IMBILA NSUMA UKULINGANA NE FYO LUKA AILEMBELE

1 Pa mulandu wa kuti namwene ukuti abengi balilemba ilyashi umwaba amashiwi ya cine ayo na ifwe twacetekela,+ 2 nga filya fine abaliko ukufuma pa kutendeka+ kabili abalebila icebo ca kwa Lesa batwebele,+ 3 na ine apo nalifwailisha ifi fyebo bwino bwino ukufuma pa kutendeka, natile nkulembele ukulingana ne fyo fyakonkana, we Teofile,+ we wacindama nga nshi, 4 pa kuti wishibe bwino bwino ukuti ifyo bakushimikila fya cine.+

5 Mu nshiku sha kwa Herode,*+ imfumu ya Yudea, kwali shimapepo umo ishina lyakwe ni Sekaria, uwa mwi bumba lya bashimapepo ilyo baleita ukuti Abiya.+ Kabili umukashi wakwe afumine mu bana banakashi ba kwa Aarone, ne shina lyakwe ali ni Elisabete. 6 Bonse babili bali abalungama mu menso ya kwa Lesa, kabili balekonka amafunde ya kwa Yehova* yonse na fyonse ifyo abebele ukuti e fyo balingile ukulacita. 7 Lelo tabakwetepo umwana, pantu Elisabete talekwata abana, kabili bonse babili balikotele.

8 Nomba ilyo cafikiile ibumba Sekaria alimo ukubomba,+ ninshi alebomba bushimapepo pa cinso ca kwa Lesa, 9 yalifikile inshita yakwe iya kwingila mwi tempele lya kwa Yehova*+ pa kuti afutumune ububani+ nga fintu bashimapepo balecita lyonse. 10 Kabili abantu abengi bali panse balepepa pantu yali ni nshita ya kufutumuna ububani. 11 Sekaria amwene malaika wa kwa Yehova* naiminina ku mbali ya ciipailo ca bubani. 12 Nomba Sekaria alisakamikwe pa fyo amwene, kabili alitiinine nga nshi. 13 Nomba malaika amwebele ati: “Witiina Sekaria, pantu Lesa naumfwa ukupaapaata kobe. Umukashi obe Elisabete akakufyalila umwana umwaume, kabili ukamwinike ati Yohane.+ 14 Ukasekelela kabili ukaba ne nsansa sana, na abantu abengi bakasekelela ilyo akafyalwa,+ 15 pantu akaba umukalamba mu menso ya kwa Yehova.*+ Lelo tafwile ukunwa umwangashi ne fya kunwa ifikola,+ kabili akaba no mupashi wa mushilo na lintu ashilafyalwa,*+ 16 kabili akalenga abana ba kwa Israele abengi bakabwelele kuli Yehova* Lesa wabo.+ 17 Akatangilila Lesa kabili akaba no mupashi na maka nga Eliya.+ Akalula imitima ya bashibo ica kuti ikaba nge ya bana.+ Na bashaba ne cumfwila bakaba na mano yene yene aya balungama, pa kuti akapekanishishe Yehova* abantu.”+

18 E lyo Sekaria aebele malaika ati: “Kuti naishiba shani ukuti cine cine ifi fikacitika? Pantu ine ninkota, umukashi wandi na o nakota.” 19 Malaika na o amwaswike ati: “Nine Gabriele,+ uwiminina pa cinso ca kwa Lesa,+ kabili bantumine ukuti njise nande nobe no kuti nkwebe iyi mbila nsuma. 20 Lelo mona! walaba cibulu kabili tawakulalanda mpaka no bushiku ifi fintu fikacitika, pantu tausumine amashiwi yandi ayakafikilishiwa ilyo inshita ikafika.” 21 Nomba abantu balelolela Sekaria, kabili balipapile pantu alikokwele sana mwi tempele. 22 Ilyo afumine alifililwe ukulanda nabo. Lyena balilwike ukuti alimwene icimonwa mwi tempele. Alelandila fye nabo ku minwe, pantu alilekele ukulanda. 23 Ilyo inshiku shakwe isha kubomba umulimo wa mushilo shapwile, alibwelelemo ku mwakwe.

24 Pa numa ya nshiku shimo umukashi wakwe Elisabete alimite, kabili talefuma pa ng’anda pa myeshi 5, pantu aleti: 25 “Ifi e fyo Yehova* ancitila muli shino nshiku. Nanangulukilako pa kuti anseebululeko insoni ku bantu.”+

26 Mu mweshi walenga 6 ukutula apo aimitiile, Lesa atumine malaika Gabriele+ ku musumba wa mu Galili uo beta ukuti Nasarete. 27 Amutumine kuli nacisungu+ uwakobekelwe ku mwaume uwe shina lya kuti Yosefe, uwatuntwike mu lupwa lwa kwa Davidi. Ishina lya kwa nacisungu ali ni Maria.+ 28 Kabili ilyo aingile umwali Maria, amwebele ati: “Mwapoleni we wapaalwa nga nshi, Yehova* ali na iwe.” 29 Lelo aya mashiwi yalimusakamike nga nshi, kabili aletontonkanya umo malaika aloseshe pa kumuposha ifi. 30 E ico malaika amwebele ati: “Witiina Maria, pantu Lesa nakupaala. 31 Umfwa! ukemita no kufyala umwana umwaume,+ kabili ukamwinike ati Yesu.+ 32 Uyu akaba umukalamba+ kabili bakalamwita ati Umwana wa Wapulamo.+ Yehova* Lesa akamupeela icipuna ca bufumu ica kwa Davidi wishi,+ 33 kabili akaba Imfumu umuyayaya pa ng’anda ya kwa Yakobo, no Bufumu bwakwe tabwakapwe.”+

34 Lelo Maria aebele malaika ati: “Bushe ifi mwalanda fikacitika shani, pantu nshatalalaalapo no mwaume?”+ 35 Malaika na o amwaswike ati: “Umupashi wa mushilo ukesa pali iwe,+ na maka ya Wapulamo yakakufimba. E mulandu wine umwana uo ukafyala bakalamwitila ati uwa mushilo,+ Umwana wa kwa Lesa.+ 36 Kabili umfwa! lupwa obe Elisabete, uo batila takwata abana, na o naimita umwana umwaume mu bukote bwakwe, kabili uno e mweshi walenga 6 ukutula apo aimitila; 37 pantu fyonse ifyo Lesa alanda te kuti afilwe ukufifikilisha.”+ 38 Lyena Maria alandile ati: “Moneni! ine ndi musha mwanakashi uwa kwa Yehova!* Nacibe ukulingana ne fyo mwalanda.” Kabili malaika aliile.

39 E ico muli shilya nshiku Maria alyangufyenye ukwima no kuya ku citungu ca mpili, mu musumba wa mu Yuda, 40 kabili aingile mu ng’anda ya kwa Sekaria aposha na Elisabete. 41 Nomba ilyo Elisabete aumfwile Maria amuposha, umwana uwali mwi fumo lyakwe alisunkeene, kabili umupashi wa mushilo waishile pali Elisabete, 42 kabili abilikishe ishiwi ilikalamba ati: “Walipaalwa pa banakashi bonse, kabili umwana uo ukafyala na o alipaalwa! 43 Nine nani ne wa kuti nyina wa kwa Shikulu antandalile? 44 Pantu mona! ilyo wacimposha fye, umwana mwi fumo acisunkaana pa mulandu wa nsansa. 45 Alipaalwa umwanakashi uwasumina ifyo bamweba, pantu fyonse ifyo Yehova* amweba fikacitika.”

46 Na o Maria alandile ati: “Umweo wandi ulelumbanya* Yehova,*+ 47 no mutima wandi te kuti ukaane ukusansamukila nga nshi Lesa Umupusushi wandi,+ 48 pantu nalolesha pa musha wakwe umwanakashi+ nangu ca kutila muntu yaweyawe. Pantu moneni! abantu ba mu nkulo shonse bakalalanda ati nalishuka,+ 49 pantu Lesa wa maka nancitila ifintu ifikalamba, kabili ishina lyakwe lya mushilo,+ 50 kabili aba mu nkulo shonse abamutiina alabomfwila uluse.+ 51 Alicita ifya maka ku kuboko kwakwe, alisalanganya abalanga ukuti bamatutumuko mu fyo bapanga mu mitima yabo.+ 52 Alikisha aba maka pa fipuna fya bufumu+ kabili alicindamika abalanda;+ 53 alilenga abaali ne nsala baikuta ifisuma+ na baali ne fyuma alilenga baya iminwe nkutwa. 54 Alyafwa umubomfi wakwe Israele, pantu alebukisha ifyo amulaile ukuti akatwalilila ukumumfwila uluse,+ 55 nga filya fine aebele Abrahamu no mwana wakwe,*+ ifi fine e fyo aebele ifikolwe fyesu.” 56 Maria alikele na Elisabete nalimo pa myeshi itatu, lyena alibwelelemo ku mwakwe.

57 Nomba inshita yalifikile iya kuti Elisabete apaape, kabili afyele umwana umwaume. 58 Kabili abena mupalamano na balupwa balyumfwile ifyo Yehova* alangile ukuti alimumfwilile uluse, kabili balisekelele pamo nankwe.+ 59 Pa bushiku bwalenga 8, balishile mu kusembulula umwana,+ kabili balefwaya ukumwinika ishina lya kwa wishi ilya kuti Sekaria. 60 Nomba nyina abebele ati: “Awe, tulemwinika ati Yohane.” 61 Lelo bamwebele abati: “Pa lupwa lobe tapabapo uwe shina lya kuti Yohane.” 62 Lyena baipwishe wishi ukubomfya iminwe ukuti abebe ishina alefwaya ukwinika umwana. 63 E ico alombele ica kulembapo, e lyo alembapo ukuti: “Ishina lyakwe ni Yohane.”+ Na bantu bonse balipapile. 64 Apo pene akanwa kakwe kaliswike no lulimi lwakwe lwalikakwike kabili atendeke ukulanda,+ alalumbanya na Lesa. 65 Kabili abena mupalamano bonse balyumfwile umwenso, na bantu abaleikala mu citungu ca mpili ica Yudea balelanda pali ifi fyonse ifyacitike. 66 Abantu bonse abaumfwile mu mitima yabo baleti: “Bushe uyu mwana akaba shani?” Pantu ukuboko kwa kwa Yehova* kwalimutungilile.

67 Lyena umupashi wa mushilo waishile pali Sekaria wishi, na o aseseme ati: 68 “Lekeni Yehova* Lesa wa kwa Israele acindikwe,+ pantu nalangulukilako abantu bakwe kabili nabalubula.+ 69 Kabili natwimisha ulusengo lwe pusukilo*+ mu ng’anda ya mubomfi wakwe Davidi,+ 70 nga filya fine alanda ukupitila muli bakasesema bakwe aba mushilo ukutula fye na kale;+ 71 alilaile ukuti akatupususha ku balwani besu na mu minwe ya bantu bonse abatupata;+ 72 akatumfwila uluse nga fintu alaile ifikolwe fyesu kabili akebukisha icipangano cakwe ica mushilo,+ 73 umulapo uo alapile ku cikolwe cesu Abrahamu,+ 74 pa kuti ilyo atulubula mu minwe ya balwani besu, atupeele ishuko lya kumubombela ukwabula umwenso 75 na pa kuti inshiku shonse aletumona ukuti tuli ba cishinka kabili twalilungama. 76 Lelo iwe we mwana, bakakwita ukuti kasesema wa Wapulamo, pantu ukatangilila Yehova* no kumupekanishisha inshila,+ 77 pa kulenga abantu bakwe bakeshibe imbila nsuma ye pusukilo ukupitila mu kubabelela uluse pa membu shabo,+ 78 pa mulandu wa luse lwa kwa Lesa wesu. Pa mulandu wa ulu luse, tukamona ulubuuto ulwafuma ku muulu nga lulya lubako ilyo akasuba katula, 79 pa kuti lukasanikile abaikala mu mfifi na mu cinshingwa ca mfwa,+ na pa kuti lukatungulule amakasa yesu mu nshila ya mutende.”

80 Uyu mwana alekulilako kabili umupashi wa kwa Lesa walelenga alekoselako. Aikele mu matololo mpaka ubushiku aisokolwele kuli Israele.

2 Nomba muli shilya nshiku, Kaisare Augusti afumishe icipope ca kuti abantu bonse pe sonde bafwile ukulembesha amashina. 2 (Uku ukulembesha kwa kubalilapo kwaliko ilyo Kwirini ali umulashi wa citungu ca Siria.) 3 Kabili abantu bonse baile mu kulembesha, cila muntu aile ku musumba wa ku mwabo. 4 E ico Yosefe+ na o afumine ku Galili, mu musumba wa Nasarete, no kuya ku Yudea, ku musumba wa kwa Davidi, uo beta ati Betelehemu,+ pantu ali wa mu ng’anda ya kwa Davidi kabili atuntwike mu lupwa lwa kwa Davidi. 5 Aile mu kulembesha pamo na Maria uo aupile, ukulingana ne fyo bapangene.+ Pali iyi nshita ninshi ifumo lya kwa Maria nalikula.+ 6 Ilyo bacili kulya, inshita ya kuti apaape yalifikile. 7 Kabili afyele umwana umwaume, ibeli.+ Lyena amupombele mu nsalu e lyo amulaalika umo ifitekwa fyaleliila,*+ pantu takwali umuputule uo bengalalaamo mu ng’anda ya beni.

8 Kabili muli cilya cine citungu mwali bakacema abali mu mpanga balelinda impaanga shabo ubushiku. 9 Mu kupumikisha malaika wa kwa Yehova* aishileiminina apo bali, no bukata bwa kwa Yehova* bwalibengeshime ukubashinguluka. E ico balitiinine nga nshi. 10 Lelo malaika abebele ati: “Mwitiina, pantu umfweni! Njishile mu kumweba imbila nsuma iikalenga abantu bonse bakasekelele nga nshi. 11 Pantu pa bushiku bwa lelo mu musumba wa kwa Davidi+ namufyalwa Umupusushi wenu,+ uyu e Kristu Shikulu.+ 12 Kabili ici e co mwalayaishibilako: Muleyasanga akanya nabakapomba mu nsalu kabili nakalaala umo ifitekwa filiila.” 13 Mu kupumikisha ibumba lya bamalaika ba ku muulu+ lyaishile apali uyu malaika, balalumbanya na Lesa abati: 14 “Natulumbe Lesa mu muulu, na pe sonde pabe umutende pa bantu abo Lesa atemwa.”

15 E ico ilyo bamalaika bafuminepo babwelelamo ku muulu, bakacema batendeke ukulanshanya abati: “Natwangufyanye ukuya ku Betelehemu tuyemona icicitike, ico Yehova* atusokolwela.” 16 Awe balyangufyenye ukuya, bayasanga na Maria, Yosefe na kanya ninshi nabakalaalika umo ifitekwa filiila. 17 Ilyo bamwene umwana, bashimike ifyo malaika abebele pali uyu mwana. 18 Na bonse abaumfwileko aya mashiwi balipapile pa fyo bakacema babashimikile, 19 lelo Maria ena alisungile aya amashiwi yonse, kabili aletontonkanya sana pa fyo aya amashiwi yalepilibula.+ 20 Lyena bakacema balibwelelemo ninshi balecindika Lesa kabili balemulumbanya pali fyonse ifyo baumfwile ne fyo bamwene, pantu fyali fye nga filya fine malaika abebele.

21 Ilyo inshiku 8 shakumene isha kuti bamusembulule,+ bamwinike ati Yesu. Ili e shina ilyo malaika amwinike ninshi nyina talati amwimite no kumwimita.+

22 Kabili ilyo inshita ya kubasangulula ukulingana na Mafunde ya kwa Mose+ yafikile, batwele umwana ku Yerusalemu pa kuti bayemupeela kuli Yehova,* 23 nga filya fine calembwa mu Mafunde ya kwa Yehova* ukuti: “Mukapeele* Yehova* umwana umwaume onse ibeli.”*+ 24 Kabili batuulile ilambo ukulingana ne fyo Amafunde ya kwa Yehova* yalanda, yatila: “Ifipeele fibili nelyo utwana twa nkunda tubili.”+

25 Kabili moneni! kwali umuntu uwali mu Yerusalemu ishina lyakwe ni Simeone. Uyu muntu ali uwalungama kabili aletiina Lesa, alelolela inshita ilyo Lesa ali no kusansamusha abena Israele+ kabili umupashi wa mushilo walemutungulula. 26 Kabili Lesa alimusokolwelele ukupitila mu mupashi wa mushilo ukuti tali no kufwa mpaka akamone Kristu uo Yehova* atuma. 27 Apo umupashi walimutungulwile aileingila mwi tempele; kabili ilyo abafyashi baletele umwana Yesu pa kuti bacite ukulingana ne fyo Amafunde yalanda,+ 28 Simeone alimishe umwana, alalumbanya na Lesa ati: 29 “Mwe Shikulu Mulopwe, lekeni nomba umusha wenu aye umutende+ ukulingana ne fyo mwamulaile, 30 pantu namona inshila mukapusushishamo abantu+ 31 iyo mwapekanya pa kuti abantu bonse baimone,+ 32 ulubuuto+ ulwa kufumya imfifi pa bena fyalo+ kabili ubukata bwa bantu benu abena Israele.” 33 Kabili wishi na nyina balepapa fye ifyo Simeone alelanda pali uyu mwana. 34 Kabili Simeone alibapaalile, aebele na Maria nyina wa kwa Yesu ati: “Mona! Uyu mwana akalenga abengi aba mu Israele+ bakawe+ nelyo bakeme kabili bakamupontela+ 35 (cine cine, ulupanga ulutali lukapula muli iwe*),+ pa kuti ifyaba mu mitima ya bantu abengi fikeshibikwe.”

36 Nomba kwali kasesema mwanakashi Ana, umwana wa kwa Fanuele, uwa mu mukowa wa kwa Ashere. Uyu mwanakashi ali mukote. Ilyo aupilwe,* aikele fye no mulume wakwe imyaka 7. 37 Ali ni mukamfwilwa kabili ali ne myaka 84. Talepuswa pe tempele, alebomba umulimo wa mushilo ubushiku na kasuba kabili alefunga, alepepa na mapepo ya kupaapaata. 38 Pali ilya ine nshita alipaleme atendeka no kutootela Lesa, kabili abantu bonse abalelolela ukuti Yerusalemu ikalubulwe+ alebeba pali uyu mwana.

39 Lyena ilyo bacitile fyonse ukulingana na Mafunde ya kwa Yehova,*+ babweleele ku Galili ku musumba wabo uwa Nasarete.+ 40 Uyu mwana alitwalilile ukukula kabili alekoselako na mano yalefulilako, kabili Lesa alemupaala.+

41 Nomba cila mwaka abafyashi bakwe baleya ku Yerusalemu ku mutebeto wa Cakucilila.+ 42 Nomba ilyo ali ne myaka 12, baliile ku mutebeto ukulingana ne fyo balecita lyonse.+ 43 Ilyo inshiku sha mutebeto shapwile, batampile ukubwelelamo. Lelo Yesu ena ashele ku Yerusalemu, kabili abafyashi bakwe tabaishibe. 44 Apo bena balemona kwati ali mwi bumba ilyale-endela pamo nabo, balyendele ulwendo lwa bushiku bumo. Lyena batendeke ukumufwaya muli balupwa na mu bakaaya. 45 Lelo ilyo bafililwe ukumusanga, babweleele ku Yerusalemu, kabili balimufwaile sana. 46 Nomba ilyo papitile inshiku shitatu, bamusangile mwi tempele, naikala na bakasambilisha alekutika kuli bena alebepusha ne fipusho. 47 Lelo bonse abalekutika kuli ena balipapile pa fintu ubwingi ifyo aishibe na pa fyo aleasuka.+ 48 Nomba ilyo abafyashi bakwe bamumwene, balipapile sana kabili banyina bamwebele abati: “We mwana, cinshi ico watucushisha ifi? Mona, bawiso na ine natucula ukukufwaya.” 49 Lelo abepwishe ati: “Cinshi mulemfwaila? Bushe tamwaishiba ukuti mfwile ukuba mu ng’anda ya kwa Tata?”+ 50 Nomba tabaishibe umwalolele amashiwi ayo abebele.

51 Lyena aliile nabo ku Nasarete, kabili alitwalilile ukubanakila.*+ Kabili nyina alisungile aya mashiwi yonse mu mutima wakwe.+ 52 Yesu alekulilako, alekwatilako amano kabili Lesa na bantu balimutemenwe.

3 Mu mwaka walenga 15 ukutula apo Tiberi Kaisare atendekeele ukuteka, ilyo Ponti Pilato ali umulashi wa ku Yudea, na Herode*+ ali kateka wa ku citungu ca Galili, kabili Filipi munyina ali kateka wa citungu ca Iturea ne ca Trakoniti, e lyo Lusani ali kateka wa citungu ca Abilene, 2 mu nshiku sha kwa Anasi intungulushi ya bashimapepo na mu nshiku sha kwa Kayafa,+ Yohane+ umwana wa kwa Sekaria apokelele amashiwi ya kwa Lesa ninshi ali mu matololo.+

3 E ico aile ku mishi iyashinguluka Yordani, aleshimikila abantu ukuti balingile ukubatishiwa pa kulanga ukuti nabalapila pa kuti Lesa ababelele uluse pa membu shabo,+ 4 nga filya calembwa mwi buuku lya kwa Kasesema Esaya ukuti: “Umuntu alebilikisha mu matololo aleti: ‘Pekanyeni inshila sha kwa Yehova!* Lungamikeni inshila shakwe.+ 5 Umupokapoka onse ufwile ukushiikwa, ulupili lonse na kapili fifwile ukupaswa; ifinshoko fifwile ukuba inshila ishaololoka no mwalundumana mufwile ukuba inshila ishalingana; 6 na bantu bonse bakamona ifyo Lesa akapususha abantu.’”*+

7 E ico atendeke ukweba amabumba ya bantu abaleya kuli ena ukuti ababatishe, ati: “Mwe bana ba mafwafwa mwe, nani amusokele pa kuti mufulumuke ubukali ubuleisa?+ 8 E ico citeni ifintu ifilelanga ukuti namulapila. Mwilalanda mu mitima yenu amuti, ‘Twalikwata shifwe Abrahamu.’ Pantu ndemweba nati, Lesa kuti ayalula aya mabwe yaba abana ba kwa Abrahamu. 9 Na kuba isembe lili kale mupepi ne shinte lya cimuti. E ico icimuti conse icishitwala ifisabo ifisuma bakacitema no kucipoosa mu mulilo.”+

10 Kabili amabumba yalemwipusha ayati: “Nomba cinshi tufwile ukucita?” 11 Na o abaswike ati: “Uukwete ifya kufwala fibili* apeeleko uushikwete, no ukwete ifya kulya apeeleko uushikwete.”+ 12 Na bakasonkesha ba misonko nabo balile mu kubatishiwa,+ kabili bamwipwishe abati: “Mwe Kasambilisha, cinshi tufwile ukucita?” 13 Na o abebele ati: “Mwilasonkesha* abantu umusonko ukucila uo balingile ukusonka.”+ 14 Abashilika nabo bamwipwishe abati: “Inga ifwe cinshi tufwile ukucita?” Na o abaswike ati: “Mwilacusha umuntu nangu umo* nelyo ukufyenga umuntu uuli onse,+ muleteka fye imitima ku malipilo yenu.”

15 Nomba apo abantu balelolela Kristu, bonse baletontonkanya pali Yohane abati: “Bushe uyu nalimo e Kristu?”+ 16 Lelo Yohane aebele bonse ati: “Ine imubatishisha mu menshi, lelo uwancila amaka aleisa, uo nshalinga ukukakula intambo sha ndyato shakwe.+ Ena akamubatishisha ku mupashi wa mushilo na ku mulilo.+ 17 Naikata ica kwelelako cakwe pa kuti akawamye bwino bwino apa kupumina ingano no kushilonganya e lyo no kushibika mu butala, lelo imisungu akayoca mu mulilo uo bashingashimya.”

