KALATA YA BUBILI KULI TIMOTE

1 Ine ne Paulo, ne mutumwa wa kwa Kristu Yesu ukulingana no kufwaya kwa kwa Lesa, pa kuti ndebila ubulayo bwa kwa Lesa ubwa bumi ubwishila muli Kristu Yesu,+ 2 nalembela iwe Timote, we mwana wandi uwatemwikwa,+ ndeti:

Icikuuku icaibela, uluse, no mutende ukufuma kuli Lesa Shifwe na kuli Kristu Yesu Shikulwifwe fibe na iwe.

3 Ndetootela Lesa, uo mombela nge fyo ifikolwe fyandi fyalecita, kabili naliba na kampingu iisuma. Ndakwibukisha lyonse nga ndepepa amapepo ya kupaapaata ubushiku na kasuba. 4 Nga naibukisha ifilamba fyobe, ndafwaisha ukukumona, pa kuti ningasekelela nga nshi. 5 Pantu ndebukisha icitetekelo ico wakwata icabula ubumbimunda.+ Pa kubala nokokulu Loisi na noko Yunike e bakwete ici citetekelo, lelo nincetekela ukuti na iwe wine e citetekelo wakwata.

6 E mulandu wine ndekwibukishishako ukuti ulebomfya sana ica bupe ca kwa Lesa ico wapokelele ilyo nabikile iminwe yandi pali iwe,+ kabili ulecibilimya kwati mulilo. 7 Pantu Lesa tatupeela umupashi wa bukuuwe,+ lelo atupeela umupashi wa maka,+ uwa kutemwa kabili uwa mano ayatuntulu. 8 E ico wilaumfwa insoni sha kushimika pali Shikulwifwe,+ nangu pali ine ne o bakaka pa mulandu wakwe, lelo na iwe uleculila+ imbila nsuma kabili uleshintilila pa maka ya kwa Lesa ilyo ulecita ifi.+ 9 Alitupuswishe no kutwita ubwite bwa mushilo.+ Tatwitile pa mulandu wa milimo yesu, lelo ni pa mulandu wa kufwaya kwakwe na pa mulandu wa cikuuku cakwe icaibela.+ Alitulangile ici icikuuku ukupitila muli Kristu Yesu ku nshita sha kale na kale, 10 lelo pali ino nshita ici icikuuku icaibela calimoneka bwino bwino ukupitila mu kumoneka kwa Mupusushi wesu, Kristu Yesu,+ uwafumyapo imfwa+ kabili uwasanika ulubuuto pa bumi+ na pa kukanabola+ ukupitila mu mbila nsuma,+ 11 iyo bansontelepo ukuba kabila, umutumwa kabili kasambilisha.+

12 Uyu e mulandu na ine ndeculila ne fi fintu,+ lelo nshumfwa insoni.+ Pantu nalishiba Lesa uo nasuminamo, kabili nalicetekela ukuti alikwata amaka ya kusunga ico namuseekesha ukufika na pali bulya bushiku.+ 13 Ifya kukonka ifyali mu mashiwi ayasuma*+ ayo waumfwile kuli ine ulefikatisha. Uleikatisha ifi ifya kukonka ne citetekelo no kutemwa ifyaba muli Kristu Yesu. 14 Ici cuma ico bakuseekesha, ulecisunga bwino ukupitila mu mupashi wa mushilo uwaba muli ifwe.+

15 Walishiba ukuti aba mu citungu ca Asia+ bonse balimfutuka, ukubikako fye na Fugele na Hermogene. 16 Shikulu naomfwile aba mu ng’anda ya kwa Onesifore+ uluse, pantu ilingi Onesifore alensansamusha, kabili taleumfwa insoni pa mulandu wa kuti nali na maceni ya mu cifungo. 17 Lelo ilyo ali mu Roma, alimfwaile nga nshi kabili alinsangile. 18 Shikulu Yehova* nakamubelele uluse muli bulya bushiku. Kabili walishiba bwino imilimo yonse iyo abombele mu Efese.

