HOSEA
1 Ifi e fyebo ifyo Yehova aebele Hosea* umwana wa kwa Beeri mu nshiku sha kwa Usia,+ Yotamu,+ Ahasi+ na Hisekia,+ imfumu sha Yuda,+ na mu nshiku sha kwa Yeroboamu+ umwana wa kwa Yoashi,+ imfumu ya bena Israele. 2 Ilyo Yehova atendeke ukulanda na bantu ukupitila muli Hosea, Yehova aebele Hosea ati: “Kabiye, kope umwanakashi uukaba cilende,* kabili akakwata abana ba muli bucilende,* pantu icalo nacileka ukukonka Yehova pa mulandu wa bucilende.”*+
3 E ico alileupa Gomere umwana mwanakashi wa kwa Diblaimu, na o alimite no kumufyalila umwana umwaume.
4 Lyena Yehova amwebele ati: “Umwinike ati Yesreele,* pantu kwashala panono ndi no kulubulwisha aba mu ng’anda ya kwa Yehu+ pa mulandu wa kusuumya umulopa mu Yesreele, kabili nkalenga ubufumu bwa ba mu ng’anda ya kwa Israele bukapwe.+ 5 Muli bulya bushiku nkafuna ubuta bwa kwa Israele mu Mupokapoka wa Yesreele.”*
6 Na kabili alimite no kufyala umwana umwanakashi. Kabili Lesa aebele Hosea ati: “Umwinike ati Loruhama,* pantu nshakomfwile aba mu ng’anda ya kwa Israele uluse+ na kabili, pantu nkabatamfya.+ 7 Lelo aba mu ng’anda ya kwa Yuda nkabomfwila uluse,+ kabili ine ne Yehova Lesa wabo nkabapususha;+ nshakabapusushishe ku buta nangu ku lupanga nangu ku nkondo, nangu kuli bakabalwe nangu ku banina pali bakabalwe.”+
8 Pa numa ya kusumuna Loruhama, alimite no kufyala umwana umwaume. 9 Lyena Lesa amwebele ati: “Umwinike ati Loami,* pantu imwe tamuli bantu bandi na ine nshakabe Lesa wenu.
10 “Kabili impendwa ya bena Israele* ikaba ngo mucanga wa kuli bemba uushingapimwa nangu ukupendwa.+ Kabili uko baebelwe ukuti, ‘Tamuli bantu bandi,’+ e ko bakebwa ukuti, ‘Muli bana ba kwa Lesa wa mweo.’+ 11 Kabili abantu ba mu Yuda na ba mu Israele bakalonganikwa pamo+ kabili bakaisalila intungulushi no kufuma mu calo, pantu ubushiku bwa kwa Yesreele bukaba ubukalamba.+
2 “Eba bandume nobe auti, ‘Muli bantu bandi!’*+
Na bankashi yobe ubebe auti, ‘Muli banakashi ababelelwa uluse!’*+
2 Peeleni nyinenwe umulandu; mupeeleni umulandu,
Pantu tali mukashi wandi,+ na ine nshili mulume wakwe.
Afwile ukuleka ukucita bucilende
Kabili afwile ukufumya ubucende pa kati ka mabele yakwe,
3 Pantu nga tacitile ifi nkamufuula akashale fye ubwamba kabili nkalenga akashale nge fyo ali ubushiku afyelwe,
Nkalenga akabe amatololo,
Akashale nge mpanga iyabula amenshi,
Kabili nkalenga akafwe ku cilaka.
5 Pantu nyinabo alicita bucilende.*+
Uwabemite alicita ifya nsoni,+ pantu atila,
‘Nalaya ku baume abantemwa,+
Abampeela umukate na menshi,
Ifya kufwala fya masako ya mpaanga ne nsalu ishisuma, amafuta ne fya kunwa.’
6 E ico nkacilika inshila shakwe no lubao lwa myunga;
Nkabikako ne linga lya mabwe ilya kumucilikila,
Pa kuti ekakwata inshila sha kupitamo.
Lyena akatila, ‘Ndebwelela ku mulume wandi uwa kubalilapo,+
Pantu ilya nshita naleikala bwino ukucila ifyo ndeikala ino nshita.’+
8 Tabikileko amano ukumona ukuti nine nalemupeela ingano,+ umwangashi uupya na mafuta,
No kuti nine namupeele silfere iingi
Na golde, iyo babomfeshe mu kupepa Baali.+
9 ‘E ico nkabwela, kabili nkapokolola ingano shandi mu nshita ya shiko
No mwangashi wandi uupya mu nshita ya uko,+
Kabili nkapoka ne fya kufwala fyandi ifya masako ya mpaanga ne nsalu shandi ishisuma sana isho alefwala pa kuti eba ubwamba.
10 Nomba nkafimbula pa fya mfwalo fyakwe pa menso ya baume abo alecita nabo ubucende,
Kabili takwakabe umwaume nangu umo uukamupokolola mu minwe yandi.+
11 Nkalenga akaleke ukusekelela,
Nkapwisha imitebeto yakwe,+ kumo no mweshi wakwe uupya, isabata lyakwe, ne nshita sha mitebeto yakwe shonse.