18 Alibakonkomeshe pa fintu ifingi na fimbi, kabili alitwalilile ukubila imbila nsuma ku bantu. 19 Lelo pa mulandu wa kuti Yohane alekalipila Herode kateka wa citungu pali filya aupile Herodia muka munyina, na pa fintu fyonse ifyabipa ifyo alecita, 20 Herode alicitile icabipa na cimbi: Abikile Yohane mu cifungo.+

21 Nomba ilyo abantu bonse balebatishiwa, Yesu na o alibatishiwe.+ Kabili ilyo alepepa, umuulu waliswike+ 22 no mupashi wa mushilo uwalemoneka kwati ni nkunda waikiile pali ena, ne shiwi lyafumine mu muulu aliti: “Uli Mwana wandi uo natemwa; niwe nsekelamo.”+

4 Lyena Yesu afumine ku mumana wa Yordani ninshi ali no mupashi wa mushilo, kabili uyu umupashi wamutungulwile ku matololo+ 2 uko aileikala inshiku 40, kabili Satana Kaseebanya alimutunkile.+ Nomba mu nshiku shilya taliile nangu kamo, kabili ilyo shapwile, alyumfwile insala. 3 E ico Satana Kaseebanya amwebele ati: “Nga uli mwana wa kwa Lesa, eba ilibwe ili libe umukate.” 4 Lelo Yesu amwaswike ati: “Amalembo ya mushilo yatila, ‘Te fya kulya fyeka filenga umuntu atwalilila ukuba no mweo.’”+

5 Lyena amutwele pa lupili kabili mu kashita fye akanono amulangile amabufumu yonse aya pe sonde.+ 6 Lyena Satana Kaseebanya amwebele ati: “Ndekupeela amaka pa mabufumu yonse aya no bucindami bwa yako, pantu balimpeela,+ na ine mpeelako uo ntemenwe. 7 E ico iwe nga wampepako fye umuku umo, ndekupeela amaka pali ifi fyonse.” 8 Na Yesu amwaswike ati: “Calilembwa ukuti, ‘Yehova* Lesa obe e o ulepepa, kabili eka fye e o ulebombela.’”+

9 Lyena amutwele mu Yerusalemu kabili amwimike pa muulu wa cibumba* ce tempele e lyo amweba ati: “Nga uli mwana wa kwa Lesa, tolokela panshi,+ 10 pantu calilembwa ukuti, ‘Akeba bamalaika bakwe ifya kucita pali iwe, pa kuti bakakucingilile,’ 11 no kuti, ‘Bakakusendela pa maboko yabo, pa kuti wikaipununa ulukasa kwi libwe.’”+ 12 Na o Yesu amwebele ati: “Calilembwa ukuti, ‘Wilaesha Yehova* Lesa obe.’”+ 13 E ico ilyo Satana Kaseebanya apwishishe ukumutunka muli fyonse ifi, aliile mpaka inshita imbi iyalinga.+

14 Nomba Yesu abweleele ku Galili+ ninshi ali na maka ya mupashi wa mushilo. Kabili ifisuma ifyo abantu baleshimika pali ena fyasalangene mu mishi yonse iyali mupepi. 15 Atendeke no kusambilisha mu masunagoge yabo, kabili abantu bonse balimucindike.

16 Lyena aile ku Nasarete+ uko akuliile, aingila na mwi sunagoge+ nge fyo alecita lyonse pe Sabata, e lyo aiminina pa kuti abelenge. 17 E ico bamupeele icimfungwa ca kwa Kasesema Esaya, kabili alicifungulwile asanga na apalembelwe ati: 18 “Umupashi wa kwa Yehova* waba pali ine, pantu ansubile pa kuti mbile imbila nsuma ku bapiina, antumine mu kubila ukulubulwa kwa bankole na mu kushibula amenso ya mpofu, no kulubula abo batitikisha,+ 19 no kubila pa mwaka uo Yehova* akapaalamo abantu bakwe.”+ 20 Lyena afungile ici cimfungwa, abwesesha na kapyunga aikala no kwikala; na bantu bonse mwi sunagoge balemulolekesha. 21 E lyo atendeke ukubeba ati: “Ili lembo mwaumfwa nalifikilishiwa+ ubushiku bwa lelo.”

22 E ico bonse batendeke ukulanda ifisuma pali ena kabili balipapile pa mashiwi ayasuma ayo alandile.+ Baleti: “Bushe uyu te mwana wa kwa Yosefe?”+ 23 Na o abebele ati: “Nangu cibe shani, mwalalanda iyi nsoselo pali ine, iya kuti, ‘Kondapa, yundape.’ Kabili mwalalanda amuti, ‘Ifyo twaumfwile ulecita ku Kapernahumu,+ cita na kuno ku mwenu.’” 24 E ico abebele ati: “Ndemweba icine cine nati, takwaba kasesema uo basumina ku mwabo ukuti ni kasesema.+ 25 Ku ca kumwenako, ndemweba icine cine nati: Mwali bamukamfwilwa abengi mu Israele mu nshiku sha kwa Eliya, ilyo imfula ishalokele pa myaka itatu ne myeshi 6, ica kuti mu calo conse mwaponene icipowe icikalamba.+ 26 Nomba Eliya tabamutumine ku mwanakashi nangu umo pali aba, lelo bamutumine kuli mukamfwilwa wa ku Sarefati mu calo ca Sidone.+ 27 Kabili mu nshiku sha kwa Kasesema Elisha mu Israele mwali abalwele ifibashi abengi; lelo takwali nangu umo pali aba uo aundepe, kano Naamani umwina Siria.”+ 28 Nomba bonse abali mwi sunagoge abaumfwile ifyo alandile balikalipe nga nshi,+ 29 kabili balimine bamufumya mu musumba, bamutwala na ku cipuma ca lupili apo bakuulile umusumba wabo, pa kuti bamufuntule. 30 Lelo apitile mwi bumba lyabo, aya no kuya.+

31 Lyena aile ku Kapernahumu, umusumba wa ku Galili. Kabili alebasambilisha pe Sabata,+ 32 kabili balipapile imisambilishishe yakwe,+ pantu alelanda na maka. 33 Nomba mwi sunagoge mwali umwaume uwali no mupashi uwakowela, kabili abilikishe ishiwi ilikalamba ati:+ 34 “Yangu! Bushe tulomfwana na iwe, we Yesu umwina Nasarete?+ Bushe wishile mu kutonaula? Nalikwishiba bwino, uli Wa Mushilo uwa kwa Lesa.”+ 35 Lelo Yesu aliukalipiile, atile: “Ikala tondolo, kabili fuma muli uyu muntu!” E ico ilyo uyu mupashi wakowela wamufuntwile ninshi balemonako, walifuminemo ukwabula ukumucena. 36 Lyena bonse balipapile, kabili batendeke ukulanshanya abati: “Milandile ya musango nshi iyi? Pantu nakwata na maka yakweba imipashi yakowela ukuti ifume mu muntu, nayo yafuma!” 37 E ico ululumbi lwakwe lwasalanganine mu mishi yonse iyali mupepi.

38 Ilyo afumine mwi sunagoge aileingila mu ng’anda ya kwa Simone. Nomba nafyala Simone alilwele sana impepo, e ico balombele Yesu ukuti amundape.+ 39 E ico Yesu aileiminina apo ali no kukalipila impepo ukuti ipwe, nayo yalipwile. Awe nafyala Petro apo pene alimine alabapekanishisha ne fya kulya.

40 Lelo ilyo akasuba kalewa, bonse abali na bantu abalwele amalwele ayalekanalekana, babaletele kuli ena. Na o alibikile iminwe yakwe pali cila muntu pa kubondapa.+ 41 Ifibanda na fyo fyalefuma mu bantu abengi kabili fyalebilikisha afiti: “Uli Mwana wa kwa Lesa.”+ Lelo alefikalipila, talefisuminisha ukulanda,+ pantu fyalimwishibe ukuti ni Kristu.+

42 Nomba ilyo bwacele fye, alifumine aya ukwa kuti abe eka.+ Lelo amabumba ya bantu yaile yalemufwaya mpaka yamusanga, kabili yaeseshe ukumulesha ukuya. 43 Lelo abebele ati: “Mfwile ukubila imbila ya Bufumu bwa kwa Lesa na mu misumba imbi, pantu e co Lesa antumine.”+ 44 E ico aile aleshimikila abantu mu masunagoge ya mu Yudea.

5 Bushiku bumo ilyo Yesu aiminine ku lulamba lwa bemba wa Genesarete,*+ ibumba lyalemutitikisha ninshi lileumfwa icebo ca kwa Lesa. 2 Kabili amwene amato yabili ayali ku lulamba lwa bemba, lelo abalondo ninshi nabafumamo balesamfya amasumbu yabo.+ 3 Aninine mu bwato bumo ubwali ubwa kwa Simone, e lyo amweba ukubutalushako panono ku mulundu. Lyena alikele, alasambilisha amabumba ninshi ali mu bwato. 4 Ilyo alekele ukulanda kwi bumba, aebele Simone ati: “Twala ubwato apashikile, kabili mupoose amasumbu yenu pali bemba pa kuti mwipaye isabi.” 5 Lelo Simone amwebele ati: “Mwe Kasambilisha, tuculile ubushiku bonse ukwabula ukwipaya nangu limo,+ lelo pa mulandu ne fyo mwalanda nalapoosamo amasumbu.” 6 Awe ilyo bacitile ifi, baipeye* isabi ilingi nga nshi, ica kuti na masumbu yabo yatendeke ukulepuka.+ 7 E ico bacebwishe abalondo banabo abali mu bwato bumbi pa kuti bese babafweko. Nabo balishile kabili baiswishe amato yonse yabili, ica kuti yatendeke ukubunda. 8 Ilyo Simone Petro amwene ifi, afukeme pa ntanshi ya kwa Yesu, e lyo amweba ati: “Ntalukeni mwe Shikulu, pantu ndi mubembu.” 9 Pantu ena na bo ali nabo balipapile nga nshi pe sabi baipeye, 10 Yakobo na Yohane, abana baume ba kwa Sebede,+ abalondo banankwe ba kwa Simone nabo balipapile. Lelo Yesu aebele Simone ati: “Witiina. Ukufuma nomba walaba umulondo wa bantu.”+ 11 E ico babweseshe amato ku mulundu, kabili bashiile fyonse bamukonka no kumukonka.+

12 Inshita imbi ilyo Yesu ali mu musumba umo, moneni! kwali umwaume uwalwele ifibashi umubili onse! Ilyo amwene fye Yesu, awile ubukupeme, alamupaapaata ati: “Mwe Shikulu, nga mulefwaya, kuti mwang’undapa.”+ 13 E ico atambalike ukuboko kwakwe, amwikata, e lyo atila: “Ee, ndefwaya! Pola.” Kabili ilyo line fye alipolele ifibashi.+ 14 Lyena amwebele ukuti eebako umuntu nangu umo e lyo amweba no kuti: “Kabiye kuli shimapepo pa kuti akumone utuule ne ca bupe ico balandapo mu mafunde ya kwa Mose+ ica kulanga ukuti naupola, pa kuti bashimapepo bashininkishe ukuti naupola.”+ 15 Nomba ilyashi pali ena lyalesalanganinako fye, na mabumba ayakalamba yalelongana pa kuti yomfwe kuli ena na pa kuti aposhe amalwele yabo.+ 16 Lelo ilingi line aleya eka ukushaleba abantu mu kupepa.

17 Bushiku bumo ilyo alesambilisha, abaFarise na bakasambilisha ba Mafunde abafumine mu mishi yonse iya mu Galili, mu Yudea na mu Yerusalemu e po bali ninshi nabekala; kabili ali na maka ya kwa Yehova* aya kundapa abantu.+ 18 Kabili moneni! kwali abantu abaishile ninshi nabasenda umwaume uwali no bulebe pa musengele, kabili balefwaya apa kumwingishisha pa kuti bamubike pa ntanshi ya kwa Yesu.+ 19 Nomba apo balifililwe ukumufisha apali Yesu pa mulandu wa kuti ibumba lyalimushingulwike, baninine pa mutenge, e po bapushisha umusengele apali uwalwele ubulebe, bamubika na apali abantu abali pa ntanshi ya kwa Yesu. 20 Ilyo amwene ifyo bali ne citetekelo, aebele uwalwele ubulebe ati: “Imembu shobe shaelelwa.”+ 21 Lyena bakalemba na baFarise batendeke ukulanshanya abati: “Bushe uyu nani uwa kuti alepontela Lesa? Bushe te Lesa eka uwingelela imembu?”+ 22 Lelo ilyo Yesu aishibe ifyo baletontonkanya, abebele ati: “Cinshi muletontonkanishisha ifyo mu mitima yenu? 23 Cinshi ca-angukapo ukulanda, ukulanda ati, ‘Imembu shobe shaelelwa,’ nelyo ukulanda ati, ‘Ima wende’? 24 Nomba pa kuti mwishibe ukuti Umwana wa muntu alikwata amaka ya kwelela imembu pano isonde—” lyena aebele uwa bulebe ati: “Ndekweba nati, Ima, senda umusengele obe uye ku mobe.”+ 25 Na o apo pene alimine ninshi na bonse balemonako, asenda umusengele wakwe aya na ku mwakwe, ninshi alelumbanya Lesa. 26 Lyena bonse balipapile nga nshi, kabili batendeke ukulumbanya Lesa. Balitiinine sana kabili batile: “Twamona ifipesha amano lelo!”

27 Nomba pa numa ya ifi, alifumine alaya kabili amwene kasonkesha wa misonko naikala pa cikulwa ca kusonkeseshapo imisonko. Ishina lyakwe ni Lebi. Lyena amwebele ati: “Nkonka ube umusambi wandi.”+ 28 Na o alishile fyonse, kabili aliimine alamukonka. 29 Lyena Lebi amupekanishishe umutebeto uukalamba mu ng’anda mu mwakwe, kabili mwali ibumba ilikalamba ilya bakasonkesha ba misonko e lyo na bantu bambi abalelya pamo nabo.*+ 30 E lyo abaFarise na bakalemba babo balailishanya ku basambi bakwe abati: “Cinshi muliila no kunwena pamo na bakasonkesha ba misonko na babembu?”+ 31 Yesu na o abaswike ati: “Abatuntulu tabakabila kondapa, kano abalwele.+ 32 Nshaisa mu kwita abalungama, kano ababembu pa kuti balapile.”+

33 Nabo bamwebele abati: “Abasambi ba kwa Yohane balafunga libili libili kabili balapepa amapepo ya kupaapaata kuli Lesa. Ifi fine e fyo na basambi ba baFarise bacita, lelo abasambi bobe bena balalya no kunwa.”+ 34 Yesu abebele ati: “Bushe kuti mwaeba abanankwe ba kwa shibwinga ukuti balefunga ilyo shibwinga acili nabo? 35 Lelo inshiku shikesa ilyo shibwinga+ bakamusenda; muli isho nshiku e lyo bakafunga.”+

36 Na kabili abebele icilangililo ca kuti: “Takwaba uulepula icikamba pa ca kufwala ca kunse icipya no kucibilila pa ca kufwala ca kale. Pantu nga acita ifi, icikamba icipya kuti calepula ica kufwala ca kale, kabili icikamba icipya cilapusana ne ca kufwala ca kale.+ 37 Kabili takwaba uubika umwangashi uushilakalipa mu nyambi sha kale. Pantu nga acita ifi, umwangashi uushilakalipa kuti walepula inyambi, kabili kuti wapongoloka, ne nyambi kuti shaonaika. 38 Lelo umwangashi uushilakalipa bafwile ukuubika mu nyambi ishipya. 39 Takwaba uufwaya ukunwa umwangashi uushilakalipa pa numa ya kunwa uukali, pantu atila: ‘Uukali e usuma!’”

6 Nomba pe sabata Yesu alepita mu mabala ya ngano, kabili abasambi bakwe baletimpula imitwe ya ngano+ e lyo baleifikina mu minwe balelya.+ 2 E ico abaFarise bamo babepwishe abati: “Cinshi mulecitila ico amafunde yalesha ukucita pe Sabata?”+ 3 Lelo Yesu abaswike ati: “Bushe tamwabelenga ifyo Davidi acitile ilyo ena na bo ali nabo baumfwile insala?+ 4 Aingile mu ng’anda ya kwa Lesa, apoka umukate wa mushilo* alya, apeelako na baume abo ali nabo. Takwete insambu sha kulya ulya mukate kano fye bashimapepo e bakwete insambu sha ku-ulya.”+ 5 Lyena abebele ati: “Umwana wa muntu alikwata amaka pe Sabata.”+

6 Pe sabata na limbi+ aingile mwi sunagoge alasambilisha. Kabili mwali umuntu uwali no kuboko kwa ku kulyo ukwafwa.*+ 7 Bakalemba na baFarise balemulolekesha pa kuti bamone nga alaundapa umuntu pe Sabata, pantu balefwaya ukusanga apa kumupeelela umulandu. 8 Lelo apo alishibe ifyo baletontonkanya,+ aebele umuntu uwali no kuboko ukwafwa* ati: “Ima, wiminine pa kati.” Na o aliimine, aiminina na pa kati. 9 Lyena Yesu abebele ati: “Lekeni imwipusheko, Bushe amafunde yalisuminisha ukucita icisuma nelyo ukucita icabipa pe Sabata, ukupususha umuntu* nelyo ukumwipaya?”+ 10 Ilyo aloleshe bonse abalimo, aebele uyu muntu ati: “Fungulula ukuboko kobe.” Na o alikufungulwile kabili kwalipolele. 11 Lelo balikalipe nga nshi, kabili batendeke ukulanshanya ifyo bengacita Yesu.

12 Bushiku bumo aile ku lupili mu kupepa,+ kabili aikele ubushiku bonse alepepa kuli Lesa.+ 13 Kabili ilyo bwacele, aitile abasambi bakwe asalapo na bali 12, e lyo abenika ati abatumwa.+ 14 Amashina yabo ni: Simone uo ainike no kuti Petro, Andrea munyina, Yakobo, Yohane, Filipi,+ Bartolomeo, 15 Mateo, Toma,+ Yakobo umwana wa kwa Alfeo, Simone uo baleita ati “uwacincila,” 16 Yuda umwana wa kwa Yakobo na Yuda Iskariote uwaishilemufutuka.

17 Kabili alitentemwike nabo ulupili, bayaiminina na patambalala kabili pali ibumba ilikalamba ilya basambi bakwe, na cinkupiti wa bantu abafumine monse mu Yudea, mu Yerusalemu na mu mishi yali mu citungu ca Turi na Sidone, abaishile mu kumfwa kuli ena na mu kundapwa amalwele. 18 Na bantu abo imipashi yakowela yalecusha alibondepe. 19 Kabili abantu bonse mwi bumba balefwaya ukumwikata, pantu amaka yalefuma muli ena+ kabili aleundapa bonse abali na malwele.

20 Kabili ainwine amenso yakwe alolesha na basambi bakwe e lyo abeba ati:

“Muli ba nsansa mwe bapiina, pantu Ubufumu bwa kwa Lesa bwenu.+

21 “Muli ba nsansa mwe bomfwa insala pali ino nshita, pantu mukekuta.+

“Muli ba nsansa mwe balila pali ino nshita, pantu mukaseka.+

22 “Muli ba nsansa abantu nga bamupata,+ nga bamukaana,+ nga bamupontela kabili nga bamweba ukuti muli babi pa mulandu wa Mwana wa muntu. 23 Sekeleleni muli ubo bushiku kabili beni ne nsansa nga nshi, pantu moneni! icilambu cenu cikalamba mu muulu. Na kuba ifi fine e fyo ne fikolwe fyabo fyalecita bakasesema.+

24 “Lelo we bulanda kuli imwe mwe bakankaala,+ pantu mwalipokelela kale ifya kumusansamusha fyonse.+

25 “We bulanda kuli imwe mwe bekuta pali ino nshita, pantu mukalaba ne nsala.

“We bulanda kuli imwe mwe baseka pali ino nshita, pantu mukaloosha kabili mukalila.+

26 “We bulanda kuli imwe, nga ca kuti abantu bonse balelanda ifisuma pali imwe,+ pantu ifi fine e fyo ne fikolwe fyabo fyalecita bakasesema ba bufi.

27 “Lelo nde-eba mwe baleumfwa nati: Muletemwa abalwani benu, abamupata mulebacitila ifisuma,+ 28 mulepaala abamutiipwila, mulepepelako abamusaalula.+ 29 Uwakutoba ulupi kwi saya limo, mupeele ne libiye; no wakupoka ica kufwala cobe ica kunse, wimukaanya no kusenda ica kufwala cobe ica mu kati.+ 30 Onse uulekulomba,+ ulemupeela, na onse uulekupoka ifintu fyobe wilamupokolola.

31 “Kabili ifyo mufwaya abantu balemucitila, e fyo na imwe mulebacitila.+

32 “Nga mwatemwa fye abamutemwa, cinshi abantu bengamutashishapo? Pantu na babembu nabo batemwa fye ababatemwa.+ 33 Kabili nga mucitila fye ifisuma abamucitila ifisuma, cinshi abantu bengamutashishapo? Pantu na babembu nabo ifi fine e fyo bacita. 34 Kabili nga mukongwesha* fye abo mwishibe ukuti bakamubwesesha, ninshi cinshi abantu bakamutashishapo?+ Na babembu nabo balakongwesha ababembu banabo kabili benekela ukuti bakababwesesha shonse. 35 Lelo muletemwa abalwani benu no kulacita ifisuma, kabili mulekongwesha ukwabula ukwenekela ukuti bakamubwesesha.+ Lyena icilambu cenu cikaba icikalamba, kabili mukaba abana ba Wapulamo, pantu wa cikuuku ku bashitasha na ku babifi.+ 36 Muleba aba luse, nga filya fine Shinwe aba uwa luse.+

37 “Kabili lekeni ukupingula abantu, na imwe tabakamupingule;+ lekeni ukupeela abantu imilandu, na imwe tabakamupeele imilandu. Mule-elela, na imwe bakamwelela.+ 38 Mulepeela, na imwe abantu bakulamupeela.+ Bakulamupeelela pa nsalu ya ca kufwala cenu* icipimo icisuma, ico bashindaila, ico basunkanya bwino kabili icaisula. Pantu icipimo mupiminako bambi, e co na imwe bakamupiminako.”

39 Lyena abebele icilangililo ca kuti: “Bushe impofu kuti yatungulula impofu inankwe? Bushe shonse shibili te kuti shiwile mu cilindi?+ 40 Umusambi tacila kasambilisha wakwe, lelo onse uo basambilisha bwino akaba nga kasambilisha wakwe. 41 Nomba cinshi ulolesesha akacani akali mu linso lya kwa munonko, lelo taumona ulusonta ululi mu linso lyobe?+ 42 Bushe kuti waeba shani munonko ati, ‘Munyinane, leka nkufumye akacani mu linso,’ lelo we mwine taulemona ulusonta ululi mu linso lyobe? We wa bumbimunda we! Utale ufumye ulusonta mu linso lyobe, e lyo walamona bwino ifya kufumya akacani akali mu linso lya kwa munonko.

43 “Pantu takwaba icimuti icisuma icitwala ifisabo ifyabipa, kabili takwaba icimuti icabipa icitwala ifisabo ifisuma.+ 44 Pantu icimuti conse bacishibila ku fisabo fya ciko.+ Ku ca kumwenako, abantu tabasaba amakunyu ku myunga, nangu imyangashi ku cimpusa ca myunga. 45 Umuntu umusuma afumya ifisuma ifyo asunga mu mutima wakwe, lelo umuntu umubi afumya ifibi ifyo asunga mu mutima wakwe; pantu ifingi ifyaba mu mutima wa muntu, no kulanda e fyo alanda.+

46 “Nomba cinshi munjitila amuti, ‘Shikulu! Shikulu!’ lelo tamucita ifyo nanda?+ 47 Onse uwaisa mu kumfwa amashiwi yandi kabili uuyakonka, nalamweba uo apala:+ 48 Apala umuntu uwa kuti pa kukuula ing’anda, aimbile umufula ukufika pa mwalaala.* E ico ilyo mulamba aishile, umumana waliswile ica kuti na menshi yaleuma mu ng’anda, lelo tayakwete amaka ya kusunkaanya iyi ng’anda, pantu ali-ikulile bwino.+ 49 Nomba uumfwa amashiwi yandi lelo uushiyakonka,+ apala umuntu uwakuulile ing’anda pa mushili ukwabula ukwimba umufula. E ico ilyo umumana waiswile, amenshi yaumine mu ng’anda, na po pene ing’anda yalibongolweke, kabili yabongolweke fye yonse.”