2 E ico we mwana wandi,+ ulekwatilako amaka mu cikuuku icaibela ica kwa Kristu Yesu; 2 kabili ulesambilisha abaume ba cishinka ifintu ifyo waumfwile kuli ine, ifyo ne nte ishingi shashininkishe ukuti fya cine,+ lyena nabo bakafikapo bwino bwino ukusambilishako bambi. 3 Apo uli mushilika umusuma+ uwa kwa Kristu Yesu, uleiteyanya ukucula ku mafya.+ 4 Takwaba umushilika nangu umo uwingila* mu makwebo* ya muli cino calo, pantu afwaya ukucita ifya kuti asekeshe uwamwingisha ubushilika. 5 Kabili nangu fye ni mu mangalo ya kucimfyanya, umuntu ulecimfyanya na bambi tapoka icilambu kano nga acilakonka amafunde.+ 6 Umulimi uubombesha e ufwile ukubalilapo ukulya ifisabo. 7 Lyonse uletontonkanya pa fyo ndelanda; Shikulu akalenga ukaleiluka* ifintu fyonse.

8 Ibukisha ukuti Yesu Kristu alibuushiwe ku bafwa+ kabili atuntwike muli Davidi,*+ ukulingana ne mbila nsuma iyo ine mbila,+ 9 iyo ndeculila no kukakwa kwati ndi cipondo.+ Nomba icebo ca kwa Lesa tacakakwa.+ 10 E mulandu wine nshipikishisha ifintu fyonse pa mulandu wa basalwa,+ pa kuti nabo bakapusuke ukupitila muli Kristu Yesu kabili bakacindamikwe umuyayaya. 11 Yacishinka aya mashiwi ayatila: Nga cine cine twafwilile pamo nankwe, ninshi tukaba aba mweo pamo nankwe;+ 12 nga twatwalilila ukushipikisha, tukaba imfumu no kutekela pamo nankwe;+ nga twamukaana, na o akatukaana;+ 13 nga tatuli ne cishinka, ena atwalilila fye ukuba uwa cishinka, pantu te kuti aikaane umwine.

14 Utwalilile ukubebukishako ifi fintu, kabili ulebasambilisha* pa menso ya kwa Lesa ukuti belakansanina pa mashiwi. Pantu ukucita ifi takwafwa kantu nakalya, lelo konaula fye icitetekelo ca baleumfwako. 15 Uleibikilishako pa kuti Lesa alekumona ukuti naufikapo ukumubombela, ngo mubomfi uushingaba ne nsoni pa mulimo wakwe, uulungika pa kusambilisha icebo ca cine.+ 16 Lelo uletaluka ku milandile ya buwelewele iisuusha ifya mushilo,+ pantu ababa ne yo milandile bakulaya balebipilako fye kabili bakulacita ifyo Lesa ashifwaya, 17 kabili amashiwi yabo yakasalangana nge cilonda icishipola. Bamo pali aba ni Humenai na Filete.+ 18 Aba bantu balifuma ku cine, balanda ukuti ukubuushiwa kwa bafwa kwalicitika kale,+ kabili balelenga bamo baleka ukuba ne citetekelo. 19 Nangu caba ifi, umufula uwakosa uwa kwa Lesa walitwalilila, umufula apafwatikwa amashiwi ya kuti, “Yehova* alishiba abantu bakwe,”+ na ya kuti, “Onse uulumbula ishina lya kwa Yehova*+ ataluke ku cishalungama.”

20 Nomba mu ng’anda iikalamba tamwaba fye ifipe fya golde ne fya silfere, lelo mwaliba ne fya fimuti ne fye bumba, kabili fimo fya mulimo wa mucinshi, lelo fimbi fyena fya mulimo uwabula umucinshi. 21 E ico umuntu nga aitalusha ku fipe ifyabula umucinshi, akaba icipe ica mucinshi kabili ica mushilo, ico umwine engalabomfya, icalinga ukubomba umulimo onse uusuma. 22 Kanshi ulefulumuka ulunkumbwa lwa mu bulumendo, lelo ule-esha na maka yobe yonse ukuba uwalungama, ukuba ne citetekelo, ukuba no kutemwa, ukuba uwa mutende, kabili uleba pamo na balilila kuli Shikulu ne mitima iyasanguluka.

