Camulengele Ukucitapo Cimo!
Umwaume ukufuma ku Caracas, umusumba wa bwangalishi uwa mu Venezuela, atandalile wishi umukote, Rufino. Uyu wishi aikele mu La Loma, umushi waba weka mu ncende ya ku mishi. Umwana wakwe atwaliile Rufino icitabo ca Kuti Waikala Kuli Pe na pe muli Paradise Pe Sonde.
Pa numa, Inte sha kwa Yehova ukufuma ku Los Humocaros shaile ku kushimikila ku La Loma. Icabapapwishe cali ca kuti, abantu balebeeba ukuti kwali Nte uyo kale kale aalebatandalila. BaNte balipeshiwe amano pantu bene baishibe ukuti muli ilya ncende tamwaleikala baNte. Lyene umo asontele ku ng’anda ya muntu abene baleti ni Nte—yali ni ng’anda ya kwa Rufino!
Rufino alicankilwe ukupokelela abatandashi bakwe. Mulandu nshi aba mu mushi wakwe bamwishibile nga umo uwa Nte sha kwa Yehova? Umulandu, Rufino alitendeke ukubelenga icitabo ca Ikala Kuli Pe na pe, nomba lintu afikile pa cipandwa 13, amwene icikope ca kwa Yesu aletuma abakonshi bakwe ukuya mu mulimo wa kushimikila. Rufino asondwelele ukuti na lelo line Abena Kristu balingile ukulacito mulimo umo wine. Kanshi alitendeke ukulaebako abena mupalamano bakwe icine ca mu Baibolo ico aalesambilila.
Isambililo lya Baibolo lyalitendeke kuli Rufino, kabili balimwebeleko pa lwa kulongana kwa cilonganino. Ubushiku bwa pa Mulungu ubwakonkelepo aliile ku Ng’anda ya Bufumu. Nangu ca kuti Rufino aali ne myaka ya bukulu 80, alyendele ne nkasa pa maawala yatatu ukuyasangwako! Ukufuma pali bulya bushiku no kuya ku ntanshi, tatalile apuswapo ku kulongana kano fye nga ninshi nalwala sana. Alilembeshe na mu Isukulu lya Butumikishi bwa Teokrasi no kupeela ilyashi ilishaiwamina. Rufino alilwele umwaka wapwile kabili afwile mu July 1996, mu kuba ne subilo lyashangila ilya kubuukila kwi sonde lya paradise.
Natucetekelo kuti na imwe bene muli no kunonkelamo mu kubelenga ici citabo icakwatamo ifikope fyabalabata, icaba na mabula 256 ica Kuti Waikala Kuli Pe na pe muli Paradise Pe Sonde. Nga mwingatemwa ukukwatako ici citabo nelyo nga kuti mwatemwa ukulasambilila Baibolo mu ng’anda apa fye, kuti mwalembela ku Watch Tower, Box 33459, Lusaka 10101, nelyo ku keyala kalinga ukufuma pe bula 5.