Umulandu Cakosela Ukucite Fisuma

LINTU Sauli alecita ifintu fyabipa, nani alesekelela?— Ni Satana Kaseebanya. Lelo na bashimapepo ba baYuda na bo bene balesekelela. Lyene ilyo Sauli aishileba umusambi wa kwa Kasambilisha Mukalamba no kulaitwa ati Paulo, balya bashimapepo balimupatile. E co, wamona umulandu cikosela umusambi wa kwa Yesu ukucite fisuma?—

Inshita imo shimapepo mukalamba uwaleitwa ati Anania aebele abantu ukuuma Paulo pa menso. Anania aeseshe no kubika Paulo mu cifungo. Paulo aliculile sana lintu asangwike umusambi wa kwa Yesu. Ku ca kumwenako, abantu ababifi baumine Paulo no kwesha ukumwipaya ku kumupoola amabwe.—Imilimo 23:1, 2; 2 Abena Korinti 11:24, 25.

Abengi bakesha ukulenga ifwe ukucita ifya kukalifya Lesa. E co tontonkanya pali fi, Bushe ukutemwa kobe ukwa fisuma kukalamba atemwa kunono? Bushe walitemwe fisuma ica kuti kuti wacite fisuma na lintu bambi bakupatilapo? Cikabila ukushipa pa kucite fyo, bushe te ifyo?—

Lelo kuti waipusha ukuti, ‘Mulandu nshi abantu bengatupatila pa kucite fisuma? Bushe tabafwile ukutemwa?’ E fyo wingamona. Ilingi abantu baletemwa Yesu pa fintu ifisuma ifyo alecita. Inshita imo, abantu bonse aba mu musumba balilongene pa mwinshi wa ng’anda afikilile. Balishile pantu Yesu aleposha abalwala.—Marko 1:33.

Lelo inshita shimo abantu tabaletemwa ifyo Yesu alesambilisha. Nangu ca kuti lyonse alesambilisha ifyalungama, abantu bambi balimupatile pantu alelanda icine. Ici cacitike bushiku bumo mu Nasarete, mu musumba Yesu akuliile. Aile mwi sunagoge, umo abaYuda balekumana ku kupepa Lesa.

Mulya Yesu alandile ilyashi lisuma ilya mu Malembo. Pa kubala abantu batemenwe ili lyashi. Balipapile pa fyebo ubusuma ifyalefuma mu kanwa kakwe. Balifililwe ukusumina ukuti uyu ali e mulumendo uwakuliile mu musumba wabo wine.

Lyene Yesu alandile icintu cimbi. Alandile pa nshita lintu Lesa ali no kutemwa abantu abashali abaYuda. Ilyo Yesu alandile fi, abali mwi sunagoge balikalipe. Bushe walishiba umulandu bakalipile?— Baletontonkanya ukuti bena beka e bo Lesa atemenwe. Baletontonkanya ukuti balicila abantu bambi. E co bapatile Yesu pa fyo alandile. Kabili bushe walishiba ifyo baeseshe ukumucita?—

Baibolo itila: ‘Baikete Yesu no kumutamfya mu mushi. Bamutwele ku mbali ya lupili ku kuyamufuntula no kumwipaya! Lelo Yesu alibafyukile.’—Luka 4:16-30.

Nga ca kuti ico calicitike kuli iwe, bushe kuti wabwelela kuli balya bantu ku kuyabashimikila pali Lesa?— Ico kuti cakabila ukushipa, bushe te ifyo?— Lelo, ilyo papitile umwaka, Yesu alibwelele ku Nasarete. Baibolo itila: ‘Alebasambilisha mwi sunagoge.’ Yesu talekele ukulanda pa cine pa mulandu wa kutiina abantu abashatemenwe Lesa.—Mateo 13:54.