7 Ilyo apwishishe ukweba abantu ifyo alingile ukubeba, aingile mu Kapernahumu. 2 Nomba kwali umukalamba wa bashilika uwakwete umusha uo atemenwe nga nshi. Uyu musha alilwele sana ica kuti ali mupepi no kufwa.+ 3 Ilyo umukalamba wa bashilika aumfwile ifyo abantu balelanda pali Yesu, atumine abakalamba ba baYuda ukuyamwita pa kuti ese ondape umusha wakwe. 4 Ilyo baishile kuli Yesu batendeke ukumupaapaata sana abati: “Uyu muntu nalinga ukuti mumwafwilishe, 5 pantu alitemwa uluko lwesu kabili e watukuliile ne sunagoge.” 6 E ico Yesu aliile nabo. Lelo ilyo alepalama ku ng’anda, ninshi umukalamba wa bashilika natuma kale ifibusa fyakwe abakuyaeba Yesu ukuti: “Mukwai nshilingile ukumupokelela mu ng’anda mu mwandi.+ 7 E mulandu wine nacimwena ukutila nshilingile ukwisa kuli imwe. Lelo landeni fye amashiwi, no mubomfi wandi alapola. 8 Pantu na ine wine nalikwata abantungulula, nalikwata na bashilika abang’umfwila, kuti naeba umo nati, ‘Kabiye!’ na o aya, na umbi nati, ‘Isa!’ na o aisa, kabili kuti naeba umusha wandi nati, ‘Cita ici!’ na o acita.” 9 Ilyo Yesu aumfwile ifi, alipapile kabili apilibukile kwi bumba e lyo abeba ati: “Ndemweba nati, nshatala nsangapo umuntu uwaba ne citetekelo icikalamba nge ci nangu fye ni mu Israele.”+ 10 Kabili ilyo abo atumine babwelele ku ng’anda, basangile umusha napola.+

11 Pa numa fye ya ifi, aile ku musumba uo beta ati Naini, kabili abasambi bakwe ne bumba ilikalamba baile nankwe. 12 Ilyo apaleme pa mpongolo ya musumba, moneni! kwali umuntu uwafwile uo baletwala kunse ya musumba. Uyu e mwana fye uo nyina akwete.+ Nyina wa uyu mwana ali ni mukamfwilwa. Kabili ibumba ilikalamba ilyafumine mu musumba lyali no yu mukamfwilwa. 13 Ilyo Shikulu amumwene, alimumfwilile uluse,+ kabili amwebele ati: “Leka ukulila.”+ 14 Kabili alipaleme aikata na ku musengele apaleele umulumendo uwafwile, na basendele umusengele* baliminine, lyena alandile ati: “We mulumendo, ndekweba nati, ima!”+ 15 No mulumendo uwafwile alimine atendeka no kulanda, e lyo Yesu amupeela kuli nyina.+ 16 Nomba bonse balyumfwile umwenso, kabili balacindika Lesa abati: “Kasesema mukalamba naima muli ifwe,”+ balalanda no kuti, “Lesa naibukisha abantu bakwe.”+ 17 Kabili ili ilyashi pali Yesu lyaile ululumbi mu Yudea monse na mu mishi yonse iyali mupepi.

18 Nomba abasambi ba kwa Yohane balimushimikile fyonse ifi.+ 19 E ico Yohane aitile abasambi bakwe babili no kubatuma kuli Shikulu pa kuti bayemwipusha ati: “Bushe niwe Uli no Kwisa+ nelyo kuli umbi uo tufwile ukulolela?” 20 Ilyo bafikile kuli ena, balandile abati: “Yohane Kabatisha atutuma ukwisamwipusha ati, ‘Bushe nimwe Muli no Kwisa nelyo tufwile ukulolela umbi?’” 21 Muli ilya nshita alyundepe abantu abengi abali ne ntenda,+ na balwele amalwele ayakalamba, kabili alifumishe imipashi yabipa, alilengele ne mpofu ishingi shatampa ukumona. 22 Yesu abaswike ati: “Kabiyeni, muyeshimikila Yohane ifyo mulemona ne fyo muleumfwa: Impofu shilemona,+ abalemana bale-enda, aba fibashi balepola, bankomamatwi baleumfwa,+ abafwa balebuushiwa na bapiina baleshimikilwa imbila nsuma.+ 23 Wa nsansa umuntu uushisanga ica kuipununako muli ine.”+

24 Ilyo abo Yohane atumine babwelelemo, Yesu atendeke ukweba amabumba pali Yohane ati: “Cinshi mwaile mu kumona mu matololo? Bushe litete ilyalepungaila ku mwela?+ 25 Nomba cinshi mwaile mu kumona? Bushe muntu uwafwele ifya kufwala ifyanakilila?*+ Awe nakalya, pantu abafwala ifya kufwala ifyanakilila kabili abekala bwino, bekala mu masano ya shamfumu. 26 E co nani kanshi mwaile mu kumona? Bushe ni kasesema? Ndemweba icine cine nati, ena alicila na pali kasesema.+ 27 Uyu e o balembelepo ukuti, ‘Moneni! Nkatuma inkombe yandi iikakutangilila,* iikakupekanishisha inshila ya kuti ukapitemo.’+ 28 Ndemweba nati, pa bana bonse abo abanakashi bafyala tapatala apaba uwacila pali Yohane; lelo uwacepesha mu Bufumu bwa mu muulu alimucila.”+ 29 (Ilyo abantu bonse na bakasonkesha ba misonko baumfwile ifi, balandile ukuti Lesa alilungama, pantu babatishiwe ulubatisho lwa kwa Yohane.+ 30 Lelo abaFarise na baishiba sana Amafunde balisuulile amano ayo Lesa abapandile,*+ pantu balikeene ukuti Yohane ababatishe.)

31 “Ni kuli bani ningalinganya abantu ba muli iyi nkulo, kabili bapala bani?+ 32 Baba nga bana abanono abekele pa maliketi balebilikishanya abati: ‘Natumulishisha imitoolilo, lelo tamucindile; natupumapo imisowa, lelo tamulilile.’ 33 Ifi fine e fyo caba, Yohane Kabatisha alisa, talya umukate kabili tanwa umwangashi,+ lelo mutila: ‘Aba ne cibanda.’ 34 Umwana wa muntu alisa, alalya no kunwa, lelo mutila: ‘Moneni! Uyu muntu muliili, alitemwisha umwangashi kabili ni cibusa wa bakasonkesha ba misonko na babembu!’+ 35 Lelo ifisuma ififuma mu fyalungama ifyo umuntu acita e filanga ukuti wa mano.”+

36 Nomba umuFarise umo aikalile fye ukumweba ukuti ayelya nankwe ifya kulya. E ico aileingila mu ng’anda ya muFarise baikala nankwe na pe tebulo balalya. 37 Kabili moneni! umwanakashi uo abantu mu musumba baishibe ukuti mubembu alyumfwile ukuti Yesu ali mu ng’anda ya muFarise alelya, kabili alishile ne botolo* lya mafuta ayanunkila.+ 38 Kabili ilyo aiminine ku numa ya kwa Yesu mupepi na makasa yakwe, atendeke ukulila alabomfya na makasa ya kwa Yesu ku filamba fyakwe kabili aleyakumuna no mushishi wa ku mutwe wakwe. Na kabili atomwene amakasa ya kwa Yesu e lyo aitulwilako amafuta ayanunkila. 39 Ilyo umuFarise uwaitile Yesu amwene ifi, atendeke ukutontonkanya ati: “Uyu muntu aba ni kasesema, nga naishiba ifyo umwanakashi uulemwikata aba, nga naishiba ukuti mubembu.”+ 40 Lelo Yesu amwebele ati: “Simone pali ifyo ndefwaya ukukweba.” Na o atile: “Mwe Kasambilisha, landeni!”

41 “Kwali abantu babili abakongwele indalama ku ukongwesha indalama; umo akongwele amadenari* 500, e lyo umbi amadenari 50. 42 Nomba ilyo bonse babili bafililwe ukumubwesesha, alibabelele uluse. E ico nani pali aba babili uwingamutemwa sana?” 43 Simone ayaswike ati: “Kuti natila ni ulya abelele sana uluse.” Na o amwebele ati: “Ca cine.” 44 Lyena apilibukile ku mwanakashi, e lyo aeba Simone ati: “Bushe wamumona uyu mwanakashi? Ninjisa mu ng’anda yobe; lelo taumpeele amenshi ya kusamba amakasa yandi. Nomba uyu mwanakashi nabomfya amakasa yandi ku filamba fyakwe no kuyakumuna ku mushishi wakwe. 45 Tauntomwene, lelo ukutula apo njishiile uyu mwanakashi talekelepo ukutomona amakasa yandi. 46 Taunjitulwililile amafuta pa mutwe, lelo uyu mwanakashi nanjitulwila amafuta ayanunkila ku makasa. 47 Pa mulandu wa ici, ndekweba nati, imembu shakwe nangu shafula shani,* nashelelwa,+ pantu ukutemwa kwakwe kukalamba. Lelo uo baelela panono, no kutemwa kwakwe kuba ukunono.” 48 Lyena aebele umwanakashi ati: “Imembu shobe shaelelwa.”+ 49 Abalelya nankwe pe tebulo batendeke ukulanshanya abati: “Bushe muntu wa musango shani uyu, uwa kuti ale-elela ne membu?”+ 50 Lelo aebele umwanakashi ati: “Icitetekelo cobe cakupususha;+ kabiye umutende.”

8 Ilyo papitile inshita iinono, aile alepita mu misumba na mu mishi aleshimikila abantu, kabili alebila imbila nsuma ya Bufumu bwa kwa Lesa.+ Na batumwa bakwe 12 ali nabo, 2 kumo na banakashi bamo abo afumishemo imipashi yabipa na bo aundepe amalwele: Maria uo baleita ukuti umwina Magadala, uo afumishemo ifibanda 7; 3 Yoana+ muka Kusa, umubomfi mukalamba uwa kwa Herode; Susana e lyo na banakashi bambi abengi, abalebomfya ifintu fyabo pa kwafwilisha Yesu na batumwa bakwe.+

4 Nomba ilyo ibumba ilikalamba lyalongene pamo na balemukonka mu misumba yonse umo aleya, abebele icilangililo ati:+ 5 “Katanda umo aile mu kutanda imbuto shakwe. Ilyo aletanda, shimo shaponene mu mbali ya nshila kabili abantu balinyantawilepo, ne fyuni fya mu muulu fyalishiliile.+ 6 Shimbi shaponene pa cilibwe, kabili ilyo shamenene shalyumine pantu tashakwete umutonshi.+ 7 Shimbi shena shaponene mu myunga, ne myunga iyo shakuliile pamo nayo, yalishitabiliile.+ 8 Shimbi shaponene pa mushili uusuma, kabili ilyo shamenene, shatwele ifisabo 100 ukucila pa sho atandile.”+ Ilyo alandile ifi, aikatishe ishiwi e lyo alanda ati: “Uuli na matwi ya kumfwa, naomfwe.”+

9 Lelo abasambi bakwe bamwipwishe umwalolele ici cilangililo.+ 10 Na o abebele ati: “Imwe balimupeela amano ya kumfwikisha inkaama sha kwa Lesa pa Bufumu bwakwe. Lelo bambi kubebela mu filangililo,+ pa kuti nangu ca kuti balelolesha, belamona, kabili nangu ca kuti baleumfwa, belailuka.+ 11 Nomba umu e mo icilangililo cilolele: Ulubuto cebo ca kwa Lesa.+ 12 Ishaponene mu mbali ya nshila, bantu aba kuti baumfwa icebo, e lyo Satana Kaseebanya aisa no kusenda icebo ca kwa Lesa mu mitima yabo pa kuti besumina kabili bepusuka.+ 13 Ishaponene pa cilibwe, bantu aba kuti cilya baumfwa icebo, bacitetekela ne nsansa. Lelo apo icebo tacilimbile imishila mu mitima yabo, bacitetekela fye pa nshita iinono, kabili ilyo baeshiwa, baleka ukucitetekela.+ 14 E lyo ishaponene mu myunga, bantu aba kuti baumfwa icebo, lelo pa mulandu wa kuti ifyuma+ fyababeleleka kabili bakwata amasakamika ya muli cino calo,+ icebo catusa kabili bafilwa ukutwala ifisabo ifyafikapo.+ 15 Lelo ishaponene pa mushili uusuma, bantu ababa ne mitima iisuma nga nshi,+ ica kuti nga baumfwa icebo, baciikatisha kabili batwala ifisabo uku ninshi baleshipikisha amafya.+

16 “Takwaba umuntu uusanika inyali no kukupikapo icipe nelyo ukuibika mwi samba lya busanshi, lelo aiteka pa ca kutekapo inyali, pa kuti isanikile abaleingila.+ 17 Pantu takuli icafisama icishakamoneke, nangu ico bafishilisha icishakeshibikwe no kusokoloka.+ 18 E ico mulebika amano ku fyo mumfwa, pantu onse uwakwata, bakamupeelelapo na fimbi.+ Lelo uushakwata, bakamupoka ne fyo atila alikwata.”+

19 Nomba banyina na bamunyina balishile,+ lelo balifililwe ukufika uko ali pa mulandu we bumba lya bantu.+ 20 E ico kwali abamwebele ati: “Banoko na bamunonko nabeminina panse balefwaya ukukumona.” 21 Na o abaswike ati: “Bamayo na bamunyinane ni aba abomfwa icebo ca kwa Lesa no kucikonka.”+

22 Bushiku bumo aninine mu bwato na basambi bakwe, kabili abebele ati: “Natwabukile kwi shilya lya bemba.” E ico balimine balaya.+ 23 Lelo ilyo baleya mu bwato, aponene mu tulo. Kabili icikuuku ca mwela calimine pali bemba na menshi yalaingila mu bwato ica kuti no bwato bwalefwaya ukubunda.+ 24 Basukile bamushibusha e lyo bamweba ati: “Mwe Kasambilisha, mwe Kasambilisha, twalafwa!” Ilyo ashibwike, alikalipiile umwela na mabimbi, na fyo fyalilekele kabili kwatalele na tondolo.+ 25 Lyena abepwishe ati: “Cinshi mushikwatile icitetekelo?” Lelo pa mulandu wa kuti balyumfwile umwenso, balipapile kabili batendeke ukulanshanya abati: “Inga uyu na o muntu wa musango nshi? Pantu alekalipila no mwela na menshi na fyo filemumfwila.”+

26 Kabili bafikile ku lulamba ku citungu ca bena Gerasa,+ icalungatana na Galili. 27 Ilyo Yesu afumine mu bwato aya ku mulundu, kwali umwaume uwali ne fibanda uwafumine mu musumba uwamukumenye. Uyu mwaume pa nshita iitali talefwala ifya kufwala, kabili taleikala mu ng’anda, lelo aleikala ku nshiishi.*+ 28 Ilyo amwene Yesu, alipundile no kumufukamina, e lyo abilikisha ne shiwi ilikalamba ati: “Bushe tulomfwana na iwe, Yesu, we Mwana wa kwa Lesa Uwapulamo? Napaapaata wincusha.”+ 29 (Pa miku iingi*+ umupashi waleikata uyu muntu kabili ilingi line balemukakila amaceni ku maboko na ku makasa, e lyo balamulonda. Lelo aleyaputaula kabili icibanda calemutwala ukwa kuti aba fye eka.) 30 Yesu amwipwishe ati: “Niwe nani?” Na o ayaswike ati: “Nine Ibumba,” pantu muli uyu muntu mwali ifibanda ifingi. 31 Kabili fyalemupaapaata ukuti e fyeba ukuya mu muyenge.+ 32 Nomba kwali inkumba+ ishingi ishalelya mu lupili, e co fyamupaapeete ukuti afisuminishe ukwingila mu nkumba. Na o alifisuminishe.+ 33 E ico ifibanda fyalifumine mu muntu fyayaingila na mu nkumba, ne nkumba shonse shabutukile ukwasuluka shaponena na muli bemba shanwena no kunwena. 34 Lelo ilyo bakacema bamwene ifyacitike, balifulumwike bayashimikila na bantu abali mu musumba na mu mishi iyali mupepi.

35 Lyena abantu baliile mu kumona ifyacitike. Baishile kuli Yesu basanga no muntu uo ifibanda fyafuminemo nafwala ali fye umutuntulu, kabili naikala mupepi na Yesu. Ilyo bamwene ifi balyumfwile umwenso. 36 Abamweneko bashimikile abantu ifyo Yesu aundepe uyu umuntu uwali ne fibanda. 37 E ico abantu abengi abafumine mu mishi iyali mupepi ne citungu ca bena Gerasa bamwebele ukuti afume mu citungu cabo, pantu balitiinine nga nshi. Lyena aninine ubwato aya no kuya. 38 Lelo umuntu uo ifibanda fyafuminemo alemupaapaata ukuti emusha, lelo Yesu amwebele ukuti abwelelemo. Amwebele ati:+ 39 “Bwelela ku ng’anda, uyeshimikila abantu ifyo Lesa akucitiile.” E ico alibwelelemo, alashimikila na bantu mu musumba ifyo Yesu amucitiile.

40 Ilyo Yesu abwelelemo ku Galili, ibumba lyalimupokelele bwino pantu bonse balemulolela.+ 41 Lelo moneni! kwali umwaume umo uwaishile uwe shina lya kuti Yairo, uwali umukalamba we sunagoge. Kabili afukamine Yesu e lyo alamupaapaata ukuti ayeingila mu ng’anda yakwe,+ 42 pantu umwana wakwe umwanakashi uo akwete fye uwali nalimo ne myaka 12 ali mupepi no kufwa.

Ilyo Yesu aleya, ibumba lya bantu lyalemutitikisha pa kwenda. 43 Nomba kwali umwanakashi uwalefuma umulopa+ pa myaka 12, uo abantu bonse bafililwe ukundapa.+ 44 Alishile ku numa ya kwa Yesu aikata na ku nsenkebele sha ca kufwala cakwe ica kunse,+ kabili ilyo line umulopa walilekele ukufuma. 45 E ico Yesu aipwishe ati: “Nani wanjikata?” Ilyo bonse bakeene, Petro amwebele ati: “Mwe Kasambilisha, amabumba nayamushinguluka kabili yalemutitikisha pa kwenda.”+ 46 Lelo Yesu alandile ati: “Pali uwacinjikata, pantu ning’umfwa amaka+ yafuma muli ine.” 47 Ilyo umwanakashi amwene ukuti Yesu alishibe ifyo acitile, aishile aletutuma afukamina na Yesu e lyo alanda pa menso ya bantu bonse umulandu amwikatile ne fyo apolele apo pene. 48 Lelo Yesu amwebele ati: “We mwana, icitetekelo cobe nacikuposha. Kabiye umutende.”+

49 Ilyo Yesu acili alelanda, kwaishile umuntu uwafumine ku ng’anda ya mukalamba we sunagoge kabili atile: “Umwana wenu nafwa; lekeni ukupamfya Kasambilisha.”+ 50 Ilyo Yesu aumfwile ifi, amwebele ati: “Wisakamana, tetekela fye, alapusuka.”+ 51 Ilyo Yesu afikile ku ng’anda, tasuminishe abantu bambi ukwingila nankwe mu ng’anda kano fye Petro, Yohane, Yakobo, wishi wa mwana e lyo na nyina. 52 Lelo abantu bonse balelila kabili bali no bulanda nga nshi. E ico Yesu abebele ati: “Lekeni ukulila,+ pantu tafwile, lelo aleele fye utulo.”+ 53 E ico batampile ukumuseka no kumupumya pantu balishibe ukuti umwana alifwile. 54 Lelo amwikete ku kuboko e lyo abilikisha ati: “We mwana, buuka!”+ 55 Lyena umupashi*+ walibweleele muli ena, aima no kwima apo pene.+ Kabili Yesu abebele ukuti bamupeeleko ifya kulya. 56 Nomba abafyashi bakwe balitemenwe nga nshi ica kuti calibapeseshe amano, lelo Yesu abebele ukuti tabalingile ukwebako umuntu nangu umo icacitike.+

9 Lyena aitile abatumwa bakwe 12 kabili abapeele amaka ya kufumya ifibanda fyonse+ na ya kuposha amalwele.+ 2 Kabili abatumine mu kubila pa Bufumu bwa kwa Lesa no kundapa abalwele, 3 kabili abebele ati: “Ilyo muleya tamufwile ukusenda nangu cimo, nampo nga ni nkonto, nangu cola ca fya kulya, nangu mukate nangu ni ndalama;* nangu fya kufwala fibili.*+ 4 Ing’anda yonse iyo mwaingilamo, mukekale muli iyo ine ing’anda mpaka mukafume mu musumba.+ 5 Na konse uko abantu bashimupokelele, pa kufuma muli uyo musumba mulekunta ulukungu ku makasa yenu pa kulanga ukuti Lesa nabasoka.”+ 6 Lyena baile balepita mu mishi balebila imbila nsuma kabili konse uko baleya baleundapa abantu.+

7 Nomba Herode* kateka wa citungu alyumfwile fyonse ifyalecitika, kabili calimupeseshe sana amano pantu abantu bamo balelanda abati Yohane alibuukile ku bafwa,+ 8 lelo bambi baleti Eliya alimoneke, e lyo bambi nabo baleti umo pali bakasesema ba kale alibuukile ku bafwa.+ 9 Herode atile: “Yohane nalimuputwile umutwe.+ Nomba nani uulecita ifi ndeumfwa?” E ico alefwaisha ukumumona.+

10 Ilyo abatumwa babwelele, bamushimikile fyonse ifyo bacitile.+ E ico alibafumishe pa bantu abasenda na ku musumba uo beta ati Betsaida.+ 11 Lelo ilyo amabumba ya bantu yaishibe uko ali, yalimukonkele. Na o alibapokelele bwino, alabasambilisha na pa Bufumu bwa kwa Lesa, kabili alyundepe abalwele.+ 12 Lyena akasuba kaile kalewa. Na batumwa bakwe 12 baishile kuli ena e lyo bamweba abati: “Ebeni ibumba lileya pa kuti bayefwaya mu mishi na mu ncende shili mupepi, bayefwaya umwa kusendama ne fya kulya pantu pano tuli ni pa mpanga.”+ 13 Lelo abebele ati: “Imwe bene bapeeleni ifya kulya.”+ Nabo bamwebele abati: “Tukwete fye imikate 5 ne sabi libili, kano ninshi ifwe bene tuyeshitila aba bantu bonse ifya kulya.” 14 Na kuba bali nalimo abaume 5,000. Lelo aebele abasambi bakwe ati: “Bekalikeni mu mabumba, mwi bumba limo muleba abantu nalimo 50.” 15 Na basambi balicitile ifyo abebele, kabili balikalike abantu bonse. 16 Ilyo abuulile imikate 5 ne sabi libili, aloleshe ku muulu no kupepa. Lyena alimokawile umukate, atendeka no kupeela abasambi bakwe umukate ne sabi pa kuti nabo bapeele ibumba. 17 E ico bonse baliliile no kwikuta, kabili ilyo balonganike ifyashelepo, fyaiswile imiseke 12.+

18 Nomba ilyo ali eka alepepa, abasambi balishile uko ali, kabili abepwishe ati: “Bushe amabumba yatila nine ani?”+ 19 Nabo bamwaswike abati: “Bamo batila nimwe Yohane Kabatisha, e lyo bambi batila nimwe Eliya, bambi nabo batila ni umo pali bakasesema ba kale e wabuuka.”+ 20 Lyena abepwishe ati: “Inga imwe mutila nine ani?” Petro ayaswike ati: “Nimwe Kristu uo Lesa atuma.”+ 21 Lyena abakonkomeshe ukuti tabalingile ukwebako umuntu nangu umo.+ 22 Lelo abebele ati: “Umwana wa muntu bali no kumucusha nga nshi kabili abakalamba, intungulushi sha bashimapepo na bakalemba bali no kumukaana kabili bali no kumwipaya.+ Lyena pa bushiku bwalenga shitatu akabuushiwa.”+

23 E lyo aebele bonse ati: “Umuntu nga alefwaya ukunkonka aikaane umwine,+ alesenda icimuti cakwe ica kucushiwilwapo* cila bushiku kabili alenkonka lyonse.+ 24 Pantu onse uufwaya ukupususha umweo wakwe* akaulofya, lelo onse uwalofya umweo wakwe* pa mulandu wandi akaupususha.+ 25 Na kuba busuma nshi umuntu engasangamo nga anonka icalo conse lelo alufya fyonse, nelyo alufya umweo wakwe?+ 26 Pantu onse uumfwa insoni sha kulenga abantu baishiba ukuti musambi wandi no kuti alisumina amashiwi yandi, Umwana wa muntu na o akamumfwila insoni ilyo akesa no bukata bwakwe, ubukata bwa kwa Wishi no bwa bamalaika ba mushilo.+ 27 Lelo ndemweba icine cine nati, bamo pa beminine pano tabakafwe nakalya mpaka bakamone Ubufumu bwa kwa Lesa.”+

28 Nomba ilyo papitile inshiku nalimo 8 ukutula apo alandiile aya mashiwi, asendele Petro, Yohane na Yakobo banina no lupili e lyo aya mu kupepa.+ 29 Kabili ilyo alepepa, icinso cakwe calyalwike, ne fya kufwala fyakwe fyalibuutile nga nshi kabili fyalebengeshima. 30 Kabili moneni! kwali abantu babili abalelanda nankwe; aba bantu bali ni Mose na Eliya. 31 Aba balemoneka no bukata, kabili balelanda pa fyo ali no kufumapo, ifyo ali no kufikilisha ku Yerusalemu.+ 32 Nomba Petro na bo ali nabo baleshipula, lelo ilyo bashibwike bamwene ubukata+ bwa kwa Yesu na bantu babili nabeminina nankwe. 33 Kabili ilyo aba baleya, Petro aebele Yesu ati: “Mwe Kasambilisha, kuti cawama twaikala pano pene. E ico natupangepo insakwe shitatu, imo iyenu, imbi iya kwa Mose e lyo na imbi iya kwa Eliya.” Taishibe ifyo alelandapo. 34 Lelo ilyo alelanda ifi, kwaishile ikumbi lyabafimba no kubafimba. Ilyo ikumbi lyabafimbile, balyumfwile umwenso. 35 Lyena ishiwi+ lyafumine mwi kumbi aliti: “Uyu e Mwana wandi uo nasala.+ Muleumfwa ifyo alelanda.”+ 36 Ilyo baleumfwa ili shiwi, baishilemona Yesu ali eka. Lelo baikele fye tondolo kabili muli shilya nshiku tabaebeleko umuntu nangu umo pa fyo bamwene.+

37 Ubushiku bwakonkelepo ilyo batentemwike ulupili, ibumba ilikalamba lyalikumenye Yesu.+ 38 Kabili moneni! kwali umwaume umo uwabilikishe mwi bumba ati: “Mwe Kasambilisha, napaapaata afweni umwana wandi umwaume, pantu e mwana fye nakwata.+ 39 Kabili moneni! umupashi ulamwikata, na mu kupumikisha alapunda, kabili ulamufuntula panshi, wamufulansha ninshi alefumya ne fulo ku kanwa. Kabili pa kuti ufume muli ena cilafya, mpaka washa wamucenaula. 40 Nacipaapaata abasambi benu ukuti baufumye, lelo bacifilwa.” 41 Yesu na o ayaswike ati: “Kwena muli nkulo iyabula icitetekelo kabili iishalungama,+ bushe nkaba na imwe ukufika lilali? Bushe ni lilali nkaleka ukushipikisha pa fyo mucita? Leta umwana obe kuno.”+ 42 Nomba na lintu umulumendo alepalamina, icibanda calimufuntwile panshi no kumufulansha nga nshi. Lelo Yesu akalipile uyu mupashi wakowela kabili alyundepe umulumendo amupeela na kuli wishi. 43 Kabili bonse balipapile pa fyo amaka ya kwa Lesa yakula.

