IMBILA NSUMA UKULINGANA NE FYO MARKO AILEMBELE

1 Intendekelo ya mbila nsuma pali Yesu Kristu Umwana wa kwa Lesa: 2 Nga filya fine Kasesema Esaya alembele ati: “(Mona! Nkatuma inkombe yandi iikakutangilila, iikakupekanishisha inshila.)+ 3 Umuntu alebilikisha mu matololo aleti: ‘Pekanyeni inshila ya kwa Yehova!* Lungamikeni inshila shakwe.’”+ 4 Yohane Kabatisha ali mu matololo, alebila ku bantu pa lubatisho lwa kulanga ukuti nabalapila pa kuti Lesa ababelele uluse pa membu shabo.+ 5 Kabili bonse aba mu citungu ca Yudea na bonse aba mu Yerusalemu baleya kuli ena, baleyebelela imembu+ shabo kabili alebabatishisha* mu Mumana wa Yordani. 6 Nomba Yohane alefwala ica kufwala ca masako ya ngamila no mushipi wa mpapa mu musana,+ kabili alelya makanta no buci+ bwa mu mpanga. 7 Alebila ati: “Uwancila amaka alenkonka pa numa, nshalinga ukukontama no kukakula intambo sha pa ndyato shakwe.+ 8 Ine namubatishe mu menshi, lelo ena akamubatisha mu mupashi wa mushilo.”+

9 Muli shilya nshiku Yesu afumine ku Nasarete mu citungu ca Galili kabili Yohane alimubatishe mu Mumana wa Yordani.+ 10 Kabili ilyo Yesu afumine fye mu menshi amwene umuulu uleisuka, no mupashi wa mushilo uwalemoneka kwati ni nkunda waleisa pali ena ukufuma mu muulu.+ 11 Kabili ishiwi lyafumine mu muulu aliti: “Uli Mwana wandi uo natemwa, niwe nsekelamo.”+

12 Kabili ilyo line umupashi wa mushilo walengele aya mu matololo. 13 E ico aikele mu matololo umwali inama sha mpanga pa nshiku 40, kabili Satana+ alimutunkile, lelo bamalaika balemwafwa.+

14 Nomba ilyo baikete Yohane, Yesu aile ku Galili+ mu kubila imbila nsuma iya kwa Lesa.+ 15 Alebila ati: “Inshita naifika, kabili Ubufumu bwa kwa Lesa nabupalama. Lapileni,+ kabili tetekeleni imbila nsuma.”

16 Ilyo ale-enda mu lulamba lwa bemba wa Galili, amwene Simone na Andrea+ munyina baleteya amasumbu muli bemba,+ pantu bali balondo.+ 17 E ico Yesu abebele ati: “Nkonkeni, kabili nkalenga mukabe abalondo ba bantu.”+ 18 Ilyo line fye balishile amasumbu yabo bamukonka no kumukonka.+ 19 Ilyo aendeleko panono, amwene Yakobo na Yohane munyina abana ba kwa Sebede, ninshi bali mu bwato balelunda amasumbu yabo,+ 20 kabili ilyo line alibetile. E ico bashile shibo Sebede na babomfi mu bwato, batampa no kumukonka. 21 Kabili baile ku Kapernahumu.

Ilyo Isabata lyatendeke fye, Yesu aingile mwi sunagoge, atampa no kusambilisha abantu.+ 22 Kabili balipapile pa misambilishishe yakwe, pantu alebasambilisha ngo muntu uwakwata amaka ayafuma kuli Lesa. Talebasambilisha nge fyo bakalemba+ babo balebasambilisha. 23 Pali ilya ine nshita, mwi sunagoge lyabo mwali umuntu uwali no mupashi uwakowela, kabili abilikishe ati: 24 “Bushe tulomfwana na iwe, we Yesu umwina Nasarete?+ Bushe wishile mu kutonaula? Nalikwishiba bwino uli wa Mushilo uwa kwa Lesa!”+ 25 Lelo Yesu aliukalipile ati: “Ikala tondolo, kabili fuma muli uyu muntu!” 26 Kabili ilyo uyu mupashi wakowela wamufulenshe, wabilikishe ishiwi ilikalamba e lyo wafuma muli ena. 27 Abantu bonse balipapile nga nshi ica kuti batendeke ukulalanshanya abati: “Cinshi ici cacitika? Lisambilisho ilipya! Alikwata na maka ya kutamfya imipashi yakowela, na yo ilamumfwila.” 28 E ico bwangu bwangu ili lyashi lyalishibikwe mu citungu conse ica Galili.

29 Ilyo line bafumine mwi sunagoge baya ku ng’anda kuli Simone na Andrea. Bali pamo na Yakobo na Yohane.+ 30 Nomba nafyala+ Simone alileele pantu alilwele impepo. E ico bwangu bwangu baebele Yesu. 31 Ilyo Yesu aile apo ali, amwikete ku kuboko e lyo amwimya. Lyena alipolele atendeka no kubapekanishisha ifya kulya.

32 Pa numa ilyo akasuba kawile, abantu batampile ukumuletela bonse abalwele na bali ne fibanda;+ 33 kabili aba mu musumba bonse balongene pa mwinshi. 34 E ico alyundepe abantu abengi abalwele amalwele ayalekanalekana,+ kabili alifumishe ifibanda ifingi, lelo talefisuminisha ukulanda, pantu fyalimwishibe ukuti ni Kristu.*

35 Lucelocelo ninshi pacili napafiita, alimine afumina panse e lyo aya ukushali abantu atendeka no kupepa.+ 36 Lelo Simone na bo ali nabo baile balemufwaya 37 kabili balimusangile e lyo bamweba abati: “Abantu bonse balemufwaya.” 38 Lelo abebele ati: “Tuleyeni kumbi, ku misumba inono iili mupepi, pa kuti nako kwine nshimikileko, pantu e co naishila.”+ 39 Kabili aile aleshimikila abantu mu masunagoge yabo mu Galili monse, alefumya ne fibanda.+

40 Lyena uwalwele ifibashi aishile kuli ena, alamupaapaata ninshi nafukama no kufukama, aleti: “Nga mulefwaya kuti mwang’undapa.”+ 41 Na o alyumfwile uluse, kabili atambike ukuboko amwikata, e lyo amweba ati: “Ee ndefwaya! Pola.”+ 42 Ilyo line fye ifibashi fyalipwile, apola no kupola. 43 Lyena alimusokele e lyo amuleka aya. 44 Amwebele ati: “Wiebako umuntu nangu umo, lelo kabiye kuli shimapepo pa kuti akumone. Utuule ne ca bupe ico balandapo mu Mafunde ya kwa Mose,+ pa kuti bashimapepo bashininkishe+ ukuti naupola.” 45 Nomba ilyo uyu uwali ne fibashi aile, atendeke ukubila kuli bonse no kusabankanya ilyashi konse fye, ica kuti Yesu taleingila mu musumba ukwabula ukuti abantu beshibe, lelo aikele fye kunse ya musumba ukushali abantu. Na lyo line abantu mpanga yonse+ baleya uko ali.

2 Nomba ilyo papitile inshiku shimo, Yesu aingile mu Kapernahumu na kabili, lyena ilyashi lyalisalangene ukuti ali pa ng’anda.+ 2 E ico abantu abengi nga nshi baliswile mu ng’anda ica kuti tamwashele incende nangu imo, kumo na pa mwinshi, kabili atendeke ukubila icebo ca kwa Lesa kuli bena.+ 3 Kabili abantu bamuleteele umuntu uwalwele ubulebe uo abantu 4 basendele.+ 4 Lelo apo balifililwe ukumufisha apali Yesu pa mulandu wa kuti ibumba lyalimushingulwike, bafimbwile umutenge apo Yesu abelele, kabili apashele icipunda e po bapushishe umusengele apaleele uwalwele ubulebe. 5 Ilyo Yesu amwene ifyo bali ne citetekelo,+ aebele uwalwele ubulebe ati: “We mwana, imembu shobe shaelelwa.”+ 6 Nomba mulya mwine mwali bakalemba bamo abaikele kabili baletontonkanya mu mitima yabo abati:+ 7 “Cinshi uyu muntu alelandila ifi? Alesaalula Lesa. Bushe te Lesa fye engelela imembu?”+ 8 Lelo ilyo line, Yesu alilwike ukuti e fyo baletontonkanya, e ico abebele ati: “Cinshi muletontonkanishisha ifi mu mitima yenu?+ 9 Cinshi ca-angukapo ukweba uwa bulebe, ukumweba ati, ‘Imembu shobe shaelelwa,’ nelyo ukumweba ati, ‘Ima, buula umusengele obe wende’? 10 Nomba pa kuti mwishibe ukuti Umwana wa muntu+ alikwata amaka ya kwelela imembu pano isonde . . .”+ lyena aebele uwa bulebe ati: 11 “Ndekweba nati, Ima, senda umusengele obe uye ku mobe.” 12 Ilyo line aliimine, abuula umusengele wakwe atampa no kwenda ninshi na bantu bonse balemona. E ico abantu bonse balipapile kabili balumbenye Lesa abati: “Tatwatala atumonapo ica musango uyu.”+

13 Kabili Yesu alimine alaenda mu lulamba lwa bemba, ne bumba lyonse lyaleya kuli ena, kabili atendeke ukubasambilisha. 14 Kabili ilyo alepita, amwene Lebi umwana wa kwa Alfeo naikala pa cikuulwa ca kusonkeseshapo imisonko, kabili amwebele ati: “Nkonka ube umusambi wandi.” Ilyo line alimine amukonka no kumukonka.+ 15 Pa numa Yesu na basambi bakwe balelya* pamo na bakasonkesha ba misonko abengi na babembu mu ng’anda ya kwa Lebi, bali abengi abatendeke ukumukonka.+ 16 Lelo ilyo bakalemba ba baFarise bamwene aleliila pamo na babembu na bakasonkesha ba misonko, batendeke ukweba abasambi bakwe abati: “Cinshi aliila pamo na bakasonkesha ba misonko na babembu?” 17 Ilyo Yesu aumfwile balelanda ifi, abebele ati: “Abatuntulu tabakabila kondapa, kano abalwele. Nshaisa mu kwita abalungama, kano ababembu.”+

18 Nomba abasambi ba kwa Yohane na baFarise balefunga. E ico bamo pali aba balishile e lyo baipusha Yesu abati: “Mulandu nshi abasambi ba kwa Yohane na basambi ba baFarise bafungila, lelo abasambi bobe bena tabafunga?”+ 19 E ico Yesu abaswike ati: “Bushe abanankwe ba kwa shibwinga+ bafwile ukulafunga ilyo shibwinga acili nabo? Shibwinga nga acili nabo tabafwile ukulafunga. 20 Lelo inshiku shikesa ilyo shibwinga bakamusenda,+ pali bulya bushiku bakafunga. 21 Takwaba uubilila icikamba ca nsalu iipya pa ca kufwala ca kale, pantu nga acita ifi icikamba ca nsalu iipya kuti calenga ica kufwala calepuka, ica kuti ne cipunda cakulilako.+ 22 Kabili takwaba umuntu uubika umwangashi uushilakalipa mu nyambi sha kale, pantu nga abikamo, inyambi shilalepuka no mwangashi ulapongoloka, ne nyambi shilonaika. Lelo abantu babika umwangashi uushilakalipa mu nyambi ishipya.”

23 Nomba ilyo Yesu alepita mu mabala ya ngano pe Sabata pamo na basambi bakwe, abasambi bakwe batendeke ukutimpula imitwe ya ngano.+ 24 E ico abaFarise bamwebele abati: “Mona! Cinshi abasambi bobe balecitila ico amafunde yalesha ukucita pe Sabata?” 25 Lelo abebele ati: “Bushe tamwabelenga ifyo Davidi acitile ilyo ena na bo ali nabo baumfwile nsala+ pa mulandu wa kuti tabakwete ifya kulya? 26 Bushe tamwabelenga mu lyashi lya kwa Abiatari+ uwali intungulushi ya bashimapepo? Davidi aingile mu ng’anda ya kwa Lesa, abuula umukate wa mushilo* e lyo auliila pamo na bo ali nabo. Tabakwete insambu sha kulya ulya mukate kano fye bashimapepo+ e bakwete insambu sha ku-ulya.” 27 Lyena abebele ati: “Isabata lyabelako abantu,+ lelo abantu tababelako Isabata. 28 E ico Umwana wa muntu alikwata amaka na pe Sabata.”+

3 Na kabili Yesu aingile mwi sunagoge umwali umuntu uwali no kuboko ukwafwa.*+ 2 E ico abaFarise balemulolekesha pa kuti bamone nga alamundapa pe Sabata, pa kuti bamupeele umulandu. 3 Lyena aebele umuntu uwali no kuboko ukwafwa* ati: “Ima, isa pa kati.” 4 E lyo abepwishe ati: “Bushe amafunde yalisuminisha ukucita icisuma nelyo ukucita icabipa pe Sabata, ukupususha umuntu* nelyo ukumwipaya?”+ Lelo baikele fye tondolo. 5 Pa numa ya kubalolesha bukali bukali, ninshi naumfwa ububi sana pa mulandu wa kuti bali ne mitima+ iyatalama, aebele uwali no kuboko ukwafwa ati: “Fungulula ukuboko kobe.” Na o alikufungulwile, kabili kwalipolele. 6 E ico ilyo line fye abaFarise bailekumana na ba mu kabungwe ka kwa Herode,+ balamupangila pa kuti bamwipaye.

