“Bonse Abo ababa mu Nshishi sha Cibukisho”

BUSHE kuti waba uwashininkisha ukuti abengi aba bafwa bakaba abomi na kabili? Ee, apantu Yesu asosele ukuti: “Mwisunguka pali ici; pantu inshita ileisa, iyo bonse abo [ababa mu nshishi sha cibukisho, NW] bakomfwamo ishiwi lyakwe, no kufumamo.” (Yohane 5:28, 29) Moneni inumbwilo “inshishi sha cibukisho,” iyaba iyaibela kuli New World Translation. Itwibukishako ulwa kucindama kwa cibukisho ca kwa Lesa mu kubuushiwa.

Mulandu nshi ukupilibula kwa lyonse, ukwa “nshishi,” takwabomfiwe? Pantu Yesu tabomfeshe ishiwi lya kufusha ilya ciGreek taʹphos, ilipilibula “inshishi” nelyo “ukwa kushiikwa.” Mu cine cine, te bonse abafwa abashiikilwe mu nshishi sha cine cine, nelyo taʹphoi. Nangu ni fyo, abo abo Lesa abwesha ku bumi mu kubuushiwa baba mu cibukisho cakwe. Ici calilangililwa mu kubomfya kwa kwa Yesu ukwa musango wa kufusha uwa mne·meiʹon, ilyapilibula mu kupalamisha ku mashiwi ya kutendekelako aya ciGreek ukupilibula “ukwibukisha.” (Mateo 16:9; Marko 8:18) Greek-English Lexicon iya kwa H. G. Liddell na R. Scott ipilibula mne·meiʹon pamo nge “icibukisho, ukwibukisha, icalembwa ca muntu nelyo icintu, . . . inshishi, . . . ya cinkumbawile, icaimikwa ca cibukisho.”

Muli fyo, New World Translation ipusanya pa kati ka mashiwi taʹphos na mne·meiʹon. Na kabili calicindama ukumona ukuti amabupilibulo ayengi aya Baibolo mu kupalako yabomfya inumbwilo shapusanapusana shibili pali Mateo 23:29 apo amashiwi yonse yabili aya ciGreek yamoneka. Revised Standard Version ipilibula yene nge fyakonkapo: “Mukuula inshishi [umusango wa taʹphos] uwa bakasesema no kuyemfya ifyaimikwa fya cibukisho [umusango wa mne·meiʹon] uwa balungama.”

Kabumba wa muntu talaba umusango wa bumi ubwa makana ya mamilioni ya bantunse abaikalako abomi. (Ilumbo 139:16; 147:4; Mateo 10:30) Mu nshita yakwe iyalinga, akebukisho ababa mu “nshishi sha cibukisho” no kubabwesha ku bumi pe sonde lyasangululwa. Fintu twaba abakoseleshiwa no kusansamushiwa pa kwishiba ukuti icibukisho capwililika ica Lesa te kuti cifilwe!—Ukusokolola 20:11-13.