12 Kabili nkonaula imyangashi yakwe ne mikunyu yakwe, ifyo atila:
“Malipilo ayo abaume abo ncita nabo ubucende bampeela”;
Nkalenga fikabe umutengo,
Kabili inama mpanga shikafyonaula.
13 Nkamulubulwisha pa nshiku alefutumwina ifilubi fya kwa Baali+ icushi ce lambo,
Ilyo alefwala inindaminwe ne fya kufwala fimbi ifya kuiyemfya ilyo alekonka abaume alecita nabo ubucende,
Kabili nine alabile,’+ e fyo Yehova alanda.
15 Ukufuma ilya nshita nkamubwesesha amabala yakwe aya myangashi,+
Kabili nkalenga Umupokapoka wa Akore*+ ukabe umwinshi wa kuba ne subilo;
Ilyo akaba kulya akanjasuka nga fintu alecita mu nshiku sha bukashana bwakwe,
Kabili nga fintu alecita mu nshiku afumine mu calo ca Egupti.+
16 Kabili muli bulya bushiku,’ e fyo Yehova alanda,
‘Ukanjita ati umulume Wandi, tawakatwalilile ukunjita ati Shikulu.’*
17 ‘Nkafumya amashina ya filubi fya kwa Baali mu kanwa kakwe,+
Kabili takabale ebukisha amashina ya fiko.+
18 Muli bulya bushiku nkabapangila icipangano ne nama mpanga,+
Ne fyuni fya mu muulu ne fikulika panshi;+
Nkafumya ubuta no lupanga ne nkondo mu calo,+
19 Nkakukobekela pa kuti ukabe uwandi umuyayaya;
Nkakukobekelela mu bulungami na mu mulinganya,
Mu kutemwa ukushipwa na mu luse.+
21 ‘Kabili muli bulya bushiku nkaasuka,’ e fyo Yehova alanda,
‘Nkaasuka imyulu,
Imyulu nayo ikaasuka isonde;+
22 Kabili isonde likaasuka ingano, umwangashi uupya na mafuta;
Nabo bakatila: “Nimwe Lesa wesu.”’”+
3 Lyena Yehova anjebele ati: “Na kabili kabiye, uye utemwe umwanakashi uo umwaume umbi atemwa kabili uucita ubucende,+ nga filya fine Yehova atemwa abena Israele+ nangu ca kuti baya kuli balesa bambi+ kabili balitemwa amakeke ya myangashi.”*
2 E ico nalimushitile pa kuti abe uwandi mu ndalama 15 isha silfere na muli homa* imo na hafu iya barle. 3 Lyena namwebele nati: “Ukatwalilila ukuba uwandi pa nshiku ishingi. Taufwile ukulacita ubucende,* kabili taufwile ukulalaala no mwaume umbi. Na ine nshakalaale na iwe.”
4 Pantu pa nshita iitali* abena Israele bakekala ukwabula imfumu,+ ukwabula cilolo, ukwabula ilambo, ukwabula ukuimikila ilibwe ilya kupepa, ukwabula efode+ kabili ukwabula utulubi twa terafimu.*+ 5 Pa numa abena Israele bakabwela no kufwaya Yehova Lesa wabo,+ ne mfumu yabo Davidi.+ Mu nshiku sha ku mpela bakesa baletutuma kuli Yehova kabili bakalafwaya ukuti abapaale.+
4 Umfweni icebo ca kwa Yehova, mwe bena Israele,
Pantu Yehova nakwata umulandu wa kupeela abekala mu calo,+
Pantu mu calo tamuli icine nangu ukutemwa ukushipwa nangu ukwishiba Lesa.+
2 Muli imilapo ya bufi, ukubepa+ no kwipaya+
Kabili ukwiba no kucita ubucende+ nafifula sana,
Na kabili, abantu tabaleka ukusumya umulopa wa bantu banabo.+
3 E mulandu wine icalo ici cikaloosesha+
Abekala mu calo bonse bakapomponteka;
Inama mpanga ne fyuni fya mulwelele,
Kumo ne sabi lya muli bemba, fikaloba.
4 “Lelo kwiba nangu umo uwa kukansana no munankwe nelyo uwa kulungika umunankwe,+
Pantu abantu bobe baba nga abantu abalekansana na shimapepo.+
5 E ico ukaipununa mu nshita ya kasuba,
Kabili kasesema na o akaipunwina pamo na iwe, kwati ni mu nshita ya bushiku.
Kabili nkalofya noko.
6 Abantu bandi bakaloba, pantu tabanjishiba.
Apo walikaana ukunjishiba,+
Na ine nkakukaana ukuba shimapepo wandi;
Kabili apo walilaba amafunde* ya kwa Lesa obe,+
Na ine nkalaba abana bobe abaume.
7 Ilyo bafulileko, e lyo bacililemo ukumembukila.+
Nkaalula ubukata bwabo bukabe umuseebanya.*
8 Balya ifya pa lubembu lwa bantu bandi,
Kabili balafwaisha ukucita imembu.
