Ubwafya: Nga ca Kuti Ubwafya Mukwete te Kuti Bupwe

BUSHE mwalilwala ubulwele ubushipola, nelyo mwalilekana na bena mwenu? Bushe mwalikwetepo umuntu uo mwatemenwe uwafwa? Nga ca kuti mwalikwata amafya ayo mushingapwisha, kuti mwalamona kwati tapali ifyo mwingacitapo. Kabili kuti mwalati fye, ‘bushe te kuti mbuke fye kasuba kamo no kusanga ubwafya na bupwa?’ Kuti mwacita shani nga caba ifi?

UMUNTU UO BAIBOLO YALANDAPO: PAULO

Umutumwa Paulo aali ni mishonari mu nshita ya batumwa kabili aleya mu fyalo ifyalekanalekana mu kushimikila. Lelo inshita imo bamupeele imilandu ya bufi no ku mulesha ukufuma mu ng’anda pa myaka ibili, babikako na bashilika ba kumulonda. Na lyo line, Paulo taikalile fye ukulaililila ubulanda, lelo abikile amano ku kucita ifyo aali na maka ya kucita. Alebomfya Icebo ca kwa Lesa ukukoselesha abantu bonse abaleya mu kumutandalila. Alilembele na makalata ayaba muli Baibolo.—Imilimo 28:30, 31.

IFYO ANJA ACITA

Nga fintu tulandilepo mu cipande ca kubalilapo, Anja na o tafuma pa nse. Anja atile, “Ubulwele bwa kansa bwalilenga nilacita ifintu ifyo nalecita kale. Apo nshifwaya ukwambula amalwele na yambi nalileka incito, kabili ndafilwa ukuya mu kwangala na banandi.” Cinshi cayafwa Anja ukushipikisha? Atile, “Nomba icingafwa kwalula inshila incitilamo ifintu. Nga ndefwaya ukucita fimo, mbalilapo ukutantika ificindeme sana, kabili ndebukisha ukuti kwaliba ifyo nshingaba na maka ya kucita. Ukucita ifi kulalenga ndemona ukuti kanshi na ine wine kuti nabomba imilimo imo.”

IFYO MWINGACITA

Nga ca kuti amafya mwakwata yalalenga muleumfwa sana ubulanda, muleeshako ukucita ifi:

• Mulecita ifintu ifyo mwingaba na maka ya kucita. Ku ca kumwenako, nangu ca kuti ubulwele mwalwala te kuti bupole, muletukushako umubili, mulelyako ne fya kulya ifingalenga mwakwata ubumi ubusuma, kabili mulelaala ama-awala ayalinga.

• Pangileni libela ifyo mulefwaya ukucita ku ntanshi. Lyena tantikeni ifyo mukacita pa kuti mukafikilishe ifyo mulefwaya ukucita. Cila bushiku mulecitapo fimo ifingalenga mukafikilishe ifyo mufwaya ukucita ku ntanshi.

• Mulebombako utumilimo utunono pamo nga ukuwamya apo mwacilila no kusamfya imbale, utwingalenga mwalamona ukuti na imwe paliba imilimo iyo mwingabomba bwino. Ukucita ifi kukalenga mwaba ne nsansa. Mulefwala bwino. Nga mwashibuka mulebalilapo ukubomba imilimo iicindeme sana.

• Muletontonkanya pa fisuma ifilemucitikila. Ku ca kumwenako, bushe ubwafya mwakwata bwalilenga mwasambilila ifya kushipikisha amafya? Bushe kuti mwakoseleshako bambi abali na mafya ukwishiba ifya kushipikisha?

Icishinka ca Kuti: Nangu ca kuti te kuti mukwate amaka ya kupwisha ubwafya bwenu, kuti mwaalula ifyo mutontonkanya pali ubo bwafya.