Ifya Kubomfya Cino Citabo ca Fisontelelo — Watchtower LAIBRARE YA PA INTANETI

IFYA KUBOMFYA CINO CITABO CA FISONTELELO

IFILIMO NO BUCINDAMI FIKWETE

Inte sha kwa Yehova nabatemwa ukupekanya cino citabo ca fisontelelo umuli impapulo ishafuma ne shapitulukwamo isha myaka ilangililwe.

Ifipande fimo ifiba lyonse mu Ulupungu lwa kwa Kalinda, muli Loleni! na mu Ubutumikishi Bwesu Ubwa Bufumu fili pa nshi ya mitwe ikalamba iikwete ishina lya ifyo fine fipande ifibamo lyonse, pamo nga IFIPUSHO UKUFUMA KU BABELENGA.

Kuti mwasanga ifyebo na fimbi pa fya kubomfya Icisontelelo mu mpapulo ishili pa mutwe ukalamba uwa kuti ICISONTELELO CA MPAPULO SHA WATCH TOWER.

Cino citabo cikamwafwa sana ukupekanya umulimo wa mwi bala, amalyashi ya mu cilonganino, e lyo na lintu mulesambilila mwe bene. E lyo kabili cili no kumwafwa na mu lupwa e lyo na mu fintu fye fimbi ificitika cila bushiku.

ICISONTELELO CA AMALYASHI

Ifyo Amalyashi Yatantikwe. Imitwe ikalamba itantikwe ukulingana no mo yakonkanina mu afabeti. Imyaka yena, iletendeka na mashiwi ya kuti “Umwaka wa,” nge fi “Umwaka wa 1914,” e lyo nga ni mpendwa pamo nga 144,000, yena iletendeka na “Ba144,000.” (Amanambala yambi ayashala yaletendeka ne shiwi lya kuti “Inambala,” nge fi “Inambala 666.”) Amashiwi yambi ayashala ukubikako fye na mashina ya fifulo, yakonkele fye afabeti. Ku mashiwi yamo yamo kulebikwako amashiwi na yambi pa kuti cingeshibikwa bwino bwino ico tulelandapo na pa kuti aya mashiwi yengatantama bwino bwino ukulingana no mo yakonkanina mu afabeti (ica kumwenako ADAMU [Umuntu wa Ntanshi]; ADAMU, UWA KULEKELESHA; ADAMU NA EFA).

Utumitwe tunono na to tukonkene ukulingana na afabeti, e lyo yambi yakonkene ukulingana ne fyo amanambala yakonkana. Imitande ya myaka, nga ilya iili pa mutwe wa kuti INSHIKU (Kalenda), ilembelwe ukulingana ne fyo imyaka ikonkana. Umutande wa malembo, nga yalya ayali pa mutwe wa kuti BUCISHINKA BWA BAIBOLO, yalembelwe ukulingana ne fyo yakonkana mu Baibolo. Amanambala yambi yaletantikwa ukulingana ne fyo yakonkana pa kupenda.

Ifya Kusanga Ifyebo. Ifyebo fitantikwe ukulingana ne lyashi te kulingana no mutwe wa cipande nangu icipandwa. Nomba amashiwi ya mpikwe ayali pa mutwe kuti yamwafwa ukwishiba umutwe ukalamba uwa lyashi ilyo mulefwaya.

Pa kufwaya ifyebo, intanshi mulingile ukwishiba ilyashi, e lyo nomba mwafwaya ishiwi ililelondolola ifyo mulefwaya, e lyo mwalafwaya umutwe ukalamba uyo wine. Inshila isuma iya kufwailamo amashiwi, kwishiba ishiwi ilya kulungatika ilya co mulefwaya, pantu imitwe ilembelwe ukulingana ne fyo mulefwaya. Katulangilile, tutile mulefwaya ifyebo pa lwa kubikwamo umulopa, ninshi mulingile ukuya pa mutwe wa kuti UKUBIKWAMO UMULOPA te kuya pa mutwe wa kuti UMULOPA.

Nga mulefwaya ifyacitike mu mulimo kuti mwafisanga pa mutwe wa kuti IFYACITIKE MU MULIMO WA MWI BALA na pa mitwe imbi iikalamba iikumine ilyashi ilyo mulefwaya, ukubikako fye na pa mitwe ya mashina ya mpapulo. E lyo kumbi uko mwingasanga ifyebo ni pa mutwe we shina lya calo uko ifyo mulefwaya fyacitikile.

Amashina ya bantu te lingi yalembwa nge mitwe ikalamba. Amashina yamo kuti mwayasanga pa mutwe wa kuti AMALYASHI PA BUMI BWA NTE SHA KWA YEHOVA. Amashina ya baNte ayalembwa mu cisontelelo yatantikwa pa mitwe ikalamba iya fyalo uko babombela.

