Ifipusho Ilingi Fipushiwa na Balefwaya Ukwishiba Icine

Nga Lesa kutemwa, mulandu nshi asuminishisha ububifi?

LESA alisuminisha ububifi, kabili abantu abengi babucitila ku mufulo. Ku ca kumwenako, balemya inkondo, ukuponesha amabomba pa bana, ukonaula isonde, no kulenga ifipowe. Abengi balapeepa fwaka no kulwala kansa wa kuli bapwapwa, bacita ubucende no kwambulamo amalwele, balanwensha no kulwala ubulwele bwa ku libu, na fimbipo. Abantu ba musango yo tabafwaya ububifi ukupwa. Bafwaya fye ukufumyapo ifya kufumamo fyabipa. Lintu balobolola ico babyele, balilishika ati, “Ine nalishama fye?” Kabili bapeela Lesa umulandu, kwati fye ni filya fine filanda Amapinda 19:3 ukuti: “Ubupumbu bwa muntu bonaula umweo wakwe, kabili afiitilwa SHIKULU.” (The New English Bible) Kabili nga ca kuti Lesa abaleseshe imicitile yabo iyabipa, kuti bailishanya ukuti bapokwa ubuntungwa bwa kucita ifyabipa!

Umulandu ukalamba Yehova asuminishisha ububifi wa kwasuka ukusonsomba kwa kwa Satana. Satana Kaseebanya asosele ukuti Lesa te kuti akwate abantu pe sonde abengatwalilila aba cishinka kuli Wene nga bayeshiwa. (Yobo 1:6-12; 2:1-10) Yehova alisuminisha Satana ukubapo pa kuti akwate inshita ya kushininkisha ukusonsomba kwakwe. (Ukufuma 9:16) Satana acili aleleta amalanda, ukwalula abantu ukufuma kuli Lesa, ilyo aleesha ukushininkisha ukusonsomba kwakwe. (Ukusokolola 12:12) Nangu cibe fyo, Yobo asungilile bumpomfu bwakwe. E fyo na Yesu acitile. Na Bena Kristu ba cine e fyo bacita.—Yobo 27:5; 31:6; Mateo 4:1-11; 1 Petro 1:6, 7.

Kuti natemwa ukusumina muli paradise wa pe sonde umo abantu bakekala ku ciyayaya, lelo bushe ico tacili ca kwelenganya fye?

Te fyo Baibolo ilanda. Cimoneka kwati ca kwelenganya fye ico abantunse babelesha ububi pa nshita ntali. Yehova alengele isonde no kweba abantunse ukuliisushamo abaume na banakashi abalungami abali no kusakamana ifimenwa ne nama no kusungilila ukuyemba kwa liko mu cifulo ca kulyonaula. (Moneni amabula 12 na 17.) Mu cifulo ca kulatila ati ubulayo bwa Paradise tabwakafikilishiwe, ubu bwine bwikashi bwa nomba ubwaisulamo amalanda ububipishe nga nshi e bushifwile ukutwalilila. Bukapyanwapo na Paradise.

Kuti nayasuka shani abantu abapumya no kusosa ukuti Baibolo lushimi fye kabili tayumfwana ne fya sayansi?

Ukutetekela aya malayo te bucisuminesumine fye. “Ukutetekela kufuma ku caumfwika.” Pa kusambilila Icebo ca kwa Lesa, tulomfwikisha amano ya ciko ne citetekelo cesu cilakula.—Abena Roma 10:17; AbaHebere 11:1.

Ukusambilila pa fyashulwa ifyakuma ku fya mu Baibolo kushininkisha bucine bwa lyashi lya kale ilya mu Baibolo. Sayansi wa cine filomfwana na Baibolo. Ifishinka fyakonkapo fyali mu Baibolo imyaka iingi ilyo fishilaishibikwa ku basoma: ukukonkana kwa nshita isonde lyalepekanishiwamo, ukuti isonde lyalibulungana, ukuti talyakwata apo lyakobama mu lwelele, no kuti ifyuni filakuuka ukufuma ku ncende imo ukuya kumbi.—Ukutendeka, icipandwa 1; Esaya 40:22; Yobo 26:7; Yeremia 8:7.

