“Nge Nkalamo Iilelila”

BUSHE walisumina ukuti Satana eko aba? Ilelo, abengi tabasumina. Cimoneko kuti bamona icisumino ca musango yo nga “icishili ca sayansi.” Nelyo fye ku numa mu 1911, Encyclopædia Britannica yasosele ukuti: “Sayansi yalilondolola ifingi nga nshi ifya mibombele ya cifyalilwa ca ku nse ne ya bumi bwa mu kati ubwa muntu ica kuti tayashako incende ku mibombele ya buSatana.” Abasambilila ifya butotelo bapelulula ukuti Satana aba fye cipasho, ulushimi. The World Book Encyclopedia ilondolola ukuti: “Abasambilila ifya butotelo abengi aba muno nshiku balanguluka Ciwa ukuba icipasho ca maka ya bubifi, aya mibele yabipisha iya cifyalilwa ca buntunse.”

Finshi, nangu ni fyo, fyaba ifishinka? Nga ca kuti walisumina muli Baibolo, uli no kusumina ukuti Satana wa cine cine. Yesu tasumine fye ukuti eko aba lelo na kabili amwitile “kateka wa pano isonde.” (Yohane 14:30) Umutumwa Paulo aitile Satana “lesa wa ino micitile ya fintu.” (2 Abena Korinti 4:4, NW) Kabili umutumwa umukoloci Yohane alandile ukuti: “Pano isonde ponse palaala mu maka ya Mubifi.”—1 Yohane 5:19.

Nga ca kuti tausuminishenye na Yohane, tontonkanya pa lwa lyashi lya kale ilya nomba line. Languluka impuka sha kwipaya no kubomfya kwa kulungulusha ukwa makamfulumende. Ibukisha inkondo no bukomi ifyo inkulo yesu yamona. Kabili ni shani pa lwa misoka yakaluka iiba e mitwe ya malyashi ya manyunshipepala yesu—ukwipayaulula kwakulisha, ubucende bwa kwikata kama, ukwipaya kwatwalilila, ukucenda kwa bana, ukulumbula fye ifinono? Bushe uuli onse ukucila pali Satana e wingaba lesa wa ici calo?

Umutumwa wa Bwina Kristu Petro asokele ukuti” “Loleni. Icibambe cenu, [Ciwa, NW] wine, endauka nge nkalamo iilelila, ukufwaya untu engalya.” (1 Petro 5:8) Nga ca kuti inkalamo yalelulumba mu bwina mupalamano bobe, bushe kuti mulelanshanya nampo nga e ko ili nelyo iyo? Nelyo bushe kuti wabutukila ku kufisama?

Ba uwaebekeshiwa ukuti Satana e ko aba. Takwata nkumbu kabili aba uwakaluka, kabili alikwatisha amaka ukutucila. E co butukila ku kucingililwa kuli Umo uwakwatisha amaka ukucilapo. “Ishina lya kwa Yehova lupungu ulwakosa, e mo abutukilo mulungami no kuba fye.” (Amapinda 18:10) Uba muli Yehova Lesa, kabili ishiba ukuti nomba line umutundu wa muntu ukalubulwa ukufuma ku kusonga kwa kwa ulya umubifi, Satana. Mwandi kutauluka kwa buseko uko kukaba!—Ukusokolola 20:1-3.