Balishile Te Mulandu no Kubipilwa no Busanso
UBUSHIKU bwali ni January 2, 1992. Icifulo—Maxixe, icitungu ca Inhambane. Ifiunda fya nshita ya bushiku ifya Mozambique ifya cina Africa fyalipumfyanishiwe apakalamba ilyo radio yaiswilwe. “Inte sha kwa Yehova balekwata Ibungano lyabo ilya ‘Bakatemwa ba Buntungwa’ mu citungu cesu,” e fyabilishe kabilisha wa pa mulabasa. “Imifwaile yabo ili ya kusambilisha abantu pa lwa fintu ubuntungwa bwa cine bwingasangwa mu calo ca lelo. Bonse bali abapokelelwa ukusangwako.”
Mulya mu cifutu cabela akatalamukila ica Africa, icintu ca kucebusha calecitika! Pa muku wa kubalilapo, ibungano lya citungu ilya Nte sha kwa Yehova lyalecitwa, kabili abantu 1,024 bali kulya ku kuipakisha lyene. Imyaka inono iyapitapo, ica kuponako ca musango uyo te kuti cicitike pa lwalala nga filya mu Mozambique, apantu umulimo wa Nte sha kwa Yehova pali iyo nshita wali pe samba lya cibindo. Bushe kuti wafwaya ukumfwa pa lwa malambo yashipa ayo yacitilwe pa kusangwa kuli ili bungano?
Icitungu ca Inhambane, ukupala incende shimbi ishingi isha Africa, caliyemba apakalamba. Amaato ya bulondo ayapala ama dhow (amaato yalebomfiwa na baArabu) mu kuba na matanga ya miŋoŋo itatu yenda pali bemba ukufuma ku lulamba. Ifimuti fya ngashi fyalifula. Lelo umwenso wabipa walyanana ku ncende ya ku nse ya misumba. Inkondo ya bana calo!
Kuli abo abesendeme mu misakuta yapangwa na mabula ya fimuti fya tuncindu mu maawala ya ku macaca, tacaba icishili ca lyonse ukushibushiwa ku ciunda ca boom-boom-boom ica minshinga mu ncende sha mu mishi ishapalaminako ilyo inkondo ya mu mpanga ilwikwa ubushiku bonse. Ilingi line nga nshi caba bana calo aba kaele e baculilamo. Inshita shimo abana balamonwa balesunkuta ne filundwa fya mubili ifyabulila nelyo ifyacenwa. Nangu fye bamo aba Nte sha kwa Yehova balikwata imikofu pa finso fyabo na pa mibili ukufuma ku bunkalwe ubo baculako.
Pe samba lya iyi mibele Ibungano lya “Bakatemwa ba Buntungwa” lyalitashiwe apakalamba kuli bonse abasangilweko. Te mulandu no kucitikako kwa kusansa kwa kubelamina mu nshila ukuya kwi bungano, amabumba ya ndupwa ayengi ukufuma mu mishi yali ayapampamina ukwisa. Nangu fye kusangwa kulya tacali icayanguka, apantu imyendele ya cintubwingi ilingi line yaba kunina mu cimbayambaya cikalamba. Inshita shimo abayendo 400 balatitikana mu cimbayambaya cimo! Ifi fimbayambaya fyafulilako filatantama ukupanga umulongo uyo ushindikwa na bashilika baipangasha ne fyanso.
Nora na bana banakashi bakwe batatu, aba mishinku ya myaka umo, itatu, na mutanda, bali lupwa lumo ulwaibikile mu busanso pa kwenda muli iyi nshila. Alisungile indalama pa myeshi yafulilako mu kubangilila ku kumanisha ukulipila ulwendo. Icishinka ca kuti takwali umwa kusendama mwakumanina mwabikilwe pe bungano tacamufuupwile. Capamo na bambi, Nora no lupwa lwakwe baipikile, ukuliila, no kusendama pa lwalala pa cifulo cine ice bungano.
Nangu fye ukukaba kwabipisha ukwakonkelwepo no kufumfumuka kwa mfula takwashimishe ukucankwa kwa bamunyina baleipakisha umutebeto wa ku mupashi capamo. Bayumfwile ukuti takwali icili conse icacindama kuli bene ukucila ukuba pali lilya ibungano. Ubwingi bwa bantu 17 balangishe ukuipeela kwabo mu menshi yakaba aya Indian Ocean. Ilyo ulubatisho lwalecitika, amabumba ya ba kutamba aba buseko balikuntilwe apakalamba ku kwimba amalumbo kuli Yehova.
Ili bumba lya bakapepa mu cine cine lyalisangile fintu cipilibula ukuba bakatemwa ba buntungwa bwa bukapepa. Hans, umwiminishi ukufuma ku musumba ukalamba, Maputo, asosele ukuti: “E lintu twamona fye ukutendeka kwa ca kucitika cipya mu mulimo wa Nte sha kwa Yehova muli ulu lubali lwa Africa.”