Nomba ilyo bonse bacili nabapapa pali fyonse ifyo alecita, aebele abasambi bakwe ati: 44 “Kutikisheni kabili muleibukisha aya mashiwi: Umwana wa muntu bali no kumufutuka no kumupeela mu minwe ya bantu.”+ 45 Lelo tabaishibe umo aya amashiwi yalolele. Na kuba yali ni nkaama pa kuti beishiba umo yalolele, kabili baletiina ukumwipusha umo aloseshe.

46 Lyena batendeke ukukansanina pa wali umukalamba pali bena.+ 47 Apo Yesu alishibe ifyali mu mitima yabo, abuulile umwana umunono, amwimika mupepi na po ali, 48 e lyo alabeba ati: “Onse uwapokelela uyu mwana umunono pa mulandu we shina lyandi, ninshi na ine ampokelela; na onse uwampokelela, ninshi apokelela no wantumine.+ Pantu uwaicefya pali imwe bonse e mukalamba.”+

49 Pa kwasuka Yohane amwebele ati: “Mwe Kasambilisha, twalimwene umuntu aletamfisha ifibanda mwi shina lyenu kabili twalimuleseshe, pantu tatukonka.”+ 50 Lelo Yesu amwebele ati: “Tamufwile ukumulesha, pantu uushimulwisha ninshi muntu wenu.”

51 Ilyo inshiku shaile shilepalamina* isha kuti abwelele ku muulu,+ alefwaisha ukuya ku Yerusalemu. 52 E ico atumine abakumutangilila. Nabo baileingila mu mushi wa bena Samaria, pa kuti bamupekanishishe ifyo alekabila nga afika. 53 Lelo tabamupokelele bwino,+ pantu alefwaisha ukuya ku Yerusalemu. 54 Ilyo abasambi bakwe Yakobo na Yohane+ bamwene ifi, bamwipwishe abati: “Mwe Shikulu, bushe mulefwaya twebe umulilo ufume ku muulu wise uboce?”+ 55 Lelo alipilibwike no kubakalipila. 56 E ico baile ku mushi umbi.

57 Nomba ilyo baleya mu musebo, umuntu umo amwebele ati: “Nalamukonka konse uko mwalaya.” 58 Lelo Yesu amwebele ati: “Bamumbwe balikwata imiimba* umo bekala ne fyuni fya mu lwelele fyalikwata ifinsa, lelo Umwana wa muntu ena takwata na pa kusaisha umutwe.”+ 59 Lyena aebele umbi ati: “Nkonka ube umusambi wandi.” Na o ayaswike ati: “Mwe Shikulu, lekeni ntale njeshiika batata.”+ 60 Lelo amwebele ati: “Leka abafwa bashiike abafwa+ babo abene, nomba iwe kabiye ulebila konse pa Bufumu bwa kwa Lesa.”+ 61 Umbi na o amwebele ati: “Nakulamukonka, mwe Shikulu, lelo lekeni ntale njeshalikapo aba mu ng’anda yandi.” 62 Yesu amwebele ati: “Takwaba uwikata kuli plao uku ninshi alelolesha ku fili ku numa+ uwalinga ukwingila mu Bufumu bwa kwa Lesa.”+

10 Pa numa ya ifi fintu, Shikulu asalile abasambi na bambi 70 kabili abatumine babili babili,+ pa kuti bamutangilile mu misumba yonse na mu ncende shonse umo ali no kuya umwine. 2 Lyena abebele ati: “Cine cine umulimo wa kulobolola ukalamba, lelo ababomfi bena nabacepa. E ico lombeni Umwine wa mulimo wa kulobolola+ ukuti atume ababomfi mu mulimo wakwe. 3 Kabiyeni! Moneni! Ndemutuma nga bana ba mpaanga mu mimbulu.+ 4 Mwisenda icikwama, icola ca fya kulya, nangu indyato+ kabili mwiposha umuntu nangu umo* mu nshila. 5 Mu ng’anda yonse iyo mwaingilamo, mulebalilapo ukulanda amuti: ‘Umutende ube muli ino ng’anda.’+ 6 Nga muli umuntu uulefwaya umutende, umutende wenu ukaba pali ena. Lelo nga tamuli, ukabwelela kuli imwe. 7 E ico mulingile ukwikala muli iyo ine ng’anda,+ kabili mulelya no kunwa ifyo bamupekanishisha,+ pantu umubomfi alilinga ukumupeela amalipilo yakwe.+ Mwilakuukakuuka mu mayanda.

8 “Kabili mu musumba onse uo mwaingilamo nga bamupokelela, mulelya ifyo bamupekanishisha, 9 muleundapa na balwele abalimo kabili mulebeba amuti, ‘Ubufumu bwa kwa Lesa nabupalama kuli imwe.’+ 10 Nomba mu musumba onse uo mwaingilamo nga tabamupokelele, muleya mu misebo ya uko iikalamba kabili mulelanda amuti: 11 ‘No lukungu lwine ulwa mu musumba wenu ululi ku makasa yesu,+ twamukuntila. Lelo mwishibe ukuti Ubufumu bwa kwa Lesa nabupalama.’ 12 Ndemweba nati, muli bulya bushiku cikaba eyefilya ku musumba wa Sodomu ukucila ifyo cikaba kuli uyo musumba.+

13 “We bulanda kuli mwe bena Korasini! We bulanda kuli mwe bena Betsaida! pantu ifipesha amano ifyacitike mu misumba yenu aficitika mu Turi na mu Sidone, abekashi ba muli iyi misumba nga kale balapiile, nga balifwele nsamu kabili nga balikele mu mito.+ 14 E ico ilyo kukaba ubupingushi cikaba eyefilya ku bena Turi na bena Sidone ukucila ifyo cikaba kuli imwe. 15 Na imwe mwe bena Kapernahumu, bushe mukaya ku muulu? Awe, mukaya ku Nshiishi!*

16 “Onse uuleumfwa kuli imwe+ ninshi aleumfwa kuli ine. No wamusuula ninshi na ine ansuula kabili uwansuula ninshi asuula no wantumine.”+

17 Lyena abasambi 70 balibwelele ninshi balesekelela kabili bamwebele abati: “Mwe Shikulu, ne fibanda na fyo filetunakila nga twalumbula ishina lyenu.”+ 18 Na o abebele ati: “Nimona Satana alepona+ nga filya fipona inkuba mu muulu. 19 Moneni! nimupeela amaka ya kunyanta pa nsoka na pali bakaling’ongo, na maka ya kucimfya umulwani,+ kabili takuli nangu cimo icikamucita icabipa. 20 Nomba mwisekelela pa mulandu wa kuti imipashi ilemunakila, lelo sekeleleni pa mulandu wa kuti amashina yenu nayalembwa mu muulu.”+ 21 Muli ilya ine nshita umupashi wa mushilo walengele asekelele nga nshi kabili alandile ati: “Ndemulumbanya pa cintubwingi, mwe Tata, Shikulu wa muulu ne sonde, pantu mwalifisa aba mano na bacenjela ifi fintu,+ lelo mwafisokolwela abana abanono. Cine cine mwe Tata, pantu ifi fine e fyo mwalefwaya.+ 22 Tata alimpeela ifintu fyonse, takwaba uwaishiba ifyo Umwana aba kano Wishi, kabili takwaba uwaishiba ifyo Wishi aba kano Umwana,+ e lyo na onse uo Umwana afwaya ukusokolwela.”+

23 Lyena apilibukile ku basambi ninshi bali fye beka e lyo abeba ati: “Ba nsansa abantu abakwata amenso ayamona ifintu ifyo imwe mulemona.+ 24 Pantu ndemweba nati, bakasesema abengi ne shamfumu balefwaisha ukumona ifintu ifyo imwe mulemona,+ lelo tabafimwene. Kabili balefwaisha ukumfwa ifintu ifyo muleumfwa, nomba tabafyumfwile.”

25 Nomba moneni! umwaume umo uwaishibishe Amafunde aliminine pa kuti amweshe, kabili amwipwishe ati: “Mwe Kasambilisha, cinshi mfwile ukucita pa kuti nkakwate umweo wa muyayaya?”+ 26 Na o Yesu amwipwishe ati: “Finshi fyalembwa mu Mafunde? Bushe walyumfwa ifyo yalanda?” 27 Na o ayaswike ati: “Yatila, ‘Uletemwa Yehova* Lesa obe no mutima obe onse, no mweo* obe onse, na maka yobe yonse, no kutontonkanya kobe konse,’+ no kuti ‘uletemwa umunobe nge fyo waitemwa we mwine.’”+ 28 E lyo amwebele ati: “Wa-asuka bwino; ulecita ifyo fine lyena ukaba no mweo.”+

29 Lelo pa kufwaya ukuilungamika,+ ulya mwaume aipwishe Yesu ati: “Bushe kanshi umunandi nani?” 30 Yesu na o amwaswike ati: “Umuntu umo alefuma ku Yerusalemu aleya ku Yeriko, kabili ifipondo fyalimusanshile, fyamufuula ifya kufwala, fyamupumaula, fyamusha ninshi ali mupepi no kufwa fyaya no kuya. 31 Nomba cali fye nkuma, shimapepo umo alepita muli ulya wine musebo, lelo ilyo amwene uo ifipondo fyapumine, apitiile ku lubali lumbi ulwa musebo. 32 Ifi fine e fyo no mwina Lebi acitile, ilyo amwene uo ifipondo fyapumine apitiile ku lubali lumbi ulwa musebo. 33 Lelo umwina Samaria+ umo uwalepita muli ulya musebo afikile apali uyu muntu uo bapumine, kabili ilyo amumwene, alimumfwilile uluse. 34 E ico aile apo ali amukakila ifilonda, aitilapo na mafuta no mwangashi. Lyena amuninike pa citekwa cakwe amutwala na ku ng’anda ya beni alamutensha no kumutensha. 35 Ubushiku bwakonkelepo abuulile amadenari* yabili apeela no mwine wa ng’anda ya beni e lyo amweba ati, ‘Ulemutensha, na shonse isho ukapoosapo ukucila pali ishi, nkakubwesesha ilyo nkabwela.’ 36 Bushe iwe ulemona ukuti nani pali aba batatu uwacitile ifyo umunankwe+ wa muntu uo ifipondo fyapumine engacita?” 37 Amwaswike ati: “Uwamumfwilile uluse.”+ E lyo Yesu amweba ati: “Kabiye, na iwe ulecita ifyo fine.”+

38 Nomba ilyo baleya mu nshila aingile mu mushi umo. Kabili umwanakashi umo uwe shina lya kuti Marita+ alimupokelele mu ng’anda mu mwakwe. 39 Uyu mwanakashi alikwete nkashi nankwe uwe shina lya kuti Maria. Lelo ena aikele mupepi na Shikulu aleumfwa ifyo alelanda.* 40 Lelo Marita abikile fye amano ku kubomba imilimo iingi. E ico apaleme kuli Yesu e lyo amweba ati: “Mwe Shikulu, bushe tamumwene ukuti nkashi nandi andekele fye ndebomba neka? Mwebeni angafweko.” 41 Shikulu na o amwebele ati: “Marita, Marita, nausakamikwa kabili naupamfiwa pa mulandu wa milimo iingi. 42 Lelo finono fye filekabilwa, nelyo cimo fye. Maria ena nasala icintu icisuma,+ kabili takuli uukamupoka.”

11 Nomba bushiku bumo ali ku ncende imo alepepa, kabili ilyo alekele, umusambi wakwe umo amwebele ati: “Mwe Shikulu tusambilisheni ifya kupepa, nga filya fine Yohane na o asambilishe abasambi bakwe.”

2 E ico abebele ati: “Lyonse ilyo mulepepa, muletila, ‘Mwe Shifwe, ishina lyenu libe ilya mushilo.*+ Ubufumu bwenu bwise.+ 3 Muletupeela ifya kulya cila bushiku ukulingana ne fyo tukabila.+ 4 Kabili tweleleni imembu shesu,+ pantu na ifwe tulelela bonse abatulufyanya;*+ kabili mwitutwala mu kutunkwa.’”+

5 Lyena abebele ati: “Tutile umo pali imwe alikwata cibusa wakwe kabili aya kuli ena pa kati ka bushiku e lyo amulomba ati, ‘Mune, njashimako imikate itatu, 6 pantu napokelela umunandi uuli pa lwendo lelo nshikwete ifya kulya fya kumupeela.’ 7 Nomba uuli mu ng’anda amwasuka ati: Leka ukumpamfya. Ninkoma iciibi, kabili ine na bana bandi natulaala. Te kuti njime nkupeele imikate.’ 8 Ndemweba nati, nangu taciba no kwima no kumupeela pa mulandu wa kuti munankwe, kuti aima no kumupeela ifyo alefwaya pa mulandu wa mupampamina wakwe.+ 9 E ico ndemweba nati, nga mulelomba,+ bakamupeela; nga mulefwaya, mukasanga kabili nga mulekonkonsha, bakamwiswila.+ 10 Pantu onse uulomba alapokelela,+ na onse uufwaya alasanga, na onse uukonkonsha balamwiswila. 11 Na kuba, mufyashi nshi pali imwe, uwa kuti umwana wakwe nga amulomba isabi, amupeela insoka mu cifulo ca kumupeela isabi?+ 12 Nelyo nga ca kuti amulomba ne lini, bushe kuti amupeela kaling’ongo? 13 E ico imwe nga mwalishiba ukupeela abana benu ifya bupe ifisuma nangu ca kuti muli babifi, ninshi Shinwe wa mu muulu ena akacilapo ukupeela umupashi wa mushilo abamulomba!”+

14 Pa numa alifumishe icibanda mu muntu icalengele abe cibulu.+ Ilyo icibanda cafumine, umwaume uwali cibulu alitendeke ukulanda kabili amabumba yalipapile.+ 15 Lelo bamo batile: “Afumisha ifibanda ku maka ya kwa Beelisebubi* kateka wa fibanda.”+ 16 Bambi nabo pa kumwesha bamwebele ati abacitile icishibilo+ ukufuma ku muulu. 17 Na o apo alishibe ifyo baletontonkanya,+ abebele ati: “Ubufumu bonse nga bwapaatukana bulonaika, ne ng’anda yonse nga yapaatukana ilonaika. 18 Ifi fine e fyo caba na kuli Satana. Nga ca kuti aleilwisha umwine, bushe ubufumu bwakwe kuti bwatwalilila shani ukubako? Pantu mutila mfumisha ifibanda ku maka ya kwa Beelisebubi. 19 Nga mfumisha ifibanda ku maka ya kwa Beelisebubi, ninshi abasambi benu bafumisha ifibanda ku maka ya kwa nani? E mulandu wine abasambi benu bakamwebela ukuti mwaliluba. 20 Lelo nga mfumisha ifibanda ku munwe wa kwa Lesa,+ ninshi Ubufumu bwa kwa Lesa bwalisa pali imwe ukwabula ukuti mwishibe.+ 21 Nga ca kuti umwaume uwa maka uwaipangasha bwino ne fyanso alelinda ing’anda yakwe, tapali uwingesasenda ifyuma fyakwe. 22 Lelo nga kwaisa uwamucila amaka kabili amucimfya, alamupoka ifyanso fyakwe kabili alasenda ifyuma fyakwe aya-akanya na bantu bambi. 23 Onse uushaba pamo na ine, ninshi alandwisha, na onse uushilonganika abantu pamo na ine, ninshi alabasalanganya.+

24 “Ilyo umupashi wakowela wafuma mu muntu, upita umwauma ilyo ulefwaya apa kutuushisha, lelo taupasanga. Lyena utila, ‘Ndebwelelamo ku ng’anda yandi uko nafumine.’+ 25 Kabili ilyo wafika, usanga mwalipyangwa ubusaka kabili balimuyemfya. 26 Lyena ulaya no kuyasenda imipashi iyalekanalekana 7 iyabipa uku-ucila, kabili nga yaingila ilekala mulya mwine. E ico ilalenga umuntu abipa ukucila ifyo ali kale.”

27 Nomba ilyo alelanda ifi fintu, umwanakashi umo mwi bumba asanswile ishiwi lyakwe e lyo alanda ati: “Wa nsansa umwanakashi uwakusendele mwi fumo kabili uo waonkeleko amabele yakwe!”+ 28 Lelo Yesu atile: “Awe, aba nsansa bantu abomfwa icebo ca kwa Lesa no kukonka ifyo cilanda!”+

29 Ilyo amabumba yalelongana pamo, atendeke ukulanda ati: “Inkulo iyi ni nkulo iyabipa; ifwaya ukuilanga icishibilo, lelo tabakailange icishibilo cimbi kano fye icishibilo ca kwa Yona.+ 30 Pantu filya fine Yona+ aishileba icishibilo ku bena Ninebe, e fyo no Mwana wa muntu akaba icishibilo kuli iyi nkulo. 31 Namfumu wa ku kapinda ka ku kulyo+ akabuukila pamo na bantu ba nkulo ino ilyo kukaba ubupingushi kabili akabashinina, pantu afumine ukutali sana pa kuti ese omfwe amano ya kwa Solomone. Lelo moneni! uwacila pali Solomone ali pano.+ 32 Abena Ninebe bakabuukila pamo na bantu ba iyi nkulo ilyo kukaba ubupingushi kabili bakabashinina, pantu bena balilapiile ilyo Yona abilile imbila.+ Lelo moneni! uwacila Yona ali pano. 33 Umuntu nga asanika inyali taibika umwafisama nelyo ukuikupikila mu museke,* lelo aiteka pa ca kutekapo inyali,+ pa kuti abaleingila balemona ulubuuto. 34 Ulubuuto lwa mubili obe menso. E ico amenso yobe nga yalolesha fye pa cintu cimo, umubili obe onse ukaba umwabuuta; lelo amenso yobe nga yalolesha pa fyabipa, umubili obe onse ukuba umwafiita.+ 35 E ico ucenjele pa kuti ulubuuto ulwaba muli iwe lwiba imfifi. 36 Kanshi umubili obe onse nga waba umwabuuta kabili tamwaba imfifi nangu imo, ninshi umubili onse ukuba umwabuuta nga filya inyali ikusanikila ulubuuto.”

37 Ilyo apwile ukulanda ifi, umuFarise alimwitile pa kuti ayelya nankwe ifya kulya. E ico aileingila mu ng’anda ya muFarise baikala balalya no kulya. 38 Lelo umuFarise alipapile ilyo amwene ukuti Yesu tasambile ku minwe* pa kulya.+ 39 Nomba Shikulu amwebele ati: “Imwe mwe baFarise muwamya kunse ya kapu ne mbale, lelo mu kati mwaisula ubufunushi no bubifi.+ 40 Mwe bawelewele mwe! Bushe uwapangile kunse te wapangile na mu kati mwine? 41 Lelo mulepeela abalekabila ubwafwilisho ifya bupe ifyaba mu mitima,* kabili ifi fyonse fimbi ifyo mukalacita fikalaba ifyasanguluka. 42 Lelo we bulanda kuli imwe mwe baFarise, pantu mupeela ica pe kumi ica minte, anise, no musalu umbi onse,+ lelo mwalisuula umulinganya no kutemwa Lesa. Kwena mwalingile ukulacita ifi fintu, lelo tamufwile ukusuula ifintu fimbi ifyacilapo ukucindama ifyo amafunde yalandapo.+ 43 We bulanda kuli imwe mwe baFarise, pantu mwalitemwa ifipuna fya ku ntanshi* mu masunagoge kabili mulatemwa filya abantu bamuposha pa maliketi!+ 44 We bulanda kuli imwe, pantu mwaba nga shilya inshiishi* ishishimoneka,*+ ica kuti abantu balendanapo ukwabula ukwishiba!”

45 Umo pa baishibe sana Amafunde amwebele ati: “Mwe Kasambilisha, ifi mulelanda mulesaalwila kumo na ifwe.” 46 Lyena Yesu alandile ati: “We bulanda na kuli imwe bene mwe baishiba sana Amafunde, pantu mutwika abantu ifisendo ifya-afya ukusenda, lelo imwe mwe bene tamufwaya nangu fye kwikatako umunwe umo!+

47 “We bulanda kuli imwe, pantu mukuulilila inshiishi* sha bakasesema, lelo ifikolwe fyenu e fyabepeye!+ 48 Cine cine mwalishiba ifyo ifikolwe fyenu fyacitile. Na lyo line mumona ukuti ifyo bacitile fyali fye bwino, pantu e baipeye bakasesema,+ lelo imwe mulekuulilila inshiishi shabo. 49 E mulandu wine Lesa mu mano yakwe alandiile ati: ‘Nkabatumina bakasesema na batumwa, lelo bakepayapo bamo e lyo bambi nabo bakabacusha, 50 pa kuti abantu ba nkulo ino+ bakabe no mulandu pa mulopa wa bakasesema bonse uwasuuma ukutula pa kutendeka kwa calo, 51 ukutampila pa mulopa wa kwa Abele+ ukufika na ku mulopa wa kwa Sekaria, uo baipaile pa kati ka ciipailo ne tempele.’+ Ndemweba nati bakapeela iyi nkulo umulandu pali uyu mulopa onse.

