“Inte sha kwa Yehova?”

ICIPUSHO cili pa mulu camoneke ngo mutwe muli Bulletin of the University of Helsinki iya lulimi lwa ciFinnish. Pe samba lya mutwe pali kalata iyalembelwe na Profesa Jorma Palo, kabili yasosele mu lubali ukuti: “Naloleshe mu kupalamisha pa cishibilo calambatikwa ica universiti yesu icapulintilwe pa nkupo ya Bulletin. Pa kati ka citika wa pa mulu, nasangile icalembwa ca ciHebere ubupilibulo ubo naipwishe umweni wandi umuYuda. Ukulingana na uyu uwasambilila, uwaishiba iciHebere, ili shiwi ni ‘Yehova’ mu ciFinnish.”

Ukubapo kwe shina lya pa lwakwe ilya kwa Lesa pa cishibilo calambatikwa ica iyi universiti ya ciFinnish kwapapwishe bamo. Na kabushe, nangula ni fyo, universiti yakokola imyaka 350, kabili lintu yakuulilwe, ishina Yehova lyalishibikwe mu kusaalala no kubomfiwa ukupulinkana Europe. Ishina lilamoneka pa fikuulwa ifingi ifishingapendwa ifya cintubwingi, amakobili, ne fishibilo fyalambatikwa ifyo fyatunganishiwa ukulembwa ukufuma kuli ico ciputulwa ca nshita.—Moneni broshuwa Ishina lya Bulesa Ilikatwalilila Kuli Pe na Pe.

Mu mwanda wesu uwa myaka, Kristendomu tabomfya na kabili ishina lya kwa Lesa, kabili ubo buseko bwa mu kubangilila muli lyene bwalilabwa apakalamba. Libumba fye limo e libomfya ishina lya bulesa mu kupepa no kulisabankanya mu kusaalala, mu kumfwana no kulomba kwa kubalilapo mwi Pepo lya kwa Shikulu ukuti: “Shifwe wa mu mulu, ishina lyenu libelwe akatiina.” (Mateo 6:9) Uyo e mulandu, lintu ishina lyaishibikwe pa cishibilo calambatikwa pa universiti, abantu mu kwangufyanya batontonkenye ulwa Nte sha kwa Yehova.

[Abatusuminishe Ukubomfya Icikope pe bula 32]

Yliopisto