9 “Ifyo cikaba ku bantu e fyo cikaba na kuli shimapepo;
Nkabalubulwisha pa fyo bacita,
Kabili ifyo nkabacita fikalingana ne fyo bacita.+
12 Abantu bandi baile mu kwipusha utulubi twabo utwa fimuti,
Bacita ifyo inkonto yabo* ibeba;
Pantu umupashi wa bucilende* ulabalufya,
Kabili pa mulandu wa bucilende* bwabo balakaana ukunakila Lesa wabo.
13 Batuulila amalambo pa muulu wa mpili,+
Kabili pa tupili e po bafutumwina amalambo,
Mwi samba lya fimuti ifyakosa nga nshi ne fimuti fya mulivene ne fimuti fyonse ifikalamba,+
Pantu mwaliba ifintelelwe ifisuma.
14 “Nshakalubulwishe abana benu abanakashi pa mulandu wa bucilende* bwabo,
Nangu banafyalenwe pa mulandu wa bucende bwabo.
Pantu abaume baya na bacilende
Kabili bapeelela amalambo pamo na bacilende ba pe tempele;
Abantu ba musango uyu abashiluka+ bakonaulwa.
Tamulingile ukwisa ku Gilgali+ nangu ku Bete-abene,+
Kabili tamulingile ukulapa amuti, ‘Napali Yehova!’+
16 Pantu filya ing’ombe iilume iyatalama yaba, e fyo na Israele atalama.+
Bushe nomba Yehova alabacema ngo mwana wa mpaanga pa ncende apaba umulemfwe?*
17 Efraimu natendeka ukupepa utulubi.+
Mulekeni abe!
Kabili intungulushi shabo* shalitemwa sana umuseebanya.+
5 “Umfweni ici mwe bashimapepo,+
Kutikisheni, mwe ba mu ng’anda ya kwa Israele,
Kutikeni mwe ba mu ng’anda ya mfumu,
Pantu ubu ubupingushi nimwe bukumine;
Pantu muli nge citeyo kuli Mispa
Kabili muli nge sumbu ilyo bateya pa Tabore.+
3 Efraimu nalimwishiba,
Kabili Israele tafisama kuli ine.
4 Ifyo bacita tafibasuminisha ukubwelela kuli Lesa wabo,
Pantu balacita sana bucilende;*+
Kabili Yehova tabamwishiba.
5 Icilumba ca kwa Israele nacimushinina;*+
Israele na Efraimu nabaipununa pa mulandu wa filubo fyabo.
Kabili Yuda na o naipununa pamo nabo.+
6 Baile ne mpaanga shabo ne ng’ombe shabo mu kufwaya Yehova,
Lelo tabamusangile.
Alibatalwike.+
Nomba no mweshi tawakapwe bakabalya* kumo no bupyani bwabo.*
8 “Lisha intandala+ mu Gibea, ne penga mu Rama!+
Welesha ukuwelesha kwa nkondo pa Bete-abene+—tuli na iwe, we Benjamini!
9 We Efraimu, ukaba ica kupapusha mu bushiku nkakukanda.+
Ninenga icikacitikila imikowa ya kwa Israele caishibikwa.
10 Bacilolo ba kwa Yuda baba nga basesha umupaka.+
Nkabapongolwela ubukali bwandi nga menshi.
11 Efraimu nabamutitikisha, kabili ubupingushi bwakwe nabulinga,
Pantu alefwaisha ukukonka umulwani wakwe.+
12 E ico nali nge cipelebesha ca bushiku kuli Efraimu
Kabili ngo kubola ku ba mu ng’anda ya kwa Yuda.
13 Ilyo Efraimu amwene ubulwele bwakwe, na Yuda amona icilonda cakwe,
Efraimu aile ku Asiria+ kabili atumine inkombe ku mfumu nkalamba.
Lelo yalifililwe ukumundapa,
Kabili yalifililwe ukundapa icilonda cenu.
14 Pantu ine nkaba nge nkalamo iyana kuli Efraimu,
Kabili nkaba nge nkalamo iyakosa* ku ba mu ng’anda ya kwa Yuda.
15 Nkaya, kabili nkabwelelamo ku cifulo candi mpaka bakakandwe pa filubo fyabo,
Ilyo bakaba na mafya, bakamfwaya.”+
Natupumaula, lelo akatukakila ifilonda.
2 Akalenga tukabe aba mweo pa numa ya nshiku shibili.
Pa bushiku bwalenga shitatu akatwimya,
Kabili akalenga tukabe aba mweo pa cinso cakwe.
3 Tukeshiba, tukafwaisha ukwishiba Yehova.
Nga filya fine akasuba katula ulucelo nangu cibe shani e fyo akesa;
Akesa kuli ifwe nge mfula iilefumfumuka,
Nge mfula ya kulekelesha iitapilila isonde.”
4 “Cinshi ningakucitila, we Efraimu?
Cinshi ningakucitila, we Yuda?
Pantu ukutemwa ukushipwa uko utila walikwata kwaba nga makumbi ya lucelo,
Kabili ngo mume uukuntika bwangu.
Kabili ifyo nkamupingula fikabengeshima ngo lubuuto.+
6 Pantu ukutemwa ukushipwa e ko natemwa,* te malambo,
Kabili ukwishiba Lesa e ko natemwa, te mituulo ya koca.+
7 Lelo bena, balipula mu cipangano nga filya abantu bambi bacita.+
Mu calo cabo e mo bampondokela.