52 “We bulanda kuli imwe mwe baishiba sana Amafunde, pantu mwalipoka abantu amakii ya kwishiba. Mwe bene tamwaingilemo mu Bufumu bwa mu muulu, kabili abafwaya ukwingilamo mulesha ukubalesha!”+

53 E ico ilyo afumine kulya, bakalemba na baFarise balimwimiine kabili batendeke ukumwipusha amepusho na yambi ayengi, 54 pantu balefwaya alande fimo ifyo bengamupelelapo umulandu.+

12 Pali ilya nshita, ilyo ibumba lya bantu amakana ayengi balongene ica kuti balanyantana no kunyantana, abalilepo ukweba abasambi bakwe ati: “Mulecenjela ne citutumushi ca baFarise, e kutila ubumbimunda bwabo.+ 2 Lelo takwaba ico bafishilisha icishakasokoloke, nangu inkaama iishakeshibikwe.+ 3 E ico fyonse ifyo mulandila mu mfifi, abantu bakafyumfwila mu lubuuto, ne fyo mutepelesha mu miputule yenu bakafibilishisha pa mitenge. 4 Kabili ndemweba mwe banandi nati,+ mwilatiina abepaya umubili, lelo abashingacita nangu cimo pa numa ya kwipaya umubili.+ 5 Nomba ndemulanga uwa kuti muletiina: Muletiina uwa kuti nga aipaya, alikwata na maka ya kupoosa mu Gehena.*+ Ndemweba nati, uyo e o muletiina.+ 6 Bushe tabashita inseba 5 mu tundalama tubili utunono sana?* Na lyo line Lesa talabapo nangu lumo.+ 7 Na kuba alishiba ne mpendwa ya mushishi wa ku mitwe yenu.+ E ico mwilatiina, mwalicindama ukucila inseba ishingi.+

8 “E ico ndemweba nati, umuntu onse uwansumina pa menso ya bantu,+ Umwana wa muntu na o akamusumina pa menso ya bamalaika ba kwa Lesa.+ 9 Lelo onse uwankaana pa menso ya bantu, Umwana wa muntu na o akamukaana pa menso ya bamalaika ba kwa Lesa.+ 10 Na onse uwalanda amashiwi ayabipa pa Mwana wa muntu, bakamwelela, lelo onse uwapontela umupashi wa mushilo tabakamwelele.+ 11 Ilyo bakamutwala mu kumulubulwisha pa cintubwingi,* kuli bakateka na ku balashi, mwikasakamikwa pa nshila mukalandilamo nelyo pa fyo mukalanda pa kuipokolola,+ 12 pantu pa nshita ilya ine umupashi wa mushilo ukamusambilisha ifyo mufwile ukulanda.”+

13 Lyena umo mwi bumba aebele Yesu ati: “Mwe Kasambilisha, ebeni munyinane anjakanyeko ifyuma fya bupyani.” 14 Na o amwebele ati: “We muntu we, bushe nani wansonta ukuba kapingula nelyo uwa kwakanya ifintu fyenu?” 15 Lyena aebele ibumba ati: “Mulecenjela kabili muletaluka ku musango onse uwa bufunushi,*+ pantu umuntu nangu akwate shani ifingi, ubumi bwakwe tabuba mu fintu akwata.”+ 16 E ico abebele icilangililo ca kuti: “Ifilimwa mwi bala lya mukankaala umo fyalitwalishe. 17 E ico atendeke ukutontonkanya ati, ‘Nalacita shani, apo nshikwete umwa kututila ifilimwa fyandi?’ 18 Lyena atile, ‘Nkacita ifi:+ Nkatobolola amatala yandi e lyo nkakuule ayakalamba pali aya, e mo nkabike ingano shandi shonse ne fintu fyandi fyonse, 19 e lyo nkayeba nati:* “Naukwata ifintu ifingi ifisuma ifya kubomfya pa myaka iingi, e ico uletuusha fye no kulya no kunwa no kuipakisha.”’ 20 Nomba Lesa amwebele ati, ‘We ciwelewele we, lelo ubushiku balakwipaya.* Nomba filya wasunga fikashala fya kwa nani?’+ 21 Ifi fine e fyo caba ku muntu uututila ifyuma, lelo uushacindama mu menso ya kwa Lesa.”+

22 Lyena aebele abasambi bakwe ati: “E co imwebela nati, lekeni ukusakamikwa pa bumi bwenu* pa fyo mukalya nelyo ukusakamikwa pa mibili yenu pa fyo mukafwala.+ 23 Pantu ubumi* bwalicindama ukucila ifya kulya no mubili walicindama ukucila ifya kufwala. 24 Tontonkanyeni pali bamwankole, tabatanda imbuto kabili tabaseepa, tabakwata umwa kusungila ifya kulya nangu matala, lelo Lesa alabaliisha.+ Bushe imwe tamwacindama ukucila ifyuni?+ 25 Nani pali imwe uwingalundako umukono* umo ku bumi bwakwe nga alesakamikwa? 26 E ico nga te kuti mucite icintu icacepa ifi, cinshi musakamanina pali ifi fimbi ifyashala?+ 27 Tontonkanyeni pa fyo amaluba yakula: Tayabomba kabili tayapikula ifya kufwala; nomba ndemweba nati, nangu fye ni Solomone uwakwete ifintu ifingi ifya lulumbi tafwelepo ifyalingene ne luba limo pali aya.+ 28 Lelo nga ca kuti ifi e fyo Lesa afwika ifimenwa fya mu mpanga ifya kuti lelo e po fili kabili mailo bafipoosa mu mulilo, bushe takacilepo ukufwika imwe? Icitetekelo cenu cinono! 29 E ico lekeni ukusakamikwa pa fyo mukalya na pa fyo mukanwa, lekeni ukusakamikwa;+ 30 pantu fyonse ifi e fyo abena fyalo bafwaisha. Shinwe alishiba ukuti mulakabila ifi fyonse.+ 31 Lelo mulefwaya Ubufumu bwakwe, na fyonse ifi akamupeela.+

32 “Mwilatiina mwe mukuni unono,+ pantu Shinwe alafwaya ukumupeela Ubufumu.+ 33 Shitisheni ifyo mwakwata pa kuti mwafwe abalekabila ubwafwilisho.*+ Ipangileni ifikwama ifishingonaika, e kutila icuma ca ku muulu icishingapwa,+ uko umupuupu nangu umo tapalama kabili uko icipelebesha ca bushiku cishingonaula. 34 Pantu ukuli icuma cenu, e ko ne mitima yenu iba.

35 “Fwaleni kabili ipekanyeni,*+ lekeni ne nyali shenu shileaka,+ 36 kabili mube nga bantu abalelolela shikulwibo ukuti abwele+ ku bwinga,+ pa kuti ilyo abwela kabili akonkosha, bamwiswila ilyo line. 37 Ba nsansa abo abasha abo shikulu wabo pa kwisa akasanga balelola! Ndemweba icine cine nati, akaipekanya ukubabombela* kabili akabeba ukwikala pe tebulo, lyena akesa mupepi no kubapekanishisha ifya kulya. 38 Kabili nga aisa mu bulinde bwa bubili,* nangu mu bwa butatu,* e lyo asanga balelola, abo abasha bakaba ne nsansa! 39 Lelo ishibeni ukuti umwine wa ng’anda nga naishiba inshita umupuupu aleisa, kuti aba uwalola kabili te kuti aleke umupuupu aingila mu ng’anda yakwe.+ 40 Na imwe mube abaipekanya, pantu pa nshita mushile-enekela, e po Umwana wa muntu akeshila.”+

41 Lyena Petro amwipwishe ati: “Mwe Shikulu, bushe nifwe fye mule-eba ici cilangililo nelyo mule-eba abantu bonse?” 42 Na o Shikulu alandile ati: “Bushe nani kangalila* wa cishinka, uwashilimuka,* uo shikulu wakwe akapeela umulimo wa kulapeela ababomfi* bakwe ifya kulya pa nshita yalinga?+ 43 Akaba ne nsansa uyo musha nga ca kuti ilyo shikulu wakwe abwela amusanga alecita ifi fine! 44 Ndemweba icine cine nati, akamusonta ukula-angalila ifyuma fyakwe fyonse. 45 Lelo nga ca kuti uyu musha mu mutima wakwe alatila, ‘Shikulu akokola ukwisa,’ kabili atendeka ukupuma ababomfi abaume na babomfi abanakashi, alalya no kunwa no kukolwa,+ 46 shikulu wa uyu musha akesa pa bushiku ubo ashileenekela na pa nshita iyo ashishibe, akamukanda icine cine kabili akamubika pamo na bashaba na cishinka. 47 Lyena umusha uwaishibe bwino ifyo shikulu wakwe alefwaya, lelo uushaipekenye nelyo uushacitile ifyo bamwebele,* shikulu wakwe akamulopola ifikoti ifingi.+ 48 Nomba uushaishibe lelo uwacitile ifintu ifyo balingile ukumulopwelapo ifikoti, bakamulopola fye ifikoti ifinono. E ico umuntu onse uo bapeele ifingi, bakafwayako ifingi kuli ena, no muntu onse uo bapeele ukwangalila ifintu ifingi, bakafwayako ifingi nga nshi kuli ena.+

49 “Naishile mu kusonteka umulilo pano isonde, nomba cinshi cimbi ningafwaya nga ca kuti walyaka kale? 50 Cine cine, kuli ulubatisho ulo mfwile ukubatishiwako, kabili ninsakamikwa mpaka lukapite!+ 51 Bushe mutila naishile mu kuleta umutende pano isonde? Ndemweba nati, nshaishile mu kuleta umutende iyo, naishile mu kulenga abantu balepusana.+ 52 Pantu ukufuma pali ino nshita abantu mu mayanda bakalapusana. Nga ca kuti mu ng’anda muli abantu 5, batatu bakapusana na babili, e lyo babili nabo bakapusana na batatu. 53 Wishi akapusana no mwana umwaume, kabili umwana umwaume na o akapusana na wishi, nyina akapusana no mwana umwanakashi, no mwana umwanakashi na o akapusana na nyina, nafyala akapusana na nyinafyala, na nafyala na o akapusana na nyinafyala.”+

54 Lyena aebele amabumba ati: “llyo mwamona ikumbi lileima ku masamba, apo pene mulanda ati, ‘Imfula iikalamba yalaisa,’ kabili ifyo fine e fyo ciba. 55 Kabili ilyo mwamona umwela wa ku kapinda ka ku kulyo ulepuupa, mulanda amuti, ‘Kwalakaba sana,’ kabili ifyo fine e fyo ciba. 56 Mwe ba bumbimunda mwe, mwalishiba ukubebeta imimonekele ye sonde no muulu, lelo cinshi mushilukila umwalola ifilecitika pali ino nshita?+ 57 Cinshi mushisalilapo ukucita ifyalungama ifyo mufwile ukucita? 58 Ku ca kumwenako, ilyo uleya pamo no uulekupeela umulandu ku ntungulushi, umfwana nankwe ilyo mucili mu nshila, pa kuti mupwishe umulandu, e pa kuti e kutwala kuli kapingula, kapingula na o eyeba kapaso ukuti akusende, kapaso na o e kupoosa mu cifungo.+ 59 Ndekweba nati, tawakafumemo nakalya mpaka ukamubweseshe indalama shonse.”*

13 Pali ilya nshita abantu bamo baebele Yesu pa bena Galili abo Pilato asakeenye umulopa wabo no mulopa wa malambo ayo baletuula. 2 Na o abebele ati: “Bushe mulemona ukuti icalengele ifi ficitikile abena Galili balya ni co bali babembu nga nshi ukucila abena Galili bonse abashala? 3 Awe, lelo ndemweba nati na imwe bene nga tamulapiile, bonse mukonaulwa nga filya fine balya baonawilwe.+ 4 Nelyo bushe mulemona ukuti balya abantu 18 abo ulupungu lwawililepo mu Siloamu no kubepaya, balecita sana ifyabipa ukucila abantu bonse abashala abekala mu Yerusalemu? 5 Awe, lelo ndemweba nati; na imwe nga tamulapiile, bonse mukonaulwa nga filya fine balya baonawilwe.”

6 Lyena abebele ici icilangililo, atile: “Umuntu umo alibyele icimuti ca makunyu mwi bala lyakwe ilya myangashi, lelo ilyo aile mu kusabako ifisabo, tasangileko nangu cimo.+ 7 E lyo aebele uwalebomba mwi bala lya myangashi ati, ‘Imyaka nomba yaba itatu ukutula apo natendekela ukwisa mu kufwaya amakunyu kuli ici cimuti, lelo nshisangako nangu yamo. Citeme! Cinshi nalacisungila mwi bala icishitwala nangu cimo?’ 8 Umubomfi na o amwaswike ati, ‘Mwe Shikulu, cilekeni na uno mwaka, pa kuti ndimaulemo no kubikamo umufundo. 9 Nga ca kuti ku ntanshi cikatwala ifisabo, ninshi cikawama; lelo nga tacakatwale, mukaciteme.’”+

10 Nomba pe Sabata alesambilisha mwi sunagoge limo. 11 Kabili moneni! kwali umwanakashi uwali no mupashi uwakowela* uwamulwalike pa myaka 18. Uyu mwanakashi ali uwakongama kabili alefilwa no kololoka. 12 Ilyo Yesu amumwene, alimwitile e lyo amweba ati: “We mwanakashi, wapola ubulwele bobe.”+ 13 Lyena abikile iminwe yakwe pali ena, kabili apo pene fye alyololweke alacindika na Lesa. 14 Lelo umukalamba we sunagoge alikalipe pa mulandu wa kuti Yesu aundepe umuntu pe Sabata, kabili atendeke ukweba ibumba ati: “Twalikwata inshiku 6 isha kubombamo imilimo;+ e ico muleisa mu kundapwa muli ishi shine inshiku, te pa bushiku bwe Sabata.”+ 15 Lelo Shikulu amwebele ati: “Mwe ba bumbimunda mwe,+ bushe nani pali imwe uushikakula ing’ombe yakwe nelyo impunda yakwe no kuifumya mwi tanga pa bushiku bwe Sabata pa kuti aitwale mu kunwa amenshi?+ 16 Bushe uyu umwanakashi uwatuntuka muli Abrahamu uo Satana alwalika pa myaka 18, tacilingile ukuti imundape pa bushiku bwe Sabata?” 17 Ilyo alandile ifi fyonse, bonse abalemukaanya balyumfwile insoni, lelo ibumba lyonse lyatendeke ukusekelela pa fipesha amano fyonse ifyo acitile.+

18 E ico alandile ati: “Ubufumu bwa kwa Lesa bwapala cinshi, kabili kuti nabupashanya kuli cinshi? 19 Bwaba nga kaluseke akanono sana* ako umuntu abuulile no kukabyala mwi bala lyakwe, kabili ilyo kamenene kalikulile kaba icimuti, ne fyuni fya mu muulu fyatendeke ukupangako ifinsa ku misambo ya ciko.”+

20 Na kabili alandile ati: “Cinshi ningapashanyako Ubufumu bwa kwa Lesa? 21 Bwaba kwati citutumushi, ico umwanakashi abuulile e lyo akashila mu magaloni* yatatu aya buunga mpaka umufuba onse watutumuka.”+

22 Kabili ilyo Yesu aleya ku Yerusalemu, alepita mu misumba na mu mishi alesambilisha abantu. 23 Nomba umuntu umo amwipwishe ati: “Mwe Shikulu, bushe abakapusuka banono?” Na o abebele ati: 24 “Mulelwisha na maka pa kuti mupite pa mwinshi uunono,+ pantu ndemweba nati abengi bakafwaya ukwingila lelo bakafilwa. 25 Ilyo umwine wa ng’anda akema no kukoma iciibi, mukeminina panse no kulakonkonsha ku ciibi kabili mukalalanda amuti, ‘Shikulu, twiswileniko.’+ Na o akamwasuka ati: ‘Nshishibe uko mufumine.’ 26 Lyena mukatendeka ukulanda amuti, ‘Twaleliila pamo na imwe kabili twalenwena pamo na imwe, mwalesambilisha na mu misebo yesu iikalamba.’+ 27 Lelo akamweba ati, ‘Nshishibe uko mufumine. Fumeni apa, imwe bonse mwe bacita ifyabipa!’ 28 Kulya e ko mukalila no kusumanya ameno, ilyo mukamona Abrahamu, Isaki, Yakobo na bakasesema bonse mu Bufumu bwa kwa Lesa, lelo ninshi imwe nabamupoosa kunse.+ 29 Na kabili abantu bakafuma ku kabanga, ku masamba, ku kapinda ka ku kuso na ku kapinda ka ku kulyo, kabili bakekala no kuliila pe tebulo mu Bufumu bwa kwa Lesa. 30 Kabili moneni, bamo aba ntanshi bakaba aba kulekelesha, e lyo bamo aba kulekelesha e bakaba aba ntanshi.”+

31 Pali ilya yine nshita abaFarise balishile e lyo bamweba abati: “Fuma kuno kabiye, pantu Herode alefwaya ukukwipaya.” 32 Na o abebele ati: “Kebeni ilya incenjeshi* amuti, ‘Umfwa! Lelo na mailo nakulafumya ifibanda no kundapa abantu, kabili pa bushiku bwalenga shitatu e po nkapwisha umulimo wandi.’ 33 Nomba mfwile ukukonkanyapo ubulendo bwandi, ubushiku bwa lelo, ubwa mailo no bukakonkapo, pantu kasesema tabafwile ukumwipaila kunse ya Yerusalemu.+ 34 We Yerusalemu, we Yerusalemu, we wipaya bakasesema kabili we upoola abo bakutumina amabwe——+ pa miku iingi nalefwaya ukulonganika abana bobe, filya nankoko afukatila utwana twakwe mu mapindo yakwe, lelo imwe tamwalefwaya!+ 35 Moneni! Lesa akalekelesha ing’anda yenu.+ Ndemweba nati, ukufuma pali ino nshita tamwakamonepo na kabili, mpaka mukatile: ‘Alipaalwa uuleishila mwi shina lya kwa Yehova!’”*+

14 Pa bushiku na bumbi, Yesu aile mu kulya ifya kulya mu ng’anda ya ntungulushi imo iya baFarise pe Sabata, kabili abali mu ng’anda balemulolekesha. 2 Kabili moneni! kwali umwaume uwalwele ulusuku* uwali pa ntanshi yakwe. 3 E ico Yesu aipwishe abaishibe sana Amafunde na baFarise ati: “Bushe amafunde yalisuminisha ukundapa umuntu pe Sabata nelyo iyo?”+ 4 Lelo baikele fye tondolo. E ico aikete ulya mwaume, amundapa e lyo amuleka aya. 5 Lyena abepwishe ati: “Nani pali imwe uushingafumya umwana wakwe nga awila mu cishima+ nelyo uushingafumya ing’ombe yakwe nga yawila mu cishima pa bushiku bwe Sabata?”+ 6 Kabili balifililwe ukumwasuka icili conse.

7 Ilyo amwene ifyo abantu abo baitile ku mutebeto balesala apakwikala apacindamishe,+ abebele icilangililo. Abebele ati: 8 “Ilyo umuntu akwita ku mutebeto wa bwinga, wilaikala apacindamisha+ epali nabeta no muntu uwacindama ukukucila. 9 Lyena uumwitile bonse babili aisa e lyo akweba ati, ‘Fumapo uyu ekalepo.’ E lyo wayaikala apalekeleshako ukucindama ninshi uli ne nsoni. 10 Lelo ilyo bakwita, uleya mu kwikala apalekeleshako ukucindama, pa kuti uukwitile nga aisa, aisakweba ati, ‘Mune, kekale palya apacindeme ukucila apo wikele.’ Lyena ukacindama pa menso ya bantu bonse abo bakwitile nabo ku mutebeto.+ 11 Pantu onse uuicindamika bakamucefya, na onse uuicefya bakamucindamika.”+

12 Lyena Yesu aebele uwamwitile mu kulya ifya kulya ati: “Ilyo wapekanya ifya kulya fya kasuba nelyo umulaalilo, wilaita ifibusa fyobe nangu bamunonko nelyo balupwa nangu abena mupalamano abakankaala. Pantu aba nga e bo waita, nalimo nabo bakakwita kabili ico e cingaba icilambu cobe. 13 Lelo ilyo wapekanya umutebeto, uleita abapiina, abalemana, abalemana amolu, e lyo ne mpofu;+ 14 e lyo ukaba ne nsansa, pantu tabakwata ifya kukupeela. Lyena Lesa akakulambula ilyo akabuusha+ abalungama.”

15 Ilyo umo pa bo bamwitile nabo aumfwile ifi, amwebele ati: “Wa nsansa uukalya* mu Bufumu bwa kwa Lesa.”

16 Yesu na o amwebele ati: “Kwali umuntu umo uwapekenye umulaalilo uukalamba,+ kabili alitile abantu abengi. 17 Lyena atumine umusha wakwe pa nshita ya mulaalilo ukuti aye-eba abo aitile ku mulaalilo ati, ‘Iseni, pantu nomba nimpekanya fyonse.’ 18 Lelo bonse batendeke ukutelebwila.+ Uwa kubalilapo amwebele ati, ‘Ninshita impanga kabili mfwile ukuyaimona; napaapaata unjeleleko nshaise.’ 19 Umbi amwebele ati, ‘Ninshita ing’ombe ishili 10 kabili ndeya mu kushiceeceeta; napaapaata njelelako nshaise.’+ 20 Umbi na o alandile ati, ‘E lyo ngupile fye, kanshi te kuti njise.’ 21 E ico umusha alishile, aeba na shikulu wakwe ifyo abo aitile balandile. Lyena umwine wa ng’anda alikalipe e lyo aeba umusha wakwe ati, ‘Angufyanya kabiye mu misebo iikalamba na mu nshila sha mu musumba, uye usende abapiina, abalemana, impofu na balemana amolu.’ 22 Ilyo papitile nshita umusha aebele shikulu wakwe ati, ‘Mwe shikulu, nacita ifyo mwacinjeba, lelo mu ng’anda mucili incende.’ 23 E ico shikulu aebele umusha wakwe ati, ‘Kabiye ku bali mu misebo na mu tushila, kabili weshe ukubeba bonse ukuti bese pa kuti ing’anda yandi isule.+ 24 Pantu ndemweba nati, pa bantu bonse abo nacibalilapo ukwita tapali nangu umo uwalasondapo umulaalilo wandi.’”+

25 Nomba ilyo aleya amabumba ayakalamba yaleya nankwe. Lyena ilyo apilibwike abebele ati: 26 “Umuntu nga aisa kuli ine lelo tapata* wishi, nyina, umukashi, abana, bamunyina na bankashi yakwe nelyo fye umweo wakwe,+ te kuti abe umusambi wandi.+ 27 Onse uushisenda icimuti cakwe ica kucushiwilwapo* no kunkonka, te kuti abe umusambi wandi.+ 28 Ku ca kumwenako, nani pali imwe nga alefwaya ukukuula ulupungu uushingabala aikala panshi no kupenda ishingapooswapo, pa kuti amone nga nakwata isha kulupwishisha? 29 Pantu kuti apanga umufula wa luko lelo afilwa ukulupwisha, kabili abantu bonse abalemonako batendeka ukumuseka, 30 abati, ‘Uyu muntu alitendeke ukukuula lelo alifilwa ukupwisha.’ 31 Nelyo ni mfumu nshi iili mu kuya mu kulwa inkondo ne mfumu imbi, iishibala yaikala panshi no kulanshanya ne mpanda mano sha iko pa kuti imone nga kuti yaya na bashilika 10,000 ku kulwa ne mfumu iileisa na bashilika 20,000? 32 Na kuba, nga te kuti icite ifi, ninshi ilyo imfumu imbi icili ukutali, kuti yatuma inkombe isha kuyalomba ukuti pabe umutende pali ishi mfumu shibili. 33 Ifi fine e fyo caba, mufwile ukwishiba ukuti, takuli nangu umo pali imwe uushifwaya ukusha fyonse ifyo akwata uwingaba umusambi wandi.+

34 “Kwena umucele waliwama. Lelo umucele nga wafumuka, cinshi bengabikamo pa kuti ulowe na kabili?+ 35 Te kuti ulinge no ku-ubika mu mushili nangu mu mufundo. Abantu baupoosa fye. Uuli na matwi ya kumfwa, naomfwe.”+

15 Nomba bakasonkesha ba misonko bonse e lyo na babembu balelongana apo Yesu ali pa kuti bomfwe ifyo alelanda.+ 2 Kabili abaFarise na bakalemba baleilishanya abati: “Uyu muntu alapokelela ababembu kabili alalya nabo.” 3 Lyena abebele icilangililo ati: 4 “Nani pali imwe uwa kuti akwata impaanga 100, ilyo alufyapo imo, uushingasha impaanga 99 mu matololo no kuya mu kufwaya iilubile mpaka aisanga?+ 5 Kabili ilyo aisanga, aibika pa mabeya yakwe e lyo alasekelela. 6 Ilyo afika ku mwakwe, aita ifibusa fyakwe na bena mupalamano e lyo abeba ati, ‘Natusekelele pantu ninsanga impaanga yandi iyalubile.’+ 7 Ndemweba nati ifi fine e fyo ciba. Ku muulu balasekelela sana pa mubembu umo uwalapila+ ukucila ifyo basekelela pa balungama 99 abashikabila ukulapila.

