Tukabila Umuntu Umo uwa Kukutika
PAMO nga bantunse, twesha ukusanga ubuseko no kwikushiwa mu bumi. Lelo lintu impika sha pa lwesu shaimako, ifyo caba ica kwaafwa ne ca kusansamusha ukukwata umo uyo twingalandako amafya yesu!
E fisosa Dr. George S. Stevenson ukuti: “Ukulanda pa fintu kulaafwa ukwilulula ukukanshika kobe, kulakwaafwa ukumona ukusakamikwa kobe mu lubuuto lwamonekesha, ilingi line kulakwaafwa ukuti umone ico wingacita pa lwa cene.” Dr. Rose Hilferding amwene ukuti: “Bonse tulingile ukwakana amafya yesu. Tulingile ukwakana ukusakamikwa. Tulingile ukuyumfwa ukuti kuliko umo uuli uwaitemenwa ukukutika kabili uuli na maka ya kumfwikisha.”
Kwena, takwaba umuntunse uwingesusha uku kukabila mu kukumanina. Pa mulandu wa kupelebela pa nshita ne fya kusangwilako fimbi, abantunse banensu abacetekelwa te kuti pambi babeko lintu twabakabila apakalamba, nelyo kuti pambi twashimunuka ukulanda pa milandu imo nelyo fye ne fibusa fyapalamisha.
Nangu cibe fyo, Abena Kristu ba cine tababala ababulisha ukutwi kwa kumfwa umupwilapo, apantu inshila ye pepo lyonse epo yaba. Baibolo mu kubwekeshabwekeshapo itukoselesha ukupepa kuli Lesa, Kabumba wesu, uo ishina lyakwe ni Yehova. Tulakambishiwa ukupepa mu kufumaluka, mwi shina lya kwa Yesu, kabili mu kumfwana no kufwaya kwa kwa Lesa. Nangu fye milandu ya pa lwesu ne ya pa mbali yaliba milandu yalinga ukupepela. “Mu fintu fyonse lekeni ifya kulomba fyenu fiishibikwe kuli Lesa,” e fyo twaebwa pa Abena Filipi 4:6. Mwandi ca bupe ca kupapusha! Kateka Mulopwe wa kubumbwa konse lyonse aliba uwaiteyanya ukusengela no kupokelela amapepo ya babomfi bakwe abaicefya inshita iili yonse bafwaisha ukumutununuka.—Ilumbo 83:18; Mateo 6:9-15; Yohane 14:13, 14; 1 Yohane 5:14.
Nalyo line, bushe Lesa mu cituntulu alakutika? Bamo kuti pambi bapapa nampo nga ukufumamo cimo ukwe pepo kwapeleshiwa fye ku maka ya buntunse: Umuntu kuti apepa, ukutantika amatontonkanyo yakwe no kuyalumbulula mu mashiwi. Muli ifyo pa kuba nalondolola impika yakwe, afwaya ukupikulula kwalinga kabili alaba uwaibukila ku cili conse ico cingasangwila ku kukusanga. Lintu impika yakwe yapikululwa, kuti pambi atasha Lesa, lelo mu cine cine cali muntontonkanya wakwe no kubombesha e fyaleteleko ifya kufumamo fifwaikwa.
Abengi ilelo batontonkanya ukuti ico e cabako mu cituntulu kwi pepo. Bushe e fyo utontonkanya? Bushe amaka ye pepo yaba ayapeleshiwa nge fyo? Kwena, ukubombesha kwa muntu ukwa muntontonkanya no kwa ku mubili mu kumfwana na mapepo yakwe lubali lwacindama mu kupokelela amasuko. Ni shani, nangu cibe fyo, pa lwa lubali lwa kwa Lesa umwine mu mulandu? Bushe Lesa alakutika lintu ulepepa kuli wene? Bushe alalanguluka amapepo yobe nga yacindama, ukupeela ukusakamana ku filimo no kwankulako kuli yene?
Amasuko kuli aya mepusho yalicindama. Nga ca kuti Lesa tapeela kusakamana ku mapepo yesu, lyene ipepo talyakatama ukucila pa kwelenganya. Pa lubali lumbi, nga ca kuti Lesa alapokelela no kukutika mu buseko kuli limo limo ilya mapepo yesu, ifyo tulingile ukuba aba kutasha ku kupayanya kwa musango yo! Cilingile ukutusesha ukubomfya uko kupayanya cila bushiku.
Twamulaalika, lyene, ukutwalilila ukubelenga, ilyo iyi milandu ilelandwapo mu cipande cikonkelepo.