Abena Gibeone Bafwaile Umutende

UMUSUMBA uli pa nsunsu ya lupili uuli pa mulu waishibikilwa pamo ngo waba pa ncende pantu Gibeone aiminine, amakilomita yamo ikumi ukulola ku kapinda ka ku kuso aka Yerusalemu.

Mu kupalako walishiba ukuti Gibeone alilumbwike mu kwangufyanya fye pa numa lintu Yoshua atungulwile Israele ukwingila mu Calo Calaiwa no kucimfya Yeriko. Abena Kanaani ba ku Gibeone bamwensekeshe ukuti tabaali na kwansha Israele, uwakwete mu kulengama ukutungilila kwa bulesa. Cinshi cili no kucitwa? Ukwalukila ku mucenjelo, abena Gibeone batumine abeminishi ababepekeshe ukuba abalendo ukufumu ku calo ca kutali. Uku kubombesha ukulola ku mutende kwalitungulwike, pantu Israele acitile icipingo na bene. Lintu umucenjelo wabo wasansalikwe, abena Gibeone babele aba kutebe nkuni kabili aba kutapa amenshi.

Lesa afwile tafulushiwe na aba bantu abafwaile umutende. Atungilile ukupokolola kwa kwa Yoshua ukwa bena Gibeone lintu basanshilwe ne shamfumu shisano. Yehova acitile fye ne cipesha amano ica kulundako ulubuuto lwa kasuba kuli bulya bulwi.—Yoshua 9:3-27; 10:1-14.

Bakashula ba fyashikama basangile pali uyu mwina icilongoma cashika, nelyo icishiba, icapekwa mu cilibwe cakosa. Abena Gibeone baletentemuka pa matabo ukwingila muli ici no kutapa amenshi ukufuma pa nshi ya cishima. Bushe pambi ici cali “cishiba ca Gibeone” icalumbulwa pali 2 Samwele 2:13? Abashule fyashikama basangile na kabili imiputule ya pa nshi iya kusungilamo ifipe iyapekwa mu cilibwe ne fibombelo ifingi ifya kupangilo mwangashi. Ee, cimoneka ukuti Gibeone cali cifulo ca pa kati ica kupangilamo umwangashi.

Mu kati ka nshita ya kwa Davidi itenti, nelyo ihema, ilya kwa Lesa wa cine lyaimikwe pano. Imfumu Solomone aishile kuno ku kupeela amalambo. Yehova amoneke kuli Solomone mu ciloto no kumulaya “umutima wa mano, kabili uwa mucetekanya,” capamo ne fyuma. (1 Ishamfumu 3:4-14; 2 Imilandu 1:3) Icipande pa mabula 12-17 ica ulu lwafuma cilelangilila ukuti intuntuko sha bantu abaikele muno mu Gibeone bali ukucilisha abashuka pa kati ka luko lwa kwa Lesa pa nshita ya pa numa. Bushe nawishiba fintu cali?

[Abatusuminishe Ukubomfya Icikope pe bula 32]

Pictorial Archive (Near Eastern History) Est