Umulilo Wakumbamo Programu ya Bukuule

“UMULILO! Umulilo! Iŋanda ya Kulonganinamo iya Nte sha kwa Yehova ilepya!” Uko kukuuta kwa kupapusha kwaumfwikile icungulo kasuba cimo pali Cisano mu October 1989 mu Heerenveen, itauni lyaba ku kapinda ka ku kuso aka Netherlands.

Inte sha kwa Yehova bali nababomfya iyi ŋanda isuma pa myaka 11. Mupepi ne mpela ya mulungu iili yonse, amakana balebungana palya atemwa ku kulongana kwa muputule ukwa nshiku shibili nelyo ku bushiku bwa kulongana kwaibela. Cali cifulo cisuma ku makambisho ya Baibolo.

Ubusanso bwacitike ilintu umulimo walebombwa pa mutenge wa ŋanda. Mu maminiti fye, ubu busanso bwasangwile iŋanda mu kuba ifitantala filefutumune cushi. Ica kutasha, nangu cibe fyo, tapali uwacenenwe.

Aba bulanda pa lwa kulufya lelo abashafuupulwa, Inte bacitile amapange ku kukuula iŋanda ipya pa ncende imbi. Basangile incende yalinga pa Swifterbant, mu citungu ca Flevoland. Ulu lulamba lwa mu mpanga ya Zuider Zee, amamita 5 pe samba lya kubatama kwa bemba.

Pa ntanshi ya January 1991 icishibisho calipeelwe ku kutampa ukukuula Iŋanda ya Kulonganinamo ipya. Yali no kukuulwa pa kati ka May na September 1991. Imyanda ya Nte baliitemenwe ukubomba pa cifulo ca kukuulapo, kabili abacaice bamo bamwene umulimo nga pa kutanukila ku kubombela Yehova Lesa inshita yonse. Bakabomba abengi bafumine ku Belgium na England.

Icikuulwa capangwa mu kuyemba calikuulilwe. Icifulo mu ŋanda ya kulonganinamo na cafeteria fyapaatulwa ne mpito yakwata umutenge wa maglasi. Icikuulwa ca kulonganinamo icine cakwata ifipuna fya kwikalapo abantu 1,008, kabili bambi 230 kuti batamba programu pa ca kutambilapo ca televisioni mu cikuulwa cakonkapo.

Ilelo, amakana balesoso kuti: ‘Endeni, natunine tuye ku lupili lwa kwa Yehova, ukuti atulange imibele yakwe.’ (Esaya 2:2, 3) Iyi Ŋanda ya Kulonganinamo iipya ili fye cimo ica fifulo ifingi uko ukusambilisha kwa musango yo ukwa ku mupashi kulepeelelwa. Iŋanda ya Bufumu iya cikaya iya Nte sha kwa Yehova caba cifulo na cimbi. Kulya ukapokelelwa mu kukaba.