7 Lelo Yesu pamo na basambi bakwe balifumineko baya kuli bemba, kabili ibumba ilikalamba ilyafumine ku Galili na ku Yudea lyalimukonkele.+ 8 Kabili kwali ne bumba ilikalamba ilyafumine ku Yerusalemu, ku Idumea, kwi shilya lya Yordani na mu ncende sha mu Turi na Sidone, ilyaishile kuli ena pa mulandu wa kuti balyumfwile ifipesha amano ifyo alecita. 9 Kabili aebele abasambi bakwe ukuti bamuletele akabwato ka kuti ekalemo pa kuti ibumba lilamutitikisha. 10 Apo alyundepe abantu abengi, bonse abali na malwele ayabipisha balelwisha ukuti bamukumye.+ 11 Ne mipashi+ iyakowela yaleti nga yamumona, yawa pa ntanshi yakwe e lyo yabilikisha aiti: “Uli Mwana wa kwa Lesa.”+ 12 Lelo aleikalipila nga nshi ukuti ilamusokolola.+

13 Yesu aninine ulupili kabili aitile abo alefwaya,+ nabo baile kuli ena.+ 14 Lyena asalile* abaume 12 e lyo abenika ukuti abatumwa. Aba bali no kulaba nankwe kabili ebo ali no kulatuma mu kubila imbila nsuma, 15 alibapeele na maka ya kulafumya ifibanda.+

16 Kabili abaume 12+ abo asalile* bali ni Simone, uo ainike ati Petro,+ 17 Yakobo umwana wa kwa Sebede na Yohane munyina (aba nabo abenike ati Boanerge, ishiwi ilyalola mu kuti “Abana Ababa ngo Kubulukuta kwa Mfula”),+ 18 Andrea, Filipi, Bartolomeo, Mateo, Toma, Yakobo umwana wa kwa Alfeo, Tadeo, Simone uwacincila* 19 na Yuda Iskariote, uwaishilemufutuka.

Lyena Yesu aingile mu ng’anda. 20 Kabili ibumba lyalilongene na kabili ica kuti balifililwe no kulya ifya kulya. 21 Lelo ilyo balupwa lwakwe baumfwile, baile mu kumwikata, pantu baletila: “Napena.”+ 22 Na bakalemba abafumine ku Yerusalemu baletila: “Aba na Beelisebubi,* kabili afumisha ifibanda ku maka ya kwa kateka wa fibanda.”+ 23 E ico ilyo abetile ukuti baye uko ali, abebeele mu filangililo ati: “Satana kuti afumya shani Satana? 24 Ubufumu nga bwapaatukana te kuti butwalilile ukubako;+ 25 kabili aba mu ng’anda nga bapaatukana, te kuti batwalilile ukwikala pamo. 26 Satana na o nga ayimina kabili alailwisha, te kuti atwalilile ukubako, lelo kuti aloba. 27 Na kuba, takwaba uwingengila mu ng’anda ya muntu uwa maka pa kuti amwibile, kano abala amukaka e lyo engasenda ifipe fyonse ifya mu ng’anda yakwe. 28 Ndemweba icine cine nati, abantu bakababelela uluse pa lubembu lonse na pa fyo bapontela ifya mushilo. 29 Nomba onse uwapontela umupashi wa kwa Lesa tabakatale abamubelela uluse,+ lelo ulubembu lwakwe lukalenga akabe no mulandu umuyayaya.”+ 30 Icalengele abebe ifi, nico balelanda abati: “Aba no mupashi uwakowela.”+

31 Nomba banyina na bamunyina+ balishile baiminina panse, e lyo batuma uwa kuyamwita.+ 32 Apo kwali ibumba ilyaikele nalimushinguluka, kwali abamwebele abati: “Mona! Banoko na bamunonko bali panse balekufwaya.”+ 33 Lelo abaswike ati: “Bushe bamayo na bamunyinane mwalibeshiba?” 34 Lyena aloleshe abaikele nabamushinguluka, e lyo atila: “Moneni, aba e bamayo na bamunyinane!+ 35 Onse uucita ifyo Lesa afwaya, e munyinane, e nkashi yandi kabili e mayo.”+

4 Kabili atendeke ukusambilisha abantu mu lulamba lwa bemba, ne bumba ilikalamba nga nshi lyalongene mupepi nankwe. E ico aninine mu bwato e mo aikala, lyena ubwato bwalyendeleko panono ukufuma ku lulamba. Lelo ibumba lyonse lyali ku lulamba lwa bemba.+ 2 Kabili atampile ukubasambilisha ifintu ifingi mu filangililo.+ Ilyo alebasambilisha abebele ati:+ 3 “Umfweni. Moneni! Katanda wa mbuto aile mu kutanda imbuto.+ 4 Ilyo aletanda imbuto, shimo shaponene mu mbali ya nshila, ne fyuni fyalishile shilya. 5 Shimbi shaponene pa mushili wa mabwe apashali iloba ilingi, kabili shalimenene bwangu bwangu pantu tapali iloba ilingi.+ 6 Lelo ilyo akasuba kabalike shalipiile, kabili pa mulandu wa kuti tashakwete imishila, shalyumine. 7 Imbuto shimbi na sho shaponene mu myunga, ne myunga yalikulile yashitabilila no kushitabilila, ica kuti tashatwele ifisabo.+ 8 Lelo shimbi shaponene pa mushili uusuma. Ilyo shamenene shakula no kukula, shatendeke ukutwala ifisabo ifingi ukucila pa sho atandile, shimo shatwele 30, shimbi 60, e lyo shimbi 100.”+ 9 Lyena abebele ati: “Uuli na matwi ya kumfwa, naomfwe.”+

10 Nomba ilyo ali eka, abasambi bamo pamo na batumwa 12 batendeke ukumwipusha umwalolele ifilangililo.+ 11 Abaswike ati: “Imwe balimupeela amano ya kumfwikisha inkaama*+ ya kwa Lesa pa Bufumu bwa mu muulu, lelo abantu bambi bena mbasambilishisha mu filangililo,+ 12 pa kuti nangu ca kuti balalolesha belamona, nangu ca kuti balomfwa belailuka, kabili bealuka no kubelelwa uluse.”+ 13 Kabili abebele ati: “Nga ca kuti tamwishibe umulolele ici cilangililo, ninshi mukeshiba shani umwalola ifilangililo fimbi?

14 “Katanda, atanda icebo ca kwa Lesa.+ 15 Imbuto ishaponeene mu mbali ya nshila; bantu aba kuti ilyo fye baumfwa icebo, Satana aisa+ no kusenda icebo icatandilwe muli bena.+ 16 Kabili imbuto ishaponeene pa mushili wa mabwe; bantu aba kuti ilyo baumfwa fye icebo, bacitetekela ne nsansa.+ 17 Lelo apo icebo tacalimbile imishila mu mitima yabo, batetekela fye pa nshita iinono kabili ilyo bakwata ubwafya nelyo nga babacusha pa mulandu wa cebo pa Bufumu, banenuka. 18 Kwali imbuto na shimbi ishaponeene mu myunga. Ishi mbuto bantu aba kuti baumfwa icebo,+ 19 lelo pa mulandu wa masakamika+ ya muli cino calo* na pa mulandu wa kuti ifyuma+ fyababeleleka kabili balafwaisha+ ukukwata ifingi, icebo catusa kabili bafilwa ukutwala ifisabo. 20 Na mu kulekelesha, imbuto ishaponeene pa mushili uusuma, bantu aba kuti ilyo baumfwa icebo, bacipokelela bwino batwala ne fisabo ifingi ukucila imbuto isho katanda atandile, bamo batwala 30, bambi 60, e lyo bambi 100.”+

21 Kabili abebele ati: “Bushe abantu baasha inyali pa kuti baikupikile mu museke* nelyo pa kuti baibike mwi samba lya busanshi? Bushe tabayasha pa kuti baibike pa ca kutekapo inyali?+ 22 Pantu takwaba icafisama icishakasokoloke; takwaba ico bafishilisha icishakeshibikwe.+ 23 Uuli na matwi ya kumfwa, naomfwe.”+

24 Na kabili abebele ati: “Mulebika amano ku fyo muleumfwa.+ Ifyo mucitila abantu e fyo na imwe bakamucitila,* kabili bakamulundilapo na fimbi. 25 Pantu onse uwakwata, bakamupeelelapo na fimbi,+ lelo onse uushakwata bakamupoka no tunono uto akwata.”+

26 E ico akonkenyepo ukubeba ati: “Ubufumu bwa kwa Lesa bwaba nga filya ciba umuntu nga atanda imbuto mu mushili. 27 Aya mu kulaala ubushiku kabili ulucelo abuuka, asanga imbuto nashimena kabili nashikula, nomba teshiba ifyo shimena. 28 Umushili uwine weka e umesha ifisabo panono panono. Umusonga e ubalilapo, e lyo pakonka umutwe, na mu kulekelesha ku mutwe kulaba inseke ishituntulu. 29 Lelo ifisabo nga fyapya fye, alapishamo icikwakwa, pantu ninshi inshita ya kuseepa naifika.”

30 Na kabili abebele ati: “Bushe Ubufumu bwa kwa Lesa kuti twabupashanya kuli cinshi, nelyo cilangililo nshi twingabomfya pa kubulondolola? 31 Bwaba kwati kaluseke akanono sana,* aka kuti ilyo balekabyala kali akacepesha pa nseke shonse isha pano isonde.+ 32 Nomba cilya bakabyala, kalakula ica kuti kalacila imisalu yonse, kaba fye cimuti icikalamba, cilakwata imisambo iikalamba ica kuti ne fyuni fya mu lwelele filesa mu kwikala mu cintelelwe ca ciko.”

33 Yesu alibasambilishe icebo ca kwa Lesa mu filangililo+ fya musango uyu, ukulingana ne fyo bali no kumfwa. 34 Tabebele nangu cimo ukwabula icilangililo, lelo nga baya ukushili abantu alelondolwela abasambi+ bakwe fyonse.

35 Kabili pali bulya bushiku ilyo cali icungulo, aebele abasambi bakwe ati: “Natwabukile kwi shilya lya bemba.”+ 36 E ico ilyo basalangenye ibumba, bamusendeele mu bwato ubo alimo, kabili kwali amato na yambi ayale-endela pamo no bwato alimo.+ 37 Nomba pali bemba paimine icikuuku ca mwela icikalamba na mabimbi yaileuma mu bwato, ica kuti kwashele fye panono ubwato nga bwaliswilemo amenshi.+ 38 Lelo ena ali ku numa ya bwato nalaala, nasaisha no mutwe pa musao.* E ico balimushibwishe e lyo bamweba abati: “Mwe Kasambilisha, bushe tamumwene ukuti twalafwa?” 39 E ico aliimine, akalipila umwela e lyo aeba bemba ati: “Talala! Ba tondolo!”+ Kabili umwela walilekele, kwaba na tondolo. 40 Lyena abebele ati: “Cinshi muletiinina?* Bushe na nomba tamulakwata icitetekelo nangu icinono?” 41 Lelo balitiinine icine cine, kabili balaipushanya abati: “Bushe uyu muntu nani, uwa kuti nangu fye mwela na bemba filamuumfwila?”+

5 Lyena bafikile kwi shilya lya bemba mu citungu ca bena Gerasa.+ 2 Kabili ilyo Yesu afumine fye mu bwato, umuntu uwafumine mu nshiishi* uwali no mupashi uwakowela alimukumenye. 3 Uyu muntu aleikala mu nshiishi, kabili ukufika na pali ilya ine nshita takwali umuntu nangu umo uwali na maka ya kumukaka nangu fye ni kuli ceni. 4 Ilingi line balemukaka amaceni ku maboko na ku makasa, lelo aleyaputaula yonse kabili takwali uwali na maka ya kumunasha. 5 Lyonse akasuba no bushiku alebilikisha mu nshiishi na mu mpili kabili aleitetaula ku mabwe. 6 Lelo ilyo amwene fye Yesu akatalamukila, alimubutukiile e lyo amukontamina.+ 7 Lyena abilikishe ati: “Bushe tulomfwana na iwe Yesu, we Mwana wa kwa Lesa Uwapulamo? Lapa mwi shina lya kwa Lesa ukuti tawancushe.”+ 8 Ico abilikishishe fi ni co Yesu ale-eba umupashi wakowela ati: “Fuma muli uyu muntu, we mupashi+ wakowela.” 9 Lelo amwipwishe ati: “Niwe ani?” Na o amwaswike ati: “Ishina lyandi nine Ibumba,* pantu twaba abengi.” 10 Na o alepaapaata Yesu ukuti etamfya imipashi muli ilya mpanga.+

11 Nomba ku lupili+ kwali inkumba+ ishingi ishalelya. 12 E ico imipashi iyakowela yapaapeete Yesu aiti: “Tutamfishe mu nkumba, e mo tuye twingile.” 13 Na o ali-isuminishe. Lyena imipashi yakowela yalifumine no kuyaingila mu nkumba, kabili inkumba shonse shabutukiile ukwasuluka shaponena na muli bemba, shanwena no kunwena. Ishi inkumba shali nalimo 2,000. 14 Lelo abaleshicema balifulumwike kabili baileshimika ifyacitike mu musumba na mu mishi. E ico abantu balile mu kumona ifyacitike.+ 15 Baishile kuli Yesu, kabili ilyo bamwene umwaume uwali ne bumba lya fibanda kale naikala, nafwala no kufwala kabili ali umutuntulu, balyumfwile umwenso. 16 Kabili abamwene ifyacitikiile umwaume uwali ne fibanda ne fyacitikiile inkumba, balibashimikile. 17 E ico batampile ukupaapaata Yesu ukuti afume mu citungu cabo.+

18 Nomba ilyo Yesu alenina mu bwato, ulya umwaume uo atamfishemo ifibanda amupaapeete ukuti amukonke.+ 19 Lelo tamusuminishe, amwebele ati: “Kabiye ku ng’anda kuli balupwa lobe, kabili uye ubashimikile fyonse fye ifyo Yehova* akucitila ne fyo akumfwilile uluse.” 20 Uyu mwaume alile, alabila mu Dekapoli* fyonse ifyo Yesu amucitiile, kabili abantu bonse balipapile.

21 Ilyo Yesu ayabukile kwi shilya lya bemba na kabili ninshi ali mu bwato, ibumba ilikalamba lyailelongana ku lulamba lwa bemba+ uko ali. 22 Nomba Yairo, umo pa bakalamba ba mwi sunagoge, alishile, kabili ilyo amumwene fye, alimufukamine.+ 23 Amupaapeete imiku iingi ati: “Akamwana kandi akakashana nakalwala sana.* Natuleya muye mubike iminwe pali kena+ pa kuti kapole kabili kefwa.” 24 Yesu aile nankwe, ne bumba ilikalamba lyalemukonka kabili lyalemutitikisha.

