Imyendele Iipulamika Isambilisho lya kwa Lesa

Nomba line fye, ibumba lya bangalila ilya kampani mu Caracas, Venezuela, lyalembele kalata kuli baeluda na babomfi batumikila ba cilonganino ca mupepi ica Nte sha kwa Yehova. Muli yene balembele ukuti: “Twalipokelela ifya kuloshako fisuma nga nshi pa lwa bantu mu butotelo bwenu ukukuma ku kuyumfwa kwabo ukwa kushingamwa no bufumacumi. Cili ni pali uyu mulandu nomba twamutununukila. Pa mulandu wa kubulwa ababomfi, tulekabila mu kampampa abantu babili ku kwisusha ififulo fyakonkapo: umo ukuba namutekenya na umbi ukuba maneja wesu uwa musungilwa ifipe. Tukatasha sana ifyebo ifili fyonse ifyo mwingapayanya ukukuma ku muntu umo mu cilonganino cenu nelyo umo mu cipalemeko. Mu cituntulu tatulefwaya ukwingishe ncito ababomfi abashili Inte. Twapaapaata, twishibisheni nangu fye nga ca kuti takuli nangu umo, apantu tukapembelela ukwankulako kwenu pa ntanshi ya kucita ukupingulapo ukuli konse.”

Pa numa ya kusanga kalata mwi samba lya ciibi ca Ŋanda ya Bufumu, umo uwa baeluda mu cilonganino atandalile umwine wa kampani kalelandwapo. Umwine alibomba ne Nte sha kwa Yehova pa myaka 15 kabili aibukishe ukukanakwata impika shabipisha na babomfi bakwe Inte. Aloseshe kuli bene nga babomfi ababombesha, abasakamana, abafumacumi, na ba mukoosha. Lyene alundilepo ukuti: “Nalishiba ukuti tamutekelesha incitatubi, kabili mulabatamfya. Ico cilanga ukuti icilonganino cenu tacifwaya ukuba ulubali lwa babombela pamo na ba musango yu.”

Imyendele ya musango yo ipulamika isambilisho lya kwa Lesa. (Tito 2:10) Kabili cili ca kufumamo ca kufwaisha kwa cine cine ku kwikatilila mu kupalamisha ku fishinte fya mibele isuma ifyalondololwa muli Baibolo.