9 Ibumba lya bashimapepo lyaba nge fipondo ifibelamina abantu pa kuti fibapoke ifipe.
Balepaya abantu mu musebo pa Shekemu,+
Pantu ifyo bacita fya nsoni.
10 Nalimona ica bunani mu ng’anda ya kwa Israele.
11 Na kabili, ninkupimina inshita ya kusombola we Yuda,
Ilyo nkabwesha abantu bandi ukufuma muli bunkole.”+
7 “Nga nafwaya ukundapa Israele,
E lyo icilubo ca kwa Efraimu naco cisokoloka,+
E lyo ne fyabipa ifyo Samaria acita.+
Pantu balabepa;+
Abapuupu balengila mu mayanda kabili ifipondo ifipokolola ifipe filasansa abali panse.+
2 Lelo mu mitima yabo tabatontonkanya ukuti nkebukisha ifyabipa fyonse ifyo bacita.+
Nomba ifyo bacita nafibashinguluka;
Fili pa ntanshi yandi.
3 Balalenga imfumu yasekelela pa fyabipa ifyo bacita,
Kabili balalenga bacilolo basekelela pa mulandu wa bucenjeshi bwabo.
4 Bonse fye bacende,
Baba nge citofu ico uupanga umukate akafishe,
Ico aleka ukusonkeleshako pa numa ya kukasa umufuba mpaka umufuba watutumuka.
Naifungulwila aba miponto ukuboko kwa iko.
6 Pantu bapalama ne mitima iyaba nge citofu.*
Uupanga umukate alaala ubushiku bonse;
Ulucelo umulilo mu citofu ulebilima.
8 Efraimu alaisakanya mu nko.+
Efraimu aba nga keke iyabulungana iyo bashipilibwile.
9 Abeni bakwe balimupwisha amaka,+ lelo taishiba.
Imfwi shakwe nashilenga mu mutwe mwabuuta tuutu, ukwabula ukuti eshibe.
10 Icilumba ca kwa Israele nacimushinina,+
Lelo tababwelela kuli Yehova Lesa wabo,+
Kabili tabamufwaya te mulandu ne fi fyonse.
11 Efraimu aba nge nkunda iyatumpa, iishakwata amano.*+
Balilila kuli Egupti;+ baliya kuli Asiria.+
12 Konse uko bakaya nkabafungulwila isumbu lyandi.
Nkabaponesha panshi nge fyuni fya mu muulu.
Nkabasalapula ukulingana ne fyo ulukuta lwabo lwasokelwe.+
13 We bulanda kuli bena, pantu balimbutuka!
Balabapoka ifipe, pantu balapula mu mafunde yandi!
Nali pa kubalubula, lelo balalanda ifya bufi pali ine.+
Baleitetaula pa mulandu wa ngano shabo no mwangashi uupya;
Balampondokela.
15 Nangu ca kuti nalibasalapwile kabili nalikoseshe amaboko yabo,
Balimpondokela pantu balampangila ifyabipa.
16 Balyalwike, lelo taba-alukile ku fisuma;*
Bali ngo buta ubwanenuka ubo umuntu ashingashintililapo.+
Bacilolo babo bakabacimfisha ku lupanga pa mulandu wa kuti ululimi lwabo lwaba ne cilumba.
Ici cikalenga bakalebapumya mu calo ca Egupti.”+
8 “Bika intandala ku kanwa kobe!+
Umulwani esa nga kapumpe uwafookela pa ng’anda ya kwa Yehova,+
Pantu nabatoba icipangano candi+ kabili nabapula mwi funde lyandi.+
2 Balilila kuli ine abati, ‘Mwe Lesa wesu, ifwe fwe bena Israele twalimwishiba!’+
Lekeni umulwani amukunkunike.
4 Nabaisontela imfumu, lelo tabapitiile muli ine.
Nabaisontela bacilolo, ukwabula ukuti ine nsuminisheko.
5 We Samaria, umwana obe uwa ng’ombe umulume nabamukaana.+
Ubukali bwandi nabubemina.+
Ni lilali bakaleka ukufilwa ukuba aba kaele?*
6 Pantu afuma kuli Israele.
Umuntu uwaishiba sana ifya kupangapanga e wamupangile, kabili te ka Lesa ka cine;
Umwana wa ng’ombe umulume wa kwa Samaria akashala fye tupimfya tupimfya.
Takwaba ingano ishifumya imitwe;+
Nga kwaba ishapuuka takufuma ubunga.
Nga kukaba ishikafumya ubunga, abantu ba ku calo cimbi* e bakabulya.+
Nomba bakasalanganina mu nko,+
Kwati cipe ico bashilefwaya.
9 Pantu nabaya ku Asiria,+ nge mpunda ya mpanga iyenda yeka.
Efraimu nalipila bacilende.+
10 Nangu ca kuti balipila bacilende ba mu nko shimbi,
Ndi no kubalonganya;
Bakatendeka ukucula+ pa mulandu ne cisendo ico imfumu na bacilolo bakabikako.
