala pa kuti afuule insamu, lelo alikeene ukufifwala. 5 E ico Estere aitile Hataki, umo pali bamutungwi ba mfumu, uo imfumu yasontele ukuti alemubombela, kabili amwebele ukuti ayeipusha Mordekai icacitike.

6 Lyena Hataki aile kuli Mordekai mu lubansa ulwali mu musumba, ulwali pa ntanshi ya mpongolo ye sano lya mfumu. 7 E ico Mordekai amwebele fyonse ifyacitike ne ndalama+ isho Hamani alaile ukuti ali no kubika mu cipao ca mfumu pa kuti bakalofye+ abaYuda. 8 Alimupeele na po balembele icipope ica kuti bepaye abaYuda bonse ico bapangile mu Shushani.*+ Hataki alingile ukulanga Estere icipope no kumulondolwela ifyalecitika. Alingile no kumweba+ ukuti aye ku mfumu, ayepaapaatilako abantu bakwe.

9 Hataki alibweleele kuli Estere no kumweba ifyo Mordekai alandile. 10 Lyena Estere aebele Hataki ukuyaeba Mordekai+ ati: 11 “Ababomfi ba mfumu bonse na bantu bonse ababa mu fitungu ifyo imfumu iteka balishiba ukuti ifunde litila: Umwaume onse nelyo umwanakashi onse uwaya mu lubansa lwa mu kati+ ulwe sano ukwabula ukuti imfumu imwite, bafwile ukumwipaya, kano fye nga ca kuti imfumu yamutambika inkonto ya golde.+ Lelo ine napapita inshiku 30 imfumu tayanjitapo.”

12 Ilyo baebele Mordekai ifyo Estere alandile, 13 Mordekai ayaswike Estere ati: “Witontonkanya ukuti ilyo abaYuda bakabepaya iwe ukapusuka pa mulandu wa kuti wikala mwi sano lya mfumu. 14 Pantu nga tawacitepo nangu cimo pali ino nshita, abaYuda bakapusukila mu muntu umbi,+ lelo iwe na balupwa lobe bakamulofya. Tawishibe nalimo ico wabela namfumu+ ni pa kuti utupusushe.”

15 Lyena Estere aebele Mordekai ati: 16 “Kabiye kalonganike abaYuda bonse ababa mu Shushani,* kabili mumfungileko+ pa nshiku shitatu,+ akasuba no bushiku. Tamufwile ukulya nelyo ukunwa nangu cimo. Na ine na babomfi bandi abanakashi twalafunga. Nkaya ku mfumu nangu ca kuti ifunde talisuminisha, kabili nga kunjipaya, kabakayenjipaya.” 17 E ico Mordekai alile, ayacita na fyonse ifyo Estere amwebele.

5 Pa bushiku bwalenga shitatu+ Estere afwele ifya kufwala fya bunamfumu kabili aileiminina mu lubansa lwa mu kati ulwa ng’anda ya mfumu.* Aileiminina apaloshenye ne ng’anda ya mfumu, ninshi imfumu naikala pa cipuna ca bufumu mu ng’anda ya iko, nailosha na ku mwinshi. 2 Ilyo fye imfumu yamwene Namfumu Estere naiminina mu lubansa, yalitemenwe kabili yamutambike inkonto ya golde.+ Lyena Estere alipaleme no kwikata pa muulu wa nkonto.

3 Imfumu yamwipwishe aiti: “Cinshi waishila kuno Namfumu Estere? Cinshi ulefwaya? Nangu ulombe hafu ya bufumu bwandi, ndekupeela!” 4 Estere alandile ati: “Nga mwamona ukuti cili fye bwino mwe mfumu, mwise na Hamani+ ku mutebeto imupekanishishe.” 5 Lyena imfumu yaebele ababomfi baiko aiti: “Ebeni Hamani angufyanye ukwisa pantu Estere natwita ku mutebeto.” E ico imfumu na Hamani baile ku mutebeto uo Estere apekenye.

6 Ilyo balenwa umwangashi, imfumu yaipwishe Estere aiti: “Cinshi ulefwaya nkucitile? Nalakucitila! Cinshi ulefwaya nkupeele? Nangu ulombe hafu ya bufumu bwandi, ndekupeela!”+ 7 E lyo Estere ayaswike ati: “Ico ndefwaya muncitile ni ci, 8 Nga ca kuti mwe mfumu mulemona ukuti cili fye bwino kabili nga mwatemwa ukucita ifyo ndefwaya muncitile, mukese na Hamani mailo ku mutebeto uo nkapekanya, kabili mailo line e lyo nkamweba ifyo ndefwaya mukancitile.”