8 “Nelyo mwanakashi nshi uwa kuti nakwata indalama sha drakima* 10, nga alufyapo imo, uushingasanika inyali no kupyanga mu ng’anda no kufwailisha bwino bwino mpaka aisanga? 9 Kabili ilyo aisanga, kuti aita abanankwe* na bena mupalamano, e lyo abeba ati, ‘Sekeleleni pamo na ine, pantu ninsanga indalama ya drakima* iyo nacilufya.’ 10 E ico ndemweba nati, ifi fine e fyo na bamalaika ba kwa Lesa basekelela ilyo umubembu umo alapila.”+

11 Lyena Yesu alandile ati: “Kwali umuntu umo uwakwete abana abaume babili. 12 Kabili umwaice pali bena aebele wishi ati, ‘Tata, mpeeleleni limo ifyuma ifyo nkapyana.’ E ico alibakeenye ifyuma fyakwe. 13 Pa numa ya nshiku ishinono, uyu umwaice alilonganike ifyuma fyakwe fyonse aima no bulendo bwa kuya ku calo ca kutali, kabili kulya kwine e ko aileonawila ifyuma fyakwe fyonse mu mikalile yabipa.* 14 Ilyo aonawile icuma cakwe conse, muli cilya icalo conse mwaponene icipowe icikalamba, e ico atampile ukucula. 15 Aileikuminisha fye na ku muntu umo uwa muli cilya calo, na o amwingishe ncito ya kulacema inkumba mu mabala yakwe.+ 16 Alekumbwa fye no kulyako ifya kulya ifyo inkumba shalelya, lelo takwali nangu umo uwamupeeleko ifya kulya.

17 “Ilyo amano yabwelele, alandile ati, ‘Tata alingisha abantu abengi incito abalya umukate uwingi, lelo ine kuno ndefwa ne nsala! 18 Nalaima ndeya kuli tata kabili ndeyamweba nati: “Tata, nalibembukila Lesa* kabili na imwe nalimubembukila. 19 Nshilingile no kuti mulenjita ukuti umwana wenu. Lekeni fye imbe nga umo pa babomfi benu.’” 20 E ico alimine aya na kuli wishi. Nomba ilyo acili ukutali, wishi alimumwene kabili apo alimumfwilile uluse, alimubutukiile amukumbatila* no kumukumbatila e lyo amutomona. 21 Lyena uyu mwana aebele wishi ati, ‘Tata, nalibembukila Lesa kabili na imwe nalimubembukila.+ Nshilingile no kuti mulenjita ukuti umwana wenu.’ 22 Lelo wishi aebele abasha bakwe ati, ‘Endesheni! leteni ica kufwala icisuma sana mumufwike, kabili mufwikeni inindaminwe ne ndyato. 23 Mulete no mwana wa ng’ombe uwaina, mwipaye tulye pa kuti tusefye, 24 pantu uyu mwana wandi alifwile nomba ali uwa mweo na kabili;+ alilubile nomba nalondoka.’ E ico batampile ukusangalala.

25 “Nomba umwana wakwe umukalamba ali mwi bala. Ilyo aishile alepalamina ku ng’anda, aumfwile abaleimba no kucinda. 26 E ico aitile umubomfi umo no kumwipusha ifyalecitika. 27 Umubomfi na o amwebele ati, ‘Munonko nabwela kabili bawiso nabepaya umwana wa ng’ombe uwaina, pantu munonko nabwela umutuntulu.’* 28 Awe alikalipe, akaana no kwingilamo. E ico wishi alifumine alamupaapaata. 29 Umwana aebele wishi ati, ‘Moneni nalimubombela pa myaka iingi kabili nshatala mpulapo mwi funde lyenu, lelo tamwatala amumpeelapo nangu kana ka mbushi pa kuti ningasekelela pamo na banandi. 30 Lelo ilyo uyu mwana wenu uwaonawile* ifyuma fyenu pamo na bacilende afika fye, mwamwipaila umwana wa ng’ombe uwaina.’ 31 Lyena wishi aebele umwana wakwe ati, ‘Mwana wandi, lyonse iwe waba pamo na ine, ne fintu fyandi fyonse fyobe. 32 Lelo kwena twacilinga fye ukusefya no kusekelela, pantu munonko alifwile, nomba ali no mweo na kabili, alilubile nomba nalondoka.’”

16 Lyena Yesu aebele abasambi bakwe na kabili ati: “Umuntu umo uwali umukankaala alikwete umubomfi umukalamba uwa pa ng’anda. Kabili uyu mubomfi balimusoseleele ukuti aleonaula ifyuma. 2 E ico alimwitile e lyo amweba ati, ‘Inga ifi ndeumfwa pali iwe? Lemba ifyo walebomfya ndalama shandi, pantu nomba nakutamfya incito.’ 3 E lyo uyu mubomfi atampile ukutontonkanya ati, ‘Ndecita shani, apo shikulu alempoka umulimo wa kuba umubomfi umukalamba uwa pa ng’anda? Nshakwata amaka ya kulima, kabili nalikwata insoni sha kulomba. 4 Eya! Naishiba ifyo nalacita, pa kuti nga bantamfya incito abantu bakampokelele mu mayanda yabo.’ 5 Kabili aitile bonse abakongwele kuli shikulu wakwe. Lyena aipwishe uwa kubalilapo ati, ‘Ni nkongole shinga wakwatila shikulu?’ 6 Amwaswike ati, ‘Imitondo iikalamba* iya mafuta ya muolife 100.’ Na o amwebele ati, ‘Senda apo mwalembele ifyo mwalanshenye kabili ulembepo ukuti wakongola imitondo iikalamba 50.’ 7 E lyo aipwishe umbi ati, ‘Inga iwe wakwata inkongole shinga?’ Na o amwaswike ati, ‘Amadalamu* ya ngano 100. Lyena amwebele ati, ‘Senda apo mwalembele ifyo mwapangene kabili ulembepo ukuti wakongola amadalamu 80.’ 8 Shikulu wa uyu mubomfi umukalamba alimutashishe nangu ca kuti taali uwalungama, pa mulandu wa kuti alicitile ica mano; pantu abantu ba muli cino calo* balikwata amano ukucila abana ba lubuuto.+

9 “Na kabili ndemweba nati: Ipangileni ifibusa ku fyuma fishalungama,+ pa kuti ilyo fyapwa, bakamupokelele mu fifulo fya kwikalamo umuyayaya.+ 10 Umuntu uwa cishinka mu finono sana wa cishinka na mu fingi, kabili uushalungama mu finono sana talungama na mu fingi. 11 E ico nga tamwaba aba cishinka pa fyuma ifishalungama, nani akamuseekesha ifyuma ifya cine cine? 12 Kabili nga ca kuti tamwaba aba cishinka pa fya bantu bambi, nani akamupeela ifyo mulingile ukupyana?+ 13 Takwaba umubomfi uwingabombela bashikulu babili, pantu kuti apatapo umo no kutemwa umbi, nelyo kuti aba uwa cishinka kuli umo no kusuula umbi. Te kuti mubombele Lesa uku ninshi mulebombela ne Fyuma.”+

14 Nomba abaFarise abatemenwe indalama baleumfwa fyonse ifi, kabili batendeke ukumushuluka.+ 15 E ico abebele ati: “Imwe mulaiwaminisha pa menso ya bantu kwati mwalilungama,+ lelo Lesa alishiba imitima yenu.+ Pantu ifyo abantu bamona ukuti fyalicindama Lesa ena afimona ukuti fya bunani.+

16 “Ifyalembwa mu mabuuku ya Mafunde na ya Bakasesema e fyo balebilisha mpaka lintu Yohane amoneke. Ukutula lilya imbila nsuma ya Bufumu bwa kwa Lesa e yo babila, kabili abantu bonse balelwisha na maka yonse pa kuti bengilemo.+ 17 Cine cine, ca-angukapo umuulu ne sonde ukupita, ukucila ukulufya akalitoni ka cilembo ica mu Mafunde ukwabula ukuti ifyalembwa muli aya Mafunde fifikilishiwe.+

18 “Onse uwaleka umukashi wakwe no kuupa umbi ninshi acita ubucende, kabili onse uwaupa umwanakashi uo baleka ku mulume wakwe ninshi acita ubucende.+

19 “Kwali umuntu umo umukankaala uwalefwala insalu ishakashikila ne nsalu ishisuma, kabili cila bushiku aleipakisha ifisuma. 20 E lyo kwali na kalombalomba umo uo baleita ukuti Lasaro uo baleteka pa mpongolo ya uyu umukankaala. Ali ne filonda umubili onse 21 kabili alekumbwa ukulyako ifyalepona kwi tebulo lya mukankaala. Nangu fye ni mbwa shaleisa mu kumyanga pa filonda fyakwe. 22 Nomba mu kupita kwa nshita, uyu kalombalomba alifwile kabili bamalaika balimusendele no kumutwala ukwali Abrahamu.*

“Uyu mukankaala na o alifwile kabili balimushiikile. 23 Kabili ilyo ali mu Nshiishi* ainwine amenso, ninshi alecula nga nshi, kabili amwene Abrahamu apatali ninshi na Lasaro ali mupepi nankwe.* 24 E ico abilikishe ati, ‘Mwe tata Abrahamu, ng’ufwileniko uluse kabili tumeni Lasaro aye atumpike impela ya munwe wakwe mu menshi e lyo ese antalalikeko ululimi, pantu ndecula sana muli uno mulilo uulebilima.’ 25 Lelo Abrahamu amwebele ati, ‘We mwana, ibukisha ukuti waleipakisha ifintu ifisuma ilyo wali umumi, lelo Lasaro ena talekwata ifintu ifisuma ifyo iwe walekwata. Nomba ena kuno alesansamuka, lelo iwe ulecula sana. 26 Na kuba, pa kati ka imwe na ifwe balibikapo umuyenge uukalamba, ica kuti abalefwaya ukwabukila kuli imwe te kuti babuke, kabili ababa uko nabo te kuti babukile kuno.’ 27 Lyena amwebele ati, ‘Kanshi nga ni fyo, ndemupaapaata mwe tata ukuti mutume Lasaro ku ng’anda ya kwa tata, 28 pantu nalikwata bamunyinane 5, ndefwaya aye abalondolwele bwino, pa kuti bena bekesa kuno mu kucula.’ 29 Lelo Abrahamu amwebele ati, ‘Balikwata amabuuku ya kwa Mose na ya Bakasesema; bafwile ukulakonka ifyalembwa muli aya mabuuku.’+ 30 Lyena aebele Abrahamu ati, ‘Awe mwe tata Abrahamu, nga ca kuti umuntu uwafuma ku bafwa e waya kuli bena bakalapila.’ 31 Abrahamu amwebele ati, ‘Nga tabomfwile ifyo Mose+ na Bakasesema balemba, ninshi no muntu uwabuuka ku bafwa te kuti bamumfwe.’”

17 Lyena Yesu aebele abasambi bakwe ati: “Kwena ifya kupunwisha abantu fikesa nangu cibe shani. Lelo ca bulanda ku bakalalenga abantu bakaleipununa! 2 Kuti cawama umuntu uukalapunwisha abantu bamukakila icilibwe icafina ica kupelelako no kumupoosa muli bemba ukucila apunwisha umo pali aba abacepesha.+ 3 E ico mulecenjela. Munonko nga akubembukila mukalipile,+ kabili nga alapila, umubelele uluse.+ 4 Nangu fye akubembukila imiku 7 mu bushiku bumo kabili aisa kuli iwe imiku 7, e lyo alekweba ati, ‘Nindapila,’ ufwile ukumubelela uluse.”+

5 Nomba abatumwa baebele Shikulu abati: “Tulundileniko icitetekelo.”+ 6 Lyena Shikulu abebele ati: “Amukwata icitetekelo icaba nga akaluseke akanono sana,* kuti mwaeba ici cimuti* amuti, ‘Nukuka uyeilimba muli bemba!’ na co kuti canukuka cayailimba na muli bemba.+

7 “Nani pali imwe uwa kuti alikwata umusha uulelima nelyo uulecema impaanga, lyena lilya abwela ku mabala, amweba ati, ‘Isa kuno ili line, ikala ulye ifya kulya’? 8 Lelo bushe te kuti amwebe ati, ‘Mpekanishisha umulaalilo, kabili fwala insalu ya kufwala pa kupekanya ifya kulya e lyo ulendetela ifyo ndefwaya mpaka mpwishe ukulya no kunwa, pa numa e lyo na iwe ulye no kunwa’? 9 Bushe akatasha umusha pa kucita ifyo acimweba? 10 Ifi fine e fyo caba, na imwe nga mwacita fyonse ifyo bacimweba ukucita, mulelanda amuti, ‘Ifwe tuli basha fye. Ifyo twacita, e fyo twacilinga fye ukucita.’”+

11 Ilyo aleya ku Yerusalemu, apitile pa kati ka Samaria na Galili. 12 Kabili ilyo aleingila mu mushi umo, abantu 10 abalwele ifibashi balishile mu kumukumanya, lelo baiminine akatalamukila.+ 13 Kabili babilikishe abati: “Mwe Yesu, mwe Kasambilisha, tumfwileniko uluse!” 14 Ilyo abamwene fye, abebele ati: “Kabiyeni kuli bashimapepo pa kuti baye bamumone.”+ Lyena ilyo baleya, balipolele.+ 15 Umo pali bena ilyo amwene ukuti alipolele, alibwelulwike, ninshi alecindika Lesa mwi shiwi ilikalamba. 16 Lyena afukamine Yesu alamutootela. Na kuba ulya muntu ali mwina Samaria.+ 17 Yesu na o amwipwishe ati: “Bushe te bantu 10 abapolele? Inga abashala 9 bali kwi? 18 Bushe pa bapolele tapali bambi ababwelulwike no kucindika Lesa? Ni uyu wine fye uwa ku calo cimbi e ubwelele?” 19 Lyena amwebele ati: “Ima kabiye; icitetekelo cobe nacikuposha.”+

20 Ilyo abaFarise bamwipwishe ilyo Ubufumu bwa kwa Lesa bwali no kwisa,+ abaswike ati: “Ubufumu bwa kwa Lesa tabwakese mu musango wa kuti bonse bakabumone; 21 na bantu tabakatile, ‘Moneni, buli kuno!’ nelyo abati, ‘Buli kulya!’ Pantu, moneni! Ubufumu bwa kwa Lesa muli nabo.”*+

22 Lyena aebele abasambi bakwe ati: “Inshiku shileisa ilyo mukafwaya ukumona ubushiku bumo ubwa Mwana wa muntu lelo tamwakabumone. 23 Kabili abantu bakamweba abati, ‘Moneni ali kulya!’ nelyo, ‘Moneni ali kuno! Lelo mwikesha ukuyako nangu ukubakonka.+ 24 Pantu filya fine inkuba ibyashisha ukufuma ku lubali lumo ulwa muulu ukufika ku lubali lumbi, e fyo cikaba na pa bushiku Umwana wa muntu+ akabapo.*+ 25 Lelo akabala akacule nga nshi kabili abantu ba muli ino nkulo bakamukaana.+ 26 Kabili filya fine cali mu nshiku sha kwa Noa,+ e fyo cikaba na mu nshiku sha Mwana wa muntu:+ 27 balelya, balenwa, abaume baleupa na banakashi baleupwa, mpaka no bushiku Noa aingile mu cibwato,+ kabili Ilyeshi lyalishile no kubonaula bonse.+ 28 Na kabili cikaba nga filya fine cali mu nshiku sha kwa Lote:+ balelya, balenwa, baleshita, baleshitisha, balebyala kabili balekuula. 29 Lelo pa bushiku ubo Lote afumine mu Sodomu, umulilo na mabwe ya mulilo fyalilokele ukufuma mu muulu kabili fyalyonawile abantu bonse.+ 30 Ifi fine e fyo cikaba pali bulya bushiku ilyo Umwana wa muntu akasokololwa.+

31 “Muli bulya bushiku umuntu uukaba pa mutenge ekekila pa kuti akayesenda ifipe fyakwe ifili mu ng’anda. Kabili umuntu uukaba mwi bala na o ekabwelela mu kusenda ifyo ashile ku numa. 32 Ibukisheni muka Lote.+ 33 Onse uwafwaya ukucingilila ubumi* bwakwe akabulofya, lelo onse uwalofya ubumi bwakwe akabusanga.+ 34 Ndemweba nati, muli bulya bushiku abantu babili bakaba pa busanshi bumo; umo bakamusenda, lelo umbi bakamusha.+ 35 Kukaba abanakashi babili abakalapela apa kupelela pamo pene; umo bakamusenda lelo umbi bakamusha.” 36* —— 37 E ico bamwipwishe abati: “Ni kwi, mwe Shikulu?” Na o abaswike ati: “Ukuli icitumbi, e ko na bakapumpe* balongana.”+

18 Lyena abebele icilangililo icalelangilila ukuti balingile ukulapepa lyonse kabili tabalingile ukunenuka.+ 2 Abebele ati: “Mu musumba umo mwali kapingula umo uushaletiina Lesa kabili uushacindike umuntu nangu umo. 3 Muli ulya wine musumba mwali na mukamfwilwa uwaleya kuli ena lyonse mu kumweba ati, ‘Mwikaleka bakamfyenge ku uo nkalalubulula nankwe umulandu.’ 4 Palipitile inshita, lelo kapingula talefwaya ukumwafwa. Nomba pa numa atontonkenye ati, ‘Nangu ca kuti nshitiina Lesa kabili nshacindika umuntu nangu umo, 5 pa mulandu wa kuti uyu mukamfwilwa alesa mu kumpamfya lyonse, nshakaleke bakamufyenge pa kuti akaleke ukwisa mu kuncusha.’”*+ 6 Lyena Shikulu alandile ati: “Mwaumfwa ifyo kapingula alandile nangu ca kuti tali uwalungama! 7 Bushe mulemona ukuti Lesa na o takalenge abasalwa bakwe abalilila kuli ena akasuba no bushiku+ bekafyengwa? Pantu na kuba alabatekanishisha.+ 8 Ndemweba nati, akalenga bakapingulwe no mulinganya bwangu bwangu. Lelo bushe ilyo Umwana wa muntu akesa, akasanga icitetekelo ca musango uyu* pano isonde?”

9 Kabili abantu bamo abaicetekele ukuti bali abalungama kabili abalemona abantu bambi abashala kwati tapali ifyo bali, abebele icilangililo ca kuti: 10 “Abantu babili baile mwi tempele mu kupepa, umo ali muFarise e lyo umbi ali ni kasonkesha wa misonko. 11 UmuFarise aliminine alapepa mu mutima ati, ‘Mwe Lesa, ndemutootela pantu nshaba nga bantu bambi abashala, abapuupu, abashalungama, abacende, nangu nga uyu kasonkesha wa misonko. 12 Ndafunga imiku ibili mu mulungu, kabili ndapeela ica pe kumi pali fyonse ifyo nanonka.’+ 13 Lelo kasonkesha wa misonko aiminine akatalamukila, talefwaya no kulolesha mu muulu, aleyumaula fye pa cifuba kabili alelanda ati: ‘Mwe Lesa, mbeleleni uluse ne mubembu.’+ 14 Ndemweba nati, uyu kasonkesha wa misonko aile ku ng’anda ninshi mulungami ukucila ulya umuFarise.+ Pantu onse uuicindamika bakamucefya, lelo onse uuicefya bakamucindamika.”+

15 Nomba abantu batendeke no kumuletela abana abanono* ukuti abekate. Lelo ilyo abasambi bamwene ifi, batendeke ukubakalipila.+ 16 Lelo Yesu aitile abana abanono e lyo alanda ati: “Balekeni abana abanono mwilabalesha ukwisa kuli ine, pantu Ubufumu bwa kwa Lesa bwa bantu ababa kwati ni aba abana.+ 17 Ndemweba icine cine nati, Onse uushipokelela Ubufumu bwa kwa Lesa nga filya umwana umunono apokelela ifintu, takengilemo nakalya.”+

18 Kabili intungulushi imo yamwipwishe aiti: “Mwe Kasambilisha musuma, cinshi mfwile ukucita pa kuti nkakwate umweo wa muyayaya?”+ 19 Yesu na o amwebele ati: “Mulandu nshi wanjitila ukuti umusuma? Takwaba umusuma nangu umo, kano fye Lesa eka.+ 20 Walishiba ifyo amafunde yalanda, yalanda ukuti: ‘mwilaipaya,+ mwilacita ubucende,+ mwilaiba,+ mwilaba bakambone ba bufi,+ mwilacenjesha abanenu, mulecindika bashinwe na banyinenwe.’”+ 21 Lyena amwebele ati: “Ndakonka aya mafunde yonse ukufuma fye ku bwaice.” 22 Ilyo Yesu aumfwile ifi, amwebele ati, “Kuli icintu na cimbi ico ufwile ukucita: Kabiye kashitishe fyonse ifyo wakwata upeele na bapiina indalama. Nga wacita ifi ukakwata ifyuma mu muulu; e lyo wise ulenkonka.”+ 23 Ilyo aumfwile aya mashiwi, alyumfwile ubulanda nga nshi, pantu alikwete ifyuma ifingi.+

24 Ilyo Yesu amuloleshe, alandile ati: “Ala cikakosela abakwata indalama ukwingila mu Bufumu bwa kwa Lesa!+ 25 Ca-angukilapo ingamila ukupula mu linso lya nshindano ukucila uwa fyuma ukwingila mu Bufumu bwa kwa Lesa.”+ 26 Abaumfwile ifyo alandile balandile abati: “Ninshi nani engapusuka?”+ 27 Na o atile: “Ifyo abantu bengafilwa ukucita, Lesa ena kuti aficita.”+ 28 Lelo Petro atile: “Moneni! Twalisha fyonse pa kuti tulemukonka.”+ 29 E lyo Yesu abebele ati: “Ndemweba icine cine nati, takwaba uwasha ing’anda nangu umukashi nelyo bamunyina nangu abafyashi nelyo abana pa mulandu wa Bufumu bwa kwa Lesa+ 30 uushakapokelele ifingi nga nshi pali ino nshita, kabili ku ntanshi* akapokelela umweo wa muyayaya.”+

31 Lyena asendele abatumwa bakwe 12 pa mbali e lyo abeba ati: “Moneni! Tuleya ku Yerusalemu, kabili fyonse ifyalembwa ifyo bakasesema basobele pa Mwana wa muntu fikafikilishiwa.+ 32 Pantu bali no kumupeela ku bena fyalo,+ bakamupumya,+ bakamusaalula kabili bakamufwishila amate.+ 33 Kabili pa numa ya kumufopaula, bakamwipaya,+ lelo pa numa ya nshiku shitatu akabuushiwa.”+ 34 Lelo tabailwike umo ifi fyonse fyalolele, pantu aya mashiwi yali ni nkaama pa kuti beishiba umo yalolele, kabili tabaishibe ne fyo alelandapo.

