YOELE
1 Aya e mashiwi ayo Yehova aebele Yoele* umwana wa kwa Petuele:
Bushe ica musango uyu calicitikapo mu nshiku shenu
Nelyo mu nshiku sha fikolwe fyenu?+
3 Shimikileniko abana benu,
Pa kuti nabo bakashimikileko abana babo,
E lyo abana babo nabo bakashimikileko aba mu nkulo iikakonkapo.
4 Ifilimwa ifyo makanta wa kubalilapo asha, makanta uukonkelepo alya;+
Ifyo uyu makanta asha, abana ba makanta balya.
Kabili ifyo abana ba makanta basha, makanta wa kulekeleshako alya.+
5 Buukeni, mwe bacakolwa,+ kabili lileni!
Pumenipo imisowa bonse mwe banwa umwangashi,
Pantu tamukwete umwangashi uwalowa.+
6 Pantu kuli uluko ulwishile mu calo candi, ulwa maka icine cine kabili ulo umuntu nangu umo ashingapenda.+
Lwakwata ameno nga aya nkalamo+ ne mibango nge ya nkalamo.
7 Nalonaula imyangashi yandi kabili lushiile imikunyu yandi ifishiki,
Nalupulula fye fyonse no kufipoosa,
Ica kuti imisambo ya fiko ishele fye tuutu.
9 Nabaleka ukutuula umutuulo wa ngano+ no mutuulo wa mwangashi+ mu ng’anda ya kwa Yehova;
Bashimapepo ababomfi ba kwa Yehova, baleloosha.
10 Amabala nabayonaula, umushili uleloosha;+
Pantu ifilimwa nabafyonaula, umwangashi naupwa na mafuta nayapwa.+
11 Abalimi nabasakamana, ababombela mu mabala ya myangashi baleloosha,
Pa mulandu wa kuti takuli ingano na barle;
Pantu mu mabala tamuli ifya kusombola.
12 Imyangashi nayuma,
Imikunyu nayo naibonsa.
Imipomegranate, utuncindu ne miapele,
Ifimuti fyonse fye ifya mwi bala nafyuma;+
Pantu abantu abalesekelela bali ne nsoni.
Mwe babomfi ba kwa Lesa wandi ingileni, kabili mulaale ninshi namufwala insamu
Pantu abantu balileka ukutuula imituulo ya ngano+ ne ya fya kunwa+ mu ng’anda ya kwa Lesa wenu.
14 Bilisheni ukuti abantu batendeke ukufunga; kabili balongane ukulongana ukwacindama.+
Longanyeni abakalamba bonse kumo na bekala mu calo bonse,
Ku ng’anda ya kwa Yehova Lesa wenu,+ kabili mulilile kuli Yehova pa kuti amwafwe.
15 Ala cikabipa sana bulya bushiku!
Ubushiku bwa kwa Yehova nabupalama,+
Pali bulya ubushiku Uwa Maka yonse akaleta ubonaushi!
16 Twali-imwena na menso ukuti balitupoka ifya kulya,
Kabili abantu balileka ukusekelela no kwanga mu ng’anda ya kwa Lesa wesu.
Mu matala tamuli nangu cimo.
Ifyo basungilamo ingano nabafyonaula, pantu ingano mu mabala nashonaika.
18 Nangu fye fitekwa fileloosha!
Imikuni ya ng’ombe ilelulumba fye mu cimfulumfulu, pantu takuli umulemfwe wa kuti shilye!
Kabili imikuni ya mpaanga nayo ilecula.
19 Nkalilila+ kuli imwe, mwe Yehova;
Pantu umulilo naoca umulemfwe wa mu matololo,
Kabili ulubingu naloca ifimuti fyonse ifya mu mpanga.
20 Nangu fye ni nama sha mu mpanga shilelilila kuli imwe,
Pantu utumilonga twa menshi natukama
Kabili umulilo naoca umulemfwe wa mu matololo.”
Welesheni ukuwelesha kwa nkondo mu lupili lwandi ulwa mushilo.
Lekeni abekashi ba mu calo* bonse batutume,
Pantu ubushiku bwa kwa Yehova buleisa!+ Kabili nabupalama!
