Ica Kwaafwa Ukusambilisha Imikalile

Kafundisha ku Zimbabwe, asosele ukuti pa koleji lya Nyatsime, apo asambilisha, paliba icisambilisho ico beta abati “Amasomo ya fya Mikalile.” Alondolwele amafya ya mu lupwa ayo akwete no kusumina ukuti aalekabila ukwaafwa mu kuyapwisha.

Ukulondolola icacitike pa numa ya bwinga, atile: “Amafya yatendeke lilya line fye kabili yalengele ukuti tupingulepo ukupaatukana mu November 1989.” Na kabili kwaliko amafya yambi. Alembele ukuti: “Pa bana bonse abo mayo aafyele, uwali mukolo kuli tata, nine nalipo umwaume umukalamba. Lintu nali mu mwaka walenga bubili uwa masambililo ya fya bukafundisha, tata alifwile, ukunshiila umulimo wa kusakamana bamunyinane ne nkashi shandi 16.”

Ukusambilila Baibolo ne Nte sha kwa Yehova kwayafwile uyu kafundisha ukupwisha amafya yakwe aya mu lupwa. Wene no mukashi wakwe balibweshanya kabili baliba aba nsansa. Alembele ati: “Ine no mukashi wandi twalisambilila ukufuma ku co twapitamo ica kukalifya ukuti ukubombesha kwa muntu ku kupwisha amafya yakwe ukwabula ukwafwa kwa kwa Lesa kwa fye.” Nangu ni fyo, ni shani pa lwa kwaafwako abasambi bakwe mu mafya yabo?

“Natashishe icitabo Ifipusho Abacaice Bepusha—Ifyasuko Fibomba kuli kafundisha mukalamba pe sukulu lyesu e lyo na kuli bakafundisha bambi ukuti cali citabo ca kusambililamo icisuma,” e fyo alembele. “Bonse balisuminishe, kabili isukulu lyanjebele ukuorda ifitabo 56, ifyo natwala kale ku sukulu.”

Tulecetekelo kuti na imwe bene muli no kunonkelamo apakalamba muli ici ica kwaafwa ukusambilila icabamo ifikope fyayemba, ica mabula 320. Nga mwingatemwa ukupokelelako cimo nelyo nga mwingatemwa ukulasambilila Baibolo mu ŋanda apa fye, twapaapaata lembeleni ku Watch Tower, Box 33459, Lusaka 10101, nelyo ku keyala kalinga pe bula 5.