35 Nomba ilyo Yesu alepalamina ku Yeriko, kwali impofu imo iyaikele mu mbali ya musebo ilelomba.+ 36 Apo yalyumfwile ukuti kwali ibumba ilyalepita, yaipwishe abantu icalecitika. 37 Abo yaipwishe bayaswike abati: “Yesu umwina Nasarete alepita!” 38 E lyo yabilikishe aiti: “Mwe Yesu, Umwana wa kwa Davidi, ng’umfwileniko uluse!” 39 Kabili abatangile batendeke ukuikalipila, baleyeba ukuti ikale tondolo, lelo e lyo yacililemo ukubilikisha aiti: “We mwana wa kwa Davidi, ng’umfwilako uluse!” 40 Lyena Yesu aliminine e lyo aeba abantu ukuti bailete kuli ena. Ilyo yapaleme, Yesu ayipwishe ati: 41 “Cinshi ulefwaya nkucitile?” Na yo ya-aswike aiti: “Mwe Shikulu, lekeni ntendeke ukumona na kabili.” 42 E ico Yesu ayebele ati: “Tampa ukumona na kabili; icitetekelo cobe cakuposha.”+ 43 Kabili ilyo line yalitendeke ukumona na kabili, yatendeke no kumukonka,+ ninshi ilecindika Lesa. Kabili ilyo abantu bamwene ifi, bonse balumbenye Lesa.+

19 Lyena aingile mu musumba wa Yeriko, kabili alitwalilile ubulendo bwakwe. 2 Nomba muli uyu musumba mwali umwaume uo baleita ukuti Sakeo. Ali mukalamba wa bakasonkesha ba misonko, kabili ali mukankaala. 3 Alefwaisha ukumona Yesu, lelo alifililwe ukumumona pa mulandu we bumba, pantu ali umwipi. 4 E ico abutukiile ku ntanshi no kunina ku mukunyu pa kuti amumone, pantu ali no kupita muli ilya yine inshila. 5 Nomba ilyo Yesu afikile apali Sakeo, aloleshe ku cimuti e lyo amweba ati: “Sakeo, ikila bwangu bwangu, pantu lelo ndeikala ku ng’anda ku mobe.” 6 Ilyo line fye alikiile kabili alimupokelele ne nsansa ku mwakwe. 7 Ilyo bamwene ifi, bonse bali-ilishenye. Baleti: “Ele mu kwikala ku muntu umubembu.”+ 8 Lelo Sakeo aliminine e lyo aeba Shikulu ati: “Umfweni mwe Shikulu! Hafu ya fyo nakwata ndepeela abapiina, na conse ico napokele umuntu uuli onse mu bucenjeshi* ndemubwesesha imiku 4.”+ 9 E ico Yesu amwebele ati: “Ubushiku bwa lelo ipusukilo naliisa muli ino ng’anda, pantu na iwe wine uli mwana wa kwa Abrahamu. 10 Pantu Umwana wa muntu aishile mu kufwaya abaluba na mu kubapususha.”+

11 Ilyo bacili baleumfwa ifyo alelanda, abebele icilangililo na cimbi pantu alipaleme ku Yerusalemu, kabili balemona kwati Ubufumu bwa kwa Lesa bwali no kumoneka lilya line.+ 12 E ico abebele ati: “Umuntu umo uwa ku bufumu ali no kuya ku calo ca kutali+ pa kuti aye abe imfumu, e lyo akabwele. 13 E ico aitile abasha bakwe 10, abakanya amamaina* 10, e lyo abeba ati, ‘Mukacite amakwebo muli aya amamaina mpaka nkabwele.’+ 14 Lelo abekashi ba mu calo cakwe balimupatile, e ico batumine inkombe ukuti shimukonke no kuyalanda ati, ‘Tatulefwaya uyu muntu akabe imfumu yesu.’

15 “Pa numa ya kuba imfumu, alibwelele kabili aitile abasha abo apeele indalama* pa kuti eshibe isho basangiilepo ilyo balecita amakwebo.+ 16 E ico uwa kubalilapo alishile e lyo alanda ati, ‘Mwe Shikulu, pali maina yenu imo nalisangilapo amamaina 10.’+ 17 Na o amwebele ati, ‘Mwabombeni, we musha musuma! Apo naulanga ukuti uli wa cishinka mu tunono sana, wakula-angalila imisumba 10.’+ 18 No walenga bubili alishile kabili atile, ‘Mwe Shikulu, pali maina yenu imo nalisangilapo amamaina 5.’+ 19 Uyu na o amwebele ati, ‘Na iwe wakula-angilila imisumba 5.’ 20 Lelo umbi alishile e lyo alanda ati, ‘Mwe Shikulu, maina yenu iyi, nali-ifishile mu nsalu. 21 Mukwai nalemutiina, pantu muli bakali; musenda indalama isho mushasungiishe kabili musombola ne fyo mushatandile.’+ 22 Na o amwebele ati, ‘Ndekupingwila ku fyo walanda we mwine, uli musha umubi. Watila ndi mukali, nsenda indalama isho nshasungiishe kabili nsombola ne fyo nshatandile.+ 23 Nomba cinshi ushabikiile indalama* shandi ku banki? Pa kuti ilyo naisa, naisashipoka pamo na nsonsela.’

24 “E ico aebele abaiminine mupepi ati, ‘Mupokeni maina mupeele uukwete amamaina 10.’+ 25 Lelo bamwebele abati, ‘Mwe Shikulu, uyu nakwata amamaina 10!’— 26 ‘Ndemweba nati, onse uwakwata bakamupeelelapo na fimbi, lelo uushakwata bakamupoka no tunono uto akwata.+ 27 Kabili abalwani bandi abashalefwaya ukuti ine mbe imfumu yabo, baleteni kuno kabili mubepaile pa menso yandi.’”

28 Ilyo apwile ukulanda ifi fintu, alikonkenyepo ubulendo bwakwe ubwa kuya ku Yerusalemu. 29 Kabili ilyo afikile pa lupili beta ukuti Ulupili lwa Miolife+ mupepi na Betifage na Betani, atumine abasambi bakwe babili,+ 30 abebele ati: “Kabiyeni muli ulya mushi uli pa ntanshi, kabili ilyo mwalaingila fye, mwalasanga umwana wa mpunda nabamukaka, uo umuntu nangu umo ashatala aninapo. Mumukakule e lyo mumulete. 31 Lelo nga kwaba uwamwipushapo ati, ‘Cinshi mulemukakwila?’ mumwebe amuti, ‘Ni co Shikulu alemufwaya.’” 32 E ico abo atumine baliile, kabili filya fine fye abebele e fyo basangile.+ 33 Lelo ilyo balekakula umwana wa mpunda, umwine abepwishe ati: “Cinshi mulekakwila umwana wa mpunda?” 34 Nabo batile: “Ni co Shikulu alemufwaya.” 35 E ico baleteele Yesu umwana wa mpunda, bapoosapo ifya kufwala fyabo ifya kunse e lyo baeba Yesu ukuti ekalepo.+

36 Ilyo aleya, baleya baleanshika ifya kufwala fyabo ifya kunse mu musebo.+ 37 Cilya apalama fye ku musebo uwatentemuka ukufuma pa Lupili lwa Miolife, cinkupiti wa basambi bonse batendeke ukusekelela no kulumbanya Lesa mu mashiwi ayakalamba pa fipesha amano fyonse ifyo bamwene. 38 Baleti: “Yalipaalwa Imfumu iileishila mwi shina lya kwa Yehova!* Mu muulu mube umutende no bukata!”+ 39 Lelo abaFarise bamo abali mwi bumba bamwebele abati: “Mwe Kasambilisha, kalipileni abasambi benu.”+ 40 Nomba abaswike ati: “Ndemweba nati, aba nga batalala, amabwe kuti yabilikisha.”

41 Ilyo apaleme, amwene umusumba kabili aliuliliile ubulanda,+ 42 ati: “Iye, muli buno bushiku awishiba ifileta umutende—lelo ifi fintu te kuti ufimone.+ 43 Pantu inshiku shikesa ilyo abalwani bobe bakakuula ilinga lya fimuti ifyasongoka ukukushingulusha, bakakushinguluka kabili bakakushinga* konse konse.+ 44 Iwe na bana bobe bakamufuntula panshi+ kabili muli iwe tamwakashale ilibwe ilikaba pa libiye,+ pantu tawailwike inshita ilyo bakupempwile.”

45 Lyena aingile mwi tempele atampa no kutamfyamo abaleshitishishamo ifintu,+ 46 abebele ati: “Amalembo yatila, ‘Ing’anda yandi bakaita ati ing’anda ya kupepelamo,’+ lelo imwe mwali-isangula ulucengo lwa fipondo.”+

47 Alitwalilile ukusambilisha mwi tempele cila bushiku. Lelo intungulushi sha bashimapepo, bakalemba na bakalamba ba bantu balefwaya ukumwipaya;+ 48 lelo balifililwe ukusanga inshila ya kumwipailamo, pantu lyonse abantu balemushinguluka pa kuti baleumfwa ifyo alelanda.+

20 Bushiku bumo ilyo alesambilisha abantu mwi tempele no kubila imbila nsuma, intungulushi sha bashimapepo, bakalemba pamo na bakalamba balishile, 2 kabili bamwipwishe abati: “Twebe, maka nshi ubomfya pa kucita ifi fintu? Nelyo nani akupeele ayo amaka?”+ 3 Na o abebele ati: “Na ine nalamwipushako icipusho cimo, munjasuke: 4 Bushe Yohane afumishe kwi amaka ya kubatisha, ni ku muulu nelyo ni ku bantu?” 5 Lyena batendeke ukulanshanya abene beka abati: “Nga twatila, ‘Ni ku muulu,’ alatweba ati, ‘Nomba cinshi mushamusuminine?’ 6 Lelo nga twatila, ‘Ni ku bantu,’ abantu bonse baletupoola amabwe, pantu balishininkisha ukuti Yohane ali ni kasesema.”+ 7 E ico bamwaswike abati tabaishibe uko afumishe. 8 Yesu na o abebele ati: “Na ine nshamwebe amaka momfya pa kucita ifi fintu.”

9 Lyena atendeke ukweba abantu ici cilangililo, atile: “Umuntu alilimine ibala lya myangashi+ e lyo aliseekesha ku balimi, aya na ku calo cimbi pa nshita iitali.+ 10 Ilyo inshita ya kusombola ifisabo yafikile, atumine umusha ku balimi pa kuti bayebamupeeleko ifisabo fya mwi bala lya myangashi. Lelo aba balimi bamulekele aya minwe nkutwa pa numa ya kumupuma.+ 11 Nomba atumine umusha na umbi ku balimi. Na o balimumine, balimusaalwile kabili bamulekele abwelelamo minwe nkutwa. 12 Atumine no walenga butatu; uyu na o balimucenene kabili balimutamfishe. 13 E ico umwine we bala lya myangashi atile, ‘Nalacita shani? Nalatumako umwana wandi umwaume uo natemwa sana.+ Uyu ena bafwile bakamucindika.’ 14 Ilyo abalimi bamumwene fye, balanshenye abati, ‘Uyu e mpyani; natumwipaye, pa kuti ibala likashale lyaba lyesu.’ 15 E ico balimusendele, bamufumisha na kunse ye bala lya myangashi bamwipaya no kumwipaya.+ Bushe mulemona ukuti cinshi umwine we bala lya myangashi akesacita abalimi? 16 Akesabepaya akapeele ne bala lya myangashi kuli bambi.”

Ilyo baumfwile ifi, batile: “Ico cena te kuti ciwame cacitika!” 17 Lelo alibalolekeshe e lyo abepusha ati: “Nomba bushe ili ilembo lyalola mwi ilitila, ‘Ilibwe ilyo bakakuula bakeene, e lyaishileba pa muulu pa koona’?*+ 18 Onse uukaponena pali ili libwe, akafungaika.+ Na onse uo likaponena, likamushonaula.”

19 Ilyo bakalemba ne ntungulushi sha bashimapepo bailwike ukuti e bo alelandapo muli ici cilangililo, balefwaya ukumwikata pali ilya ine nshita, lelo baletiina abantu.+ 20 Kabili balemulolekesha. Lyena batumine abaume abo balipiile mu bumfisolo ukuti baifungushanye kwati bantu abalungama, pa kuti bamwikatile mu milandile yakwe+ e lyo bamutwale ku buteko na ku mulashi. 21 Kabili bamwipwishe abati: “Mwe Kasambilisha, twalishiba ukuti ifyo mulanda ne fyo musambilisha fya cine, kabili tamwaba na kapaatulula, lelo musambilisha inshila ya kwa Lesa mu cine: 22 Bushe amafunde yalisuminisha ukuti tulesonka umusonko kuli Kaisare nelyo iyo?” 23 Lelo alishibe ubucenjeshi bwabo kabili abebele ati: 24 “Nangeni denari.* Bushe uyu mutwe uuli apa ne fi balembapo fya kwa nani?” Nabo batile: “Fya kwa Kaisare.” 25 E lyo abebele ati: “E ico kanshi ifya kwa Kaisare mulepeela Kaisare,+ e lyo ifya kwa Lesa mulepeela Lesa.”+ 26 Lyena balifililwe ukumwikatila mu mashiwi alandile pa menso ya bantu, lelo balipapile pa fyo abaswike, ica kuti baikele fye tondolo.

27 Lelo abaSaduke bamo abalanda ukuti abafwa tabakabuushiwe,+ balishile e lyo bamwipusha abati:+ 28 “Mwe Kasambilisha, Mose atulembeele ati, ‘Umuntu nga afwa asha umukashi ukwabula ukufyalamo umwana, munyina afwile ukuupa umukashi wakwe pa kuti engamufyalila abana.’+ 29 Nomba kwali aba bwananyina 7; uwa kubalilapo alyupile, lelo alifwile ukwabula ukukwatapo umwana. 30 E ico uwalenga bubili, 31 no walenga butatu nabo balimuupilepo. Ifi fine e fyo cali kuli bonse 7; bapwile fye ukufwa ukwabula ukufyalamo umwana. 32 Na mukulekelesha uyu mwanakashi na o alifwile. 33 E ico ilyo abafwa bakabuushiwa, bushe akaba mukashi wa kwa nani? Pantu bonse 7 balimuupilepo.”

34 Yesu abebele ati: “Abantu ba muli cino calo* baloopa no kuupwa, 35 lelo abalinga ukubako ilyo ilya nshita ikesa kabili abakabuushiwa ku bafwa bena tabakaleupa nangu ukuupwa.+ 36 Na kuba, te kuti bafwe na kabili, pantu bakaba nga bamalaika, kabili bakaba abana ba kwa Lesa ilyo bakabuushiwa. 37 Nangu fye ni Mose alilandilepo pa kubuushiwa kwa bafwa, mu lyashi ililanda pa cimpusa ca myunga, ilyo aitile Yehova* ati ‘Lesa wa kwa Abrahamu, Lesa wa kwa Isaki, kabili Lesa wa kwa Yakobo.’+ 38 Te Lesa wa bafwa iyo, lelo wa ba mweo, pantu ena bonse abamona fye ukuti ba mweo.”+ 39 E lyo bakalemba bamo bamwebele abati: “Mwe Kasambilisha, mwalanda bwino.” 40 Pantu tabakwete amaka ya kumwipusha icipusho nangu cimo.

41 Na o abepwishe ati: “Cinshi abantu balandila ati Kristu mwana wa kwa Davidi?+ 42 Apo Davidi umwine mwi buuku lya Amalumbo alanda ati, ‘Yehova* aebele Shikulu ati: “Ikala ku kuboko kwandi ukwa ku kulyo 43 mpaka nkalenge abalwani bobe bakabe nga kapuna ka kunyantapo amakasa yobe.”’+ 44 E ico, Davidi umwine amwita ati, Shikulu; nomba kuti aba shani umwana wakwe?”

45 Ilyo abantu bonse bacili baleumfwa ifyo alelanda, aebele abasambi bakwe ati: 46 “Mulecenjela na bakalemba abatemwa ukwendauka ninshi nabafwala ifya kufwala fya mucinshi, abatemwa ifyo abantu babaposha pa maliketi kabili abatemwa ukwikala pa fipuna fya ku ntanshi* mu masunagoge, na pa fya kwikalapo ifyacindamisha ilyo balelya umulaalilo.+ 47 Na kabili balapoka bamukamfwilwa ifyo bakwata* kabili bapepa amapepo ayatali sana pa kuti abantu babamone.* Aba e bo bakakanda sana.”

21 Nomba ilyo ainwine amenso, amwene abakankaala balebika ifya bupe fyabo mu cipao.+ 2 Lyena amwene mukamfwilwa umo umupiina nga nshi abikamo utundalama tubili utunono sana,*+ 3 kabili alandile ati: “Ndemweba icine cine nati, uyu mukamfwilwa umupiina, nabikamo indalama ishingi ukucila isho bonse babikilemo.+ 4 Pantu bonse ababikilemo ifya bupe, babikilemo ifipulile pa fyo bakwata, lelo ena abikilemo shonse isho acikwata isha kulilamo.”+

5 Pa numa, ilyo abantu balelanda pe tempele, ifyo baliyemfeshe na mabwe ayasuma na ku fintu ifisuma ifyo bapeele Lesa,+ 6 alandile ati: “Ifi fintu ifyo mulemona pali ino nshita, inshiku shileisa ilyo apa tapakabe ilibwe nangu limo ilikashala pa muulu wa linankwe ilyo bashakapoose panshi.”+ 7 Lyena bamwipwishe abati: “Mwe Kasambilisha, ni lilali ifi fintu fikacitika, kabili cinshi tukeshibilako ukuti ifi fintu fili mu kucitika?”+ 8 Na o alandile ati: “Mulecenjela pa kuti bekamulufya,+ pantu abengi bakeshila mwi shina lyandi abati, ‘Nine wine,’ kabili bakalati, ‘Inshita naipalama.’ Lelo mwikabakonka.+ 9 Na kabili ilyo mukomfwa inkondo ne fimfulunganya, mwikatiina. Pantu ifi fintu fifwile ukucitika, lelo impela tayakese ilyo line.”+

10 Lyena abebele ati: “Uluko lukemina uluko lumbi,+ no bufumu bukemina ubufumu bumbi.+ 11 Kukaba ifinkukuma ifikalamba, na mu ncende ishapusanapusana mukaba ifipowe ne fikuko;+ kabili abantu bakamona ifya kutiinya, na mu muulu mukaba ifishibilo ifikalamba.

12 “Lelo ilyo ifi fyonse tafilacitika, abantu bakamwikata no kumucusha,+ kabili bakamutwala ku masunagoge na ku fifungo. Bakamutwala na ku shamfumu na ku balashi pa mulandu we shina lyandi.+ 13 Ifi fikalenga mukabashimikile. 14 E ico mwikesha ukutontonkanishisha libela ifya kulanda pa kuipokolola,+ 15 pantu nkamweba amashiwi ya kulanda kabili nkamupeela amano, ayo abakalamulwisha bonse pamo bakafilwa ukukaanya nelyo ukucincintila.+ 16 Nangu fye bafyashi benu, bamunyinenwe, balupwa lwenu ne fibusa, bakalamutwala ku filye fya milandu* kabili bamo pali imwe bakabepaya,+ 17 kabili abantu bonse bakamupata pa mulandu we shina lyandi.+ 18 Lelo nangu fye ni pa mushishi wa ku mitwe yenu tapakalobe nangu umo.+ 19 Nga mwashipikisha mukatwalilila ukuba abomi.*+

20 “Nomba ilyo mukamona abashilika bashinguluka umusumba wa Yerusalemu,+ mukeshibe ukuti uli mupepi no konaulwa.+ 21 Lyena abakaba mu Yudea bakatendeke ukufulumukila ku mpili,+ na bakaba mu kati ka uyu musumba, bakafumemo, kabili abakaba mu mishi iyaba mupepi no yu musumba bekengila mu musumba, 22 pantu isho inshiku shikaba ni nshiku isho Lesa akakandamo abantu,* pa kuti fyonse ifyalembwa fingafikilishiwa. 23 Cikabipila sana abakaba pa bukulu na bakalaonsha muli isho nshiku!+ Pantu mu calo mukaba ubucushi ubukalamba kabili Lesa akakanda abantu. 24 Na kabili bakabepaila ku lupanga kabili bakabasenda bunkole mu nko shonse;+ na bena fyalo bakanyantaula Yerusalemu, mpaka inshita ya bena fyalo ikapwe.+

25 “Kabili pa kasuba, pa mweshi na pa ntanda,+ pakaba ifishibilo na bantu ba mu nko sha pano isonde bakaba no mwenso nga nshi. Tabakeshibe ifya kucita pa mulandu wa kululuma kwa bemba no kusunkaana kwa mabimbi. 26 Abantu bakalafwa umutombo pa mulandu wa mwenso na pa mulandu wa kwenekela ifikacitikila aba pe sonde, pantu ifya maka ifya mu muulu fikatenkana. 27 Lyena bakamona Umwana wa muntu+ aleisa mwi kumbi ninshi ali na maka no bukata ubukalamba.+ 28 Lelo ilyo ifi fintu fikatampa ukucitika, mukeminine kabili mukenune imitwe, pantu ninshi ukulubuka kwenu kwapalama.”

29 Pa numa ya kulanda ifi, abebele icilangililo ca kuti: “Tontonkanyeni pa mukunyu ne fimuti fyonse ifyashala.+ 30 Ilyo fyalemba, mulaimwena kabili muleshiba ukuti amainsa yali mupepi. 31 Kanshi na imwe nga mwamona ifi filecitika, mukeshibe ukuti Ubufumu bwa kwa Lesa buli mupepi. 32 Ndemweba icine cine nati, abantu ba nkulo ino tabakapwe ukufwa mpaka ifintu fyonse fikacitike.+ 33 Umuulu ne sonde fikapita, lelo amashiwi yandi tayakapite nakalya.+

34 “Lelo mucenjele pa kuti imitima yenu taifinininwe ku buliili na kuli bucakolwa+ na ku masakamika ya mikalile,+ ica kuti ubushiku bulya bwaisa pali imwe mu kupumikisha 35 nga filya iciteyo+ cikata inama. Pantu bukesa pali bonse abaikala pano isonde ponse. 36 E ico, mulelola+ inshita yonse kabili mulepepa amapepo ya kupaapaata+ pa kuti mukapusuke fyonse ifikacitika, na pa kuti mukeminine pa ntanshi ya Mwana wa muntu.”+

37 E ico akasuba alesambilisha mwi tempele, lelo ubushiku alefumamo, aya mu kulaala ku lupili ulo beta ati Ulupili lwa Miolife. 38 Kabili abantu bonse balecelela ukuya kwi tempele mu kumfwa ifyo alelanda.

22 Nomba ubushiku bwa Mutebeto wa Mukate Uushatutumuka, uo beta ati Icakucilila,+ bwaleya bulepalama.+ 2 Kabili intungulushi sha bashimapepo na bakalemba balefwaya inshila iyalinga iya kumwipailamo,+ pantu baletiina abantu.+ 3 Lyena Satana aingile muli Yuda, uo baleita ati Iskariote, uwali pa batumwa 12,+ 4 kabili Yuda ailelanda ne ntungulushi sha bashimapepo na bakalamba ba abalelinda itempele pa nshila ya kumufutukilamo.+ 5 Nabo balitemenwe sana, kabili bapangene ukumupeela indalama sha silfere.+ 6 E ico alisumine, kabili atendeke ukufwaya inshita iyalinga iya kumufutukilapo ilyo kushali no kuba abantu.

7 Ubushiku bwa Mukate Uushatutumuka bwalifikile, ubushiku ubo balingile ukupeelelapo ilambo lya pa Cakucilila;+ 8 e ico Yesu atumine Petro na Yohane, kabili abebele ati: “Kabiyeni mutupekanishishe umutebeto wa Cakucilila, pa kuti tulye.”+ 9 Nabo bamwipwishe abati: “Ni kwi mulefwaya ukuti tuyepekanishisha?” 10 Na o abaswike ati: “Moneni! Nga mwaingila mu musumba, umwaume uusendele umutondo wa menshi aleyamukumanya. Mumukonke mu ng’anda umo alayaingila.+ 11 Kabili muye mwebe umwine wa ng’anda amuti, ‘Kasambilisha atila: “Uli kwi umuputule wa beni umo ningaliila umutebeto wa Cakucilila pamo na basambi bandi?”’ 12 Na o aleyamulanga umuputule uukalamba uwa pa muulu, uo bapekenye bwino bwino. Umo mwine e mo mupekanishishe Icakucilila.” 13 E ico balile, kabili filya fine fye abebele e fyo basangile, bapekanya ne Cakucilila.

14 E ico ilyo inshita yafikile, aikele pe tebulo alalya pamo na batumwa.+ 15 E lyo abebele ati: “Nalefwaisha ukulya na imwe ici Icakucilila ilyo nshilacula; 16 pantu ndemweba nati, nshakalyepo Icakucilila na kabili mpaka fyonse fikafikilishiwe mu Bufumu bwa kwa Lesa.” 17 Kabili ilyo apokele kapu, alitashishe Lesa, e lyo abeba ati: “Buuleni kapu iyi, pishenimo pa kuti bonse munwemo, 18 pantu ndemweba nati, nshakanwepo umwangashi na kabili mpaka Ubufumu bwa kwa Lesa bukese.”

