Bushe Uleibukisha?

Bushe waliipakisha ukubelenga ishafuma isha nomba line isha Ulupungu lwa kwa Kalinda? Nga ni fyo, ukwabulo kutwishika ulecisanga ica kusekesha ukwibukishe fyakonkapo:

▫ Bushinino nshi ubwa kushinina bwapeelwe ne mibombele yalekanalekana iya mupashi wa mushilo mu mwanda wa myaka uwa kubalilapo?

Iyi mibombele yapayenye ubushininkisho bumoneka ukuti Lesa talebomfya na kabili icilonganino cakokwele imyaka 1,500 ica kwa Israele nga bantu bakwe abaibela, lelo ukusuminisha kwakwe kwabikilwe nomba pa cilonganino cipya ica Bwina Kristu, icaimikwe no Mwana wakwe uwafyalwa eka. (Linganyako AbaHebere 2:2-4.)—8/15, ibula 5.

▫ Cinshi calenga ukukula kwa cinjelengwe ukwakumanya Inte sha kwa Yehova?

Ica kubalilapo pali fyonse, caba lipaalo lya kwa Yehova. Waba mulimo wa kwa Lesa. Fintu Inte sha kwa Yehova basambilisha mu mulimo wabo uwa bukabila fyashimpwa pali Baibolo. Ulufungulo lumbi ku kutunguluka kwabo kwishiba kwabo ukwakumanina ukwa kwa Kristu Yesu ngo Mutwe wasontwa uwa cilonganino ca Bwina Kristu.—9/1, ibula 19.

▫ Mulandu nshi Yehova alangile Davidi inkumbu ukulosha ku lubembu lwakwe lukalamba na Bati-sheba?

Ici cali maka maka pa mulandu wa cipingo ca Bufumu cintu Lesa aali napanga na Davidi, lelo na kabili cali pa mulandu wa nkumbu sha kwa Davidi umwine no kulapila kwakwe ukwa cine cine. (1 Samwele 24:4-7; 2 Samwele 7:12; 12:13; Ilumbo 51:1, 2, 17)—9/15, amabula 10, 11.

▫ Misango nshi itatu iya bushininkisho Amalembo ya Bwina Kristu aya ciGreek yapeela mu kwafwilisha buMesia bwa kwa Yesu?

Umutande wa kwa Yesu e mutande wa kubalilapo uwa bushininkisho. (Mateo 1:1-16; Luka 3:23-38) Ubushininkisho bumbi buli busesemo bwafikilishiwa. Kwaba mu cituntulu amasesemo ayengi, pamo nga bulya busangwa pali Daniele 9:25, ubwishibisha Yesu nga Mesia. Umutande walenga butatu uwa bushininkisho bunte bwa kwa Lesa umwine; apayenye ubu pa miku itatu kwi shiwi lyakwe line. (Mateo 17:5; Luka 3:21, 22; Yohane 12:28)—10/1, amabula 10, 12.

▫ Cinshi Yesu apilibwile lintu asosele, nga fintu calembwa pali Mateo 24:37 ukuti: “Ifyo inshiku sha kwa Noa shali, e fyo kukaba no kwisa kwa Mwana wa muntu”?

Noa alekuula icibwato kabili alesoka ababifi pa ciputulwa ca nshita ica makumi ya myaka ilyo Ilyeshi talilaisa no kupyanga imicitile ya fintu ya calo cabola. Mu nshila imo ine, ukubapo kwa kwa Kristu ukwa kukanamoneka kwalitwalilila pa ciputulwa ca makumi yamo aya myaka, mu kati ka ico ubunte bwa mu cibulungwa bupeelwa, ilyo nako kwine takulapwila mu bonaushi bukalamba.—10/1, ibula 16.

▫ Fikabilwa nshi fimo ifisangwilako kwi sambililo lya Baibolo ilya lupwa?

Inshita ifwile ukulubulwa iye sambililo. Tatufwile ukulisuminisha ukufimbilikishiwa na TV nelyo ukupusaula kumbi. Ukukabila kumo kumo ukwa lupwa kulingile ukulangulukwapo. Bomfyeni ifipusho fya mimwene pa kushininkisha ukuti abana nabomfwikisha cintu balesambilila. (Mateo 17:25) Leka imibele ibe iya kupembesula. Bo wacincimuka, kabili lenga uuli onse abimbwemo mwi sambililo.—10/15, ibula 17.

▫ Ni shani fintu Abena Kristu balingile ukuba abasakamikwa pa kuti imisango ya mulopa kuti pambi yalisanshiwemo mu musango wa fya kulya?

Abena Kristu balingile ukuba abapempwila ku kuba abapumfyanishiwa ne cingacitikako fye nelyo amaŋumfuŋumfu fye, kabili ukupelulula kuli ukwakabilwa nelyo fye ni ku kubebeta ifipepala fyakakatikwapo nelyo ukwipusha bakashitisha ba nama. Nangu cibe fyo, nga ca kuti nacishibikwa ukuti umulopa ulabomfiwa mu kusaalala mu cifulo ca cikaya—mube ni mu fya kulya nelyo mu miti ya kundapila—Abena Kristu bafwile ukuba abasakamana ukumfwila ikambisho lya kwa Lesa ilya kutaluka ku mulopa. (Imilimo 15:28, 29)—10/15, amabula 30-1.

▫ Ni shani fintu ibuku lya Amapinda lyebekesha ukushika kwa ku mupashi ukwa nshila sha kusambilisha ishabomfiwe muli Israele?

Ibuku lya Amapinda lilango kuti imifwaile ya liko yali kusambilisha “abapelwa amano” ifintu fyapulamo pamo nga amano, ukusalapula, umucetekanya, ukushilimuka, ubupingushi, ukucenjela, ukwishiba, na maka ya kutontonkanya—fyonse mu “katiina ka kuli Yehova.” (Amapinda 1:1-7; 2:1-14)—11/1, ibula 12.

▫ Mimwene nshi iyashikatala iya masomo intu abacaice balingile ukubuula ilelo?

Abena Kristu bafwile ukumona amasomo nge nshila ya kupwishishamo fimbi. Imifwaile yabo muli ishi nshiku sha kulekelesha kubombela Yehova ukufika pantu bengapesha kabili mu kufumamo cimo mu butumikishi bwa nshita yonse nga bengabomba.—11/1, ibula 18.

▫ Mulandu nshi Yehova afwaile uluko lwa kwa Israele ukulipila ica pe kumi?

Intanshi, pa kuti bengalangisha mu nshila ya cine cine ukutasha kwabo pa busuma bwa kwa Yehova. Ica bubili, pa kuti bengasangwilako ku kwafwilisha Abena Lebi, abo lyene baali no kutontomesha pa kukakililwako kwabo, ukusanshako no kusambilisha kwa Malango. (Mona 2 Imilandu 17:7-9.)—12/1, ibula 9.

▫ Ca pe kumi nshi ico Abena Kristu balelaalikwa ukuleta? (Malaki 3:10)

Ica pe kumi cimininako iciputulwa ca cili cesu ico tuleta kuli Yehova nelyo kubomfya mu mulimo wakwe. Ici e ciikatilo ca kumutemwa kwesu kuli wene no kumwensekesha kwesu ukwa kuti tuli bakwe.—12/1, ibula 15.