23 Na kabili, ulekaana ukuibika mu kukansana kwa buwelewele kabili ukushalolamo,+ pantu walishiba ukuti ifi fiimya fye ulubuli. 24 Pantu umusha wa kwa Shikulu tafwile ukuba uwa lubuli, lelo afwile ukuba uwanakilila kuli bonse,+ uwafikapo ukusambilisha, uuilama nga bamulufyanya,+ 25 kabili uwanakilila ilyo alefunda abasuusha.+ Nalimo Lesa kuti abasuminisha ukulapila* pa kuti beshibe bwino bwino icine,+ 26 kabili bengeluka no kufuma mu citeyo ca kwa Satana Kaseebanya, apo alibekata abatuntulu pa kutila balecita ifyo afwaya.+

3 Lelo ishiba ukuti mu nshiku sha kulekelesha+ mukesaba inshita ishayafya nga nshi. 2 Pantu abantu bakaba abaitemwa, abatemwa indalama, aba mataki, aba matutumuko, abapontela ifya mushilo, abashumfwila abafyashi babo, abashitasha, abashaba ne cishinka, 3 abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, 4 abafutuka abanabo, bamunshebwa, aba cilumba, abatemwa ukwangala ukucila ukutemwa Lesa, 5 abamoneka kwati ni bakapepa lelo abakaana amaka ya bukapepa;+ abantu ba musango uyu ulebataluka. 6 Muli aba e mufuma abaya mu mayanda mu bucenjeshi no kusenda abanakashi abanaka, abafinininwa ku membu kwati ni bankole, abanakashi abatungululwa ne fya lunkumbwa ifyalekanalekana, 7 abasambilila lyonse lelo abafilwa ukwishiba bwino bwino icine.

8 Nga filya fine Yane na Yambre basuushishe Mose, e fyo na ba bene basuusha icine. Abantu ba musango uyu balyonaikilila fye amatontonkanyo, kabili Lesa alibakaana pa mulandu wa kuti tabakwata icitetekelo. 9 Lelo tabakalunduluke ukucila apa, pantu abantu bonse bakamona ubuwelewele bwabo, nga filya fine abantu bamwene ubuwelewele bwa balya abaume babili.+ 10 Lelo iwe walikonka bwino bwino isambilisho lyandi, imibele yandi,+ ifyo mfwaya ukucita, icitetekelo candi, ukutekanya kwandi, ukutemwa kwandi, ukushipikisha kwandi, 11 ifyo balencusha, e lyo na mafya yandi pamo nga ayo nakwete mu Antioke,+ mu Ikonia+ na mu Lustra.+ Nalishipikishe aya amafya yonse ilyo balencusha, kabili Shikulu alimpuswishe kuli ifi fyonse.+ 12 Na kuba, bonse abafwaya ukulapepa Lesa mu mikalile yabo ukupitila muli Kristu Yesu bakalabacusha.+ 13 Lelo abacita ifyabipa kabili incenjeshi bakaya balebipilako fye, bakulalufya abantu kabili nabo bakulabalufya.+

14 Lelo iwe ikalilila mu fyo wasambilile, kabili ifyo abantu balengele washininkisha ukuti fya cine,+ pantu walishiba bwino abantu abakusambilishe ifi fintu 15 kabili walishiba no kuti ukufuma fye ku bunya+ walisambilila amalembo ya mushilo,+ ayakwata amaka ya kulenga waba uwa mano, kabili aya amano kuti yalenga wapusuka ukupitila mu kutetekela Kristu Yesu.+ 16 Umupashi wa kwa Lesa e watungulwile abalembele Amalembo yonse aya mushilo,+ kabili aya Amalembo yonse yalikwata umulimo wa kusambilisha,+ uwa kukalipila, uwa kulungika ifintu, uwa kusalapwila mu bulungami,+ 17 pa kuti umuntu wa kwa Lesa abe uwafikapo bwino bwino, uwaipekanya icine cine ukubomba umulimo onse uusuma.