9 Bulya bushiku ilyo Hamani afumine ku mutebeto alisansamwike nga nshi. Lelo ilyo amwene Mordekai pa mpongolo ye sano lya mfumu, alifulilwe icine cine pantu Mordekai+ taiminine ilyo amumwene kabili tamutiinine. 10 Lelo Hamani ali-ilamine aya na ku ng’anda ku mwakwe. Lyena atumine abakuyaita abanankwe no mukashi wakwe Sereshe.+ 11 Hamani atendeke ukuitakishisha pa fyuma akwete, pa bana abengi+ abo akwete na pa fyo imfumu yamucindike ilyo yamupeele icifulo icikalamba pali bacilolo bonse na pa babomfi ba mfumu+ bonse.

12 Hamani alandile no kuti: “Ne cicililepo ca kuti, Namfumu Estere aciita fye imfumu e lyo na ine ku mutebeto uo acipekanya.+ Namfumu Estere atile na mailo line nkaye ne mfumu+ ku mutebeto. 13 Lelo ifi fyonse tafilelenga ndeba ne nsansa nga namona Mordekai umuYuda naikala pa mpongolo ye sano lya mfumu.” 14 E ico abanankwe no mukashi wakwe Sereshe bamwebele abati: “Eba abakupekanya icimuti icalepa imikono 50.* Kabili mailo ulucelo ukebe imfumu ukuti Mordekai bafwile ukumukobeka+ pali ico icimuti. Lyena ukaye ne mfumu mukuipakisha umutebeto.” Hamani alitemenwe ifyo bamwebele kabili aebele abakupekanya icimuti.

6 Ubushiku bulya imfumu yalifililwe ukulaala.* E ico yaebele abakuiletela ibuuku lya malyashi ya kale,+ kabili batendeke ukuibelengela ifyalembelwe muli lilya ibuuku. 2 Basangile apo balembele ifyo Mordekai asoseleele abalashi ba kwi sano babili abaleba pa mwinshi, e kutila Bigtani na Tereshe, abapangile ukwipaya Imfumu Ahasuerusi.+ 3 Imfumu yaipwishe aiti: “Finshi twacitila Mordekai pa kumucindika, kabili cilambu nshi twamupeela pali ifi acitile?” E lyo ababomfi ba mfumu ba-aswike abati: “Tatwamucitilapo nangu cimo.”

4 Pa numa imfumu yaipwishe aiti: “Nani ali mu lubansa?” Ifi fyacitike ninshi Hamani e lyo aingila fye mu lubansa+ lwa kunse ulwe sano pa kuti ebe imfumu ukuti bakobeke Mordekai pa cimuti ico amupekanishishe.+ 5 Ababomfi ba mfumu ba-aswike abati: “Ni Hamani.”+ E ico imfumu yalandile aiti: “Mwebeni engile.”

6 Ilyo Hamani aingile, imfumu yamwipwishe aiti: “Finshi twingacitila umuntu uo imfumu ilefwaya ukucindamika?” Hamani atendeke ukulanda mu mutima wakwe ati: “Nani imfumu ingafwaya ukucindamika ukucila pali ine?”+ 7 E ico Hamani aebele imfumu ati: “Umuntu uo imfumu ilefwaya ukucindamika, 8 bamuletele ica kufwala ca bufumu+ ico imfumu ifwala, na kabalwe uo imfumu ininapo, uo bafwikile icifimbo ca bufumu ku mutwe. 9 Lyena umo pali bacilolo abacindama sana aba mfumu, asende ici ica kufwala na kabalwe pa kuti bayefwika umuntu uo imfumu ilefwaya ukucindamika. Kabili bamuninike pali kabalwe e lyo balemupisha mu lubansa lwa mu musumba ulwa cintubwingi. E lyo balebilisha ninshi bali pa ntanshi yakwe abati: ‘Ifi e fyo tucitila umuntu uo imfumu ilefwaya ukucindamika!’”+ 10 Ilyo line fye imfumu yaebele Hamani aiti: “Endesha! Senda ica kufwala na kabalwe, kabili ucitile Mordekai umuYuda uwikala pa mpongolo ye sano fyonse ifyo walanda, wishapo nangu cimo.”