2 Bushiku bwa mfifi kabili ubwafiita fititi,+
Bushiku bwa makumbi kabili ubwafiitisha,+
Kwati lubuuto lwa ku macaca ulusanike pa mpili.
Kuli abantu abengi kabili aba maka;+
Takwatala akuba abantu abafula nga aba,
Kabili takwakatale akuba
Mu nkulo shonse.
Icalo ico baleingilamo caba nge bala lya Edeni,+
Lelo ilyo bafumamo cashala nga matololo umushaba akantu nangu kamo,
Kabili takuli icintu nangu cimo icingapusuka.
5 Icongo cabo ilyo baletolauka pa muulu wa mpili+ ciba nge ciunda ca maceleta,
Kabili cumfwika ngo kubilima kwa mulilo uuleoca icani.
Baba nga baume aba maka, abaleipekanya ukuya ku nkondo.+
6 Bakalenga abantu abengi bakacule.
Kabili bakalenga bonse bakabe no mwenso.
7 Babutuka nga baume aba maka,
Banina ifibumba nga bashilika,
Nga balebutuka cila mushilika alungama fye uko aleya,
Kabili bonse tabapaasuka.
8 Pa kubutuka tabasunkana;
Takuba uupaasuka.
Nga ca kuti bamo babepaya,
Abashala batwalilila fye ukubutuka.
9 Balabutukila mu misumba, balabutuka pa fibumba.
Balanina pa mayanda, kabili bengilila pa mawindo kwati bapuupu.
10 Balalenga icalo catenkaana ne myulu yasunkaana.
Akasuba no mweshi fyafiita,+
Kabili intanda nasho shaleka ukusanika.
11 Yehova akasanswila ishiwi lyakwe pa ntanshi ya bashilika bakwe,+ pantu ibumba lyakwe ilya bashilika likalamba sana.+
Pantu Lesa uulecita ifyo alefwaya wa maka;
Pantu ubushiku bwa kwa Yehova bukalamba kabili bwa kutiinya icine cine.+
Nani engabushipikisha?”+
12 Yehova aletila, “na pali ino ine nshita, bweleleni kuli ine ne mitima yenu yonse,+
Fungeni,+ lileni kabili pumenipo imisowa.
13 Lepuleni imitima yenu,+ mwilepula ifya kufwala,+
Kabili bweleleni kuli Yehova Lesa wenu,
Pantu wa cikuuku* kabili wa luse, alakokola ukukalipa+ kabili aliba sana no kutemwa ukushipwa,+
Kabili takamuletele amacushi* ayo ali no kumuletela.
14 Nani eshibe nalimo Lesa akaaluka kabili takamuletele amacushi+
Lelo akamupaala,
Pa kuti mwingatuulila Yehova Lesa wenu umutuulo wa ngano no mutuulo wa fya kunwa?
15 Lisheni ipenga mu Sione!
Bilisheni ukuti abantu batendeke ukufunga; kabili balongane ukulongana ukwacindama.+
16 Longanyeni abantu; sangululeni ulukuta.+
Longanyeni abaume abakalamba, abana no tunya.+
Lekeni shibwinga afume mu muputule wakwe uwa mu kati, lekeni nabwinga na o afume mu muputule wakwe uwa bunabwinga.
17 Pa kati ka muputule wa kwingililapo ne ciipailo+
E po bashimapepo, ababomfi ba kwa Yehova balilile, kabili batile:
‘Mwe Yehova, umfwileni abantu benu* uluse;
Mwileka abantu baleseka abantu benu,
Mwileka abena fyalo baleteka abantu benu
Cinshi mwingalekela abantu balalanda abati: “Ali kwi Lesa wabo?”’+
19 Yehova akaasuka abantu bakwe ati:
‘Moneni namutumina ingano no mwangashi uupya na mafuta,
Kabili mukekuta sana+
Nshakaleke abantu ba mu nko+ bakatwalilile ukumuseka.
