Ica Kutwafwa Ukucingilila Abana Besu

Uyu mwaka wapwile umwanakashi uwikala ku Virginia, ku United States of America, alembele kalata wa kutasha pa citabo citila Sambilila Kuli Kasambilisha Mukalamba. Atile: “Ilyo abeshikulu bandi bashilaya mu kusendama, batila: ‘Mama, tubelengeleniko ilyashi mu citabo ca kwa Yesu.’ Umo ali ne myaka 4, umbi 6, umbi na o ali ne myaka 7 kabili balaipakisha sana ukukutika kuli aya malyashi.”

Nakulwibo alondolwele ukuti: “Nabelengele icipandwa 32 icakwata umutwe wa kuti: ‘Ifyo Yesu Acingililwe.’ Nalitemenwe sana ifyebo fyaba muli ici cipandwa, pantu pa numa ya kulanda pa fyo Yehova acingilile Yesu, calilanda na pa fyo abana bafwile ukucita pa kuti bacingililwe. Catila: ‘Nga ca kuti umuntu aesha ukucite ci, bilikisha mu kushipa ati: “Lekeni fyo! Nalamusosela.”’

Banyina Betsaida umukashana wa myaka 5, aba ku Mexico bena batile, uno muku wa bubili balebelengela umwana wabo mu citabo citila Sambilila Kuli Kasambilisha Mukalamba. Kabili batila: “Icalo cileya cilebipilako fye, kabili abana besu bali mu bwafya sana. Umwana wandi umwanakashi alatasha sana pa fyebo fyaba mu cipandwa 32 ifilanda pa fyo engaicingilila ku bantu abacita ifyabipa ifilumbwilwe muli ici cipandwa.”

Icitabo ca kuti Kasambilisha Mukalamba ica mabula 256 icaba ne fikope ifisuma na mabula ayakalamba nga ino magazini, calyafwa sana abafyashi ukukonka filya Baibolo yabeba ukutila balefunda abana. (Amapinda 22:6). Ifyebo ifili muli cino citabo filanda pa fyo Yesu asambilishe, lelo nangu fyalyanguka ukumfwa fikumine abantu ba mishinku yonse. Pa kupokako ici citabo lembeni fye aka kapepala e lyo no kukatuma ukubomfya adresi ilipo nelyo adresi yalinga pa yali pe bula 5 muli uno magazini.

□ Ndelomba muntumineko icitabo ca kuti Sambilila Kuli Kasambilisha Mukalamba

□ Mukwai kuti mwaisamona, ndefwaya ukusambilila Baibolo pa ng’anda.