11 E ico Hamani abuulile kabalwe, abuula ne ca kufwala afwika Mordekai,+ e lyo alamupisha mu lubansa lwa cintubwingi ulwa mu musumba ninshi Mordekai nanina pali kabalwe. Lyena Hamani alebilikisha ninshi ali pa ntanshi yakwe ati: “Ifi e fyo tucitila umuntu uo imfumu ilefwaya ukucindamika.” 12 Pa numa Mordekai abweleele ku mpongolo ye sano lya mfumu. Lelo Hamani ena alyangufyenye ukuya ku ng’anda ku mwakwe ninshi nafimba ku mutwe pantu ali sana ne nsoni kabili alyumfwile ububi. 13 Ilyo Hamani ashimikiile Sereshe+ umukashi wakwe na banankwe bonse ifyamucitikile, impanda mano shakwe na Sereshe umukashi wakwe bamwebele abati: “Nga ca kuti Mordekai uwatendeka ukukucimfya muYuda,* ninshi tawakamucimfye, lelo e ukakucimfya.”

14 Ilyo bacili balelanda nankwe, abalashi ba kwi sano balifikile kabili balyangufyenye ukusenda Hamani ku mutebeto Estere apekenye.+

7 E ico imfumu na Hamani+ baile ku mutebeto Namfumu Estere abapekanishishe. 2 Imfumu na kabili yaipwishe Estere pa bushiku bwalenga bubili ilyo balenwa umwangashi pa mutebeto aiti: “Cinshi ulefwaya nkucitile Namfumu Estere? Nalakucitila. Cinshi ulefwaya nkupeele? Nangu ulombe hafu ya bufumu bwandi ndekupeela!”+ 3 E lyo Namfumu Estere ayaswike ati: “Nga mwamona ukuti cili fye bwino mwe mfumu, kabili nga mwatemwa, ndelomba ukuti mumpusushe, mupusushe na bantu bandi+ ku balefwaya ukutwipaya. 4 Pantu ine na bantu bandi nabatushitisha+ pa kuti batwipaye no kutulofya.+ Nga ca kuti batushitishe fye pa kuti tube abasha abaume na basha abanakashi, nga naikele fye tondolo. Lelo mwileka icintu cabipa ifi cikacitike pantu cikabipila na imwe bene mwe mfumu.”

5 Lyena Imfumu Ahasuerusi yaipwishe Namfumu Estere aiti: “Nani uulefwaya ukucita ifi, kabili ali kwi?” 6 Estere ayaswike ati: “Umuntu umubi uuletulwisha kabili umulwani wesu, ni uyu Hamani.”

Ici calengele Hamani atiine sana imfumu na namfumu. 7 Imfumu yaimine icipyu pa mutebeto apo balenwa umwangashi kabili yaile mwi bala lyali pe sano, lelo Hamani alimine no kutendeka ukupaapaata Namfumu Estere pa kuti amubelele uluse pantu alishibe ukuti imfumu yali no kumukanda. 8 Ilyo imfumu yafumine mwi bala lyali pe sano no kubwelela ku ng’anda ukwali umutebeto, yamwene Hamani nakupama pa cipuna apaikele Estere. E lyo imfumu yapundile aiti: “Alefwaya no kuulungana na namfumu mu ng’anda yandi?” Ilyo imfumu yalandile fye aya mashiwi, Hamani balimufimbile ku mutwe. 9 Haribona+ umulashi wa kwi sano alandile ati: “Hamani alipekanya ne cimuti ica kukobekapo Mordekai+ uwapuswishe imfumu.+ Aciimika pa ng’anda pa mwakwe kabili calepa imikono 50.”* E lyo imfumu yatile: “Mukobekeni pali ico cine cimuti.” 10 E ico bakobeke Hamani pa cimuti ico apekanishishe Mordekai, lyena icipyu ca mfumu calicepeleko.

8 Bulya bwine bushiku Imfumu Ahasuerusi yapeele Namfumu Estere ing’anda ya kwa Hamani+ uwali umulwani wa baYuda,+ kabili Mordekai aile ku mfumu, pantu Estere alyebele imfumu ukuti Mordekai ali ni lupwa wakwe.+ 2 Lyena imfumu yafuulile inindaminwe ya iko iya kufwatikilako+ iyo yapokele Hamani kabili yapeele Mordekai. Estere na o asontele Mordekai ukula-angalila ing’anda iyali iya kwa Hamani.+