20 Nkatamfisha abalwani benu aba ku kapinda ka ku kuso ukutali;
Nkabasalanganishisha mu calo icauma kabili icashala icibolya,
Abashilika babo aba ku ntanshi nkabasalanganishisha kuli bemba wa ku kabanga*
E lyo abashilika babo aba ku numa nkabasalanganishisha kuli bemba wa ku masamba.*
Ifitumbi fyabo fikalanunka
Kabili fikalanunka piipi mpanga yonse;+
Pantu Lesa akacita ifintu ifikalamba.’
21 Witiina we calo.
Sekelela kabili anga pantu Yehova akakucitila ifintu ifikalamba.
22 Mwitiina mwe nama sha mu mpanga,
Pantu mu matololo mukaba umulemfwe uuteku,+
Kabili ifimuti fikatwala ifisabo;+
Imikunyu ne myangashi ikatwalisha.+
23 Mwe bantu ba mu Sione,* sekeleleni kabili angeni pa fyo Yehova Lesa wenu+ akacita;
Pantu akamupeela imfula ya kubangilila iyalinga,
Kabili akalenga mukalekwata imfula iikalamba,
Akalamupeela imfula ya kubangilila ne ya kulekeleshako, nga fintu alemupeela kale.+
24 Apakupumina ingano pakesula ingano ishisuma,
Kabili ifya kukaminamo umwangashi uupya fikalapala, ne fya kukaminamo amafuta+ nafyo fine fikalapala.
25 Kabili nkamubwesesha fyonse ifyaonaike pa myaka iingi
Ifyo makanta wa kubalilapo aliile, ifyo makanta wa bubili aliile, ifyo abana ba makanta baliile ne fyo makanta wa kulekeleshako aliile,
E kutila ifyo abashilika bandi abo namutumiine+ baonawile.
26 Mukalalya ica kuti mukalaikuta,+
Kabili mukalalumbanya ishina lya kwa Yehova Lesa wenu,+
Uumucitiile ifipesha amano;
Abantu bandi tabakatale abaseebanapo na kabili.+
Abantu bandi tabakatale abaseebanapo na kabili.
28 Pa numa ya ifi nkapongolwela umupashi wandi+ pa bantu bonse,
Kabili abana benu abaume na bana benu abanakashi bakalasesema,
Abaume benu abakalamba bakalalota ifiloto,
Kabili abalumendo benu bakalamona ifimonwa.+
29 Muli isho nshiku nkapongolwela umupashi wandi
Na pa basha abaume na pa basha abanakashi abakalamombela.
31 Ilyo ubushiku bwa kwa Yehova+ ubukalamba kabili ubwa kutiinya bushilafika
Akasuba kakafiita kabili umweshi ukaaluka umulopa.+
32 Lelo bonse abalilila kuli Yehova no kulumbula ishina lyakwe bakapusuka;+
Pantu mu lupili lwa Sione na mu Yerusalemu mukaba abakapusuka,+ nga fintu Yehova alandile,
Abakapusuka bantu abo Yehova akalaita.”
3 “Pantu moneni! Mu nshiku shilya na pa nshita ilya,
Ilyo nkabwesha bankole ba mu Yuda na ba mu Yerusalemu,+
2 E lyo nkalonganya inko shonse
Kabili e mo nkashipingwila+
Pa mulandu ne fyo shalecita abantu bandi abena Israele, e kutila ubupyani bwandi,
Pantu shalibasalanganishishe mu nko,
Kabili shalyakenye+ icalo candi.
3 Pantu aba muli ishi inko balependwila ifipendwilo+ pa bantu bandi;
Baleshitisha abalumendo pa kuti balipile bacilende
Kabili baleshitisha abakashana pa kuti bashitemo umwangashi wa kuti banwe.
4 Kabili finshi namulufyanya,
Mwe bena Turi na bena Sidone na imwe mwe bekala mu fitungu fya baPelishiti?
Cinshi muncitila ifi apabula umulandu?
Nga muncita ifi apabula umulandu,
Nkangufyanya sana ukumukanda.+
5 Pantu mwalisenda silfere yandi na golde+ yandi,
Kabili ifyuma fyandi ifyawamisha mwafibika mu matempele yenu;
6 Kabili mwalishitisha abantu ba mu Yuda na ba mu Yerusalemu ku baGriki,+
Pa kuti mubatalushe ku calo cabo;
7 Moneni ndebabwesha uko mwabashitishe,+
Kabili nkalandula pa fyo mwacitile.