11 Pantu Efraimu ali-ifushisha ifiipailo ifyalenga alebembuka.+
Fyalisanguka ifipailo fyakwe kabili fyalilenga alebembuka.+
Nomba akebukisha icilubo cabo kabili akabakanda pa membu shabo.+
14 Israele alilaba uwa Mupangile+ kabili alikuula amatempele,+
Kabili Yuda alifusha imisumba ya malinga ayakosa.+
Lelo nkatuma umulilo mu misumba yakwe,
Kabili ukooca impungu mu musumba umo na umo.”+
Pantu pa mulandu wa bucilende* walifuma kuli Lesa obe.+
Walitemwa amalipilo ya muli bucilende pa fya kupuminapo ingano fyonse.+
2 Lelo takwakabe ifya kulya fya kuti bakalelya ifikafuma apa kupumina ingano no mwa kukamina imyangashi,
Kabili takakwate umwangashi uupya.+
3 Tabakatwalilile ukwikala mu calo ca kwa Yehova;+
Lelo Efraimu akabwelela ku Egupti,
Kabili mu Asiria e mo bakaliila ifishasanguluka.+
Baba kwati mukate wa kuloosha;
Bonse abakalya uyu mukate bakaikowesha.
Pantu umukate wabo, wabo fye;*
Tabakautwale mu ng’anda ya kwa Yehova.
6 Pantu moneni! bakafulumuka pa mulandu wa bonaushi.+
Egupti akabalonganya+ kabili Memfisi akabashiika.+
Kaenya ikamena kabili ikafimbilikisha ifintu fyabo ifisuma sana ifya silfere,
Kabili mu matenti yabo mukamena ifimpusa fya myunga.
Kasesema wabo akaba iciwelewele, kabili kasesema wa bufi akapena;
Pantu ifilubo fyenu nafifula sana, kabili ubulwani bwenu nabukula sana.”
8 Kalinda+ wa mu Efraimu aali na Lesa wandi.+
Lelo nomba inshila sha bakasesema shonse+ shili nge nkose sha wikata ifyuni;
Mu ng’anda ya kwa Lesa wa kwa kasesema muli ubulwani.
9 Balicita sana ifyabipa ifikalenga bakonaulwe, nga filya abaleikala mu Gibea balecita.+
Akebukisha icilubo cabo kabili akabakanda pa membu shabo.+
10 “Israele namusangile nge myangashi mu matololo.+
Ifikolwe fyenu nafimwene nga makunyu ya kubalilapo ku cimuti ca mukunyu.
Lelo baile kuli Baali wa ku Peore;+
Baipeeleshe ku cintu ca nsoni,*+
Kabili baishileba ica bunani nga filya icintu ico batemenwe cali.
12 Nangu fye bakakushe abana,
Nkalenga bakafwilwe pa kuti pekashala umwaume nangu umo;+
Cine cine bakaba no bulanda ilyo nkabasha!+
13 Efraimu uwalimbwa mu mpanga ya mulemfwe, ine nalemumona nga Turi;+
Nomba Efraimu alingile ukutwala abana bakwe ku wa kubepaya.”
14 Mwe Yehova, bapeeleni ico mufwile ukubapeela,
Bapeeleni icisa iciponya amafumo na mabele ayabulamo umukaka.*
15 “Ifyabipa fyabo fyonse baleficitila mu Gilgali,+ kulya kwine e ko nabapatiile.
Nkabatamfya mu ng’anda yandi pa mulandu ne fyabipa ifyo bacita.+
Nshakatwalilile ukubatemwa;+
Bacilolo babo bonse balitalama.
Umushila wabo ukooma, kabili tabakatwale ifisabo.
Nangu ca kuti bakakwata abana, nkepaya aba bana abo bakatemwa.
10 “Israele mwangashi uuleonaika* uuletwala ifisabo.+
Ilyo ifisabo fyakwe fyafulilako, ne fipailo fyakwe nafyo filafulilako;+
Impanga yakwe nga yatwala sana, ifimabwe fya kupepelapo ifyo babika nafyo filawaminako.+
Kuli uukatobaula ifiipailo fyabo kabili uukonaula ifimabwe fyabo ifyaimikwa.
3 Nomba bakalanda abati, ‘Tatwakwata imfumu,+ pantu tatutiina Yehova.
Kabili cinshi imfumu ingatucitila?’
4 Balanda amashiwi ya fye, balalapa imilapo ya bufi,+ kabili balapangana ifipangano;
E ico ubupingushi ubukesa pali bena bukaba nge nseku ishimena mu tumifoolo twa mwi bala ishakwata sumu.+
5 Abekala mu Samaria bakomfwa umwenso pa mulandu ne fikacitikila akalubi ka mwana wa ng’ombe aka ku Bete-abene.+
Abantu bakako bakakaloosha,
Bashimapepo ba kalesa ka ku calo cimbi abalesekelela pali kena, na pa mulandu wa bukata ubo kakwete, nabo bakaloosha,
Pantu bakakasenda bunkole.
6 Bakakaleta ku Asiria pa kuti kakabe ica bupe ca mfumu iikalamba.+
Efraimu akekatwa insoni,
Kabili Israele na o akekatwa insoni pa mulandu na mano ayo bamupandile ayo akonkele.+
8 Ififulo fya kupepelapo ifya mu Bete-abene,+ e kutila ulubembu lwa kwa Israele,+ fikaloba.+
Imyunga na ficilasa fikamena pa fiipailo fyabo.+
Abantu bakeba impili abati, ‘Tufimbilikisheni!’
