“Twalikwata Nomba Iŋanda Yesu Iya Bufumu”

IFINGI fyalisabankanishiwa pa lwa Mayanda ya Bufumu ayakuulwa mu kwangufyanya mu fyalo pamo nga Great Britain, Canada, na United States. Icaishibikwa panono, nangu cibe fyo, cishinka ca kuti ififulo fya kupepelamo ifikuulwa mu kwangufyanya ifya Nte sha kwa Yehova fyalikuulwa pa makumi ya myaka mu fitwa ifyalo fyatumpuluka.

Mu fyalo fya mu Africa Inte sha cikaya ilingi bakuula ifibombelo fya pa nshita inono ku mabungano ya citungu mu milungu fye. Ifi tafyabomba fye nge fifulo fya kulonganinamo no mwa kutushisha ukufuma ku kasuba kakabisha mu ncende shakaba lelo na kabili ngo mwa kulaala amakombe. Ifyakukumanya fyapalako kuti fyasoswa pali Central America.

Ku ca kumwenako, mu Guatemala City, Guatemala, umusangulo wa $200 walituminwe ku Cilonganino ca Vivibien ica Nte sha kwa Yehova. Lintu Nte wa cikaya apeele incende ya mpanga mu ncende ya ku mushi, Inte shapingwilepo ukubomfya umusangulo ku kukuula icipaka calinga ico icangabomfiwa ku kulongana kwabo.

Insengu shali no kubomfiwa ku kucingilila ukufika ku butali ukwa mita imo na citika; ukusumbuka ukucila apo pali icifulo ca kwingisha umwela. Capingwilwepo ifyo icipaka cilingile ukuba amamita 4 ukufushiwa na mamita 6 mu bukulu. Lintu baeluda ba mu cilonganino batandalile icifulo, ku kupapushiwa kwabo basangile pa ntanshi ya cifulo ca mpanga ifikako fya nsengu ifingi, amamita 6 ukufika ku mamita 9 ubutali kabili ukufuma ku sentimita 8 ukufika ku masentimita 13 ukushinguluka. ‘Mulandu nshi te kuikuulila pa Cibelushi cikakonkapo?’ e fyo basosele.

Pa bushiku bwakonkelepo ubwa pali Citatu, amapange ya bukuule yalilanshanishiwe. Pali Cine munyina ashitile amalata ya pa mutenge, na umbi ashitile imbao, kabili na umbi ashitile insunga. Ukufika pali Cine mu cungulo imbao shaliputwilwe mu kubangilila mu kulinga icipimo, kabili balitendeke ukupanga amakapuloshi ya musango wapala A mu kuba no kusangwilako kwa malata. Ukufika pali Cisano ubushiku amakapuloshi yalipekanishiwe.

Mu kubangilila pa Cibelushi ulucelo, icimbayambaya casendele amakapuloshi ne mbao shimbi, ifya kupangila umutenge, ne nsunga ukuya pa mushi. Ba motoka bane basendele abaume mupepi na 50, abanakashi, na bana ukuya pa mushi. Ukufika 8:00 a.m. bonse baali nabafika.

Ifilindi fyalimbilwe mu libwe lyakosa ilipuuko mulilo lyapokelele impanda shikalamba. Mu kubangilila, Inte shashitile ukufuma ku mwine wa mpanga ya nsengu ifikako 50 ifya nsengu pa masenti 12 cimo cimo—ubwingi bonse ubwa kusungisha ubwa $6. Mu kwangufyanya, impanga shaputawile insengu. Ishi shaliputawilwe kuli soo muli mita umo na citika mu butali no kupindikapo cimo pa kati.

Lintu amakapuloshi yabikilwe mu cifulo, amaboko yambi yalepopa insunga mu nsengu shapindikwa ishaololoka pa cifutu, citika umo ku nse na citika umbi mu kati, pa kuti insengu shabulungana ishicebusha kuti shayemfya fyonse ifibili ifibumba fya mu kati pamo pene na ku nse. Icakonkelepo, umutenge walibikilwepo lintu bambi batendeke ukuleta amabwe ne fya busali ku kushimina pa nshi pa fiko. Pa ntanshi tapalafita icipaka ca maawala 12 calipwishishiwe, kabili bamunyina babwelele ku sha myabo mu musumba ne mitima ya buseko.

Icakonkelepo, amabula ya nsengu yalibikilwe pa nshi pa fiko, kabili ifipuna fimo ifya kupeta na mabenci yanono yamo aya nsengu ayapangilwe ukufuma ku nsengu shishabomfiwe yalimikwe. Nomba Iŋanda ya Bufumu yalipekanishiwa ku kulongana kwa kubalilapo.

Mu fyalo ifingi ifya ncende shakaba—Africa, Pacific ne fishi fya Caribbean, Asia, Mexico, Central na South America—umo nakalimo amamilioni ya Nte sha kwa Yehova bekala, ifipaka fimo ifyayanguka ifya musango yo fyalileta ubuseko ku Nte sha cikaya pantu kuti basoso kuti: “Twalikwata nomba Iŋanda yesu iya Bufumu.”