25 Nomba kwali umwanakashi uwalwele ubulwele bwa kufuma umulopa+ pa myaka 12.+ 26 Aliculile nga nshi ilyo bakondapa abengi bale-esha ukumundapa, kabili alipooselepo icuma cakwe conse, lelo tapolele, alelwalilako fye. 27 Ilyo aumfwile ifyo abantu balelanda pali Yesu, aishile ku numa mwi bumba kabili aikete ku ca kufwala cakwe ica kunse,+ 28 pantu mu mutima wakwe aleti: “Nga naikata fye ku fya kufwala fyakwe ifya kunse, nalapola.”+ 29 Kabili apo pene umulopa walilekele ukufuma, aumfwa na mu mubili wakwe ukuti ubulwele bwakwe ubwabipisha bwalipolele.

30 Ilyo line Yesu alyumfwile ukuti amaka+ yafuma muli ena, kabili alipilibwike mwi bumba, e lyo aipusha ati: “Nani aikata ku fya kufwala fyandi?”+ 31 Lelo abasambi bakwe bamwebele abati: “Mwe Shikulu, namumona ukuti ibumba lilemutitikisha, kuti mwaipusha shani amuti, ‘Nani anjikata?’” 32 Na lyo line ena alelolesha konse konse pa kuti amone uwamwikete. 33 Uyu mwanakashi alitiinine kabili aletutuma fye. E ico alishile, afukamina Yesu e lyo amulondolwela fye fyonse. 34 Yesu amwebele ati: “We mwana, icitetekelo cobe nacikuposha. Kabiye umutende,+ kabili upolelele ubulwele bobe ubwabipisha.”+

35 Ilyo Yesu acili alelanda, abantu bamo abafumine ku ng’anda ya mukalamba we sunagoge balishile e lyo bamweba abati: “Umwana wenu nafwa! Lekeni ukupamfya kasambilisha.”+ 36 Lelo ilyo Yesu aumfwile ifyo balelanda, aebele umukalamba we sunagoge ati: “Wisakamana,* tetekela fye.”+ 37 Nomba Yesu tasuminishe abantu bambi ukumukonka, asuminishe fye Petro, Yakobo na Yohane munyina Yakobo.+

38 E ico ilyo bafikile pa ng’anda ya uyu umukalamba we sunagoge, basangile pali icongo, pali abantu abalelila na baleloosha nga nshi.+ 39 Ilyo aingile mu ng’anda, abebele ati: “Mulandu nshi mulekafisha icongo kabili cinshi muleloosesha? Umwana tafwile, aleele fye.”+ 40 Awe batampile ukumuseka no kumupumya. Lelo ilyo afumiishe bonse panse, asendele wishi wa mwana na nyina na basambi abo ali nabo, baingila no mwali umwana. 41 Lyena aikete ukuboko kwa mwana e lyo amweba ati: “Talita kumi,” aya mashiwi nga bayapilibula yalola mu kuti: “We kakashana, ndekweba nati, Ima!”+ 42 Kabili ilyo line aka kakashana kalimine kalaenda no kwenda. (Kali ne myaka 12.) Ilyo abafyashi bamwene ifi balisekelele nga nshi. 43 Lelo alibakonkomeshe imiku iingi ukuti be-ebako nangu umo pali ili lyashi,+ kabili abebele ukuti bapeeleko aka kakashana ifya kulya.

6 Lyena alifumineko aya ku citungu ca ku mwabo+ kabili abasambi bakwe balimukonkele. 2 Ilyo Isabata lyafikile, atampile ukusambilisha abantu mwi sunagoge, kabili abengi abalekutika kuli ena balipapile. Batile: “Bushe uyu muntu aishibe shani ifi fintu?+ Kabili nani amupeela amano na maka ya kucita ifipesha amano fya musango uyu?+ 3 Bushe uyu te kabasa,+ umwana wa kwa Maria+ kabili munyina Yakobo,+ Yosefe, Yuda na Simone?+ Bushe na bankashi yakwe bonse tatwikala nabo kuno?” E ico balikeene ukumusumina. 4 Lelo Yesu abebele ati: “Kasesema balamucindika kumbi, uko bashimucindika fye ni ku citungu ca ku mwabo, kuli balupwa lwakwe na ku ba mu ng’anda yakwe.”+ 5 E ico abikile fye iminwe pa bantu abanono abalwele pa kubondapa, lelo tacitilepo ifipesha amano fimbi. 6 Alipapile sana pa fyo bashamutetekele. Lyena aile aleshinguluka mu mishi iyali mupepi alesambilisha abantu.+

7 Nomba aitile abatumwa 12, e lyo atampa ukubatuma babili babili,+ kabili abapeele amaka ya kufumya imipashi iyakowela.+ 8 Na kabili abebele ukuti tabalingile ukusenda nangu cimo pa lwendo kano fye inkonto. Alibakenye ukusenda umukate, icola ca fya kulya, nangu ni ndalama* mu fikwama fya mu mishipi yabo.+ 9 Alibasuminishe ukufwala indyato, lelo alibakenye ukusenda ifya kufwala fibili.* 10 Kabili abebele ati: “Ing’anda yonse iyo mwaingilamo, mukekale muli iyo yine ng’anda mpaka mukafume kuli iyo ncende.+ 11 Kabili konse uko bashakamupokelele nelyo ukumuumfwa, pa kufumako mukalekunta ulukungu ku makasa yenu pa kulanga ukuti Lesa nabasoka.”+ 12 Lyena baile balebila ukuti abantu balingile ukulapila,+ 13 kabili balifumishe ifibanda+ ifingi, balisubile na bantu abengi amafuta no kubondapa.

14 Nomba Imfumu Herode yalyumfwile ifi, pantu abantu mpanga yonse balelanda pali Yesu, kabili baleti: “Yohane Kabatisha nabuuka ku bafwa, e co akwatile amaka ya kucita ifipesha amano.”+ 15 Lelo bambi baleti: “Ni Eliya.” E lyo bambi nabo baleti: “Ni kasesema, nga filya fine fyali bakasesema ba kale.”+ 16 Lelo ilyo Herode aumfwile ifyo balelanda, alandile ati: “Ulya Yohane uo naputwile umutwe, e wabuuka.” 17 Pantu Herode e watumine abakuyaikata Yohane no kumukaka mu cifungo, pa mulandu wa kwa Herodia uwali muka Filipi uo Herode aupile.+ Uyu Filipi ali mukalamba wa kwa Herode. 18 Pantu pa miku iingi Yohane ale-eba Herode ati: “Ukulingana na mafunde taulingile ukuupa umukashi wa kwa munonko.”+ 19 E ico Herodia alifuliilwe Yohane kabili alefwaya ukumwipaya, lelo alifililwe. 20 Pantu Herode aletiina Yohane, ico alishibe ukuti ali uwalungama kabili uwa mushilo,+ e ico alemucingilila. Yohane nga alanda, Herode taleishiba ica kucita, lelo aletemwa ukumfwa ifyo alelanda.

21 Awe ubushiku bwalinga bwalifikile ilyo Herode apekanishishe bacilolo bakwe, abakalamba ba bashilika na bashimucindikwa ba mu Galili+ umutebeto pa bushiku ubo afyalilwepo.+ 22 Lyena umwana mwanakashi wa kwa Herodia alingiilemo no kushana, kabili Herode na bo alelya nabo* balitemenwe nga nshi. E ico imfumu yaebele umukashana aiti: “Lomba conse ico ulefwaya, nalakupeela.” 23 Yalilapile no kulapa aiti: “Conse ico ulenomba, nalakupeela, nangu fye walomba ukuti nkwakanyeko ubufumu bwandi pa kati.” 24 E ico umukashana alifumine ayaipusha nyina ati: “Bushe cinshi ningalomba?” Na o amwaswike ati: “Lomba umutwe wa kwa Yohane Kabatisha.” 25 Ilyo line alyangufyenye ukuya ku mfumu no kulomba ati: “Ndefwaya mumpeele umutwe wa kwa Yohane Kabatisha+ pa mbale ili line.” 26 Nangu ca kuti imfumu yali no bulanda sana yalifililwe ukumukaanina pa mulandu wa milapo iyo yalapile na pa mulandu wa bantu abo yaitile ku mutebeto.* 27 E ico ilyo line imfumu yatumine uwaleilinda ukuyaleta umutwe wa kwa Yohane. Na o aileputula Yohane umutwe mu cifungo 28 kabili aletele umutwe pa mbale, apeela umukashana e lyo umukashana na o apeela nyina. 29 Ilyo abasambi ba kwa Yohane baumfwile ifi, balishilesenda icitumbi cakwe bayacibika na mu nshiishi.*

30 Na batumwa balongene ukwali Yesu e lyo balamushimikila fyonse ifyo bacitile ne fyo basambilishe abantu.+ 31 Na o abebele ati: “Natuleya ukutalele ukwa kuti tube fye fweka, tutuusheko panono.”+ Pantu kwali abengi abaleisa na balefuma uko bali, ica kuti tabakwete ne nshita ya kutuushako nangu fye ya kuti balye ifya kulya. 32 E ico baninine ubwato baya na ku ncende ukushali abantu pa kuti babe fye beka.+ 33 Lelo abantu balibamwene ilyo baleya kabili abengi balishibe. E ico abantu mu misumba yonse balibutukiile capamo pa makasa pa kuti babatangilile. 34 Ilyo Yesu afumine mu bwato amwene ibumba ilikalamba kabili alibomfwilile uluse+ pantu bali nge mpaanga ishabula kacema.+ Lyena atendeke ukubasambilisha ifintu ifingi.+

35 Nomba inshita yalipwile, kabili abasambi bakwe baishile kuli ena balamweba abati: “Pano tuli ni pa mpanga na kasuba nakawa.+ 36 Ebeni abantu baleya, pa kuti baye mu mishi na mu ncende shili mupepi, bayeishitila ifya kulya.”+ 37 Lelo Yesu abebele ati: “Imwe bene bapeeleni ifya kulya.” Nabo bamwebele abati: “Bushe kuti twayashita imikate ya madenari* 200 no kwisapeela abantu pa kuti balye?”+ 38 Na o abebele ati: “Bushe mukwete imikate inga? Kabiyeni, kamoneni!” Ilyo baimwene batile: “Tukwete imikate 5 ne sabi libili.”+ 39 Lyena aebele abantu ukuti bekale mu mabumba pa cani icibishi.+ 40 E ico baikele mu mabumba, bamo baleba 100 bambi 50. 41 Kabili ilyo abuulile imikate 5 ne sabi libili, aloleshe ku muulu apepa no kupepa.+ Lyena amokawile umukate alapeela na basambi pa kuti nabo bapeele abantu, kabili ayakenye isabi libili e lyo apeela abantu bonse. 42 E ico bonse baliliile baikuta no kwikuta. 43 Ilyo balonganike ifyasheleko ku mikate, fyaiswile imiseke 12, kwali ne sabi ilyasheleko.+ 44 Abaliile imikate bali abaume 5,000.

45 Lyena apo pene aebele abasambi bakwe ukuti banine ubwato bamutangilile kwi shilya lya bemba ukulola ku Betsaida. Ilyo baleya ena ashele alesalanganya amabumba.+ 46 Nomba pa numa ya kubafishapo, aile ku lupili mu kupepa.+ 47 Ilyo cali icungulo bushiku, ubwato bwafikile pa kati ka bemba lelo ena ali eka ku mulundu.+ 48 E ico nalimo pa bulinde bwalenga 4* ubwa bushiku ilyo amwene balecula pa koba ubwato, pa mulandu wa kuti umwela walefumina uko baleya, aile kuli bena ninshi ale-enda pali bemba; lelo acitile kwati alefwaya ukubapitilila.* 49 Ilyo bamumwene fye ale-enda pali bemba, batontonkenye ukuti cintu fye icapala umuntu kabili balipundile. 50 Pantu bonse balimumwene kabili balitiinine. Lelo ilyo line alilandile nabo, kabili abebele ati: “Shipeni, nine; mwitiina.”+ 51 Lyena aninine mu bwato umo bali kabili umwela walilekele. E ico balipapile nga nshi, 52 pantu ninshi tabalaishiba umwalolele icipesha amano ico Yesu acitile pa mikate. Calebakosela ukumfwa umwalelola fyonse ifyo Yesu alecita.

53 Ilyo bafikile ku mulundu, baile ku Genesarete bakakila no bwato mupepi.+ 54 Lelo ilyo bafumine fye mu bwato, abantu balimwishibe. 55 Abantu balipitene muli cilya citungu conse kabili basendeele abalwele pa misengele, no kubatwala uko baumfwile ukuti e ko ali. 56 Kabili mu mishi monse umo aleingila, mu misumba na monse nelyo mu ncende ishali mupepi ne misumba, balebika abalwele pa maliketi, kabili balemupaapaata ukuti bekateko fye ku nsenkebele sha ku ca kufwala cakwe ica kunse.+ Bonse abaiketeko balipolele.