Kabili bakeba utupili abati, ‘Tuponeneni!’+
9 Ukufuma mu nshiku sha mu Gibea,+ walibembuka we Israele.
Mulya e mo batwalilile fye ukuba ifyo bali.
Inkondo tayasangile* abalecita ifishalungama mu Gibea.
10 Kabili nkabasalapula ilyo nkatemwa.
Kabili abantu aba mu nko shalekanalekana bakalongana pa kuti bakabalwishe,
Ilyo bakabakulika ku filubo fyabo fibili.*
11 Efraimu aali mwana wa ng’ombe uo basambilishe uwatemenwe ukupuma ingano,
E ico nshakontwele umukoshi wakwe uusuma.
Nomba nkalenga umo akanine pali Efraimu.*+
Yuda akalima; Yakobo akamulimawila umushili.
12 Itandileni imbuto mu bulungami kabili musombole ukutemwa ukushipwa.
Ilimineni ibala+
Ilyo kucili nshita ya kufwaya Yehova,+
Mpaka akese kabili akamusambilishe mu bulungami.+
13 Mwalibyala ifyabipa,
Mwasombola ifishalungama,+
Mwalilya ifisabo fya bucenjeshi;
Pantu mwacetekela ifyo mucita,
Kabili mwacetekela abashilika benu abaishibisha ukulwa abengi.
14 Pa bantu bobe pakesaba icongo ca nkondo,
Kabili imisumba yobe yonse iya malinga ayakosa ikonaulwa,+
Nga filya fine Shalmani aonawile ing’anda ya kwa Arbele,
Mu bushiku bwa nkondo ilyo banacifyashi babasansawilile pamo na bana babo.
15 Ifi e fyo bakamucita mwe ba ku Betele,+ pa mulandu wa kuti mwalicilamo ukucita ifyabipa.
Imfumu ya mu Israele bakailofya ku macaca.”+
Batwalilile ukutuula ifilubi fya kwa Baali amalambo+
Kabili ifimpashanya ifyapangwa,+ balefituula amalambo.
3 Lelo nine nasambilishe Efraimu ukwenda,+ nalebasendela pa maboko yandi;+
Kabili tabasumine ukuti nalibondepe.
4 Pa kubakula nalebomfya imyando ya bantunse* ne myando ya kutemwa;+
Kabili nali kuli bena ngo ulefumya ikoli pa nsekete shabo,
Kabili nali ne cikuuku ilyo naleletela cila muntu ifya kulya.
6 Kabili ulupanga lukasansa imisumba yakwe+
Kabili lukonaula imipindo yakwe no kubongolola imisumba yakwe pa mulandu wa mapange yabo ayabipa.+
7 Abantu bandi balemenena ku kukanaba aba cishinka kuli ine.+
Nangu ca kuti balibetile ku wasumbukisha,* takwaba nangu umo uwima.
8 Kuti nakuleka shani we Efraimu?+
Kuti nakulekelesha shani we Israele?
Kuti nakucita shani nge fyo nacitile Adma?
Kuti nalenga shani waba nga Seboimu?+
Umutima wandi nawaluka;
Pa nshita imo ine ninkulangulukilako sana.+
9 Nshakabubuke mu bukali.
Nshakabwekeshepo ukonaula Efraimu,+
Pantu ine nine Lesa, nshili muntu,
Ndi wa Mushilo uuli na imwe;
Kabili nshakamwishile mu bukali.
10 Bakakonka Yehova, kabili akabuluma nge nkalamo;+
Ilyo akabuluma, abana bakwe bakesa baletutuma ukufuma ku masamba.+
11 Bakesa baletutuma kwati cuni ukufuma ku Egupti,
Kwati ni nkunda ukufuma ku calo ca Asiria;+
Kabili nkalenga bakekale mu mayanda yabo,” e fyo Yehova alanda.+
12 “Efraimu anjeba fye ifya bufi,
Konse uko nalolesha imona ubucenjeshi+ bwa ba mu ng’anda ya kwa Israele.
12 “Efraimu alelya umwela.
Apepeka umwela wa ku kabanga akasuba konse.
Alabepa sana kabili alacita sana ulukaakala.
Bapangana icipangano na Asiria,+ kabili batwala amafuta ku Egupti.+
2 Yehova nakwata umulandu wa kulubulwisha Yuda;+
Akalubulwisha Yakobo ukulingana ne nshila shakwe,
Kabili akamupingula ukulingana ne fyo acita.+
4 Atwalilile ukushashala na malaika kabili alicimfishe.
Alililile no kupaapaata pa kuti bamupaale.”+
Lesa amusangile ku Betele, kabili kulya kwine e ko Lesa alandiile na ifwe,+
Yehova e shina lya kumwibukishishako.+
6 “E ico bweleleni kuli Lesa wenu,+
Mutwalilile ukuba no kutemwa ukushipwa no mulinganya,+
Kabili lyonse mulesubila muli Lesa wenu.