3 Estere alilandile ne mfumu na kabili. Ali-ifukamine afisha ne mpumi panshi, kabili alililile. Apaapeete imfumu ukuti ifumyepo ipange ilibi ilya kwa Hamani umwina Agagi ilya kulofya abaYuda.+ 4 Imfumu yatambike Estere+ inkonto ya golde, lyena Estere alimine e lyo aiminina pa ntanshi ya mfumu. 5 E lyo Estere aebele imfumu ati: “Nga ca kuti mwe mfumu mulemona ukuti cili fye bwino, kabili nga namuntemwa kabili nga mulemona ukuti nacilinga, lekeni balembe icipope ica kulesha ipange ilyo Hamani+ umwana wa kwa Hamedata umwina Agagi+ alembele, ilya kuti balofye abaYuda mu fitungu fyonse ifyo mwe mfumu muteka. 6 Pantu te kuti nshipikishe nga namona ifyabipa fyacitikila abantu bandi, kabili te kuti nshipikishe nga namona balupwa lwandi babalofya.”

7 E ico Imfumu Ahasuerusi yaebele Namfumu Estere na Mordekai umuYuda aiti: “Moneni nalipeela Estere+ ing’anda ya kwa Hamani, kabili nalikobeka Hamani pa cimuti+ pa mulandu wa kuti alepanga ukulofya abaYuda. 8 Nomba lembeleni mwi shina lya mfumu ifyo mulemona ukutila kuti fyawamina abaYuda, mufwatikepo ne nindaminwe ya kufwatikilako iya mfumu, pantu icipope ico balembela mwi shina lya mfumu kabili ico bafwatikapo inindaminwe ya mfumu takuli nangu umo uwingacalula.”+

9 E ico baitile bakalemba ba mfumu mu mweshi walenga butatu, e kutila mu mweshi wa Sibani,* pa bushiku bwalenga 23, kabili balembele fyonse ifyo Mordekai aebele abaYuda, intungulushi shikalamba+ isha fitungu, intungulushi shimbi isha fitungu na bacilolo ba mu fitungu+ 127 ifyo imfumu yaleteka ukutendekela ku India ukufika ku Etiopia. Balembele ukulingana ne fyo balelemba* kuli cila citungu kabili ukulingana no lulimi balelanda kuli cila citungu. Balembeele na baYuda ukulingana ne fyo balelemba* kabili ukulingana no lulimi balelanda.

10 Abebele ukulembela mwi shina lya Mfumu Ahasuerusi kabili afwatikepo inindaminwe ya kufwatikilako+ iya mfumu, e lyo apeela abale-endela pali bakabalwe amakalata pa kuti bayatwale ku fitungu. Abo atumine bale-endela pali bakabalwe abalebutukisha abo balebomfya ku mulimo wa mfumu. 11 Muli aya makalata imfumu yalisuminishe abaYuda abaleikala mu misumba iyalekanalekana ukuti bakalongane pamo pa kuti bakaipokolole,* bakepaye kabili bakalofye bonse abali no kubasansa, kumo na banakashi na bana, kabili bakasende ifipe fyabo.+ 12 Ifi fyali no kucitika mu fitungu fyonse ifyo Imfumu Ahasuerusi yaleteka, pa bushiku bumo bwine ubwalenga 13 mu mweshi walenga 12, e kutila umweshi wa Adari.*+ 13 Ifyo balembele mu makalata fyali no kuba lifunde mu fitungu fyonse ifyo imfumu yaleteka. Kabili balingile ukubilisha ili ifunde ku bantu bonse pa kuti abaYuda bakaipekanye ukulwisha abalwani+ babo pali ubu bushiku. 14 Abo batumine ukutwala amakalata abale-endela pali bakabalwe abo balebomfya mu mulimo wa mfumu, balyangufyenye ukutwala amakalata nga fintu imfumu yabebele. Kabili ifunde lyalifumine na mu Shushani*+ umwali isano.

15 Nomba Mordekai afumine apali imfumu ninshi nafwala ica kufwala ca bufumu ica nsalu ya bluu ne yabuuta, kabili ninshi nafwala icilongwe ca lulumbi ica golde ne nsalu iisuma iyakashikila.+ Kabili aba mu musumba wa Shushani* ba-awile utupundu. 16 AbaYuda balilubwike, e ico balisekelele kabili abantu balibalumbenye no kubacindika. 17 Kabili abaYuda abali mu fitungu fyonse na mu misumba yonse, umo batwele icipope ne funde lya mfumu, balesekelela nga nshi, balipangile imitebeto kabili balesefya. Abantu abengi aba muli ici calo baishileba abaYuda+ pantu batendeke ukutiina abaYuda.