7 Nomba abaFarise na bakalemba bamo abafumine ku Yerusalemu balongene ukwali Yesu.+ 2 Kabili bamwene abasambi bakwe bamo balelya ifya kulya ne minwe ya fiko, e kutila ukwabula ukusamba ku minwe.* 3 (Pantu abaFarise na baYuda bonse tabalya nga tabasambile ku minwe ukufisha mu nkonkoni. Bakonka sana intambi sha ba kale, 4 kabili nga babwela ku maliketi, tabalya ukwabula ukusamba. Kwaliba intambi na shimbi ishingi isho bakonka, pamo ngo lutambi lwa kutubika amakapu, imitondo nelyo ifipe fya mukuba mu menshi.)+ 5 E ico aba abaFarise na bakalemba bamwipwishe abati: “Mulandu nshi abasambi bobe bashikonkela intambi sha ba kale, lelo balya ifya kulya ne minwe ya fiko?”+ 6 Na o abaswike ati: “Esaya alilungike ilyo aseseme pali imwe ukuti, ‘Aba bantu bancindika fye pa tunwa twabo, lelo imitima yabo yalitaluka kuli ine.+ 7 Nga balepepa baicusha fye, pantu ifisambilisho basambilisha mafunde ya bantu.’+ 8 Mwalisuula amafunde ya kwa Lesa, lelo mukonka sana intambi sha bantu.”+

9 Abebele no kuti: “Mu bucenjeshi bwenu mulasuula amafunde ya kwa Lesa pa kuti mulekonka intambi shenu.+ 10 Ku ca kumwenako Mose atile, ‘Mulecindika bashinwe na banyinenwe.’+ Kabili atile, ‘Onse uwasaalula* wishi nelyo nyina, mufwile ukumwipaya.’+ 11 Lelo imwe mutila, ‘Umuntu nga aeba wishi nelyo nyina ati: “Fyonse ifyo nakwata ifyo ningabomfya pa kumwafwilisha ni korbani (e kutila, ubupe ubo napeela Lesa),”’ 12 tamumuleka acitila wishi nelyo nyina+ icintu nangu cimo. 13 E ico mwalilenga icebo ca kwa Lesa caba ica fye pa mulandu wa ntambi isho mushiilana.+ Kabili mulacita ifyapala ifi ifingi.”+ 14 Na kabili aitile ibumba e lyo abeba ati: “Bonse umfweni ifyo ndelanda, kabili mwiluke umo filolele.+ 15 Takwaba icingila mu muntu icingamukowesha, lelo ififuma mu muntu e fingalenga aba uwakowela.”+ 16* ——

17 Nomba ilyo afumine apali ibumba aingila na mu ng’anda, abasambi bakwe batampile ukumwipusha pali cilya cilangililo.+ 18 E ico na o abebele ati: “Bushe na imwe tamwilwike umo ici cilolele? Bushe tamwaishiba ukuti takwaba icingila mu muntu icingalenga aba uwakowela, 19 pantu tacingila mu mutima, lelo cingila mu mala, e lyo cafumina mu cimbusu?” E ico alandile ukuti ifya kulya fyonse fyalisanguluka. 20 Kabili alandile ati: “Icifuma mu muntu e cilenga aba uwakowela.+ 21 Pantu mu kati, mu mutima wa muntu,+ e mufuma amatontonkanyo yabipa, pamo nga ubulalelale,* ubupuupu, ukwipaya, 22 ubucende, ubufunushi, ukucita ifyabipa, ubucenjeshi, ifya nsoni,* umufimbila,* ukupontela ifya mushilo, amatutumuko no buwelewele. 23 Fyonse ifi ifyabipa fifuma mu kati kabili e filenga umuntu aba uwakowela.”

24 Ilyo Yesu afumine kulya, aile ku Turi na ku Sidone.+ Ilyo afikile kulya aingile mu ng’anda kabili talefwaya ukuti abantu beshibe. Na lyo line abantu balishibe. 25 Ilyo line umwanakashi uwali na kamwana akakashana akali no mupashi wakowela alyumfwile ukuti Yesu ali kulya. E ico ailefukama pa ntanshi yakwe afisha ne mpumi panshi.+ 26 Uyu mwanakashi ali muGriki, uwa ku Foinike* iya mu Siria; kabili atwalilile ukulomba Yesu ukuti afumye icibanda mu mwana wakwe. 27 Lelo Yesu amwebele ati: “Leka abana bekute, pantu tacawama ukubuula umukate wa bana no kupoosela utubwa.”+ 28 Nomba umwanakashi amwaswike ati: “Ca cine mwe shikulu, lelo no tubwa twine utuli mwi samba lye tebulo tulalyako ubufungau ubulepona ku mukate wa bana.” 29 Na o amwebele ati: “Pa mulandu ne fyo walanda, kabiye; icibanda nacifuma mu mwana obe.”+ 30 E ico alile ku ng’anda ku mwakwe kabili asangile umwana nalaala pa busanshi ninshi ne cibanda nacifumamo.+

31 Ilyo Yesu afumine ku citungu ca Turi pa kuya kuli bemba wa Galili, apitile mu Sidone na mu citungu ca Dekapoli.*+ 32 Kulya kwine bamuleteele nkomamatwi uwalebulubusa,+ kabili bamupaapeete ukuti amundape.* 33 E ico amufumishe pe bumba, amusenda pa mbali. Lyena amwikete mu matwi, kabili pa numa ya kufwisa amate, amwikete ku lulimi.+ 34 Kabili ilyo aloleshe mu muulu, aishishe sana icefu e lyo amweba ati: “Efata,” e kuti, “Komoka.” 35 E ico amatwi yakwe yalikomweke,+ aleka ukubulubusa, atendeka no kulanda bwino. 36 Lyena abakonkomeshe ukuti tabalingile ukwebako nangu umo,+ lelo ilyo abakonkomeshe sana e lyo nabo bacililemo ukubilisha ifyo acitile.+ 37 Balipapile nga nshi+ kabili balelanda abati: “Fyonse ifyo acita fisuma sana. Alalenga na bankomamatwi baleumfwa na bacibulu balelanda.”+

8 Muli shilya nshiku, na kabili abantu abengi balongene ukwali Yesu kabili tabakwete ifya kulya. E ico Yesu aitile abasambi bakwe e lyo abeba ati: 2 “Naumfwila ibumba uluse,+ pantu nomba inshiku shaba shitatu isho baikala na ine kabili tabakwete ifya kulya.+ 3 Nga nabaleka baya ku mwabo ne nsala kuti bafwa ulushile mu nshila. Na kuba bamo bafuma ukutali.” 4 Lelo abasambi bakwe bamwaswike abati: “Bushe pano pa mpanga ni kwisa umuntu engafumya imikate ya kuti aba bantu balye bekute?” 5 Na o abepwishe ati: “Bushe mukwete imikate inga?” Nabo batile: “Tukwete iili 7.”+ 6 E lyo aebele abantu abali mwi bumba ukuti bekale panshi, lyena abuulile imikate 7, atasha Lesa, aimokaula e lyo apeela abasambi bakwe pa kuti nabo bapeele abantu.+ 7 Balikwete no tusabi utunono, kabili ilyo atashishe Lesa, aebele abasambi bakwe ukuti nato twine bapeele abantu. 8 E ico baliliile no kwikuta, kabili ilyo balonganike ifyashelepo+ fyaiswile imiseke iikalamba* 7. 9 Nomba pa baliile pali abaume nalimo 4,000. Lyena alilekele abantu baya.

10 Apo pene aninine mu bwato na basambi bakwe baya na ku citungu ca Dalmanuta.+ 11 Ilyo ali kuli ici citungu, abaFarise balishile balakansana nankwe. Balefwaya abacitile icishibilo ukufuma ku muulu pantu balefwaya ukumwesha.+ 12 E ico aishishe sana icefu, e lyo alanda ati: “Mulandu nshi iyi nkulo ilefwaila icishibilo?+ Ndemweba icine cine nati, abantu ba iyi nkulo+ tabakabalange icishibilo nangu cimo.” 13 E ico alibashile, anina mu bwato na kabili, aya na kwi shilya.

14 Nomba abasambi balilabile ukusenda imikate, tabakwete ifya kulya nangu fimo mu bwato, bakwete fye umukate umo.+ 15 Kabili abakonkomeshe ati: “Mulelola kabili mufwile ukucenjela ne citutumushi ca baFarise ne ca kwa Herode.”+ 16 E ico batendeke ukukansana pa mulandu wa kuti tabasendele imikate. 17 Ilyo aishibe ukuti balekansana, abebele ati: “Cinshi mulekansanina pa mulandu wa kuti tamusendele imikate? Bushe na nomba tamulailuka ico ndelandapo? Bushe tamulaishiba? Bushe nacimukosela ukumfwa? 18 ‘Mwalikwata amenso nomba tamumona; mwalikwata amatwi nomba tamuumfwa.’ Nga muleibukisha, 19 miseke inga iyo mwaiswishe ifyashelepo ilyo namokawile imikate 5+ no kuliisha abaume 5,000?” Nabo bamwaswike abati: “Yali 12.”+ 20 “Bushe ilyo namokawile imikate 7 no kuliisha abaume 4,000, miseke inga iikalamba* iyo mwaiswishemo ifyashelepo?” Nabo bamwaswike abati: “Yali 7.”+ 21 E lyo abepwishe ati: “Bushe na nomba tamwishibe ico ndelandapo?”

22 Nomba bafikile pa cabu ca Betsaida. Pali ici cabu abantu bamuleteele umwaume uwali impofu, kabili bamupaapeete ukuti amwikate.+ 23 E ico Yesu aikete uyu mwaume pa kuboko, amufumisha na kunse ya mushi. Ilyo amupaalile amate mu menso,+ alimwikete e lyo amwipusha ati: “Bushe pali ifyo ulemona?” 24 Ilyo uyu mwaume ainwine amenso alandile ati: “Ndemona abantu, nomba balemoneka kwati fimuti ifile-enda.” 25 Na kabili abikile iminwe pa menso ya uyu mwaume kabili alitampile ukumona bwino bwino. Alipolele atampa no kumona ifintu fyonse bwino bwino. 26 E ico alimulekele aya ku mwabo e lyo amweba ati: “Wi-ingila mu mushi.”

27 Nomba Yesu na basambi bakwe baile ku mishi ya ku Kaisarea Filipi, kabili mu nshila atendeke ukwipusha abasambi bakwe ati: “Bushe abantu batila nine ani?”+ 28 Nabo bamwaswike abati: “Batila nimwe Yohane Kabatisha,+ bambi batila, nimwe Eliya,+ e lyo bambi nabo batila, muli umo pali bakasesema.” 29 Lyena abepwishe ati: “Inga imwe mutila nine ani?” Petro amwaswike ati: “Nimwe Kristu.”+ 30 E ico abakonkomeshe ukuti tabalingile ukwebako umuntu nangu umo ukuti e wali Kristu.+ 31 Kabili atendeke ukubasambilisha ukuti Umwana wa muntu bali no kumucusha nga nshi no kuti abakalamba, intungulushi sha bashimapepo na bakalemba bali no kumukaana kabili bali no kumwipaya.+ Lyena pa bushiku bwalenga shitatu ali no kubuushiwa.+ 32 Na kuba tabafishile nangu cimo ilyo alebeba ifi. Lelo Petro amusendele pa mbali, atampa no kumukalipila.+ 33 Lyena Yesu alipilibwike alolesha abasambi, e lyo akalipila Petro ati: “Kabiye ku numa yandi, we Satana we, pantu tautontonkanya ifya kwa Lesa, lelo utontonkanya ifya bantu.”+

34 Nomba Yesu aitile ibumba na basambi bakwe e lyo abeba ati: “Umuntu nga alefwaya ukunkonka, aikaane umwine asende ne cimuti cakwe ica kucushiwilwapo* e lyo alenkonka.+ 35 Pantu onse uufwaya ukupususha umweo wakwe* akaulofya, lelo onse uwalofya umweo wakwe* pa mulandu wandi na pa mulandu wa mbila nsuma akaupususha.+ 36 Na kuba, busuma nshi umuntu engasangamo nga anonka icalo conse lelo alofya umweo wakwe?*+ 37 Na cine, cinshi ico umuntu engakabushamo umweo wakwe?*+ 38 Pantu onse uumfwa insoni kabili uushifwaya abantu ba muli iyi nkulo, iishaba na cishinka* kabili ababembu beshibe ukuti musambi wandi beshibe no kuti alisumina amashiwi yandi, ilyo Umwana wa muntu akesa no bucindami bwa kwa Wishi pamo na bamalaika+ ba mushilo, na o akomfwa insoni+ sha kulanda ukuti musambi wakwe.”

9 Kabili alabeba ati: “Ndemweba icine cine nati, bamo pa beminine pano tabakafwe nakalya mpaka bakamone Ubufumu bwa kwa Lesa bwatendeka ukuteka na maka.”+ 2 Ilyo papitile inshiku 6, Yesu asendele Petro, Yakobo na Yohane no kunina nabo ulupili ulutali pa kuti babe fye beka. Kabili alyalwike ninshi balemonako;+ 3 ifya kufwala fyakwe ifya kunse fyalibengeshime kabili fyalibuutile ukucila ifyo onse uuwasha ifya kufwala pano isonde engafibuutisha. 4 Kabili bamwene Eliya na Mose balelanda na Yesu. 5 Lyena Petro aebele Yesu ati: “Mwe Kasambilisha, kuti cawama nga twaikala pano pene. E ico natupangepo insakwe shitatu, imo iyenu, imo iya kwa Mose e lyo na imbi iya kwa Eliya.” 6 Na kuba taishibe ifya kulanda, pantu abasambi bonse batatu balitiinine nga nshi. 7 Kabili kwaishile ikumbi lyabakupa, ne shiwi+ lyafumine mwi kumbi aliti: “Uyu e Mwana wandi uo natemwa.+ Muleumfwa ifyo alelanda.”+ 8 Ilyo line fye baloleshe konse konse nomba tabamweneko umuntu umbi, bamwene fye Yesu.

