“Ulubuuto Lwafikapo”

NGA mwalyeshapo ukwikata kwi laiti ilyakile pa nshita ntali, mwalishiba na imwe ati lilakaba nga nshi. Icilenga ukukaba mulandu wa maka ya lubuuto ayafuma muli lyene. Mu malaiti yaseeka, ciputulwa fye icinono ica maka ya malaiti e cibomba ku lubuuto, amaka ayengi yonaikila fye ku kukaba. Nga twalinganya na kashishi kanono kalya batila akabeshamulilo (moneni icikope apo bakakushishe) kena kalabomfya amaka ya kako aya malaiti nalimo yonse fye ku kusanika fye ulubuuto.

Utubeshamulilo tatonaula amaka ya lubuuto ku kukaba, e calenga ulubuuto tusanika ukwitwa ati “ulubuuto lwafikapo.” Kasanika shani muli uyo musango? Mwi fumo lya kabeshamulilo mwaba utuntu tumo utwitwa ati luciferin. Ilyo kaingisha umwela wa okisijini mwi fumo, ulasakaana na luciferin, nga cabe fyo ninshi akabeshamulilo kalasanika ulubuuto ulumoneka ngo lwa mutuntula nelyo ulwa kashikilako.

Mwi fumo mufuma ulubuuto lwa kabeshamulilo mwaba ne nsandesande shimo ishilenga ukusanika bwino ulubuuto. Abasoma sayansi batila ulubuuto lwa tubeshamulilo lubomfiwa ku kucebushishako utukota nelyo utulume kabili imisango yapusapusana iya tubeshamulilo tusanika ulubuuto lwapusanapusana.

Bushe tamulesumina ukuti umusango utu tushishi twapangilwamo wa kulumbanya Uwatulengele, Yehova Lesa? Ca cine, nge fyo kemba wa malumbo alandile ati, “lekeni icipema conse citashe Yehova. Aleluya!”—Amalumbo 150:6.

[Abatusuminishe Ukubomfya Icikope pe bula 31]

© Darwin Dale/Photo Researchers, Inc.