Ukupuutwamo kwa Baibolo kumonekela mu kusesema kwafikilishiwa. Daniele asobele ukwima no kuwa kwa fyalo fyakwatisha amaka, ne nshita Mesia ali no kwisa no kwipaiwa. (Daniele, ifipandwa 2, 8; 9:24-27) Ilelo, ukusesema na kumbi kucili kulefikilishiwa, ukwishibisha shino ukuti ni “nshiku sha kulekelesha.” (2 Timote 3:1-5; Mateo, icipandwa 24) Ukwishibila libela ukwa musango yo te kwa mu maka ya muntu. (Esaya 41:23) Ku bushininkisho bwalundwapo, moneni icitabo ca Baibolo—Cebo ca Muntu Nelyo ca kwa Lesa? ne citabo ca Is There a Creator Who Cares About You?, ifyasabankanishiwa na Watchtower Bible and Tract Society.

Kuti nasambilila shani ukwasuka amepusho ya mu Baibolo?

Mufwile ukusambilila Baibolo no kwetetulapo, pa nshita imo ine ukulomba umupashi wa kwa Lesa ukumutungulula. (Amapinda 15:28; Luka 11:9-13) Baibolo itila “nga umo uwa muli imwe abulwa amano, alombe kuli Lesa uupeela fye kuli bonse ukwabulo kwebaula, kabili yakapeelwa kuli wene.” (Yakobo 1:5) Ukulundapo, kwaliba ifya kwafwa ukusambilila Baibolo ifingawama ukumonamo. Ilingi line tulakabila ukwafwiwa ukufuma ku bantu bambi, kwati ni fintu fye Filipi asambilile no mwina Etiopia. (Imilimo 8:26-35) Inte sha kwa Yehova balasambilisha Baibolo ku bantu abalefwaya ukwishiba icine mu myabo ukwabula ukubalipilisha. Mwiumfwa insoni ukubepusha ukuti na imwe bamusambilisheko.

Mulandu nshi abengi bakaanina Inte sha kwa Yehova no kunkaanya ukusambilila na bo?

Yesu alolenkene na balekaanya umulimo wakwe uwa kushimikila, kabili asosele ukuti na basambi bakwe bakalolenkana na bakaanya. Lintu bamo batemenwe imisambilishishe ya kwa Yesu, bashimapepo balekaanya baotweke abati: “Bushe na imwe namulufiwa? Bushe bamo pali bakateka nalimo pa baFarise balimutetekela?” (Yohane 7:46-48; 15:20) Abengi abamweba ati mwilasambilila ne Nte nalimo tabaebwa fye bwino pa lwa Nte nelyo baba fye ne mpatila. Sambilileni ne Nte no kuimwena mwe bene nga ca kuti mukeshibilapo ifingi pali Baibolo nelyo iyo.—Mateo 7:17-20.

Mulandu nshi ba Nte batandalila abantu abakwata no ko bapepa?

Ilyo bacita ifi bakonka ica kumwenako ca kwa Yesu. Aile ku baYuda. AbaYuda balikwete uko balepepa, lelo imipepele yabo yalipaaswike ku Cebo ca kwa Lesa mu nshila fye ishingi. (Mateo 15:1-9) Inko shonse shaliikwatila imipepele ya shiko, nampo nga ni yo batila Ubwina Kristu nelyo iishili ya Bwina Kristu. Calicindama ukuti abantu bekatilile ku fisumino fyumfwana ne Cebo ca kwa Lesa, kabili ukubombesha kwa Nte mu kwafwilisha abantu ukucita ico kulangilila ukutemwa abanabo.

Bushe ba Nte basumina ukuti imipepele fye yabo e yalungama?

Uuli onse uwacindika imipepele yakwe afwile ukutontonkanya ukuti uko apepa e kwa cine. Nakana nga te ifyo, mulandu nshi engatwalilila ukupepako? Abena Kristu bakonkomeshiwa ukuti: “Awe lingululeni fyonse, ikatisheni icawama.” (1 Abena Tesalonika 5:21) Umuntu afwile alingulula ifisumino fyakwe ukumona nga filomfwana na Malembo, pantu na kuba kwaba fye icitetekelo ca cine cimo. Ilembo lya Abena Efese 4:5 lilashininkisha ici ilyo lisosa ukuti “Shikulu umo, ukutetekela kumo, ulubatisho lumo.” Yesu tasumine mu fyo abengi ukwabula ukusakamana basuminamo ukuti kwaba imisebo iingi, e kutila imipepele iingi, yonse iitungulula kwi pusukilo. Lelo wena asosele ukuti: “Inshila iitwala ku mweo ya kamfyemfye kabili yalifyenenkana, kabili banono abaisanga.” Inte sha kwa Yehova basumina ukuti balisanga iyo nshila. Nakana nga te ifyo, kuti bafwayako imipepele imbi.—Mateo 7:14.

Bushe basumina ukuti e bakapusuka fye beka?