19 Kabili abuulile umukate,+ atasha Lesa, aumokaula, abapeela e lyo alanda ati: “Uyu umukate cimpashanya ca mubili wandi+ uulepeelwa pa mulandu wenu.+ Mulecita ici pa kunjibukisha.”+ 20 Kabili ifi fine e fyo acitile na kuli kapu. Ilyo bapwile ukulya umulaalilo, atile: “Iyi kapu umuli umwangashi e cipangano cipya+ ica pa mulopa wandi,+ uuli no kupongololwa pa mulandu wenu.+

21 “Lelo moneni! uulemfutuka ali na ine pano pe tebulo.+ 22 Pantu Umwana wa muntu aleya, ukulingana ne fyo cifwile ukuba;+ lelo we bulanda ku muntu uulemufutuka!”+ 23 E ico, batendeke ukulanshanya abene beka ukuti nani pali bena uwali no kumufutuka.+

24 Lelo batampile ukukansanina pa wali umukalamba pali bena.+ 25 Nomba abebele ati: “Ishamfumu sha bena fyalo shiteka abantu kwati basha, ne ntungulushi balashilumbanya ukuti shilafwilisha abantu.+ 26 Ifi te fyo imwe mufwile ukuba.+ Lelo umukalamba pali imwe afwile ukuba ngo mwaice pali bonse,+ no ulemutungulula afwile ukuba ngo ulemubombela. 27 Pantu bushe umukalamba nani? Uwikele alelya pe tebulo nelyo uulemubombela? Bushe te wikele alelya pe tebulo? Nomba ine nine ndemubombela.+

28 “Lelo imwe, nimwe mwatwalilila ukuba na ine+ mu mesho yonse ayo nkwata;+ 29 kabili ndepangana na imwe icipangano, nga filya fine Tata apangana na ine icipangano ca Bufumu,+ 30 pa kuti mukalye no kunwa pe tebulo lyandi mu Bufumu bwandi,+ na pa kuti mukekale pa fipuna fya Bufumu+ no kupingula imikowa 12 iya kwa Israele.+

31 “Simone, Simone, mona! Satana alefwaisha ukumwela nga filya abantu bela ingano.+ 32 Lelo ninkupepelako pa kuti icitetekelo cobe cinenuka;+ kabili ilyo ukalapila, ukakoseleshe bamunonko.”+ 33 Lyena Petro aebele Yesu ati: “Mwe Shikulu, ninjipekanya ukuya na imwe ku cifungo nangu fye kufwila pamo na imwe.”+ 34 Nomba amwebele ati: “Petro, ndekweba nati, lelo line ilyo mukolwe talati alile, ulekaana imiku itatu ukuti tawanjishiba.”+

35 Na kabili abepwishe ati: “Ilyo namutumine ukwabula ukusenda icikwama, icola ca fya kulya ne ndyato,+ bushe pali ico mwabulishe?” Nabo batile: “Awe tapali!” 36 Lyena abebele ati: “Lelo nomba uukwete icikwama asende, uukwete icola ca fya kulya na o wine asende, no ushikwete ulupanga ashitishe ica kufwala cakwe ica kunse ashitemo ulupanga. 37 Amalembo ya mushilo yatila, ‘Bamupendele pamo na bampulamafunde.’+ Ndemweba nati ifi amalembo yalanda, yalanda pali ine.” Pantu ifi yalanda pali ine filefikilishiwa.+ 38 Lyena bamwebele abati: “Mwe Shikulu, moneni! natukwata impanga shibili.” Na o abebele ati: “Isho shine nashifula.”

39 Ilyo afumine, aile ku Lupili lwa Miolife nge fyo alecita lyonse, kabili abasambi balimukonkele.+ 40 Ilyo afikile kulya, abebele ati: “Akupepeni pa kuti mwi-ingila mu matunko.”+ 41 Lyena alifumine apo bali, aya akatalamukila, e lyo afukama alapepa, 42 ati: “Tata, nga mulefwaya, fumyeni iyi kapu pali ine. Nomba nshiletila ifyo ndefwaya e fyo ficitike, lelo ifyo mulefwaya e fyo ficitike.”+ 43 Lyena amwene malaika uwafumine ku muulu kabili uyu malaika alimukoseshe.+ 44 Lelo alyumfwile sana ububi, kabili alitwalilile ukupepa no mweo onse;+ ne libe lyalefuma no kutona kwati mulopa uuletonena panshi. 45 Ilyo aimine apo alepepela aya ku basambi, asangile baleshipula pantu balinakile pa mulandu wa bulanda.+ 46 Abebele ati: “Cinshi mulaalile? Buukeni, akupepeni pa kuti mwi-ingila mu matunko.”+

47 Ilyo acili alelanda, moneni! kwaishile ibumba, kabili Yuda, umo pa batumwa 12, e waletungulula ili ibumba. Lyena apaleme kuli Yesu amutomona no kumutomona.+ 48 Lelo Yesu amwipwishe ati: “Yuda, bushe watomona Umwana wa muntu pa kuti umufutuke?” 49 Ilyo abali na Yesu bamwene ifyali no kucitika, balandile abati: “Mwe Shikulu, bushe tubakome no lupanga?” 50 Umo pali bena akomene fye no musha wa kwa shimapepo mukalamba amuputula no kutwi kwa ku kulyo.+ 51 Lelo Yesu atile: “Lekeni.” Kabili aikete ku kutwi kwa uyu muntu amundapa no kumundapa. 52 Lyena Yesu aebele intungulushi sha bashimapepo, abakalamba ba balelinda itempele na bakalamba ba baishile mu kumwikata, ati: “Bushe mwishile ne mpanga ne nkonto kwati ndi cipondo?+ 53 Ilyo naleba na imwe cila bushiku+ mwi tempele tamwanjikete.+ Lelo ino ni nshita yenu kabili ni nshita ya kuti imfifi iteeke.”+

54 Lyena balimwikete, bamusenda+ bamutwala na ku ng’anda ya kwa shimapepo mukalamba; lelo Petro alebakonka akatalamukila.+ 55 Ilyo bakoseshe umulilo pa kati ka lubansa, baikala na pamo, Petro na o alikele apo bali.+ 56 Lelo ilyo umubomfi umo umukashana amumwene naikala ku mulilo, alimulolekeshe e lyo alanda ati: “No yu aleba nankwe.” 57 Lelo alikeene, atile: “We mwanakashi we, ine uyu muntu nshimwishibe.” 58 Ilyo papitile inshita iinono, umuntu na umbi alimumwene, kabili amwebele ati: “Na iwe wine waleba nabo.” Lelo Petro alandile ati: “We mwaume we, ine nshaleba nabo.”+ 59 Kabili ilyo papitile nalimo iawala limo, umwaume umo akoselepo fye ati: “Ca cine no yu muntu aleba nankwe, pantu na kuba mwina Galili!” 60 Lelo Petro atile: “We mwaume we, nshishibe ifyo ulelandapo.” Kabili ilyo line, mukolwe alililile ninshi Petro acili alelanda. 61 Ilyo line Shikulu alipilibwike no kulolesha Petro, na Petro aibukishe amashiwi ayo Shikulu amwebele aya kuti: “Lelo line ilyo mukolwe talalila, ulekaana imiku itatu ukuti tawanjishiba.”+ 62 E ico afumiine panse no kulila nga nshi.

63 Nomba abaume abalelinda Yesu batendeke ukumupumya+ no kumuuma;+ 64 kabili ilyo bamufimbile pa menso, balemwipusha abati: “Nga niwe kasesema twebe! Nani akuuma?” 65 Kabili baliponteele Lesa ilyo balandile ifintu na fimbi ifingi pa kusaalula Yesu.

66 Ilyo bwacele, ibumba lya bakalamba ba bantu, intungulushi sha bashimapepo na bakalemba, balilongene+ kabili batwele Yesu mu cikuulwa cabo ica Sanhedrini, e lyo bamweba abati: 67 “Nga niwe Kristu twebe.”+ Lelo abebele ati: “Nangu namweba, tamwasumine nakalya. 68 Kabili nga namwipusha, tamwa-asuke. 69 Lelo ukufuma pali nomba Umwana wa muntu+ akekala ku kuboko kwa ku kulyo ukwa maka ukwa kwa Lesa.”+ 70 E ico bonse bamwipwishe abati: “Bushe kanshi uli Mwana wa kwa Lesa?” Na o abaswike ati: “Mwe bene namulanda ukuti ndi Mwana wa kwa Lesa.” 71 Nabo batile: “Bushe tulekabila bakambone na bambi? Pantu fwe bene twayumfwila ifyo alanda.”+

23 E ico ibumba lyonse lyalimine lyamutwala kuli Pilato.+ 2 Lyena batendeke ukumupeela imilandu abati:+ “Twasangile uyu muntu aletunka aba mu luko lwesu ukuti bemine ubuteko, alebalesha ukulipila imisonko kuli Kaisare,+ kabili aletila ena e Kristu imfumu.”+ 3 Nomba Pilato amwipwishe ati: “Bushe uli Mfumu ya baYuda?” Na o amwaswike ati: “Naulanda we mwine.”+ 4 Lyena Pilato aebele intungulushi sha bashimapepo na mabumba ya bantu ati: “Uyu muntu nshimusangile no mulandu.”+ 5 Lelo bena bakoselepo fye abati: “Alaleta icimfulunganya pantu alasambilisha monse mu Yudea, ukutampila ku Galili ukufika fye na kuno.” 6 Ilyo Pilato aumfwile ifi, aipwishe nga ca kuti uyu umuntu ali mwina Galili. 7 Ilyo Pilato aishibe ukuti Yesu ali wa mu citungu ca kwa Herode,+ amutumine kuli Herode, na kuba muli shilya nshiku Herode na o ali mu Yerusalemu.

8 Ilyo Herode amwene Yesu alitemenwe sana, pantu pa nshita ntali alefwaya ukumumona pa mulandu wa kuti alyumfwile ifingi pali ena,+ kabili ale-enekela ukuti alacitapo icipesha amano. 9 E ico atendeke ukumwipusha amepusho ayengi, lelo tamwaswike nangu cimo.+ 10 Lelo intungulushi sha bashimapepo na bakalemba baleima bukali bukali balemupeela imilandu. 11 Lyena Herode na bashilika bakwe balimusaalwile,+ kabili Herode alimupumishe+ ilyo amufwikile insalu iisuma nga nshi. Lyena amubweseeshe kuli Pilato. 12 Pali bulya bwine bushiku Herode na Pilato baishileba ifibusa, pantu kale balipatene.

13 Lyena Pilato alongenye intungulushi sha bashimapepo, intungulushi e lyo na bantu 14 kabili abebele ati: “Namuleta uyu muntu kuli ine, muleti aletunka abantu pa kuti bemine ubuteko. Nomba moneni! nimwipusha amepusho pa menso yenu, lelo nshimusangile no mulandu nangu umo pa milandu iyo mulemupeela.+ 15 Nangu fye ni Herode tamusangile no mulandu, pantu namubwesesha kuli ifwe, kabili moneni! tapali nangu cimo ico acitile ica kufwilapo. 16 E ico nalamukanda fye+ imukakule no kumukakula.” 17* —— 18 Lelo ibumba lyonse lyabilikishe aliti: “Mwipayeni,* e lyo mutukakwile Baraba!”+ 19 (Uyu Baraba bamubikile mu cifungo pa mulandu wa kwimina ubuteko mu musumba, na pa mulandu wa kwipaya umuntu.) 20 Na kabili Pilato alilandile nabo, pantu alefwaya ukukakula Yesu.+ 21 Lyena batendeke ukubilikisha abati: “Mukobekeni pa cimuti! Mukobekeni pa cimuti!”*+ 22 Umuku walenga butatu abepwishe ati: “Inga kanshi cinshi alufyenye? Nshimusangile no mulandu wa kufwilapo; e ico nalamukanda fye imukakule no kumukakula.” 23 Ilyo baumfwile ifi, e lyo bakoselepo ukumupatikisha no kubilikisha, balebilikisha ukuti alingile fye ukufwa.* Ifyo balelanda fyasukile fyanasha Pilato.+ 24 E ico Pilato apingwile ukuti ifyo abantu balefwaya e fyo ficitike. 25 Abakakwilile umuntu uo abene balefwaya ukuti abakakwile, uwali mu cifungo pa mulandu wa kwimina ubuteko no kwipaya umuntu, lelo abapeele Yesu ukulingana ne fyo abene balefwaya.

26 Nomba ilyo balemusenda, baikete Simone umwina Kurene, uwaleingila mu musumba, kabili bamupeele icimuti ca kucushiwilwapo* ukuti acisende, e lyo alekonka Yesu pa numa.+ 27 Ibumba ilikalamba ilya bantu lyalemukonka. Pali ili ibumba pali na banakashi abaleyumaula pa fifuba pa mulandu wa bulanda kabili abalemulila. 28 Na o Yesu apilibukile ku banakashi e lyo abeba ati: “Mwe bana banakashi aba mu Yerusalemu, lekeni ukulilila ine. Lelo muleililila mwe bene, mulelilila na bana benu;+ 29 pantu moneni! inshiku shileisa ilyo abantu bakalati, ‘Balishuka abanakashi abashikwata abana, na banakashi abashafyele, e lyo na bashaonseshe!’+ 30 Lyena bakalaeba impili abati, ‘Tuponeneni!’ kabili bakalaeba utupili abati, ‘Tufimbilikisheni!’+ 31 Ifi nga e fyo bacita icimuti ilyo cicili icibishi, cikaba shani nga cauma?”

32 Kwali abaume na bambi babili abali ifipondo, abo basendele pa kuti bayebepaila pamo na Yesu.+ 33 Kabili ilyo bafikile pa ncende apo beta ukuti Pa Cipanga,+ bamupopeele pa cimuti, bapopeele ne fipondo mupepi nankwe, cimo ku kulyo e lyo cimbi ku kuso kwakwe.+ 34 Lelo Yesu alandile ati: “Mwe Tata, mubabelele uluse, pantu tabeshibe ifyo balecita.” Kabili pa kwakana ifya kufwala fyakwe, balipendwile.+ 35 Kabili abantu baliminine baletamba. Lelo intungulushi shalemupumya ashiti: “Alepususha bambi; naipusushe umwine, nga ni Kristu wa kwa Lesa, uo Lesa Asala.”+ 36 Nangu fye bashilika balemupumya, kabili ilyo bapaleme kuli ena bamupeele umwangashi uwakantuka.+ 37 Balemweba abati: “Nga uli Mfumu ya baYuda, ipusushe.” 38 Pa muulu wa cimuti ico bamupopeelepo balembelepo ukuti: “Uyu ni Mfumu ya baYuda.”+

39 Lelo umo pa fipondo ifyo bapopeele mupepi nankwe atampile ukumusaalula ati:+ “Bushe te iwe Kristu? Ipusushe, upususheko na ifwe!” 40 Lelo umunankwe alimukalipile ati: “Bushe tautiina Lesa? Bakupingwile ukucuula nga ifi fine uyu muntu alecuula. 41 Ifwe nacilinga ukutukanda, pantu baletukandila pa fintu ifyo twacita; lelo uyu muntu ena tacitile icabipa nangu cimo.” 42 Lyena alandile ati: “Mwe Yesu, mukanjibukishe ilyo mukengila mu Bufumu bwenu.”+ 43 Yesu na o amwebele ati: “Cine cine ndekweba lelo nati, ukaba na ine mu Paradaise.”+

44 Nomba ilyo cali iawala ilyalenga 6,* pe sonde lyonse pali imfifi ukufika na pe awala lyalenga 9,*+ 45 pantu akasuba kalishimine; kabili insalu ya mu ncende ya mushilo+ yalilepwike pa kati.+ 46 Kabili Yesu abilikishe ishiwi ilikalamba ati: “Mwe Tata, nabika umweo wandi mu minwe yenu.”+ Ilyo alandile ifi, alilekele umweo.+ 47 Ilyo umukalamba wa bashilika amwene ifyacitike, atendeke ukucindika Lesa. Atile: “Cine cine uyu muntu ali uwalungama.”+ 48 Kabili ilyo abantu abali mu mabumba yonse ayalongene mu kumona ifyalecitika bamwene ifyacitike, babwelelemo ku mayanda yabo ninshi baleyumaula pa fifuba. 49 Kabili bonse abamwishibe baiminine akatalamukila. Na banakashi abamukonkele ukufuma ku Galili e ko bali kabili balimwene ifyacitike.+

50 Kabili moneni! kwali umwaume umo uwe shina lya kuti Yosefe, uwali wa mu Cilye Cikalamba ica baYuda. Ali muntu umusuma kabili uwalungama.+ 51 Uyu muntu tasuminisheko amapange yabo ne fyo bacitile. Ali wa ku Arimatea, umusumba wa bena Yudea kabili alelolela Ubufumu bwa kwa Lesa. 52 Uyu muntu aile kuli Pilato no kulomba umubili wa kwa Yesu. 53 Kabili aliwikishe pa cimuti,+ aupomba na mu nsalu iisuma, e lyo aubika mu nshiishi iyaimbilwe mu cilibwe,+ umo bashabalile ababika umuntu nangu umo. 54 Nomba bwali bushiku bwa Kupekanya,+ kabili ubushiku bwe Sabata+ bwali mupepi no kutendeka. 55 Lelo abanakashi abafumine nankwe ku Galili balikonkele, kabili balimwene inshiishi ne fyo balaalike umubili wakwe,+ 56 kabili balibwelelemo mu kupekanya ifyanunkila na mafuta ayanunkila. Lelo pe Sabata+ pena balituushishe ukulingana ne funde.

24 Nomba pa bushiku bwa kubalilapo mu mulungu, aba banakashi bacelele ku nshiishi,* ninshi nabasenda ne fyanunkila ifyo bapekenye.+ 2 Lelo basangile ninshi nabakunkulushapo ilibwe pa nshiishi,*+ 3 kabili ilyo baingile, tabasangilemo umubili wa kwa Shikulu Yesu.+ 4 Ilyo bacili nabapeshiwa amano pa fyo basangile, moneni! bamwene abantu babili abafwele ifyabengeshima nabeminina mupepi nabo. 5 Aba banakashi balyumfwile umwenso, kabili bainamine panshi. E ico aba baume babebele abati: “Cinshi ico mulefwaila umuntu uwa mweo mu nshiishi?+ 6 Kuno taliko, nabuushiwa. Ibukisheni ifyo amwebele ilyo ali mu Galili, 7 amwebele ati bafwile ukupeela Umwana wa muntu mu minwe ya babembu kabili bakamwipaila pa cimuti, lyena pa bushiku bwalenga shitatu akabuushiwa.”+ 8 E lyo baibukishe ifyo abebele,+ 9 kabili babweleele ku nshiishi* bashimikila na batumwa 11 e lyo na bantu bonse fyonse ifyacitike.+ 10 Aba banakashi bali ni Maria umwina Magadala, Yoana, na Maria nyina wa kwa Yakobo. Kwali na banakashi bambi abaleshimikila abatumwa ifi fintu. 11 Lelo abatumwa balemona ukuti ifyo abanakashi balelanda tafyalolelemo, kabili tabasumine ifyo balebeba.

12 Lelo Petro alimine, abutukila na ku nshiishi.* Kabili ilyo alengeele mu nshiishi, amwene muli fye insalu. E ico alifumineko, ninshi napapa pantu taishibe icacitike.

13 Nomba moneni! pali bulya bwine bushiku abasambi bakwe babili balefuma ku Yerusalemu baleya ku mushi uo beta ati Emao. Ukufuma ku Yerusalemu ukufika ku Emao palepa amakilomita nalimo 11,* 14 kabili balelanshanya pali ifi fintu fyonse ifyacitike.

15 Nomba ilyo balelanshanya pali ifi fintu, Yesu wine alipaleme, atampa no kwendela pamo nabo, 16 lelo tabamwishibe.+ 17 E lyo abepwishe ati: “Finshi mulelanshanyapo ili mule-enda?” Nabo baiminine shilili, ninshi balemoneka aba bulanda. 18 Lyena umo pali bena uwe shina lya kuti Kleopa, amwaswike ati: “Bushe uli mweni uwikala eka mu Yerusalemu kabili tawaishiba ifyacitika* mu Yerusalemu shino nshiku?” 19 Na o abepwishe ati: “Finshi fyacitika?” Lyena bamwaswike abati: “Ifyacitikila Yesu umwina Nasarete,+ uwali kasesema wa maka mu fyo alecita na mu fyo alelanda pa ntanshi ya kwa Lesa na bantu bonse;+ 20 ne fyo intungulushi shesu isha bashimapepo ne ntungulushi sha mutwele ku bamupingwile ukuti bamwipaye+ kabili bamupoopele pa cimuti. 21 Lelo twalesubila ukuti uyu muntu e wali no kulubula Israele.+ Na kuba, buno e bushiku bwalenga shitatu ukutula apo ifi fintu fyacitikiile. 22 Kabili abanakashi bamo abasambi banensu nabatupapusha, pantu bacicelela ku nshiishi+ 23 lelo ilyo bacisanga mu nshiishi tamuli umubili wakwe, bacisatweba ukuti bacimona na bamalaika, abacibeba ukuti ali uwa mweo. 24 Lyena bamo abo twaciba nabo baciya ku nshiishi*+ kabili baciyasanga filya fine abanakashi bacilanda, lelo Yesu tabacimumona.”

25 E ico abebele ati: “Mwe mpelwa mano mwe, kabili abakokola ukusumina fyonse ifyo bakasesema balandile! 26 Bushe Kristu talingile ukucula nge ifi fine+ pa kuti apokelele ubukata bwakwe?”+ 27 Kabili abelwilile ifyalembelwe pali ena mu Malembo yonse, ukutendekela pa fyo Mose alembele ne fyo Bakasesema+ bonse balembele.

28 Basukile bapalama ku mushi uko baleya, nomba ena acitile kwati alepitilila. 29 Lelo balimuleseshe ukuya, bamwebele abati: “Tuleyeni ku mwesu, pantu akasuba kali mu kuwa, kabili bwalaila nomba line.” Ilyo bamwebele ifi, alile nabo ku mwabo. 30 Kabili ilyo aikele nabo pe tebulo, abulile umukate, apepa, aumokaula, atampa no kubapeela.+ 31 Lyena amenso yabo yalishibwilwe, bamwishiba no kumwishiba. Lelo apo pene alilubile.+ 32 E lyo balalanshanya abati: “Bushe imitima yesu tayacilabilima ilyo acilalanda na ifwe mu nshila, ilyo acilatulondolwela bwino umwalola Amalembo?” 33 Kabili lilya line balimine babwelela ku Yerusalemu, basanga na batumwa 11 e lyo na bo bali nabo ninshi nabalongana, 34 kabili abalongene batile: “Cine cine Shikulu nabuushiwa kabili Simone acimumona!”+ 35 Lyena aba abasambi babili nabo balondolwele ifyacitike mu nshila ne fyo bamwishibe ilyo amokawile umukate.+

36 Ilyo balelanda ifi ifintu, aishileiminina pa kati kabo, e lyo abeba ati: “Umutende ube na imwe.”+ 37 Nomba apo balitiinine kabili bali sana no mwenso, batontonkenye ukuti balemona umupashi. 38 E ico abebele ati: “Cinshi musakamikilwe, kabili cinshi muletwishikila? 39 Moneni amaboko yandi na makasa, nine wine; njikateni, ndolesheni, pantu umupashi tawakwata umunofu na mafupa nga fintu mulemona ine nkwete.” 40 Kabili ilyo alelanda ifi, alebalanga amaboko yakwe na makasa. 41 Nomba ilyo bacili tabalasumina pa mulandu wa kuti bali ne nsansa sana kabili balipapile, abepwishe ati: “Bushe namukwata ifya kulya?” 42 E ico bamupeele isabi lya koca; 43 kabili alibuulile alalya no kulya pa menso yabo.

44 Lyena abebele ati: “Aya e mashiwi namwebele ilyo nali na imwe,+ aya kuti fyonse ifyalembelwe pali ine mu Mafunde ya kwa Mose, mu mabuuku ya Bakasesema na mu Amalumbo fifwile ukufikilishiwa.”+ 45 Lyena alilengele baishiba bwino bwino umwalola Amalembo,+ 46 kabili abebele ati: “Amalembo yatila: Kristu ali no kucula kabili pa bushiku bwalenga shitatu ali no kubuushiwa ku bafwa,+ 47 kabili ukutendekela mu Yerusalemu,+ imbila ya kuti abantu balapile pa kuti babelelwe uluse pa membu shabo,+ ikalabilwa mwi sonde lyonse+ mwi shina lyakwe. 48 Imwe mukaba inte sha ifi fintu.+ 49 Kabili moneni! nkamutumina ico Tata alaya. Lelo imwe ikaleni mu musumba, mpaka mukapokelele amaka ukufuma ku muulu.”+

50 Lyena abatwele mupepi na ku Betani, e lyo aimya amaboko, abapaala no kubapaala. 51 Ilyo alebapaala, aleya alelekana nabo, asendwa na mu muulu.+ 52 E ico balimufukamine* babwelela na ku Yerusalemu, ninshi balesekelela nga nshi.+ 53 Kabili lyonse baleba mwi tempele balelumbanya Lesa.+