4 Ndekukonkomesha pa menso ya kwa Lesa na ya kwa Kristu Yesu, uukapingula+ aba mweo na bafwa,+ ilyo akamoneka bwino bwino+ ilyo akesa mu Bufumu bwakwe,+ ndeti: 2 Ulebila icebo,+ uleba uwacincila mu nshita iiweme na mu nshita iishiweme; ulelungika,+ ulekalipila, ulekoselesha. Ilyo ulecita ifi fyonse uleba uwatekanya sana kabili ulesambilisha bwino.+ 3 Pantu kukaba inshita ilyo bakaleka ukukonka isambilisho ilituntulu,*+ lelo bakalaifwaila bakasambilisha aba kubeba ifyo abene balefwaya ukumfwa, ukulingana ne fya lunkumbwa fyabo abene.+ 4 Bakaleka ukumfwa icine, lelo bakalabika fye amano ku malyashi ya bufi. 5 Nomba iwe ube uwatekanya mu fintu fyonse, uleshipikisha nga wakwata amafya,+ ulebomba umulimo wa kwa kabila wa mbila nsuma,* kabili ulebombesha mu mulimo obe onse.+

6 Pantu ine nomba balenjitulula kwati mutuulo wa mwangashi,+ kabili inshita yandi iya kulubuka+ naipalama. 7 Nindwa bwino ulubuli,+ nimbutuka ulubilo ukufika na ku mpela,+ nintwalilila ukuba uwakosa mu citetekelo. 8 Ukufuma pali ino nshita, balinsungila icilongwe* icalungama+ ico Shikulu, kapingula uwalungama+ akampeela, icikaba icilambu candi muli bulya bushiku.+ Nomba te ine neka akapeela, lelo akapeela na bonse abalolela ukuti akamoneke.

9 Weshe na maka ukwisa bwangu kuno. 10 Pantu Dema+ alindekelesha kabili alinsha pa mulandu wa kutemwa ifya muli cino calo,* kabili aliya ku Tesalonika. Kreske aya ku Galatia, Tito aya ku Dalmatia. 11 Luka fye e uli na ine. Ukese na Marko, pantu kuti alengafwako ilyo ndebomba umulimo wa kwa Lesa. 12 Lelo nalituma Tukiki+ ku Efese. 13 Pa kwisa ukalete ica kufwala ca mpepo ico nashile mu Troa kuli Karpi, ne fimfungwa, maka maka ifimfungwa fya mpapa.

14 Alekisanda kafula wa mukuba alincitile ifyabipa ifingi. Yehova* akamukanda pa fyo acita.+ 15 Na iwe wine ukacenjele no uyu muntu, pantu alikoselepo sana ukusuusha ifyo twalesambilisha.

16 Ilyo nalelubulula pa muku wa kubalilapo tapali uwaishile mu kumpokololako, bonse balindekeleshe—bekapeelelwapo umulandu pali ici. 17 Lelo Shikulu aiminine mupepi na ine no kumpeela amaka, pa kuti mbile sana imbila nsuma na bena fyalo bonse bomfwe;+ kabili alimpokolwele ku kanwa ka nkalamo.+ 18 Shikulu akampokolola ku fyabipa fyonse kabili akampususha, nkaye na mu Bufumu bwakwe ubwa mu muulu.+ Kuli ena kube ubukata umuyayaya umuyayaya. Ameni.

19 Umposesheko Priska na Akula+ na ba mu ng’anda ya kwa Onesifore.+

20 Erasti+ ashele mu Korinti, lelo nashile Trofimu+ nalwala ku Milete. 21 Weshe na maka yobe yonse ukwisa ilyo inshita ya mpepo ishilafika.

Yubuli akuposha. Pudense, Lini, Klaudia e lyo na ba bwananyina bonse nabo bakuposha.

22 Shikulu abe na iwe pa mulandu wa mibele yobe. Icikuuku cakwe icaibela cibe na imwe.