Bushiku bumbi, pe sabata, Yesu ali mu ncende umwali umuntu wakwete ukuboko ukwaumina, nelyo ukwalemana. Yesu alikwete amaka ukufuma kuli Lesa aya kuposha ulya muntu. Lelo abantu bamo abaliko baleesha ukuletela Yesu amafya. Cinshi Kasambilisha Mukalamba ali no kucita?— Pa kubala aipwishe ati: ‘Nga mwalikwete impaanga iyaponene mu cilindi pe Sabata bushe kuti mwaifumya?’

Ee, kuti bacite co ku mpaanga, na pe Sabata, ubushiku ubo balingile ukutuusha. E co Yesu alandile ati: ‘Cawamapo ukwafwa umuntu pe Sabata, pantu umuntu alicila impaanga!’ Bonse nomba balimwene ukuti Yesu afwile ukwafwa uyu muntu pa kumuposha!

Yesu aebele ulya muntu ukutambika ukuboko kwakwe. Lilya line fye kulya kuboko kwalipolele. Fintu ulya muntu asekelele! Lelo ni shani ulwa balya bantu bambi? Bushe balisekelele?— Iyo. Calengele bacishamo ukupata Yesu. Balifuminepo no kupangana ifya kumwipaya!— Mateo 12:9-14.

E fyo caba na lelo. Te mulandu ne fyo tucita, tatwingasekesha bonse. E co tufwile ukusala untu tulefwaya ukusekesha icine cine. Nga ni Yehova Lesa no Mwana wakwe Yesu Kristu, ninshi lyonse tufwile ukucita ifyo basambilisha. Lelo nga twacite fyo, nani akatupata? Nani akalenga catukosela ukucite fisuma?—

Ni Satana Kaseebanya. Nga bambi ni bani?— Ni balya ababepwa kuli Kaseebanya ukusumina ifintu fyabipa. Yesu aebele bashimapepo ba mu nshiku shakwe ati: “Imwe muli ba kwa shinwe Kaseebanya, ne fya lunkumbwa fya kwa shinwe e fyo mufwayo kucita.”—Yohane 8:44.

Kwaliba abantu abengi abo Kaseebanya atemwa. Yesu abeta ati “aba pano isonde.” Bushe uletontonkanya ukuti “aba pano isonde” Yesu alelandapo ni bani?— Natumone Yohane icipandwa 15, icikomo 19. Palya tubelengapo aya mashiwi ya kwa Yesu aya kuti: “Amuba aba pano isonde, aba pano isonde nga batemwa ababo bene; lelo ico tamuli ba pano isonde, lelo ine namusalile mu ba pano isonde, e co aba pano isonde bamupatila.”

E co aba pano isonde abapata abasambi ba kwa Yesu ni balya bantu bonse abashili bakonshi bakwe. Mulandu nshi aba pano isonde bapatila abasambi ba kwa Yesu?— Tontonkanyapo. Kateka wa pano isonde nani?— Baibolo itila: “Pano isonde ponse palaala mu maka ya Mubifi.” Uyo mubifi ni Satana Kaseebanya.—1 Yohane 5:19.

Bushe nomba wamona umulandu cakosela ukucite fisuma?— Satana ne sonde lyakwe balenga cilekosa. Lelo kwaliba na cimbi icilenga. Bushe ulecibukisha?— Mu Cipandwa 23 ica cino citabo, twasambilile ukuti bonse tufyalwa no lubembu. Bushe tacakawame lintu ulubembu, Kaseebanya, ne sonde lyakwe fikaba nafipita?—

Baibolo ilaya ukuti: “Pano isonde paleya.” Ici cilepilibula ukuti bonse abashili abakonshi ba kwa Kasambilisha Mukalamba tabakabeko. Tabakasuminishiwe ukwikala umuyayaya. Bushe walishiba abakekala umuyayaya?— Baibolo ilanda no kuti: “Uucito kufwaya kwa kwa Lesa ekalilila umuyayaya.” (1 Yohane 2:17) Ee, ni balya fye abacite fisuma, abacita “ukufwaya kwa kwa Lesa,” e bakekalilila umuyayaya mu calo cipya ica kwa Lesa. E co nangu calikosa, tulefwaya ukucite fisuma, bushe te ifyo?—