9 Ilyo baletentemuka ulupili, Yesu abakonkomeshe ukuti tabalingile ukwebako umuntu nangu umo ifyo bamwene,+ mpaka Umwana wa muntu akabuuke ku bafwa.+ 10 Balikonkele* ifyo Yesu abebele, lelo balilanshanye umo uku kubuuka ku bafwa uko alandilepo kwalolele. 11 Kabili batendeke ukumwipusha abati: “Nomba cinshi bakalemba balandila abati Eliya+ afwile ukubalilapo ukwisa?”+ 12 Na o abaswike ati: “Eliya e ulingile ukubalilapo ukwisa kabili nga aisa akalenga ifintu fyonse fikabe ifyo filingile ukuba;+ nomba cinshi amalembo ya mushilo yalandile ukuti Umwana wa muntu afwile ukucula nga nshi+ kabili bakamukaana?+ 13 Lelo ndemweba nati, na kuba ni kale Eliya+ aisa, kabili balimucitile ifyabipa ifyo balefwaya nga filya fine amalembo ya mushilo yalanda pali ena.”+

14 Ilyo baile ku basambi bambi, bamwene ibumba ilikalamba nalibashinguluka ninshi bakalemba balekansana na basambi.+ 15 Lelo ilyo abali mwi bumba bamumwene fye, balipapile e lyo bamubutukila balamuposha. 16 E ico abepwishe ati: “Cinshi mulekansaninapo?” 17 Umo mwi bumba amwaswike ati: “Mwe Kasambilisha, ndetele umwana wandi umwaume kuli imwe pantu aba no mupashi uwalenga aba cibulu.+ 18 Lyonse ilyo wamwikata, ulamufuntula panshi, kabili alafumya ifulo ku kanwa, alasumanya ameno na maka yalapwa. Naceba abasambi benu ukuti baufumye, lelo bacifilwa.” 19 Na o abebele ati: “Kwena muli nkulo iyabula icitetekelo,+ bushe nkaba na imwe ukufika lilali? Bushe ni lilali nkaleka ukushipikisha pa fyo mucita? Muleteni kuno.”+ 20 E ico bamutwele kuli Yesu, lelo ilyo umupashi wamumwene fye wafulenshe umwana, ilyo awile panshi atampile ukufulukuta uku ninshi alefumya ne fulo ku kanwa. 21 E lyo Yesu aipwishe wishi wa mwana ati: “Ni lilali umupashi watendeke ukumucusha?” Na o amwaswike ati: “Ukufuma fye ku bwaice, 22 kabili ilingi line ulamupoosa mu mulilo na mu menshi pa kuti umwipaye. Lelo nga mwingacitapo cimo, tumfwileni uluse no kutwafwa.” 23 Yesu amwebele ati: “Mulandu nshi walandila auti, ‘Nga mwingacitapo cimo’! Fyonse kuti fyacitika nga ca kuti umuntu ali ne citetekelo.”+ 24 Apo pene wishi wa mwana abilikishe ati: “Nalikwata icitetekelo! Ngafweni ukukosha icitetekelo candi!”+

25 Nomba ilyo Yesu amwene ukuti ibumba lyalebutukila kuli bena, akalipiile umupashi wakowela, ati: “We mupashi uwalenga uyu mwana abe cibulu kabili nkomamatwi, fuma muli ena, kabili wikabwelelamo na kabili.”+ 26 Umupashi walifumine pa numa ya kubilikisha no kufulansha umwana pa miku iingi. Kabili ali fye kwati nafwa ica kuti abantu abengi baletila: “Nafwa!” 27 Lelo Yesu amwikete ku kuboko no kumwimya, na o alimine. 28 Ilyo aingile mu ng’anda, abasambi bakwe bamwipwishe ku mbali abati: “Cinshi ifwe twacifililwa uku-ufumya?”+ 29 Na o abaswike ati: “Umupashi wa musango uyu kuti mwaufumisha fye kwi pepo.”

30 Ilyo bafumine kulya, bailepita mu Galili, lelo talefwaya ukuti umuntu nangu umo eshibe. 31 Pantu alesambilisha abasambi bakwe ati: “Umwana wa muntu bali no kumufutuka pa kuti abalwani bakwe bakamwikate no kumwipaya,+ lelo nangu bakamwipaye pa numa ya nshiku shitatu akabuushiwa.”+ 32 Lelo tabaumfwikishe ifyo alelandapo, kabili balitiinine ukumwipusha.

33 Lyena bafikile mu Kapernahumu. Nomba ilyo ali mu ng’anda abepwishe ati: “Cinshi mwacilakansaninapo mu nshila?”+ 34 Nabo baikele fye tondolo, pantu mu nshila balekansanina pa wali umukalamba pali bena 35 E ico alikele aita na batumwa bakwe 12 e lyo abeba ati: “Umuntu nga alefwaya ukuba umukalamba, afwile ukuba uwacepesha pali bonse kabili afwile ukulabombela bonse.”+ 36 Lyena abuulile umwana umunono, amwiminika pa ntanshi yabo, amwikata na pa mabeya e lyo aeba abatumwa bakwe ati: 37 “Onse uwapokelela umo pa bana banono+ ngo yu pa mulandu we shina lyandi, ninshi na ine ampokelela; na onse uwampokelela, ninshi te ine neka apokelela, lelo apokelela no wantumine.”+

38 Yohane amwebele ati: “Mwe Kasambilisha, twalimwene umuntu aletamfisha ifibanda mwi shina lyenu kabili twalimuleseshe, pantu tatukonka.”+ 39 Lelo Yesu atile: “Mwilamulesha, pantu takuli nangu umo uucitila ifipesha amano mwi shina lyandi kabili apo pene atampa ukulanda ifyabipa pali ine. 40 Pantu onse uushitulwisha, ninshi muntu wesu.+ 41 Kabili onse uwamupeela kapu ya menshi aya kunwa pa mulandu wa kuti muli ba kwa Kristu,+ ndemweba icine cine nati, nangu cibe shani akalambulwa.+ 42 Lelo onse uwapunwisha umo pali aba abacepesha abakwata icitetekelo, kuti cawama bamukakila mu mukoshi icilibwe icafina ica kupelelako cilya impunda ipindulula no kumupoosa muli bemba.+

43 “Ukuboko kobe nga kulelenga ulelufyanya, kuputuleko. Pantu cawamapo wapusuka makunkutu ukucila bakupoosa na maboko yonse yabili mu Gehena,* umwaba umulilo uushishima.+ 44* —— 45 Kabili ulukasa lobe nga lulelenga ulelufyanya, luputuleko. Pantu cawama wapusuka uwalemana ukucila bakupoosa na makasa yonse yabili mu Gehena.*+ 46* —— 47 Kabili ilinso lyobe nga lilelenga ulelufyanya, lipoose.+ Pantu cawamapo waingila ne linso limo mu Bufumu bwa kwa Lesa, ukucila bakupoosa mu Gehena*+ na menso yonse yabili, 48 umo imititi ishifwa kabili umo umulilo ushishima.+

49 “Pantu bonse balingile ukulungwamo umucele wa mulilo.+ 50 Umucele usuma, lelo umucele nga wafumuka, cinshi mwingabikamo pa kuti ulowe na kabili?+ Na imwe bene muleba ngo mucele,+ kabili muleikala umutende na banenu.”+

10 Ilyo afumine kulya alimine aya ku mipaka ya Yudea iyaba kwi shilya lya Yordani, na kabili amabumba yalilongene kuli ena. Lyena atampile ukubasambilisha+ na kabili nga fintu alecita lyonse. 2 Kabili abaFarise balishile. Apo balefwaya ukumwesha, bamwipwishe nga ca kuti amafunde yalisuminisha umwaume ukuleka umukashi wakwe.+ 3 Na o abaswike ati: “Bushe Mose amwebele shani?” 4 Nabo bamwaswike abati: “Mose alisuminishe ukutila umulume kuti alembela umukashi kalata ya kumutamfishapo e lyo amuleka.”+ 5 Lelo Yesu abebele ati: “Icalengele Mose amulembele ili ifunde+ ni co mwalikosa imitima.+ 6 Lelo pa kutendeka ilyo ababumbile, ‘Ababumbile umwaume no mwanakashi.+ 7 E mulandu wine umwaume akashiila wishi na nyina,+ 8 kabili aba babili bakaba umubili umo,’+ e ico tabatwalilila ukuba babili, lelo baba umubili umo. 9 Kanshi ico Lesa alundanya, umuntu e cilekanya.”+ 10 Na kabili ilyo bali mu ng’anda, abasambi bakwe batendeke ukumwipusha pali uyu mulandu. 11 Na o abebele ati: “Onse uwaleka umukashi wakwe aupa na umbi, ninshi acita ubucende+ kabili ninshi amubembukila. 12 No mwanakashi na o nga aleka umulume wakwe e lyo aupwa ku mwaume umbi, ninshi acita ubucende.”+

13 Nomba abantu batendeke ukumuletela abana abanono pa kuti abekate, lelo abasambi balibakalipiile.+ 14 Ilyo Yesu amwene ifi alikalipe sana kabili abebele ati: “Balekeni abana banono bese kuli ine; mwilabakaanya pantu Ubufumu bwa mu muulu bwa bantu ababa kwati ni aba bana.+ 15 Ndemweba icine cine nati, Onse uushipokelela Ubufumu bwa kwa Lesa nga filya umwana umunono apokelela ifintu, takengilemo nakalya.”+ 16 Kabili afukatile abana, abika iminwe pali bena,+ e lyo alabapaala.

17 Ilyo aleya mu nshila, umwaume umo alimubutukiile amufukamina e lyo amwipusha ati: “Mwe Kasambilisha musuma, cinshi mfwile ukucita pa kuti nkakwate umweo wa muyayaya?”+ 18 Yesu na o amwebele ati: “Mulandu nshi wanjitila ukuti umusuma? Takwaba umusuma nangu umo, kano fye Lesa eka.+ 19 Walishiba ifyo amafunde yalanda, yalanda ati: ‘Mwilaipaya,+ mwilacita ubucende,+ mwilaiba,+ mwilaba bakambone ba bufi,+ mwilacenjesha abanenu,+ mulecindika bashinwe na banyinenwe.’”+ 20 Na o amwebele ati: “Mwe Kasambilisha, ndakonka aya mafunde yonse ukufuma fye ku bwaice.” 21 Yesu alimuloleshe, kabili apo alimutemenwe amwebele ati: “Kuli icintu na cimbi ico ufwile ukucita: Kabiye kashitishe fyonse ifyo wakwata upeele na bapiina indalama, nga wacita ifi ukakwata ifyuma mu muulu; e lyo wise ulenkoka.”+ 22 Ilyo aumfwile aya mashiwi alyumfwile ubulanda, kabili afuminepo ninshi ali no bulanda pantu alikwete ifyuma ifingi.+

23 Ilyo Yesu aloleshe konse konse aebele abasambi bakwe ati: “Ala cikakosela abakwata indalama ukwingila mu Bufumu bwa kwa Lesa!”+ 24 Lelo abasambi balipapile pali ifi alandile. Yesu na o abebele ati: “Mwe bana, ala calikosa ukwingila mu Bufumu bwa kwa Lesa! 25 Ca-angukilapo ingamila ukupula mu linso lya nshindano ukucila uwa fyuma ukwingila mu Bufumu bwa kwa Lesa.”+ 26 Nabo e lyo bacilileko ukupapa kabili bamwebele abati:* “Ninshi nani engapusuka?”+ 27 Ilyo Yesu abalolekeshe, abebele ati: “Abantu te kuti bacite ifi, lelo Lesa+ ena kuti acita ifintu fyonse.” 28 Lyena Petro amwebele ati: “Moneni! Twalisha fyonse pa kuti tulemukonka.”+ 29 Yesu abebele ati: “Ndemweba icine cine nati, takwaba uwasha ing’anda nelyo bamunyina nangu inkashi nelyo wishi nangu nyina nelyo abana nangu amabala pa mulandu wandi na pa mulandu wa mbila nsuma+ 30 uushakapokelele pali ino nshita imiku 100, amayanda, bamunyina, inkashi, banyina, abana, amabala e lyo no kumucusha+ pa mulandu wa ine. Kabili ku ntanshi* akapokelela umweo wa muyayaya. 31 Lelo abengi aba ntanshi bakaba aba kulekelesha, e lyo abengi aba kulekelesha e bakaba aba ntanshi.”+

32 Nomba ilyo baleya mu musebo walola ku Yerusalemu, Yesu ali pa ntanshi yabo, kabili balipapile, nomba abalebakonka balitiinine. Na kabili asendele abasambi bakwe 12 pa mbali e lyo alabeba ifyali no kumucitikila, abebele ati:+ 33 “Namwishiba! Tuleya ku Yerusalemu kabili bali no kupeela Umwana wa muntu ku ntungulushi sha bashimapepo na bakalemba, nabo bakamupingula ukuti afwe kabili bakamupeela ku bena fyalo, 34 bakamupumya, bakamufwishila amate, bakamufopaula kabili bakamwipaya, lelo pa numa ya nshiku shitatu akabuushiwa.”+

35 Yakobo na Yohane abana baume babili aba kwa Sebede,+ baile kuli Yesu e lyo bamweba abati: “Mwe Kasambilisha, tulefwaya mutucitile conse ico twalamulomba.”+ 36 Na o abepwishe ati: “Cinshi mulefwaya imucitile?” 37 Nabo bamwebele abati: “Tusuminisheni ukuti tukekale umo ku kulyo kwenu na umbi ku kuso kwenu, mu Bufumu bwenu.”*+ 38 Yesu abebele ati: “Tamwishibe ico mulelomba. Bushe kuti mwanwena muli kapu iyo ndenwenamo, nelyo bushe kuti mwabatishiwa ulubatisho ulo ndebatishiwako?”+ 39 Nabo bamwaswike abati: “Kuti twanwenamo.” E ico Yesu abebele ati: “Na imwe mukanwena muli kapu iyo ndenwenamo, no lubatisho ulo ndebatishiwako, na imwe mukabatishiwako.+ 40 Nomba te ine nsala aba kwikala ku kulyo kwandi na ku kuso kwandi, lelo abo bapekanishisha ebakekalako.”

41 Ilyo abasambi bambi 10 baumfwile icacitike, balifuliilwe Yakobo na Yohane.+ 42 Lelo Yesu alibetile, alabeba ati: “Mwalishiba ukuti bakateka ba fyalo abo abantu baishiba, bateka abantu babo kwati basha ne ntungulushi na sho shilatitikisha abo shitungulula.+ 43 Ifi te fyo imwe mufwile ukuba; lelo onse uufwaya ukuba umukalamba pali imwe, afwile ukulamubombela,+ 44 na onse uufwaya ukuba uwa ntanshi pali imwe, afwile ukulamubombela imwe bonse. 45 Pantu nangu Mwana wa muntu taishile pa kuti balemubombela, lelo aishile mu kubombela+ abantu no kubapeela umweo wakwe* icilubula pa kuti alubule abengi.”+

46 Lyena bafikile ku Yeriko. Nomba ilyo afumine mu Yeriko pamo na basambi bakwe ne bumba ilikalamba, Bartimeo (umwana wa kwa Timeo), uwali kalombalomba impofu, aikele mu mbali ya musebo.+ 47 Ilyo aumfwile ukuti ni Yesu umwina Nasarete alepita, atendeke ukubilikisha ati: “Mwe Yesu Mwana Davidi,+ ng’umfwileniko uluse.”+ 48 E ico abantu abengi batampile ukumukalipila pa kuti ekale tondolo, lelo e lyo acililemo ukubilikisha ati: “Mwe Yesu Mwana Davidi, ng’umfwileniko uluse!” 49 E ico Yesu aliminine e lyo alanda ati: “Mwiteni.” Nabo pa kumwita bamwebele abati: “Shipa! Ima; alekwita.” 50 E ico uyu mwaume alipoosele ica kufwala cakwe ica kunse, kabili bwangu bwangu alimine aya na kuli Yesu. 51 Lyena Yesu amwipwishe ati: “Cinshi ulefwaya nkucitile?” Na o amwaswike ati: “Mwe Kasambilisha,* ndefwaya ntampe ukumona.” 52 Na Yesu amwebele ati: “Kabiye. Icitetekelo cobe cakuposha.”+ Kabili apo pene uyu mwaume atampile ukumona,+ atendeka no kumukonka mu musebo.

