Inshita ya Kufwaya Lesa

ICIKOPE pali ili bula cili ca Acropolis ya ku Atena, iyali pa nshita imo icifulo ca pa kati ica kupepa imilungu ne milungu yanakashi iingi. Pe samba lya Acropolis paba Areopagi, iyasoswa ukuti yaali icifulo ca cilye ca bulungi mu nshita sha pa kale. Caali ni pali iyi ncende, mupepi ne myaka 2,000 iyapitapo, e po umutumwa Paulo aiminine no kupeela ilyashi lya kucincimusha mu cine cine. Ifyakonkapo e fimo ifyo alandile:

“[Lesa] alengele kuli umo inko shonse sha bantunse ku kwikala pano nse ponse, pa kulinge nshita sha shiko ishalingilwe kabela, no kupakule mipaka ya bwikalo bwa shiko, ku kuleka shifwaye Lesa, kuumfwa nalimo shingapampanta no kumusanga. Lelo na cine taba kutali kuli ifwe bonse; pantu muli wene e mo tumweno mweo, no kusunkana, no kuba.”—Imilimo 17:26-28.

Fintu ilyashi lya kale lyali no kuba ilyapusanako nga ca kuti umutundu wa muntu mu cinkumbawile baumfwilile amashiwi ya kwa Paulo! Nga ni nkondo shinga, ukucula kwakula shani, ifyali no kucilikilwa nga ca kuti abantunse baishibe ubuseko bwabo ubwa cinkumbawile ngo bufyashi bwa muntu umo uwabumbilwe na Shikulu Mulopwe, Yehova.

Ilelo, umutundu wa muntu walyakanishiwa kuli buluko, ukupusana kwa fifulo, ulupato lwa mushobo, ulufyengo lwa kwangalila pamo. Nalyo line, amashiwi ya kwa Paulo yacili yalabomba. Ifwe bonse twaba intuntuko sha uyo muntu uwabumbilwe kuli Lesa. Ifwe bonse, muli ayo mano, twaba bamunyina ne nkashi. Kabili tacilaba kucelwa ukufwaya Lesa ilintu engasangwa.

Amashiwi ya kwa Paulo yalaba ayakatama ukucila napo lintu twalanguluka amashiwi ya kupelako aya lyashi lyakwe. Asosele ukuti: “[Lesa] alingile ubushiku umo akapingwila aba pano isonde mu bulungami ku muntu uyo asontele; na pali ici apeele ca kuputule fikansa ku bantu bonse pa kumwimya ku bafwa.”

Ukubuushiwa kwa kwa Yesu kwaba cishinka ca mu lyashi lya kale, kabili nga fintu Paulo alangilila, caba kwebekesha kwa kuti kukaba ubushiku bwa bupingushi ku mutundu wa muntu. Lilali? Cisuma, natwishiba ukuti buli mupepi ne myaka 2,000 ukupalaminako ukufuma lintu Paulo aiminine pa Areopagi no kulanda aya mashiwi. Mu cine cine, ukufikilishiwa kwa busesemo bwa Baibolo kulangilila ukuti nabupalamina nga nshi. Mwandi litontonkanyo lyakatama! Fintu cili ice pamfya ukuti tufwaye Lesa mu kufumaluka konse, apantu, nga fintu Paulo aebeele abena Atena, “nomba akonkomesha abantu bonse konse konse ukulapila”!—Imilimo 17:30, 31.