Fwaka Naiteka Abantu ku Kalili ku India na mu China

KU ULEMBA LOLENI! MU INDIA

ILYO ukucincintila no kusambilisha abantu pa lwa busanso bwaba mu kupeepa fwaka fileingilishiwako mu fyalo fya ku Masamba, amakampani yakalamba yalealwila amakwebo yabo aya kushitisha fwaka ku fyalo fya ku Kabanga. Ukufwailisha kwa World Bank kwa kuti abantu ukufika kuli milioni umo mu China e bakulaafwa kuli fwaka cila mwaka ukufika mu mwaka wa 2010. Na kuba British Medical Journal yatile abena China amamilioni 100 abashilafishe myaka 29 bali no kufwa kuli fwaka.

Akabungwe ka World Health Organization kasobela ukuti icalo ca India—umwaba abantu mupepi na bilioni umo—e lyo na China filolenkene na “malwele yabipisha kabili ayakalipisha ayafuma mu kupeepa fwaka.” Amalipoti yashimiko kuti mupepi na mamilioni 20 abacaice abena India balatampa ukupeepa fwaka cila mwaka. Umwaume umo uwikala ku kapinda ka ku kulyo aka India aali mulembo wa fwaka pa myaka iingi. Muli magazini wa Loleni! asangilemo ilyashi ilyamulengele ukuti aleke ukupeepa umupwilapo kabili alembele na kalata wa kutasha pa kwaafwa uko magazini yamwafwile. Ilyashi abelengele lyali mu lupapulo lwa December 8, 1998 ilyaleti “Ifwe Twalileka, Na Imwe Kuti Mwaleka!”

Mulandu nshi uwa kufwaila ukuleka ukupeepa fwaka? Imilandu imo isangwa pe bula 25 muli broshuwa wa mabula 32 uutila Cinshi Cintu Lesa Afwaya Kuli Ifwe? Nga mulefwayako uyu broshuwa, isusheni kuponi ali pe samba nelyo lembeleni ku keyala kalingile pe bula 5 muli uno wine magazini.

□ Ntumineniko broshuwa atila Cinshi Cintu Lesa Afwaya Kuli Ifwe?

□ Ntantikileniko isambililo lya Baibolo illya mu ng’anda ilya pa fye.