11 Nomba ilyo bapaleme ku Yerusalemu, bafikile pa Lupili lwa Miolife apaba Betfage na Betani.+ Lyena Yesu atumine abasambi+ bakwe babili 2 kabili abebele ati: “Kabiyeni muli ulya mushi uuli pa ntanshi, kabili ilyo mwalaingila fye, mwalasanga umwana wa mpunda uo umuntu nangu umo ashabalaikalapo nabamukaka. Mumukakule e lyo mu mulete. 3 Nga paba uwamwipushapo ati, ‘Cinshi mulekakwila umwana wa mpunda?’ mumwasuke amuti, ‘Shikulu alemufwaya kabili alemubwesha nomba line.’” 4 E ico balile bayasanga umwana wa mpunda nabamukaka pa mwinshi, panse mu musebo kabili balimukakwile.+ 5 Lelo abaiminine mupepi babepwishe abati: “Cinshi ico mulekakwila umwana wa mpunda?” 6 Nabo balandile filya fine Yesu abebele, e ico balibalekele baya.

7 Kabili baleteele Yesu umwana wa mpunda,+ babikapo ifya kufwala fyabo ifya kunse e lyo aikalapo.+ 8 Kabili abengi ba-anshike ifya kufwala fyabo ifya kunse mu musebo, e lyo bambi bakontwele utumisambo mu mpanga.+ 9 Kabili abali pa ntanshi na balekonka pa numa balebilikisha abati: “Tulepepa+ kuli imwe atuti, mupususheni! Alipaalwa uwishila mwi shina+ lya kwa Yehova!* 10 Bwalipaalwa Ubufumu bwa kwa shifwe Davidi+ ubuleisa! Tulepepa kuli imwe mwe baikala mu muulu atuti, mupususheni!” 11 Kabili aile ku Yerusalemu aingila na mwi tempele, lyena aloleshe ifintu fyonse, kabili apo akasuba kaliwile kale aile na batumwa bakwe 12+ ku Betani.

12 Ubushiku bwakonkelepo ilyo balefuma ku Betani, alyumfwile insala.+ 13 Amwene umukunyu uwali na mabuula akatalamukila, kabili alileko pa kuti amone nga kuti asangako ifisabo. Lelo ilyo afikile, tasangileko ifisabo nangu fimo kwali fye amabuula yeka yeka, pantu tayali ni nshita amakunyu yatwala. 14 E ico awebele ati: “Umuntu nangu umo ekabala alyako icisabo kuli iwe na kabili.”+ Na basambi bakwe baleumfwako.

15 Nomba bafikile ku Yerusalemu. Lyena Yesu aingile mwi tempele e lyo atamfyamo bonse abaleshitishishamo ifintu na baleshita, kabili apenwine amatebulo ya balekabushanya indalama ne fipuna fya baleshitisha inkunda,+ 16 kabili tasuminishe nangu umo ukupita pe tempele ninshi nasenda fimo. 17 Alebasambilisha ati: “Bushe Amalembo ya Mushilo tayalanda ati, ‘Ing’anda yandi bakaita ukuti ing’anda ya kupepelapo inko+ shonse’? Lelo imwe muleisangula ulucengo lwa fipondo.”+ 18 Kabili intungulushi sha bashimapepo na bakalemba balyumfwile ifi. Lyena batampile ukufwaya inshila ya kumwipailamo;+ pantu balemutiina pa mulandu wa kuti ibumba lyonse lyalepapa ifyo alesambilisha.+

19 Ilyo cali icungulo, Yesu na basambi bakwe balifumine mu musumba. 20 Lelo ilyo balepita kacelocelo, bamwene umukunyu nauma ukutampila fye ku mishila.+ 21 Ilyo Petro aibukishe icacitike, aebele Yesu ati: “Mwe kasambilisha, moneni! umukunyu uo mwatiipile nauma.”+ 22 E lyo Yesu abebele ati: “Muletetekela Lesa. 23 Ndemweba icine cine nati, onse uwaeba ulu lupili ati, ‘Fuma apa no kuipoosa muli bemba,’ kabili taletwishika mu mutima wakwe lelo natetekela ukuti ico alanda cili no kucitika, ninshi cikacitika.+ 24 E mulandu wine ndemwebela nati, fyonse ifyo mwalomba ilyo mulepepa muleba ne citetekelo, kabili mulemona fye ukuti namufipokelela kale, lyena mukafipokelela.+ 25 Kabili ilyo mwaiminina mulepepa, nga muli na cimo ku mukoshi pa muntu umo mubeleleni uluse, pa kuti na Shinwe wa mu muulu engamubelela uluse pa fyo mulufyanya.”+ 26* ——

27 Na kabili baishile ku Yerusalemu. Ilyo ale-enda mwi tempele, intungulushi sha bashimapepo na bakalemba na bakalamba baishile kuli ena 28 kabili bamwipwishe abati: “Maka nshi ubomfya pa kucita ifi fintu? Nelyo nani akupeele aya maka?”+ 29 Yesu abebele ati: “Na ine nalamwipushako icipusho cimo. Nga mwanjasuka, e lyo na ine nalamweba amaka momfya pa kucita ifi fintu. 30 Bushe ni kwisa Yohane+ afumishe amaka ya kubatisha, ni ku muulu nelyo ni ku bantu? Njasukeni.”+ 31 E ico batendeke ukulanshanya abene beka abati: “Nga twatila, ‘Ni ku muulu,’ alatweba ati, ‘Nomba cinshi mushamusuminine?’ 32 Lelo bushe tupame tutile, ‘Ni ku bantu’?” Baletiina ibumba, pantu abantu bonse balishibe ukuti Yohane ali ni kasesema.+ 33 E ico ba-aswike Yesu abati: “Tatwishibe.” Yesu na o abebele ati: “Na ine nshamwebe amaka momfya pa kucita ifi fintu.”

12 Lyena atendeke ukubasambilishisha mu filangililo ati: “Umuntu alilimine ibala lya myangashi+ ashingulushako ne linga, e lyo aimba umwa kukamina imyangashi. Lyena akuulilemo ulupungu,+ aseekeshe ne bala lyakwe ku balimi e lyo aya ku calo ca kutali.+ 2 Ilyo inshita ya kusombola ifisabo yafikile, atumine umusha ku balimi pa kuti ayemusendelako ifisabo fya mwi bala lya myangashi. 3 Lelo balimwikete, bamupuma e lyo bamuleka abwelelamo minwe nkutwa. 4 Atumine umusha na umbi ku balimi, na o balimumine ku mutwe kabili balimusaalwile.+ 5 Atumineko umusha na umbi, uyu ena balimwipeye. Alitumineko na bambi abengi, bamo pali aba balibapumine bambi balibepeye. 6 Ashele fye no muntu umo, umwana wakwe umwaume uo atemenwe+ nga nshi. Pa kulekelesha e o atumineko, pantu aleti: ‘Ifi mwana wandi bakamucindika.’ 7 Lelo balya balimi balilanshenye abati, ‘Uyu e mpyani.+ Natumwipaye pa kuti ibala libe lyesu.’ 8 E ico balimusendele, bamwipaya, bamupoosa na kunse ye bala lya myangashi.+ 9 Cinshi umwine we bala lya myangashi akesacita aba balimi? Akesabepaya akapeele ne bala lya myangashi kuli bambi.+ 10 Bushe tamwabelenga? Ilembo litila: ‘Ilibwe ilyo bakakuula bakeene, e lyaishileba pa muulu pa koona.*+ 11 Ili libwe lyafuma kuli Yehova* kabili tulimona ukuti cipesha mano.’”+

12 Ilyo bailwike ukuti e bo alelandapo muli ci cilangililo, balefwaya ukumwikata, lelo baletiina ibumba. E ico balifuminepo baya.+

13 Lyena bamutumiine abaFarise bamo na ba mu kabungwe ka kwa Herode, pa kuti bamwikatile mu milandile yakwe.+ 14 Ilyo bafikile, bamwebele abati: “Mwe Kasambilisha, twalishiba ukuti mulanda icishinka, tamutiina umuntu nangu umo, pantu tamulolesha pa fyo abantu bamoneka, lelo musambilisha inshila ya kwa Lesa mu cine. Bushe amafunde yalisuminisha* ukusonkela umusonko kuli Kaisare nelyo iyo? 15 Bushe tufwile ukulasonkela nelyo tatufwile ukulasonkela?” Nomba apo alishibe ubumbimunda bwabo, abebele ati: “Mulandu nshi mulenjesesha? Ndeteleni indalama imo iya denari* imonepo.” 16 Nabo balimuleteele, e lyo abepusha ati: “Bushe uyu umutwe ne fi balembapo fya kwa nani?” Nabo bamwaswike abati: “Fya kwa Kaisare.” 17 E lyo Yesu abeba ati: “Kanshi ifya kwa Kaisare mulepeela Kaisare,+ e lyo ifya kwa Lesa mulepeela Lesa.”+ E ico balipapile pa fyo abaswike.

18 Nomba abaSaduke abalanda ati abafwa tabakabuushiwe+ baishile kuli Yesu, e lyo bamwipusha abati:+ 19 “Mwe Kasambilisha, Mose atulembeele ati, umuntu nga afwa asha umukashi ukwabula ukufyalamo umwana, munyina+ afwile ukuupa umukashi wakwe pa kuti engamufyalila abana. 20 Kwali aba bwananyina 7. Uwakubalilapo alyupile e lyo afwa ukwabula ukukwatapo umwana. 21 No walenga bubili na o wine alimuupile, lelo tafyelemo umwana. Ifi fine e fyo cali na ku walenga butatu. 22 Bonse 7 bafwile fye ukwabula ukufyalamo umwana. Na mukulekelesha uyu mwanakashi na o wine alifwile. 23 Ilyo abafwa bakabuushiwa, bushe akaba mukashi wa kwa nani? Pantu bonse 7 balimuupilepo.” 24 Na o Yesu abebele ati: “Mwaliluba pantu tamwaishiba Amalembo na maka ya kwa Lesa.+ 25 Pantu abantu nga babuushiwa abaume taboopa, abanakashi nabo taboopwa, lelo baba nga bamalaika mu muulu.+ 26 Nomba bushe tamwabelenga pa kubuuka ku bafwa mwi buuku lya kwa Mose, mu lyashi lya pa cimpusa ilyo Lesa amwebele ati: ‘Nine Lesa wa kwa Abrahamu, Lesa wa kwa Isaki kabili Lesa wa kwa Yakobo’?+ 27 Ni Lesa wa ba mweo, te Lesa wa bafwa iyo. Mwaliluba sana.”+

28 Umo pali bakalemba alyumfwile ilyo balekansana kabili alyumfwile ukuti alibaswike bwino. E ico amwipwishe ati: “Lifunde nshi ilya kubalilapo pa mafunde yonse?”+ 29 Yesu ayaswike ati: “Ilya kubalilapo* ni li, ‘Umfweni mwe bana ba kwa Israele, Yehova* Lesa wesu ni Yehova* umo, 30 kabili mulingile ukutemwa Yehova* Lesa wenu no mutima wenu onse, no mweo* wenu onse, no kutontonkanya kwenu konse, na maka yenu yonse.’+ 31 Ilyalenga bubili ni li, ‘Uletemwa umunobe nge fyo waitemwa we mwine.’+ Takwaba ifunde limbi ilyacila aya.” 32 Na o kalemba amwebele ati: “Mwe Kasambilisha, mwalanda icine, ‘Aba fye Umo, kabili takwaba na umbi’;+ 33 kabili ukutemwa Lesa no mutima onse, na mano* yonse, na maka yonse, no kutemwa umunobe nge fyo waitemwa we mwine, kwalicindama ukucila imituulo ya koca yonse na malambo.”+ 34 Ilyo Yesu amwene ukuti alyaswike na mano, amwebele ati: “Tauli ukutali no Bufumu bwa kwa Lesa.” Lelo takwali nangu umo uwali na maka ya kumwipusha na fimbi.+

35 Lelo ilyo Yesu alesambilisha mwi tempele alandile ati: “Bushe cinshi bakalemba balandila ukuti Kristu mwana wa kwa Davidi?+ 36 Ilyo Davidi apokelele umupashi+ wa mushilo, umwine alandile ati, ‘Yehova* aebele Shikulu ati: “Ikala ku kuboko kwandi ukwa ku kulyo mpaka nkabike abalwani bobe pe samba lya makasa yobe.”’+ 37 Davidi umwine amwitile ati ‘Shikulu,’ nomba kuti aba shani umwana+ wakwe?”

Kabili ibumba ilikalamba lyali ne nsansa ilyo lyalekutika ifyo alelanda. 38 Kabili pa kusambilisha abebele ati: “Mulecenjela kuli bakalemba abafwaya ukwendauka ninshi nabafwala ifya kufwala fya mucinshi kabili abafwaya abantu balebaposha pa maliketi.+ 39 Abafwaya ukwikala pa fipuna fya ku ntanshi* mu masunagoge no kwikala apacindamisha ilyo balelya umulaalilo.+ 40 Balapoka bamukamfwilwa ifyo bakwata* kabili bapepa amapepo ayatali pa kuti abantu babamone.* Aba e bo bakakanda sana.”

