Ku Nkupo

Mwe balumendo na bakashana,

Yehova Lesa, Shinwe uwa ku muulu, alimutemwa sana. Afwaya mwaba ne nsansa. Nalimo mulepusha amuti, ‘Bushe kuti cacitika ukuba ne nsansa muno nshiku?’ Ici icipusho cisuma sana. Pantu na kuba amafya nayafula nga nshi. Cimoneka kwati cila bushiku kulaba amafya ayengatupwishisha insansa. Lelo Shifwe uwatutemwa alatwafwa! Icebo cakwe cilatupanda amano pa kuti twishibe ifyo twingashipikisha amacushi. Nangu ca kuti Baibolo bailembele kale, ukufunda kwabamo kulabomba na muno nshiku nga filya fine kwalebomba ilyo fye bailembele.—Amalumbo 119:98, 99; 2 Timote 3:16, 17.

Twamilembela cino citabo pantu twalimitemwa. Tulefwaya muleba ne nsansa no kulaikala bwino. Kanshi, tulemikoselesha ukubelenga icitabo conse. Kabili lyonse ilyo mwakwata ubwafya mulebelenga icipandwa icilelanda pali ubo bwafya. Umulandu umo uo cino citabo cilembelwe, kumisambilisha ifya kulanshanya bwino na bafyashi benu. Tulesubila ukuti mukalabelengela pamo na bafyashi ifipande fimo fimo no kulanshanya na bo. Muleumfwila abafyashi benu pantu balikwata amano kabili balipitamo mu fyo mulepitamo!

Lesa amupaale,

Ibumba Litungulula Ilya Nte sha kwa Yehova