Muli fyonse ifyo nabombesha, tabakasangemo icilubo nelyo ulubembu.’
9 Lelo ine nine Yehova Lesa obe ukutula ilyo wali mu calo ca Egupti.+
Nkalenga ukekale mu matenti na kabili
Nga filya waleikala mu nshiku ishapimwa.*
10 Nalilandile na bakasesema,+
Nalibafushishe ifimonwa,
Nalilandile imilumbe ukupitila muli bakasesema.
11 Mu Gileadi mwaba ubucenjeshi*+ no bufi,
Mu Gilgali e mo batuula amalambo ya ng’ombe ishilume,+
Kabili ifipailo fyabo fyaba nge miina ya mabwe mu tumifoolo twa mwi bala.+
12 Yakobo afulumukiile ku mpanga ya Aramu;+
Kulya kwine e ko+ abombeele pa kuti bamupeele umwanakashi wa kuupa,+
Kabili alicemene impaanga+ pa kuti bamupeele umwanakashi wa kuupa.
13 Yehova abomfeshe kasesema pa kufumya Israele mu Egupti,+
Kabili abomfeshe kasesema pa kumucingilila.+
14 Efraimu alikalifye sana Lesa;+
Umulandu wa mulopa waba pali ena;
Shikulu wakwe akamukanda pa museebanya wakwe.”+
Lelo aishilekwata umulandu wa kupepa Baali+ kabili alifwile.
2 Nomba ku membu shabo nabalundako na shimbi
Kabili kuli silfere+ yabo balapangako ifimpashanya fya cela;*
Balicenjela mu kupanga ifilubi, ifyo abaume abaishiba sana ifya kupangapanga bapanga.
Balanda abati, ‘Lekeni abaume abapeela amalambo batomone abana ba ng’ombe.’+
3 E ico bakaba nga makumbi ya lucelo,
Ngo mume uukuntika lucelocelo,
Nge misungu ya apa kupumina ingano iyo icimwela icikalamba culula.
Kabili nge cushi icifumina pa cipunda ca mu mutenge.
4 Lelo ine nine Yehova Lesa obe ukutula fye ilyo wali mu calo ca Egupti;+
Takwali Lesa umbi uo waishibe kano ine,
Kabili takwaba umupusushi umbi ukucila pali ine.+
5 Nalikwishibe ilyo wali mu matololo,+ mu calo umwali icilala.
E ico balindabile.+
8 Nkabeshila nga bere uulufishe abana,
Kabili nkabalepaula ififuba.
Kulya kwine e ko nkabaliila nge nkalamo;
Iciswango ca mu mpanga cikabasantaula.
9 Cikakonaula we Israele,
Pantu walinjalukila, ne kaafwa obe.
10 Nomba bushe imfumu yobe ili kwi, pa kuti ikupusushe mu misumba yobe yonse,+
Kabili intungulushi* shobe shili kwi, isho walandilepo auti,
‘Mpeeleni imfumu na bacilolo’?+
12 Icilubo ca kwa Efraimu nacipombwa,
Ulubembu lwakwe nalusungwa.
13 Ukucula kwa pa kupaapa kukamwishila.
Lelo mwana uushakwata amano;
Takafwaye ukufyalwa ilyo inshita ya kuti afyalwe ikafika.
We Mfwa, ulubola lobe luli kwi?+
We Nshiishi, amaka yobe ayakonaula yali kwi?+
Nshakabomfwile uluse.
15 Nangu fye akatwalishe nga matete,
Umwela wa ku kabanga ukesa, umwela wa kwa Yehova,
Ukafuma ku ciswebebe kabili ukesakamya icishima cakwe na kamfukumfuku kakwe.
Ukesapoka ifipe fyakwe fyonse ifisuma.+
16 Samaria akaba no mulandu,+ pantu alipondokela Lesa wakwe.+
Bakabepaila ku lupanga,+
Abana babo bakabasantaula,
Kabili abanakashi babo abali na mafumo bakabatumbula.”
2 Bweleleni kuli Yehova na aya mashiwi,
Mumwebe amuti, ‘Tweleleni pa fyo tulufyanya+ kabili pokeleleni icisuma,
Kabili tukamulumbanishisha ku milomo yesu+ nga filya twingatuula abana ba ng’ombe abalume.
Tatwakendele pali bakabalwe,+
Kabili tatwakatwalilile ukweba ico iminwe yesu yapanga atuti: “Nimwe Lesa wesu!”
Pantu nimwe mumfwila abana abashakwata bashibo uluse.’+
4 Nkabondapa pa kuti bakaleke ukukanaba ne cishinka.+
5 Nkaba ngo mume kuli Israele;
Akabalula nge luba
Kabili imishila yakwe ikaya sana panshi nge fimuti fya mu Lebanone.
6 Utumisambo twakwe tukakula,
Akalamoneka bwino nga filya icimuti ca muolife cimoneka,
Kabili akalanunkila nga filya icimuti ca mu Lebanone cinunkila.
7 Bakekala mu cintelelwe cakwe na kabili.
Bakalima ingano kabili bakabalula ngo mwangashi.+
Bakalumbuka* nga filya umwangashi wa mu Lebanone walumbuka.
