Ubutotelo bwa ‘Citetekelo Cakondenkana’

“Amaka ya buMormon ku kunonka icitendekelo cakosa ponse pabili muli budemokrasi bwa bukapekape na mu bwikashi bwa totalitariani caba cipapwa.” E fyamwene The Wall Street Journal lintu kamfulumende ya mu Hungary yapeele ukusuminisha kwakumanina kuli Church of Jesus Christ of Latter-day Saints. Ni shani fintu icalici linonka ici? “Ulufungulo,” ukulingana na Journal, “te kufula fye kwa cipimo ca kufyala icasumbuka ica baMormon nelyo ukwananya kwa mu kwangufyanya ukwa citetekelo cabo. Ukucila, caba kukondenkana ukwakuulwa mu citetekelo.” Shani ifyo?

Ukulanda pa lwa ciputulwa ca nshita pa ntanshi ya kwaluka kwa nomba ukwa bupolitiki mu Europe wa ku Kabanga, Journal yasosele ukuti: “Pa kubomfya amabumba ya kwimba no kucinda ukufuma ku Brigham Young Universiti, baMormon balikwata amaka ya kucila pa kulama no kukanaumfwana uko ilingi line kulolenkana na bamishonari mu fyalo ifingi ifya buKomyunisti,” e fisosa Journal. Amabumba yabo yaliya ku Romania, Czechoslovakia, Hungary, Poland, Russia, na China, pamo pene na ku Saudi Arabia, Libya, Egypt, Jordan, Somalia, na Israel. Mu kulundapo, “icuma ce Calici lya baMormon calibomfiwa nge ca kwiswilako ku kwingililako mu cisumino ca buMarx ne Fyalo Fipiina.” Ukukuula amalalo no kwimba ifishima fyaba pa kati ka milimo iyafwilishiwa ne misangulo ya baMormon.

Mu calo ca lelo icatemwa umusamwe kabili icafunukila indalama, te ca kupapa ukuti imicenjelo ya kukopeka iya kwimba no kucinda no kwaafwa mu fya ndalama ifya musango yo fyalikwata ukwipukisha kwakosa. (2 Timote 3:2, 4) Lelo mu cine cine abantu bapala impaanga bacebushiwa kwi shiwi lya kwa Kacema Musuma, Yesu Kristu. (Yohane 10:27) Uyo e mulandu, lintu akambishe abakonshi bakwe ukuti “kalengeni aba nko shonse ukuba abasambi,” tasosele ukucite fyo inshila ishili shonse nelyo pa mutengo uuli onse lelo pa ‘kubasambilisha ukubaka fyonse ifyo alandile.’ (Mateo 28:19, 20) Mu kufikilisha uku kutumwa, takwaba ncende ya kusuusukako ku fipimo fya Baibolo.