Cinshi Cikacitika ku Fifulo Fyashila Ifya Kristendomu?

BAKASABANKANYA ba citabo Holy Places of Christendom, kuli kashula wa fyashikama Stewart Perowne, bepusha ukuti: “Ni ani, te mulandu ne cishilano ca Bwina Kristu atuntukako, engeminina pa Calvary mwi Calici lya Kubuuka [nelyo, Icalici lya Nshishi Yashila] pa Yerusalemu ukwabula umwenso: pantu muno mu cifulo cacindikishiwa kabili nelyo fye ukulwilwapo pa myanda ya myaka, e cifulo cine ica pa kati ica Kristendomu.”

Takwabako nangu umo uwaba na maka ya kushinina ukuti ili calici lyakuulilwe pa Calvary, apo Yesu Kristu afwilile. Na kuba, pa ntanshi kateka wa ciRoma Konstantino talapingulapo ukukuula icalici palya, itempele lya cisenshi lyali pali ilya ncende. Mu kulundapo, Yesu asosele ukuti: “Lesa Mupashi, na bamupepa bali no kumupepela mu mupashi na mu cine.” (Yohane 4:24) Bakapepa ba musango uyo tabashinshimuna ififulo fyapangwa “ifyashila”.

Pa nshita imo, Yerusalemu aali cifulo ce tempele lya kwa Lesa na muli ifyo icifulo ca pa kati ica kupepa kwasanguluka. Pa mulandu wa kubulwa bucishinka kwa bekashi ba mu musumba, nangu cibe ifyo, Yehova Lesa aliushile, nga fintu Yesu asobele. (Mateo 23:37, 38) Yesu na kabili asobele ukupomonwa kwa ico cifulo ca pa kati ica butotelo, cintu abengi batwalilile ukumona nge cifulo cashila. Amashiwi yakwe yalifikilishiwe lintu Abena Roma baonawile Yerusalemu ne tempele lya uko mu 70 C.E.—Mateo 24:15, 21.

Ubusesemo bwa kwa Yesu mu kwangufyanya bukakwata ukufikilishiwa kukalamba pa bufumu bonse ubwa butotelo ubwa Kristendomu, ubo atunga ukuba icifulo cashila. Kristendomu ne ncende shakwe ishashila nomba filolenkene no bonaushi ukupitila mu maka ayakanya ubutotelo ayetwa “ica makankamike icipomona.” (Daniele 11:31) Inte sha kwa Yehova mu buseko bakapayanya ifyebo pa lwa fintu ici ca kuponako ca kutulumusha cikacitika.

[Icikope pe bula 32]

Akalicalici mu kati ke Calici lya Nshishi Yashila

[Abatusuminishe]

Pictorial Archive (Near Eastern History) Est.