9 Pa bushiku bwalenga 13 mu mweshi walenga 12, e kutila mu mweshi wa Adari,*+ pa bushiku abantu balingile ukucita+ ifyo imfumu yalandile ne fyo balembele mwi funde yafumishe pa bushiku abalwani bale-enekela ukucimfya abaYuda, ifyo bale-enekela te fyacitike pantu abaYuda balicimfishe abalwani babo.+ 2 AbaYuda balilongene mu misumba yabo iya mu fitungu fyonse ifyo Imfumu Ahasuerusi+ yaleteka pa kuti balwishe abalefwaya ukubasansa, kabili pa balwani babo tapali nangu umo uwabacimfishe pantu abantu bonse+ balebatiina. 3 Kabili bacilolo bonse abali mu fitungu ifyo imfumu yaleteka, intungulushi shikalamba+ isha fitungu, intungulushi shimbi isha fitungu e lyo na balebomba umulimo wa mfumu, baletungilila abaYuda pantu baletiina Mordekai. 4 Mordekai aishilekwata amaka+ mu ng’anda ya mfumu,* kabili alilumbwike mu fitungu fyonse ifyo imfumu yaleteka, pantu alekwatilako fye amaka.

5 AbaYuda balicimfishe abalwani babo bonse, balibepeye ku lupanga kabili balibalofeshe. Balicitile fyonse ifyo balingile ukucita pa kuti balwishe abalwani babo.+ 6 AbaYuda baipeye abaume 500 mu Shushani*+ umwali isano kabili balibalofeshe. 7 Balipeye na Parishandata, Dalfone, Aspata, 8 Porata, Adalia, Aridata, 9 Parmashita, Arisai, Aridai na Baisata, 10 abali abana abaume 10 aba kwa Hamani umwana wa kwa Hamedata uwali umulwani wa baYuda.+ Lelo ilyo babepeye, pa fipe fyabo tabasendelepo nangu cimo.+

11 Pali bulya bushiku, imfumu baliyebele impendwa ya bantu abo baipeye mu Shushani* umwali isano.

12 Imfumu yaebele Namfumu Estere aiti: “Muno mu Shushani* umwaba isano, abaYuda nabepaya abaume 500 na bana abaume aba kwa Hamani 10 kabili nababalofya. Nomba ni banga bepeye mu fitungu+ fimbi ifyashala ifyo imfumu iteka? Cinshi cimbi walalomba? Ndekupeela. Kabili cinshi cimbi ulefwaya nkucitile? Ndekucitila.” 13 Estere ayaswike ati: “Mwe mfumu+ nga mulemona ukuti cili fye bwino, suminisheni abaYuda mu Shushani* ukuti bakaipokolole mailo nge fi baipokolwele lelo,+ kabili suminisheni ukuti abana abaume 10 aba kwa Hamani bakabakobeke pa fimuti.”+ 14 E ico imfumu yalisuminishe ukuti bakacite ifi fine. Kabili balifumishe ifunde mu Shushani,* na bana 10 aba kwa Hamani balibakobeke pa fimuti.

15 AbaYuda balilongene na kabili pa bushiku bwalenga 14 ubwa mweshi wa Adari,+ kabili baipeye abaume 300 mu Shushani,* lelo pa fipe fyabo tabasendelepo nangu cimo.

16 AbaYuda bambi abali mu fitungu fimbi ifyo imfumu yaleteka, nabo balilongene kabili bali-ipokolwele*+ ku balwani babo.+ Baipeye abalwani babo 75,000, e kutila ababapatile, lelo pa fipe fyabo tabasendelepo nangu cimo. 17 Ifi fyacitike pa bushiku bwalenga 13 mu mweshi wa Adari, lelo pa bushiku bwalenga 14 balituushishe kabili balengele ubu ubushiku bwaba bushiku bwa mutebeto kabili ubwa kusekelela.

18 AbaYuda abali mu Shushani* balongene pa bushiku bwalenga 13+ no bwalenga 14+ ubwa uyu wine mweshi, lelo batuushishe pa bushiku ubwalenga 15, kabili balengele ubu ubushiku bwaba bushiku bwa mutebeto kabili ubwa kusekelela. 19 Ici e calengele abaYuda abaleikala mu misumba imbi babike ubushiku bwalenga 14 ubwa mweshi wa Adari ukuti bushiku bwa kusekelela, ubwa mutebeto, ubwa kusefya+ kabili ubwa kupeelana+ ifya kulya.

