Imimonekele Kuti Yaba ya Kukopeka

“TAMWABA ukucetekela mu mimonekele,” e fyasosele kalemba wa fyangalo wa ku Ireland Richard Sheridan. Ici ca cine ku fimuti na ku bantu nako kwine.

Kasuba kamo ku mpela ya March mu mwaka wa 33 C.E., Yesu Kristu amwene icimuti ca mukunyu ilyo wene na basambi bakwe baleenda ukufuma ku Betani ukuya ku Yerusalemu. Icimuti cali icalemba, lelo ukubebeta kwapalamisha kwasokolwele ukuti tacakwete icisabo nangu cimo. Yesu muli ifyo acebele ukuti: “Ebwekeshapo muntu nangu umo ukulyako ifisabo kuli iwe.”—Marko 11:12-14.

Mulandu nshi Yesu atiipile cilya cimuti apantu, nga fintu Marko alondolola, “tayali ni nshita ya makunyu”? (Marko 11:13) Cisuma, lintu icimuti ca mukunyu calemba, ilingi line cilatwala amakunyu ya mu kubangilila. Cali icishili ca lyonse ku cimuti ca mukunyu ukulemba pali ilya nshita ya mwaka. Lelo apantu cakwete amabula, Yesu mu kulungika aenekele ukusangako amakunyu kuli cene. (Mona icikope pa mulu.) Icishinka ca kuti icimuti cakwete fye amabula capilibwile ukuti cali no kuba icishitwala. Ukumoneka kwa ciko kwali ukwa kukopeka. Apantu ifimuti fya fisabo fyalelipilishiwa umusonko, icimuti icishitwala cali cisendo ca mu fya ndalama kabili calekabilwa ukuteetwa.

Yesu abomfeshe cilya cimuti cishitwala ica mukunyu ku kulangilila isambililo lyakatama ukulosha ku citetekelo. Ubushiku bwakonkelepo, abasambi bakwe balisungwike ukumona ukuti icimuti cali nacuuma kale kale. Yesu alondolwele ukuti: “Mube ne citetekelo kuli Lesa. . . . Fyonse ifyo mulepepela pa kulomba, tetekeleni ukuti namupoka, kabili fikaba kuli imwe.” (Marko 11:22-24) Mu kulunda ku kulangilila ukukabila kwa kupepela mu citete-  kelo, icimuti ca mukunyu icauma mu kulengama calangile icali no kucitikila uluko lwabulilwe icitetekelo.

Imyeshi imo mu kubangililako Yesu alingenye uluko lwa ciYuda ku cimuti ca mukunyu ico cali icishitwala pa myaka itatu kabili cali no kuteetwa nga ca kuti catwalilile ukukanatwala. (Luka 13:6-9) Pa kutiipa icimuti ca mukunyu inshiku fye shine pa ntanshi ya mfwa yakwe, Yesu alangile ifyo uluko lwa ciYuda talwaleteleko ifisabo fyawaminwa ukulapila na muli ifyo lwali mu mutande wa konaulwa. Nangu cingati lulya luko—ukupala icimuti ca mukunyu—ku nse lwalemoneka ulutuntulu, ukubebeta kwapalamisha kwasokolwele ukubulwa kwa citetekelo uko kwafikile pa kalume mu kukaana Mesia.—Luka 3:8, 9.

Mu Lyashi lyakwe ilya pa Lupili, Yesu asokele ukulwisha “bakasesema wa bufi” kabili asosele ukuti: “Mukabeshibila ku fisabo fyabo; bushe abantu basabe myangashi ku myunga, nalimo amakunyu kuli bacilasa? Awe, umuti onse uusuma utwale fisabo fisuma, lelo umuti uwa fye utwale fisabo ifyabipa. Umuti usuma te kuti utwale ifisabo fyabipa, nangu umuti ubi ukutwale fisabo fisuma. Umuti onse uushitwala fisabo fisuma ulatetwa, no kupooswa mu mulilo. Awe mukabeshibila ku fisabo fyabo.” (Mateo 7:15-20) Aya mashiwi ya kwa Yesu no bulondoloshi bwa cimuti ca mukunyu icatiipilwe mu kulengama filangisha ukuti tulekabila ukuba abapempwila lwa ku mupashi, pantu imimonekele ya butotelo nayo ine kuti yaba iya kukopeka.