Bushe Kuti Wasumina Baibolo?

“CALIBA bwino umupwilapo mu cine cine ukusosa ukuti nga ca kuti wakumanya umuntu umo uutunga ukukanasumina mu kusanguka, uyo muntu mumbulu, uwatumpa nelyo alipena.” Ni shani fintu aya mashiwi ya waishibisha ifya bumi Richard Dawkins yakwambukila? Nga ca kuti walisumina Baibolo, mu kupalako walisumina mu bubumbo ukucila mu kwelenganya kwa kusanguka. Bushe ico cipilibula ukuti, pamo ngo wasumina Baibolo, uli mumbulu, uwatumpa, nelyo uwapena?

Languluka, na kabili, ubu bulondoloshi bwa kuti: “Abasambilila Icipingo Cipya balimika ukucila pa kutwishika ukuli konse ukwabamo kupelulula ukuti Yesu wa mu fyalembwa fya mu kubangilila ifya Bwina Kristu ku cipimo cimo aba lushimi lwa kwelenganya kwa Bwina Kristu.” Aya mashiwi muli The Weekend Australian yalandilwe na Dr. Robert W. Funk, profesa wa pa universiti ya masambililo ya butotelo kabili kalemba wa fitabo fyafulilako pa kwiluka kwa butotelo.

Dr. Funk aleteleko umulimo uwaishibikwa nga Jesus Seminar (Ukukumanina pali Yesu), ibumba lya bacila pa basambilila Baibolo umwanda umo abo capamo ababebetele ifyebo fya kwa Yesu ifyalembwa muli Baibolo. Pa kati ka fintu fimbi, basondwelele ukuti Ipepo lya kwa Shikulu talyashikilwe na Yesu; ukuti Yesu tasosele ukuti abafuuka bakapyana isonde nelyo ukuti abacito mutende baketwa abana ba kwa Lesa; kabili ukuti tasosele ati: “Ni ne kubuuka kabili umweo: uuntetekela . . . takafwe umuyayaya.”—Yohane 11:25, 26; Mateo 5:5, 9; 6:9, 10.

Nangu cingati ukusondwelela kwabo kuti pambi kwakutulumusha, tabali abaibela. Baba ca kufumamo ca kulengulula kwa Baibolo ukwa muno nshiku, kabili imfundo shapalako shalisambilishiwa mu maseminario ya butotelo pa nshita imo. Nakalimo walitalama pa kuumfwa Baibolo ukupilikwa na basayantisiti. Lelo ilintu intungulushi sha butotelo babika ukutwishika pali bucine bwa calembwa ca Baibolo, kuti pambi wapapa nampo nga ili ni nshita ya kulanguluka cipya cipya icifulo cobe cine. Bushe cilimo amano ukusumina Baibolo ilintu abalamuka abengi mwi bala lya butotelo mu kushininkisha tabalecite fyo?