Ukusobela Inshita ya ku Ntanshi iya Calo ca fya Bunonshi

UKUKANASHIKATALA kwa mishika ya fya bunonshi no kubulwa ukucetekela mu basambilila ukubebeta abafililwe ukusobela ukubongoloka kwa mishika ya kushitishishapo ifyakaniko fya makampani ukwa mu 1987 kwalenga bashimakwebo bamo ukwalukila ku kulengule ntanda ku kusobela inshita yabo iya ku ntanshi iya fya ndalama, e fitunga magazini ya mu London iya Accountancy Age. Magazini isoso ukuti: “Bakalengula ba ntanda aba fya ndalama balenonka umutande ukalamba uwa ba kubombela ba cikankaala ku kusobela kwabo kwalonshiwa ukwa mushika.”

Impanda mano imo iya fya makwebo alinganya ukushinguluka asanga mu myaka 30 ukwa fipendo fya cila bushiku ifya ndalama ne myendele ya maplaneti. Pali ici citendekelo atambika ukusobela kwakwe. Nangu cingati aba kubombela abengi bali abashimunuka ukumfwila ukupanda amano kwakwe pa ntanshi ya 1987, nomba alesanga nelyo fye ni bankosa mitwe ba fya ndalama abaipekanya ukukutika.

Kalengula wa ntanda umbi uwa fya ndalama aletako amacharti yashimpwa pa nshiku sha kufyalwa ku kupima umusango wa muntu kabili no kufwailisha “ifishibilo fya kupiminako inshita ya kulunduluka kwapalako ukwa bukwebo.” Nalyo line umbi asumina ukuti ukwalukaaluka kwa mushika wa silfere kukonka ukushinguluka kwa kubalika no kwililwa. Lelo lintu alinganya na basambilila ifya kubebeta fya ndalama ifya lyonse, uyu kalengula wa ntanda asango kuti aba kubombelwa bakwe bamupeela “icipimo cinono nga nshi ku kulufyanya kwakwe.”

Kuliko, nangu cibe fyo, ukumwena libela kumo ukwa fya ndalama ukuli ukwashininkisha ukucitika, kabili takwakwata ica kucita no kulengule ntanda. Uku kumwena libela kwalembwa mu Baibolo no kupuutwamo na Yehova, Lesa uushipeela napacepa “icipimo cinono ica kulufyanya.” Ali ni Lesa “uushibepa.” (Tito 1:2) Alengele kasesema wakwe Esekiele ukubilisho kuti: “Bakapoosa silfere wabo mu misebo, na golde wabo akabe ca makombela; silfere wabo na golde wabo akafilwo kubapokolola.”—Esekiele 7:19.

Ni lilali lintu ici cikaba? Mu kati ka “bucushi bukalamba” ubuleisa ubwasobelwe na Yesu Kristu, ubo Esekiele aitile “ubushiku bwa kububuka kwa kwa Yehova.” (Mateo 24:21; Esekiele 7:19) Ulubanda lwa fya ndalama talwakapayanye ukupusunsuka, te mulandu na cintu bakalengula ba ntanda pambi bengasobela. Cili fye kutetekela muli Yehova Lesa, Kalubula Mukalamba, e kwingebekesha umutelelwe mu kati ka uku kubuukana kwa mu kusaalala kwa calo umo ukubola konse kukafumishiwa—ukwa bupolitiki, ukwa butotelo, no kwa fya makwebo.—Amapinda 3:5, 6; Sefania 2:3; 2 Petro 2:9.