Pa mitwe ikalamba apalembelwe imitande ya mashina nangu imitande ya myaka, ilingi line epo bengamulangilila uko mwingasanga imitwe ya fili pa mutande. Pali iyo mitwe epo mwingasanga impapulo na shimbi ukwa kusanga ifyebo. Ica kumwenako fye, pa mutwe wa kuti UKULONGANA KWA CITUNGU, Umutande Ukulingana no Mwaka, pali umutwe wa kuti “2005, ‘Icumfwila ca Bukapepa.’” Nga mwamona umutwe ukalamba uwa kuti “UKULONGANA KWA CITUNGU UKWALETI “ICUMFWILA CA BUKAPEPA (2005), mwalamona impapulo shonse ishilelanda pali uku kulongana ishili mu cisontelelo. Ukulongana kwa citungu ukushakwete umutwe kuti mwakusanga pa mutwe ukalamba uwa musumba umo wabelele, nga fintu caba pa mutwe wa kuti COLUMBUS, OHIO, AMABUNGANO.

Nga mwasanga umutwe ukalamba, intanshi belengeni imitwe na imbi iya kuloshako iili pe samba lya mutwe ukalamba. Iyi mitwe kuti yamulangilila na kumbi uko mwingasanga ifyebo pa lyashi ilyo mulefwaya. Nga tapali imitwe na imbi iya kuloshako ninshi kuti mwatampa fye ukubelenga utumitwe tunono. Pe samba lya tumitwe tumbi utwa mu kati palaba utumitwe utunono utwingi, e lyo kabili limo limo pa numa fye ya mitwe na imbi iya kuloshako, kuti bamwebela libela ukuti pali utumitwe na tumbi pe samba pa kuti nga mwatemwa kuti mwamona fye bwangu bwangu pali uto tumitwe.

Nga tamusangile ishiwi nangu ilyashi ilyo mulefwaya nangu nga ca kuti ifyebo mulefwaya tafili pa mutwe uo mwacilamonapo, esheni ukumona amashiwi ayapalana ne lyo ishiwi ilyo mwacilafwaya nangu limbi kuti mwafwaya fye ilyashi ilingakumako.

Nangu mwingasanga impapulo sha kuloshako, mulingile ukwibukisha ukuti pa mutwe umo te kuti pabe umutande wa mpapulo shonse ishabako. E ico kuti cawamisha sana ukumona imitwe na imbi iikalamba.

Icishibisho: Ishiwi lya kuti “Abasambi ba Baibolo” nga lyalembwa muli uyu musango, lilosha ku Nte sha kwa Yehova ukutampila mu nshiku sha kwa C. T. Russell ukwisafika mu 1931, ilyo twatampile ukubomfya ishina lya kuti Inte sha kwa Yehova.

ICISONTELELO CA MALEMBO

Amalembo Ayalimo. Muli fye ifikomo ifya kuti fyalilondololwa. Kanshi, nga ca kuti ifyebo filelondolola umo ilembo lilolele, no kulondolola ukwatampiile ilyashi, no kulanda ico ilembo lyalembeelwe, nangu ukulondolola bwino ukwafuma ishiwi no bwafya lyakwata, ninshi kuti lyabikwamo mu katabo, pantu ninshi icikomo conse nangu fye lubali lumo ulwa cikomo nafilondololwa.

Amalembo ayakosha fye icishinka ca filelandwapo mwi lembo lelo ayabula ukulondololwa tayabikilwemo. Katulangilile, ilembo lya Esekiele 18:4 kuti lyabomfiwa ku kulangilila fye ukuti umweo ulafwa. Kanshi nga caba ifi, ilembo lya musango uyu te kuti libikwemo, pantu ninshi talilondolwelwe.

Ifya Kusanga Ifyebo Ifyalondololwa. Amanambala ya mabula ayakonkana mu fisontelelo (pamo nga 23-5) ni ayo fye ayakwete ilembo, ilya kuti nalibikwamo, no kulondololwa nalilondololwa. Limbi te kuti ilembo limoneke pe bula lya kubalilapo ililangililwe; lelo ubulondoloshi bwena kuti limbi epo bwatendekela. E lyo limbi kuti ubulondoloshi bwa cikomo bwatendeka, e lyo pa kati mwasangapo ifyebo na fimbi, e lyo ubulondoloshi ku ntanshi bwatwalilila. Kanshi mulingile mwashininkisha ukuti mwabelenga amabula yonse ayalangililwe.

IMPAPULO SHA KULOSHAKO

Ifyo Impapulo Shitantikwe. Impapulo sha kuloshako shitantikwe ukulingana ne myaka, umwaka uwa nomba line e ubalilepo. Mu kati ka cila mwaka, ifyebo fikonkene fi: Ulupungu lwa kwa Kalinda, amaBaibolo, ifitabo, ututabo na mabroshuwa, Loleni!, e lyo na Ubutumikishi Bwesu Ubwa Bufumu. Ifisontelelo fya mu Ulupungu lwa kwa Kalinda, Loleni!, na Ubutumikishi Bwesu Ubwa Bufumu fitampiile ku lupapulo lwa kubalilapo ukuyashinta ku lwa kulekelesha ulwa mwaka umo na umo.

Natwishiba ukuti cino citabo cili no kumwafwa bonse mwe babika amano ku kusambilila Baibolo “pa kuti muleikala ukulingana ne fyo Yehova afwaya pa kuti mulecita lyonse ifya kumusekesha ilyo muleya muletwala ifisabo mu mulimo onse uusuma kabili ilyo muleya muleishibilako Lesa bwino bwino.”—Kol. 1:10.