41 Lyena Yesu aikele apalungatene ne cipao,+ alelolekesha ifyo abantu balebika indalama mu cipao kabili abakankaala abengi balebikamo indalama ishingi.+ 42 Nomba mukamfwilwa umupiina ailebikamo utundalama tubili, utunono sana.*+ 43 E ico Yesu aitile abasambi no kubeba ati: “Ndemweba icine cine nati, indalama isho uyu mukamfwilwa abikilemo nashicila isho bonse ababikile indalama mu cipao+ babikilemo. 44 Pantu bonse babikilemo indalama isho bacifumya pa shipulile pa sho bakwata, lelo ena nangu mupiina, nabikamo shonse isho acikwata isha kuliilamo.”+

13 Ilyo alefuma mwi tempele, umusambi wakwe umo amwebele ati: “Mwe Kasambilisha, moneni! amabwe ubusuma ne fikuulwa!”+ 2 Lelo Yesu amwebele ati: “Bushe wafimona ifi fikuulwa ifikalamba? Apa tapakabe ilibwe nangu limo ilikashala pa muulu wa libiye ilyo bashakapoose panshi.”+

3 Ilyo Yesu aikele pa Lupili lwa Miolife apalungatene ne tempele, Petro, Yakobo, Yohane na Andrea bamwipwishe ku mbali abati: 4 “Twebeni, ni lilali ifi fintu fikacitika, kabili cinshi tukeshibilako ukuti ifi fintu fili ku mpela?”+ 5 E ico Yesu atendeke ukubeba ati: “Mulecenjela pa kuti umuntu nangu umo ekamulufya.+ 6 Abengi bakeshila mwi shina lyandi, bakalalanda abati, ‘Nine wine,’ kabili bakalufya abengi. 7 Na kabili ilyo mukomfwa inkondo na malyashi ya nkondo, mwikatiina; pantu ifi fintu fifwile ukucitika ilyo impela ishilaisa.+

8 “Pantu uluko lukemina uluko lumbi no bufumu bukemina ubufumu bumbi;+ kukaba ifinkukuma mu ncende ishapusanapusana; kukaba ne fipowe.+ Ifi fikaba e ntendekelo ya bucushi ubukaba ngo kucula kwa pa kupaapa.+

9 “Lelo imwe muleba abacenjela pantu abantu bakamutwala ku filye,+ bakamufopawila mu masunagoge+ kabili bakamutwala pa ntanshi ya balashi ne shamfumu pa mulandu wandi pa kuti mulebashimikila.+ 10 Na kabili imbila nsuma ifwile ukubilwa mu nko shonse ilyo impela ishilaisa.+ 11 Kabili ilyo bakalamutwala ku cilye, mwikasakamikwa pa fyo mukalanda; lelo conse ico umupashi wa mushilo ukamweba ukulanda, e co mukalande, pantu te imwe mukalalanda lelo mupashi wa mushilo.+ 12 Kabili munyina akepaisha munyina, wishi akepaisha umwana, abana nabo bakemina abafyashi babo no kubepaisha.+ 13 Kabili abantu bonse bakamupata pa mulandu we shina lyandi.+ Lelo uukashipikisha* ukufika na ku mpela+ e ukapusuka.+

14 “Lelo ilyo mukamona ica bunani icileta ubonaushi+ naciminina apo cishifwile ukwiminina (uulebelenga eluke), abakaba mu Yudea bakatendeke ukufulumukila ku mpili.+ 15 Uukaba pa mutenge ekekila, nangu ukwingila mu ng’anda yakwe pa kuti asendemo fimo; 16 no ukaba mwi bala ekabwelela ku ng’anda ku fyo ashile ku numa, mukusenda ica kufwala cakwe ica kunse. 17 Cikabipila sana abakaba pa bukulu na bakalaonsha muli isho nshiku!+ 18 Mulepepa ukuti ifi fintu fiikacitika mu nshita ya mpepo; 19 pantu muli isho nshiku kukaba ubucushi+ ubushatala abubako ukutula apo Lesa abumbiile abantu pano isonde ukufika iyo nshita, kabili tabwakatale ababuko na kabili.+ 20 Na kuba, Yehova* nga takepifye isho nshiku, takwakabe umuntu nangu umo uukapusuka. Lelo pa mulandu wa bantu abo asala, isho nshiku akashipifya.+

21 “Lyena umuntu nga amweba ati, ‘Umfweni! Kristu ali kuno,’nelyo amweba ati, ‘Umfweni! Ali kulya,’ mwikasumina iyo.+ 22 Pantu kukesaba baKristu ba bufi na bakasesema ba bufi+ abakalacita ifipesha amano ifyalekanalekana pa kuti balufye nalimo fye na basalwa. 23 E ico imwe, muleba abacenjela,+ namwebela libela fyonse.

24 “Lelo muli sho inshiku ilyo ubucushi bukapwa, akasuba kakafiita no mweshi tawakabalike,+ 25 kabili intanda shikapona mu muulu, ne fya maka ifyaba mu muulu fikatenkana. 26 E lyo bakamona Umwana wa muntu+ aleisa mu makumbi ninshi ali na maka ayengi no bukata.+ 27 Kabili akatuma bamalaika, nabo bakalonganika pamo abasalwa bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo, ukufuma ku mpela imo iye sonde ukufika ku mpela imbi, kabili ukufuma ku mpela imo iya muulu ukufika ku mpela imbi.+

28 “Nomba sambilileniko ku cilangililo ca mukunyu: Cilya fye utumisambo twa uko twaba ututeku kabili twafumya amabuula, muleshiba ukuti amainsa yali mupepi.+ 29 Kanshi na imwe ilyo mukamona ifi filecitika, mukeshibe ukuti Umwana wa muntu ali mupepi, ali pa mwinshi.+ 30 Ndemweba icine cine nati, abantu ba nkulo ino tabakapwe ukufwa mpaka fyonse ifi fikacitike.+ 31 Umuulu ne sonde fikapita,+ lelo amashiwi yandi tayakapite nakalya.+

32 “Takwaba nangu umo uwaishiba ilyo bulya ubushiku bukafika, nelyo inshita bukafika, nangu fye ni bamalaika ba mu muulu nangu fye Mwana tabaishiba, kano fye Tata e waishiba.+ 33 Mulecenjela, mulelola,+ pantu tamwaishiba inshita ifi fintu fikacitika.+ 34 Pantu Ubufumu kuti twabulinganya ku muntu uwaile ku calo ca kutali, e lyo asha apeela abasha+ amaka pa ng’anda yakwe. Kabili cila muntu alimupeele umulimo wa kubomba, aeba no walelinda ing’anda ukuti aleba uwalola.+ 35 E ico mulelola, pantu tamwaishiba ilyo umwine wa ng’anda akesa,+ nampo nga cungulo nelyo ni pa kati ka bushiku nangu ilyo ubushiku buli mu kuca* nelyo ku macaca,+ 36 pa kuti ilyo apumikisha ukwisa, tamusangile namulaala.+ 37 Lelo ifyo ndemweba, nde-eba na bonse nati, Mulelola.”+

14 Nomba kwashele fye inshiku shibili+ ukuti kube Icakucilila+ no Mutebeto wa Mukate Ushatutumuka.+ Kabili intungulushi sha bashimapepo na bakalemba balefwaya inshila ya kumwikatilamo mu bucenjeshi pa kuti bamwipaye;+ 2 pantu balelanda abati: “Twikamwikatila pa mutebeto, pantu nalimo abantu kuti baimya icimfulunganya.”

3 Kabili ilyo ali ku Betani ninshi naikala alelya* mu ng’anda ya kwa Simone uwalwelepo ifibashi, umwanakashi umo alishile kuli ena ne botolo lya mafuta ayanunkila, yali mafuta ya nardi ya cine cine. Kabili yali aya mutengo sana. Uyu mwanakashi aliswile ibotolo* lya mafuta atendeka no kumwitulwila pa mutwe.+ 4 Bamo pa basambi ba kwa Yesu balikalipe e lyo balalanda abati: “Mulandu nshi baleonawila aya mafuta? 5 Pantu aya mafuta nga baciyashitisha ukucila pa madenari* 300 no kupeela abapiina indalama!” Kabili balifuliilwe uyu mwanakashi. 6 Lelo Yesu abebele ati: “Mulekeni umwine. Inga cinshi mulemucushisha? Nancitila icintu icisuma.+ 7 Pantu abapiina mwaba nabo lyonse,+ kabili lyonse ilyo mwafwaya ukubacitila ifisuma kuti mwabacitila, lelo tamwakatwalilile ukuba na ine.+ 8 Nabomba apapelele amaka yakwe, naitulwila amafuta ayanunkila pa mubili wandi pa ku-upekanishisha libela ukushikwa.+ 9 Ndemweba icine cine nati, konse uko bakalabila iyi mbila nsuma pano calo,+ ifyo uyu mwanakashi acitile na fyo bakalafilandapo pa kumwibukisha.”+

10 Lyena Yuda Iskariote, umo pa batumwa 12, aile ku ntungulushi sha bashimapepo pa kuti amufutuke.+ 11 Ilyo baumfwile ukuti alefwaya ukumufutuka, balitemenwe sana kabili bamulaile ukumupeela indalama sha silfere.+ E ico atampile ukufwaya inshita iyalinga iya kumufutukilapo.

12 Nomba pa bushiku bwa kubalilapo ubwa mutebeto wa Mukate Ushatutumuka,+ ubo lyonse baletuulilapo ilambo lya mutebeto wa Cakucilila,+ abasambi bakwe bamwipwishe abati: “Ni kwi mulefwaya tuyemupekanishisha umwa kuliila Icakucilila?”+ 13 Na o atumine abasambi bakwe babili no kubeba ati: “Kabiyeni mu musumba, umwaume uusendele umutondo wa menshi aleyamukumanya. Mumukonke,+ 14 kabili umo alayaingila, muye mwebe umwine wa ng’anda amuti, ‘Kasambilisha atila: “Bushe umuputule wa beni umo nalaliila Icakucilila pamo na basambi bandi uli kwi?”’ 15 Na o aleyamulanga umuputule wa pa muulu uukalamba, uo bapekanya bwino. Umo mwine e mo mupekanishishe Icakucilila.” 16 E ico abasambi baliile, bayaingila na mu musumba e lyo bayasanga filya fine fye abebele, bapekanya ne Cakucilila.

17 Ilyo cali icungulo, Yesu aishile na batumwa bakwe 12.+ 18 Kabili ilyo baikele pe tebulo balelya, Yesu abebele ati: “Ndemweba icine cine nati, umo pali imwe mwebo ndelya nenu, alemfutuka.”+ 19 Awe bonse balyumfwile ubulanda, kabili cila muntu atendeke ukumwipusha ati: “Bushe nine?” 20 Na o abebele ati: “Ni umo pali imwe 12, uuletobela na ine mu mbale imo ine.+ 21 Pantu Umwana wa muntu aleya, filya fine Amalembo ya Mushilo yalanda pali ena, lelo ca bulanda ku uulefutuka+ Umwana wa muntu! Nga caliweme uyo muntu akanafyalwa.”+

22 Kabili ilyo bacili balelya, abuulile umukate, apepa, aumokaula abapeela e lyo abeba ati: “Buuleni, uyu mukate cimpashanya ca mubili wandi.”+ 23 Kabili abuulile kapu umwali umwangashi, apepa e lyo abapeela, kabili bonse balinwenemo.+ 24 Kabili abebele ati: “Uyu mwangashi cimpashanya ca ‘mulopa wandi+ uwa cipangano,’+ uulepongololwa pa mulandu wa bengi.+ 25 Ndemweba icine cine nati, nshakanwe umwangashi na kabili mpaka ubushiku bulya ilyo nkanwa uupya mu Bufumu bwa kwa Lesa.” 26 Na pa kulekelesha balimbile inyimbo sha malumbo, baya na ku Lupili lwa Miolife.+

27 Kabili Yesu abebele ati: “Bonse mulembutuka, pantu calilembwa ukuti, ‘Nkepaya kacema,+ ne mpaanga shikasalangana.’+ 28 Nomba ilyo nkabuushiwa, nkamutangilila ku Galili.”+ 29 Lelo Petro amwebele ati: “Nangu aba bonse bamubutuke, ine nshamubutuke.”+ 30 Na o Yesu amwebele ati: “Ndekweba icine cine nati, lelo line ubushiku, ilyo mukolwe ashilalila imiku ibili, ulekaana imiku itatu+ ukuti tawanjishiba.” 31 Petro akoselepo fye ukulanda ati: “Nshamukaane nakalya. Nga kufwa ndefwila pamo na imwe.” Ifi fine e fyo na basambi bambi balandile.+

32 E ico bafikile pa ncende apo beta ukuti Getsemane, kabili aebele abasambi bakwe ati: “Ikaleni pano, ine naya mu kupepa.”+ 33 Lyena asendele Petro, Yakobo na Yohane.+ Awe atendeke ukumfwa ubulanda kabili alisakamikwe nga nshi. 34 E lyo abeba ati: “Naumfwa* ubulanda nga nshi,+ ni cikanga fye mfwe. Ikaleni pano, kabili mutwalilile ukuba abalola.”+ 35 Kabili cilya aya akatalamukila, alambalala panshi, atendeka no kupepa ukuti nga cingacitika ilya nshita iya-afya ifika. 36 Kabili alandile ati: “Abba,* Tata,+ imwe kuti mwacita fyonse; fumyeni iyi kapu pali ine. Nomba nshiletila ifyo ndefwaya e fyo ficitike, lelo ifyo mulefwaya e fyo ficitike.”+ 37 Ilyo abwelele asangile nabalaala, kabili aebele Petro ati: “Simone naulaala? Bushe taukwete amaka ya kuba uwalola pe awala limo fye?+ 38 Akuloleni kabili akupepeni pa kuti mwi-ingila mu matunko.+ Umutima wena ulefwaisha, lelo umubili naunaka.”+ 39 Lyena alibwelelemo mu kupepa kabili alandile amashiwi yamo yene.+ 40 Ilyo abwelele na kabili asangile nabalaala, pantu amenso yabo yalifinine ku tulo, e ico tabakwete ne fya kumweba. 41 Lyena alibwelele pa muku walenga butatu e lyo abeba ati: “Pa nshita ya musango uyu namulaala kabili muletuusha! Moneni! Inshita yapalama+ iya kuti Umwana wa muntu bamufutuke no kumupeela mu minwe ya babembu. 42 Imeni tuleya. Moneni! Uulemfutuka apalama.”+

