Ukulobolola kwa kwa Kabila wa Mbila Nsuma wa Cine Cine

WILLIAM R. BROWN intanshi aile ku Africa mu 1923. Mu kuba no mukashi wakwe no mwana, ‘abombele umulimo wa bukabila bwa mbila nsuma’ mu Gambia, Ghana, Liberia, Nigeria, na Sierra Leone. (2 Timote 4:5) Ifisabo fya mulimo wakwe fyaba fya kupapusha.

Uyu mwikashi wa ku West Indies taali cilundwa ca macalici ya Kristendomu kabili mu kushininkisha taibimbile mu mapolitiki. Ukucila, apashenye Yesu na batumwa pa kusabankanya ishina na bumulopwe bwa kwa Yehova, ukukomaila pa bucindami bwa cilubula, no kushimikila imbila nsuma iya Bufumu. (Mateo 9:35; 20:28; Yohane 17:4-6) William R. Brown libili libili abomfeshe Baibolo, ukusonta kuli yene ngo bulashi bwa kupelako mu milandu ya cifundisho ne citetekelo. (2 Timote 3:16) Aali uwapampamina nga nshi pali ici ica kuti aishibikwe nga Bible Brown.

Mu kuba ne paalo lya kwa Yehova, imbuto shabyelwe na Bible Brown shalimenene no kukula. Ilelo, mu fyalo umo apanshile inshila, mupepi fye na bena Africa 200,000 balipeela ubumi bwabo kuli Kabumba wabo kabili, mu kukonkapo, balashimikile mbila nsuma iya Bufumu kuli bambi. (Mateo 24:14; 1 Abena Korinti 3:6-9) Aba Bena Kristu bacincila baishibikwa mu kusaalala ku bufumacumi bwabo no kushintililwapo. Baba aba cilumba pa kuba Inte sha kwa Yehova kabili abatekwa ba kwa Kristu, Imfumu ileteka.

Ukulobolola kwa musango uyo kwaba ca kufumamo ca bukabila bwa mbila nsuma ubwa cine cine ubwa Bwina Kristu. Ukulobolola kwapalako kulecitwa ukushinguluke calo mu calo cikalamba conse icaikalwamo. Mu fyalo fyacila pali 200, ukucila pa mamilioni yane abaume na banakashi aba mitima yafuuka “balilobololwa” kabili balebwekeshapo kuli bambi amashiwi ya kwa malaika walebile mbila aya kuti: “Tiineni Lesa, no kumupeelo mucinshi, pa kuti naiise nshita ya bupingushi bwakwe.” (Ukusokolola 14:7) Mu cine, inshila fye yeka ku kusange subilo mu nkulo yesu iyacushiwa ili kwalukila kuli Lesa no kunakila ku kuteka kwa Bufumu bwakwe.