8 Efraimu akalanda ati, ‘Bushe nomba utulubi twa nshi kuli ine?’+
Nkamwasuka kabili nkalamulinda.+
Nkafumba nge cimuti ca mukupri.
Muli ine e mo ukalasanga ifisabo fyobe.”
9 Nani uwa mano? Lekeni omfwikishe ifi fintu.
Nani uwiluka? Lekeni afishibe.
Pantu inshila sha kwa Yehova shalilungama,+
Kabili abalungama bakendamo;
Lelo bampulamafunde bakaipununa muli ishi inshila.
E fyo balemba ishina lya kuti Hoshaya mu kwipifya, ilyalola mu kuti “Jah Eupuswishe; Jah Napususha.”
Nelyo “umulalelale.”
Nelyo “mu bulalelale.”
Nelyo “no bulalelale.”
Ilyalola mu kuti “Lesa Akatanda Imbuto.”
Nelyo “Mu Mpanga Iyabatama Iya Yesreele.”
Ilyalola mu kuti “Tabamubeleele Uluse.”
Ilyalola mu kuti “Te Bantu Bandi.”
Mu ciHebere, “abana ba kwa Israele.”
Moneni futunoti pali Hosea 1:9.
Moneni futunoti pali Hosea 1:6.
Nelyo “mu bulalelale.”
Nelyo “ubulalelale.”
Nelyo “Impanga Iyabatama Iya Akore.”
Nelyo “Baali Wandi.”
Nelyo “bakaleikala.”
Ilyalola mu kuti “Lesa Akatanda Imbuto.”
Moneni futunoti pali Hosea 1:6.
Moneni futunoti pali Hosea 1:9.
E kutila, amakeke ayo balebomfya mu mipepele ya bufi.
Muli homa imo mwaleingila ifingengila mu cipe ca malita 220. Moneni Ifyebo Fyalundwako pa B14.
Nelyo “taufwile ukulacita ubulalelale.”
Mu ciHebere, “pa nshiku ishingi.”
Nelyo “tulesa twa mu ng’anda.”
Nelyo “ifya kukonka.”
Nelyo kuti yapilibula no kuti, “balyalula ubukata bwandi bwaba umuseebanya.”
Nelyo “bakaba sana ne mibele yabipa; bakalacita ubulalelale.”
Nelyo “ubulalelale; Ukuipoosaika.”
Mu ciHebere, “filasenda umutima.”
Nelyo “inkoto ya uubuka.”
Nelyo “ubulalelale; ukuipoosaika.”
Nelyo “ubulalelale; ukuipoosaika.”
Nelyo “ubulalelale; baipoosaikila.”
E kutila, abakashi ba bana babo.
Nelyo “ubulalelale; ukuipoosaika.”
Nelyo “ubulalelale; ulaipoosaika.”
Mu ciHebere, “pa ncende iikalamba?”
Nelyo “ubwalwa bwa ngano.”
Nelyo “balaba sana ne mibele yabipa; balacita ubulalelale.”
Mu ciHebere, “inkwela shabo.”
Nelyo “ukamululula.”
Nelyo “abalewa.”
Nelyo “ulacita sana ifyabipa; ulacita bucilende.”
Nelyo “ubulalelale; balaipoosaika.”
Mu ciHebere, “nabamushinina pa cinso cakwe.”
Mu ciHebere, “nomba umweshi ukabalya.”
Nelyo “amabala yabo.”
Nelyo “inkalamo iyana iya masense.”
Mu ciHebere, “bakafwaya icinso candi.”
Nelyo “uluse elo natemwa.”
Nelyo kuti yapilibula no kuti, “ilyo bapalama balaba no bucenjeshi no bufi kabili imitima yabo yaba nge citofu.”
Mu ciHebere, “bakapingula babo.”
Mu ciHebere, “iishakwata umutima.”
E kutila, taba-alukila ku mipepele iisuma.
Nelyo “abasanguluka.”
Nelyo “abantu bambi bambi.”
Nelyo “ifyaba mu fyakukonka fyandi.”
Nelyo kuti yapilibula no kuti, “bakabwelela.”
Nelyo “ubulalelale; ukuipoosaika.”
Nelyo “wa myeo yabo.”
Nelyo “pa mutebeto wenu uwasalwa.”
Nelyo “lesa wa nsoni.”
Nelyo “ayapapa.”
Nelyo kuti yapilibula no kuti, “uuletabilila.”
Mu ciHebere, “walitelela.”
Nelyo “tayabonawile umupwilapo.”
E kutila, ilyo bakakandwa kwati bali kwi koli.
Nelyo “akakulike Efraimu kwi koli.”
Abalebeta ni bakasesema na bantu bambi abo baletuma mu kusambilisha abena Israele.
Nelyo “imyando ya cikuuku nga ilya iyo abafyashi babomfya.”
E kutila, ku mipepele iyasumbukisha.”
Nelyo “acili ale-enda na Lesa.”
Nelyo kuti yapilibula no kuti, “mu nshita ya mutebeto.”
Nelyo “ifinjelengwe.”
Nelyo “ifimpashanya ifyaengwa.”
Mu ciHebere, “bakapingula.”
Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
Mu ciHebere, “bakalabebukisha.”