43 Kabili ilyo line ninshi acili alelanda, Yuda uwali pa basambi 12, alishile ninshi ali ne bumba ilyakwete impanga ne nkonto, ilyo intungulushi sha bashimapepo, bakalemba na bakalamba+ batumine. 44 Nomba uwalemufutuka alibebeele calimo icishibilo ca kuti: “Uo ndetomona, ninshi e o; mumwikate kabili pa kumusenda mumulinde bwino bwino.” 45 Kabili alungeme Yesu e lyo atila, “Mwe Kasambilisha!” amutomona no kumutomona. 46 E ico balimwikete bamusenda no kumusenda. 47 Lelo umo pa baiminine mupepi na Yesu, afumishe ulupanga lwakwe akoma umusha wa kwa shimapepo mukalamba amuputulako no kutwi.+ 48 Lelo Yesu abebele ati: “Bushe mwishile ne mpanga ne nkonto mu kunjikata kwati ndi cipondo?+ 49 Cila bushiku naleba na imwe mwi tempele ndesambilisha,+ lelo tamwanjikete. Nomba ico fyonse ifi fyacitikila ni pa kuti Amalembo yafikilishiwe.”+

50 Lyena abasambi bonse balimushile bafulumuka no kufulumuka.+ 51 Nomba umulumendo umo uwafwele ica kufwala ca nsalu iisuma ceka ceka alekonka Yesu pa numa kabili balefwaya ukumwikata, 52 lelo alishile ica kufwala cakwe e lyo afulumuka ubwamba.*

53 Lyena batwele Yesu kuli shimapepo mukalamba,+ uko intungulushi sha bashimapepo shonse, abakalamba na bakalemba balongene.+ 54 Lelo Petro alemukonka akatalamukila ica kuti afikile fye na mu lubansa lwa kwa shimapepo mukalamba, kabili aikele na babomfi ba pa ng’anda alaonta no mulilo.+ 55 Nomba intungulushi sha bashimapepo na ba mu cilye ca Sanhedrini bonse, balefwaya abantu aba kushinina Yesu pa kuti bamwipaye, lelo tabasangile umulandu wa kumupeela nangu umo.+ 56 Pantu abengi balelanda ifya bufi pa kumushinina,+ lelo ifyo balelanda fyalepusana. 57 Kwali na bambi abaleima no kulanda ifya bufi pa kumushinina, baleti: 58 “Twamumfwile aleti, ‘Nkabongolola ili tempele ilyo bakuulile ne minwe kabili mu nshiku shitatu nkakuula limbi ilishakakuulwe ne minwe.’”+ 59 Lelo na lintu bamupeele iyi milandu ifyo balelanda fyalipusene.

60 Lyena shimapepo mukalamba alimine aipusha Yesu ati: “Bushe taulelandapo nangu cimo pa fyo aba balekushinina?”+ 61 Lelo aikele fye tondolo kabili ta-aswike nangu cimo.+ Na kabili shimapepo mukalamba amwipwishe ati: “Bushe niwe Kristu Umwana wa Wa Mushilo?” 62 Lyena Yesu alandile ati: “Ee, nine; kabili mukamona Umwana wa muntu+ naikala ku kuboko kwa ku kulyo+ ukwa Wa Maka Yonse* kabili mukamumona aleisa mu makumbi ya mu muulu.”+ 63 Lyena shimapepo mukalamba alepwile ifya kufwala fyakwe e lyo alanda ati: “Bushe tulekabila bakambone na bambi?+ 64 Mwayumfwila ifyo alesaalula Lesa. Muletipo shani?” Bonse bapingwile ukuti alingile ukufwa.+ 65 Bamo batendeke ukumufwishila amate,+ balemufimba ku menso kabili balemuuma amakofi e lyo balamweba abati: “Tulange ukuti niwe kasesema! Twebe uwakuuma!” Kabili ilyo bamutobele amapi ku menso, bakapaso balimusendele.+

66 Nomba ilyo Petro ali mu lubansa, kwali umubomfi umukashana uwa kwa shimapepo mukalamba uwaishile.+ 67 Ilyo amwene Petro aleonta umulilo, alimulolekeshe, e lyo amweba ati: “Na iwe wine wali pamo no yu Yesu, umwina Nasarete.” 68 Lelo alikeene, atile: “Nshimwishibe kabili nshishibe ne fyo ulelandapo.” Lyena afumine mu lubansa aya pa mpongolo. 69 Ilyo ali pa mpongolo umubomfi umukashana alimumwene, lyena na kabili atampile ukweba abaiminine mupepi ati: “Uyu na o musambi wakwe.” 70 Na kabili alikeene. Ilyo papitile inshita, abaiminine mupepi batampile ukweba Petro abati: “Ca cine na iwe wine wali nabo, pantu na kuba uli mwina Galili.” 71 Lelo atendeke ukuitipwila no kulapa ati: “Nshimwishibe uyu muntu mulelandapo.” 72 Ilyo line mukolwe alililile umuku walenga bubili,+ kabili Petro aibukiishe ifyo Yesu amwebele ati: “Ilyo mukolwe ashilalila imiku ibili, ulekaana imiku itatu+ ukuti tawanjishiba.” Lyena Petro alyumfwile ubulanda kabili atampile ukulila.

15 Ilyo cafikile fye ku macaca, intungulushi sha bashimapepo, abakalamba na bakalemba, e kutila aba mu cilye ca Sanhedrini bonse, balikumene pa kuti balanshanye. Lyena bakakile Yesu, bamutwala na kuli Pilato.+ 2 E ico Pilato amwipwishe ati: “Bushe uli Mfumu ya baYuda?”+ Na o amwaswike ati: “Naulanda we mwine.”+ 3 Lelo intungulushi sha bashimapepo shalemupeela imilandu iingi. 4 E lyo Pilato atampile ukumwipusha na kabili ati: “Bushe tauleasuka nangu cimo?+ Mona imilandu ubwingi balekupeela.”+ 5 Na kabili Yesu ta-aswike nangu cimo ica kuti Pilato alipapile.+

6 Nomba lyonse ilyo kwaleba umutebeto wa Cakucilila, Pilato alebakakwila umufungwa uo abene balefwaya.+ 7 Pali ilya nshita mu cifungo mwali uo baleita ukuti Baraba uo bakakiile pamo na baimiine ubuteko, abaipeye abantu ilyo baimiine ubuteko. 8 E ico ibumba lyalishile, lyalalomba ukuti Pilato abacitile ifyo alebacitila lyonse. 9 Lyena Pilato abepwishe ati: “Bushe mulefwaya ukuti imukakwile Imfumu ya baYuda?”+ 10 Pantu alishibe ukuti umufimbila e walengele ukuti intungulushi sha bashimapepo shitwale Yesu kuli ena.+ 11 Lelo intungulushi sha bashimapepo shatunkile ibumba ukweba Pilato ukuti abakakwile Baraba.+ 12 Na kabili Pilato abepwishe ati: “Nomba finshi mulefwaya ncite uo mwita ukuti Imfumu ya baYuda?”+ 13 Na kabili babilikishe abati: “Mukobekeni pa cimuti!”*+ 14 Lelo Pilato abepwishe ati: “Inga kanshi cinshi alufyenye?” Nabo e lyo bacililemo ukubilikisha abati: “Mukobekeni pa cimuti!”*+ 15 Nomba apo Pilato alefwaya ukusekesha ibumba, alibakakwilile Baraba, kabili aebele aba kuti bome Yesu ifikoti.+ Lyena atwele Yesu ku bashilika pa kuti bayemwipaila pa cimuti.+

16 Lyena abashilika bamutwele mu lubansa lwa mwi sano lya mulashi, kabili balonganike abashilika bonse.+ 17 Bamufwikile insalu yakashikila bapikula ne cilongwe* ca myunga e lyo bamufwika ku mutwe. 18 Batampile no kumuposha abati: “Mwapoleni, mwe Mfumu ya baYuda!”+ 19 Na kabili balemuuma pa mutwe ne tete, balemufwishila na amate. Lyena balimufukamine e lyo bamukontamina. 20 Pa numa ya kumupumya, bamufuulile insalu yakashikila e lyo bamufwika ifya kufwala fyakwe ifya kunse. Kabili balimusendele pa kuti bayemupoopela pa cimuti.+ 21 Lyena bakumenye umupita nshila umo uwalefuma kunse ya musumba. Ishina lyakwe ni Simone uwa ku Kurene, wishi wa kwa Alekesanda na Rufu, kabili bamupatikishe ukusenda icimuti ca kucushiwilwapo*+ ica kwa Yesu.

22 E ico bamutwele pa ncende iyo beta ukuti Golgota. Ili ishiwi nga balipilibula lyalola mu kuti, “Pa Cipanga.”+ 23 Ilyo bali pali iyi ncende bamupeele umwangashi umwali muri,+ lelo alikeene ukunwa. 24 Bamupoopeele na pa cimuti, kabili balipendwile pa kwakana ifya kufwala fyakwe ifya kunse pa kuti beshibe ifyo cila muntu ali no kusenda.+ 25 Nomba ilyo inshita yafikile pe awala ilyalenga butatu,* balimupoopeele pa cimuti. 26 Kabili balibikilepo icipampa apo balembele umulandu bamupeele, balembelepo ati: “Imfumu ya baYuda.”+ 27 Kabili bakobeke ifipondo fibili pa fimuti mupepi na apo bapoopeele Yesu, cimo ku kulyo kwakwe, cimbi ku kuso kwakwe.+ 28* —— 29 Kabili abapita nshila balemusaalula, balepukunya imitwe+ kabili baleti: “Eya! Te iwe waleti kuti wabongolola itempele no kulikuula mu nshiku shitatu,+ 30 ika pa cimuti ca kucushiwilwapo* pa kuti uipusushe.” 31 Ifi fine e fyo ne ntungulushi sha bashimapepo na bakalemba balemupumya, balelanda abati: “Aalepususha bambi; lelo afilwa ukuipususha umwine!+ 32 Lekeni Kristu Imfumu ya kwa Israele nomba eke pa cimuti ca kucushiwilwapo,* pa kuti tumone kabili tusumine.”+ Ifipondo ifyo bakobeke mupepi na ena na fyo fyalemusaalula.+

33 Ilyo iawala lyalenga 6* lyafikile, pa calo ponse pali imfifi ukufika na pe awala lyalenga 9.+ 34 Kabili pe awala lyalenga 9,* Yesu abilikishe ishiwi ilikalamba ati: “Eli, Eli, lama sabaktani?” aya mashiwi nga bayapilibula yalola mu kuti: “Lesa wandi, Lesa wandi, cinshi mwandekelesesha?”+ 35 Ilyo bamo abaiminine mupepi baumfwile ifi, batampile ukulanda abati: “Umfweni! Aleita Eliya.” 36 Lyena umo alibutwike, abula icapala umwepu, acitumpika mu mwangashi uwakantuka, acibika na kwi tete e lyo amupeela pa kuti anwe,+ kabili alelanda ati: “Loleleni! Lekeni tumone nga ca kuti Eliya alaisamwikisha pa cimuti.” 37 Lelo Yesu alipundile mwi shiwi ilikalamba, afwa no kufwa.*+ 38 Kabili insalu ya kucingilako iya mwi tempele+ yalepwike pa kati, ukufuma pa muulu ukufika panshi.+ 39 Nomba ilyo umukalamba wa bashilika uwaiminine apalungatene na po Yesu ali amwene ifyacitike ilyo Yesu afwile, alandile ati: “Cine cine, uyu muntu ali Mwana wa kwa Lesa.”+

40 Kwali na banakashi abaiminine akatalamukila abalemona ifyalecitika. Pali aba pali Maria umwina Magadala, Maria nyina wa kwa Yakobo Mwaice* na Yose, na Salome+ na o e po ali, 41 abalemukonka no kumwafwako imilimo+ ilyo ali ku Galili, kwali abanakashi na bambi abengi abo aishile nabo ku Yerusalemu.

42 Nomba apo cali cungulo, kabili bwali Bushiku bwa Kupekanya, e kutila, ubushiku bwakonkelepo bwali no kuba ubushiku bwe Sabata, 43 Yosefe shimucindikwa wa mu Cilye, uwa ku Arimatea, alishile. Na o alelolela Ubufumu bwa kwa Lesa. Alishipile, aya kuli Pilato alomba ne citumbi ca kwa Yesu.+ 44 Lelo Pilato taishibe bwino nga ca kuti pali iyi nshita Yesu alifwile nelyo iyo, kabili ilyo aitile umukalamba wa bashilika, amwipwishe nga ca kuti Yesu alifwile kale. 45 E ico ilyo umukalamba wa bashilika amwebele ukuti ca cine ali nafwa, apeele Yosefe icitumbi ca kwa Yesu. 46 Ilyo Yosefe ashitile insalu iisuma, aikishe umubili wa kwa Yesu, aupomba na muli iyi yine insalu iisuma no kuubika mu nshiishi*+ iyo baimbile mu cilibwe; lyena akunkulushishepo ilibwe ukufisha na pa mwinshi wa nshiishi.+ 47 Lelo Maria umwina Magadala na Maria nyina wa kwa Yose batwalilile fye ukulolesha pa nshiishi iyo babikilemo Yesu.+

16 E ico ilyo Isabata+ lyapwile, Maria umwina Magadala, Maria+ nyina wa kwa Yakobo, e lyo na Salome bashitile ifyanunkila pa kuti bayesuba umubili wa kwa Yesu.+ 2 Kabili ku macaca pa bushiku bwa kubalilapo mu mulungu baile ku nshiishi. Bafikile ku nshiishi*+ ninshi na kasuba nakatula. 3 Kabili baile balelanshanya abati: “Nani alayatukunkulushishako ilibwe ukulifumya pa mwinshi wa nshiishi?” 4 Lelo ilyo bainwine amenso, bamwene ukuti ilibwe balilifumishepo kale, nangu ca kuti lyali likalamba nga nshi.+ 5 Ilyo baingile mu nshiishi bamwene umulumendo naikala lubali ku kulyo nafwala ne ca kufwala icabuuta, e ico balipapile nga nshi. 6 Na o abebele ati: “Mwipapa.+ Ninjishiba mulefwaya Yesu umwina Nasarete uo baipaile pa cimuti. Nabuushiwa,+ tali muno. Moneni apo bamulalike.+ 7 Nomba kabiyeni, muye-eba abasambi bakwe na Petro amuti, ‘Alemutangilila ku Galili.+ E ko mukayamumwena, nga filya fine amwebele.’”+ 8 E ico ilyo bafumine mu nshiishi, balifulumwike ninshi baletutuma fye ku mwenso. Kabili tabaebeleko nangu umo ili lyashi, pantu bali no mwenso.*+