Iyo. Abantu abengi aba ku kale abashali Inte sha kwa Yehova bali no kubuushiwa no kupeelwe shuko lya kuba aba mweo. Abengi abali aba mweo nomba kuti basambilila icine no kuba abalungami ilyo “ubucushi bukalamba” tabulaisa kabili bakesapusuka. Ukulunda pali ici, Yesu asosele ukuti tatulekabila ukulapingulana. Ifwe tumona fye ku nse; Lesa amona mu mutima. Amona mu kulungika no kupingula mu luse. Apeela ubupingushi kuli Yesu, te kuli ifwe iyo.—Mateo 7:1-5; 25:31.

Misangulo nshi iya ndalama yenekelwa ku besa ku kulongana kwa Nte sha kwa Yehova?

Ukulosha ku misangulo ya ndalama, umutumwa Paulo atile: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Mu Mayanda ya Bufumu aya Nte sha kwa Yehova na pa fifulo balonganina ukulongana kukalamba, takuba ukupishamo imbale yakubikamo umutulo. Muba fye utubokoshi twa misangulo pa kuti uwatemwa ukupoosamo umusangulo engapoosamo umwine. Takuli uwishiba ifyo bambi bapeela. Bamo kuti bapeela ifingi ukucila bambi; bamo te kuti bakwate na kali konse aka kupeela. Yesu alangilile icifwaikwa lintu alandile pa lwa mbokoshi yali mwi tempele na pa lwa balepoosamo imisangulo: Icifwaikwa ni bukapekape no kupeela ukulingana no mo umo akwatile, te bwingi bwa ndalama iyo.—Luka 21:1-4.

Nga ca kuti naba Inte ya kwa Yehova, bushe na ine nkalafwaikwa ukushimikila nge fyo bashimikila?

Ilyo umo aishiba bwino pa lwa Paradise wa pe sonde uwalaiwa uukatekwa na Kristu, alafwaisha sana ukwebako bambi. Na imwe bene e fyo mukacita. Ni mbila nsuma!—Imilimo 5:41, 42.

Ukucita fi e nshila yawamisha iya kuishibishishamo ukuti muli basambi ba kwa Yesu Kristu. Muli Baibolo, Yesu etwa ukuti “inte ya cishinka kabili iya cine.” Ilyo ali pe sonde aleshimikila, ukusosa ukuti: “Ubufumu bwa mu muulu nabupalama,” kabili atumine abasambi bakwe ukucita cimo cine. (Ukusokolola 3:14; Mateo 4:17; 10:7) Mu kupita kwa nshita, Yesu akambishe abakonshi bakwe ukuti: “E ico kabiyeni, kalengeni aba nko shonse ukuba basambi, . . . mulebasambilisha.” Asobele no kuti ilyo impela ishilaisa, “imbila nsuma iyi ya bufumu ikabilwa ku fyalo fyonse ku kubo bunte ku nko shonse.”—Mateo 24:14; 28:19, 20.

Kwaba inshila ishingi isha kubilishishamo iyi mbila nsuma. Ukulanshanya ne fibusa na bo twaishibana na bo ilingi line kulatupa ishuko lya kushimikila. Bamo bashimikila ukupitila mu kulemba bakalata nelyo pa foni. Bambi batumina abo baishibana na bo ifitabo fyabamo ifyebo ifyo bengatemwa. Pa kuti fye beshako nangu umo, ba Nte baya ku ng’anda ne ng’anda ukweba abantu ubukombe.

Mu Baibolo mwaba ubwite busuma ubutila: “Umupashi na Nabwinga batila, Iseni: no uleumfwa asose, ati, Iseni; no uleumfwe cilaka ese, uulefwaya abuulepo ica bupe amenshi ya Mweo.” (Ukusokolola 22:17) Umulimo wa kwebako bambi pa lwa Paradise wa pe sonde na mapaalo ya iko ufwile ukubombwa mu kuitemenwa, pa mulandu wa kufwaisha mu mutima ukushimikilako bambi imbila nsuma.

Natwishiba ukuti mucili ne fipusho na fimbi pa lwa Nte sha kwa Yehova ne fyo basuminamo. Napamo fimo ifyo twalandapo filemoneka ukuba ifyakosa. Kuti twatemwa ukwasuka ifipusho fyenu. Tatukwete fye incende ya kumulondolwela fyonse muli uno broshuwa, kanshi kuti mwaipusha fye ba Nte ababela uko kwine mwikala. Kuti mwabepushisha napamo pa kulongana kubela pa Ng’anda yabo iya Bufumu nelyo lintu bamutandalila pa ng’anda pa mwenu. Nelyo kuti mwatumina amepusho yenu ku Watch Tower, ukusalapo adresi walinga pa yatantikwe pe samba.