Ulutampulo lwa Mano pa Ntanshi ya Kayofi
APO abana ba kwa Mary baali nabakula, alikwete nshita no kupingulapo ukukwata incito ya ku mubili iya nshita lubali. Ilyo aebele umulume wakwe, Enos, nangu cibe fyo, acilengele ukumfwika ukuti takwaliko ukukabila kuli wene ukucite fyo. “Nga ca kuti kuti nakupayanishisha na bana, kuti mu cituntulu nacita pa lwa babili aba ifwe,” e fyo asosele. Mu cifulo ca kulenga umukashi wakwe ukubomba lwa ku mubili, atubulwile ukuti mu kubamo ipepo alanguluke ukuba painiya, kabilisha wa nshita yonse uwa Bufumu.
Nangula Mary aleipakisha ukwakana ubukombe bwa Bufumu pamo na bena mupalamano, aali uwa nsoni kabili abulishe ukuicetekela. Nalyo line, alefwaya ukukonka ukufunda kwa mulume wakwe. E co, mu kuba no kusakamikwa, alilembeshe pamo nga painiya wa kwafwilisha mu April 1981.
Mary mu kwangufyanya alundulwile ukutemwa ku mulimo wa kushimikila Ubufumu uko ashabalile akumanya kale. Mu kwangufyanya, aletungulula amasambililo ya Baibolo aya mu ŋanda yane na balesekelela. Mu kati ka mwaka umo abele painiya wa nshita yonse, ukutungulula amasambililo ya Baibolo ikumi limo. Christine, Inte ya kwa Yehova uwakwata abana babili abacili ku sukulu, mu kucincimuka ailundile kuli Mary pamo ngo munankwe muli bupainiya. Abapya abalesekelela batendeke ukulasangwa ku kulongana pa Ŋanda ya Bufumu iya cikaya, uko umupashi usuma uwa bupainiya walekula. Kabili ubuseko bukalamba ubwa kwa Mary bwaishile ilyo umwana wakwe wine umwaume, Christopher, asalilepo ukukonka ica kumwenako cakwe kabili na o abele painiya.
Lyene, mu kupumikisha, mu 1985 akayofi kalipamine. Mary aliponene. Aneurysm mu mutwe wakwe yatungulwile ku kusuuma kwa mulopa ukwingi muli bongobongo, kabili mu kati ka nshiku shitatu Mary wa myaka ya bukulu 45 alifwile.
Mu kati ka iyo myaka ine iya kucita bupainiya, nangu cibe fyo, Mary alikuulile ukwiminina kusuma mu bwikashi bwakwe. Icililo cakwe casangilweko ukucila pa bantu 300, ukusanshako abena mupalamano abengi. Umo uwa balipo aali ni cibusa wa ku sukulu uwaebekeshiwe ku citetekelo ca kwa Mary, afwaile ukusambilila ifyafulilako pali cene, kabili aipwishe ulwe sambililo lya Baibolo. Ubutumikishi bwa kwa Mary bwali bucili buletwale fisabo.
“Ndi painiya wa kwafwilisha ne mwine nomba,” e fisosa Enos, “kanshi nga nailundile fye kuli Mary ilyo alecita bupainiya. Lyonse alelanda pa lwa fyakukumanya fyakwe kabili aali uwa nsansa nga nshi. Na kuba, iyo myaka inono yaali e imo iyacilapo insansa iya bumi bwesu capamo, lelo ni lino fye e lyo ningatesekesha ifyo cali.”
Takuli umuntu uwingasobela ilyo “inshita ne ca mankumanya” fingapwisha conse, nga fintu cacitile mu kukanaenekela nga nshi mu mulandu wa kwa Mary. Nangu cibe fyo, abo abatwalilila aba busumino pamo nga bakabilisha ba Bufumu baebekesha abene ukwishibikwa kwasenaminwa kuli bonse Lesa no muntu, nangu fye ni mu kulolenkana na kayofi.—Lukala Milandu 9:11; 11:1, 2.
[Ifikope pe bula 31]
Ukwakana mu butumikishi ni nshita yapooswa bwino