20 Mordekai+ alilembele fyonse ifi mu makalata no kuyatuma ku baYuda bonse abaleikala mu fitungu fyonse ifyo Imfumu Ahasuerusi yaleteka, ifyali mupepi ne fyali ukutali. 21 Abalembeele ukuti cila mwaka baleibukisha ubushiku bwalenga 14 no bwalenga 15 mu mweshi wa Adari, 22 pantu muli ishi nshiku e mo abaYuda balubwike ku balwani babo kabili muli uyu wine mweshi e mo balekele ukuba no bulanda, batendeka ukulasekelela kabili e mo balekele ukuloosha,+ batendeka no kulasefya. Balingile ukulaibukisha ukuti ishi nshiku ni nshiku sha mutebeto, sha kusekelela, sha kupeelana ifya kulya kabili sha kupeelamo abapiina ifya bupe.

23 Kabili abaYuda balisumiine ukuti bali no kutwalilila ukulaibukisha shilya nshiku nga filya fine Mordekai abalembeele. 24 Pantu Hamani+ umwana wa kwa Hamedata umwina Agagi+ uwali umulwani wa baYuda bonse, apangile ukulofya abaYuda,+ kabili pa kupendula abomfeshe icipendwilo ca Puri+ pa kuti abafulunganye kabili abalofye. 25 Lelo ilyo Estere aile ku mfumu, imfumu yalifumishe icipope kabili balicilembele.+ Icipope caleti: “Lekeni ifyabipa ifyo alefwaya ukucita abaYuda+ e o ficitikile.” Lyena Hamani na bana bakwe abaume balibakobeke pa fimuti.+ 26 E co bainikile shilya nshiku sha mutebeto ukuti Purimu. Ili ishina balifumishe kwi shiwi lya kuti Puri.*+ E ico pa mulandu ne fyo balembele muli iyi kalata ne fyo abaYuda bamwene e lyo ne fyabacitikile, 27 bena kumo na batuntwike muli bena na bonse abaishileba abaYuda,+ basuminishenye ukuti bali no kulaibukisha shilya nshiku shibili, kabili bali no kulakonka ifyo balembele muli kalata shilya nshiku shibili nga shafika cila mwaka. 28 Basuminishenye no kuti bali no kulaibukisha ishi nshiku mu nkulo shabo shonse, mu ndupwa shonse, mu fitungu fyonse, na mu misumba yonse, kabili abaYuda tabalingile ukuleka ukwibukisha ishi nshiku sha Purimu. Abatuntwike muli bena nabo tabalingile ukuleka ukwibukisha ishi nshiku.

29 Lyena Namfumu Estere umwana wa kwa Abihaili, na Mordekai umuYuda balibomfeshe amaka babapeele pa kulemba kalata yalenga bubili pa fyo abaYuda bali no kulaibukisha inshiku sha Purimu. 30 Mordekai atumine amakalata ku baYuda bonse abaleikala mu fitungu+ 127 ifyo Imfumu Ahasuerusi+ yaleteka. Abatumiine umutende na mashiwi aya cine 31 pa kuti babwekeshepo ukubeba ukuti baleibukisha inshiku sha Purimu nga shafika, nga filya fine Mordekai umuYuda na Namfumu Estere babebele ukuti e fyo balecita,+ kabili nga filya fine basuminishenye abene ukuti bena na bali no kutuntuka muli bena bali no kulacita.+ Bali no kulafunga+ e lyo no kulapepa amapepo ya kupaapaata.+ 32 Kabili ifunde ilyo Estere abalembeele lyalengele bashininkisha ukuti balingile ukulaibukisha inshiku sha Purimu,+ kabili ili ifunde balililembele na mwi buuku.

10 Ahasuerusi imfumu aebele abaleikala mu calo na baleikala pa fishi fya pali bemba ukuti balemubombela.

2 Kabili imilimo iikalamba yonse iyabombelwe ne fyo imfumu yacindamike+ Mordekai,+ bushe tabafilemba mwi buuku lya malyashi+ ya mfumu sha ku Madai na Persia?+ 3 Pantu Mordekai umuYuda e wakonkele pa Mfumu Ahasuerusi. Mordekai alikwete icifulo icikalamba pa baYuda, kabili bonse abaYuda banankwe balimucindike. Alecitila abantu bakwe ifisuma kabili alefwaya ukuti abali no kutuntuka mu baYuda bakaleikala umutende.