8 Nkapeela* abana benu abaume na bana benu abanakashi ku baYuda,+
Nabo bakabashitisha ku bena Sheba abekala ukutali,
Pantu Yehova umwine nalanda.
‘Ipekanyeni ukulwa inkondo! Cincisheni abaume ba maka!
Lekeni abashilika bapalame, lekeni bese balwe!+
10 Fuleni amaplao yenu yabe impanga, ne fya kutungwilako ifimuti fyenu fibe amafumo.
Lekeni uushakwata amaka alande ukuti: “Ndi wa maka.”
11 Mwe ba mu nko shonse ishili mupepi iseni mulongane pamo+ pa kuti mubafwe!’”
Mwe Yehova, twaleni abaume benu* aba maka kuli cilya cifulo.
12 “Lekeni inko shonse shiime, shise mu Mupokapoka* wa kwa Yehoshafati;
Pantu kulya kwine e ko nkapingwila inko+ shonse ishaba mupepi.
13 Pisheni icikwakwa mwi bala pantu ifilimwa nafipya.
Tentemukeni mwise munyantaule mu fya kukaminamo umwangashi, pantu nafiisula.+
Ifya kukaminamo filepala, pantu ifyabipa ifyo bacita fingi.
14 Abantu abengi nga nshi bali mu mupokapoka* wa bupingushi,
Pantu ubushiku bwa kwa Yehova nabupalama ku mupokapoka* wa bupingushi.+
15 Akasuba no mweshi fikaaluka imfifi,
Ne ntanda tashakasanike
16 Kabili Yehova akabulumina mu Sione,
Akasanswila ishiwi lyakwe mu Yerusalemu.
Kabili umuulu ne sonde fikatenta;
Lelo Yehova akacingilila abantu bakwe,+
Kabili akaba icubo ca bena Israele.
17 Kabili mukeshiba ukuti nine Yehova Lesa wenu, uwikala mu Sione ulupili lwandi ulwa mushilo.+
18 Muli bulya bushiku, impili shikalatonya umwangashi uwalowa,+
Mu tupili mukalakonkoloka umukaka,
Na mu tumilonga tonse utwa mu Yuda mukalapita amenshi.
Mu ng’anda ya kwa Yehova mukaba akamfukumfuku,+
Kabili kakalatapilila Umupokapoka* umwaba Ifimuti fya Munganunshi.
19 Lelo Egupti ikaba icibolya,+
Na Edomu ikashala amatololo umushaba abantu,+
Pa mulandu wa bunkalwe ubo bacitile abaYuda,+
Abo basuumishe umulopa+ wabo mu calo cabo apabula umulandu.
21 Umulopa wabo uo nshalemona ukuti wa kaele, nomba nkalaumona uwa kaele;+
Kabili ine ne Yehova nkekala mu Sione.”+
Ilyalola mu kuti “Yehova e Lesa.”
Nelyo “isonde.”
Nelyo “umukashana.”
Nelyo “umulume.”
Mu ciHebere, “Ikakeni.”
Nelyo “yumauleni pa fifuba.”
Nelyo kuti lyapilibula no kuti “amakunyu ayauma.”
Nelyo “nashifoota pe samba lya bafosholo babo.”
Nelyo “isonde.”
Nelyo “inkumbu.”
Nelyo “akalanguluka pa macushi.”
Mu ciHebere, “ubupyani bwenu.”
E kutila, Bemba Wafwa.
E kutila, Bemba wa Mediterranean.
Mu ciHebere, “abana baume ba mu Sione.”
Nelyo “ifisungusho.”
Nelyo “Impanga Iyabatama.”
Ilyalola mu kuti “Yehova ni Kapingula.”
Mu ciHebere, “Nkashitisha.”
Nelyo “abaume abaishiba sana ukulwa.”
Nelyo “Impanga Iyabatama.”
Nelyo “impanga iyabatama.”
Nelyo “impanga iyabatama.”
Nelyo “Impanga Iyabatama.”