Umulumbu wa Pomegranate Ukufuma mu Ŋanda ya kwa Yehova?

ABASHULA ifya mu mushili mu Israel balishula imilumbu iingi, inkonto shasendelwe ku bantu ba mu bulashi. (Ukutendeka 49:10; Estere 8:4; Esekiele 19:14) Imilumbu imo iyasangilwe mu Lakishi yalikwete inkoli mu musango wa mupomegranate. Abantu ba kwa Lesa balishibe bwino ici cisabo.—Amalango 8:8; Ulwimbo lwa Nyimbo 4:13.

Pomegranate wapangwa ku meno ya nsofu pa nshita ya kubalula, ku kuso, yaishile mu kwishibikwa inshita inono iyapitapo. Yaba amamilimita 43 ukusumbuka, kabili icipunda pa nshi ya iko citubulula ukuti yali lubali lwa mulumbu. Mona amakalata ayalembelwe mu musango wa kubangilila uwa ciHebere mu bushiku bwa mu mwanda wa myaka uwalenga cinekonsekonse B.C.E.

Ulubali lwapangilwe ameno ya nsofu lwalimokwelwe mu nshita sha ku kale, e co amakalata yanono yalibulila nelyo e po yaba mu kukanakumanina. Nalyo line, incenshi mu kulemba kwa ku kale batubulula ukulundanishiwa kwalengwa uko kuli pe samba. (Ukushimpwa pali Biblical Archaeologist) Ukutalushanya amashiwi kushili kwa lyonse pa kati ka makalata kwalitungulula ku mibelengelwe ikalamba ibili. Umusambi wa ciFrench André Lemaire atambike mibelengele ya “Ica Mwi Tem[pele lya kwa Shikul]u [Yahweh], ica mushilo kuli bashimapepo.” Nahman Avigad atubulwile ati “Umusangulo washila kuli bashimapepo aba (mu) Ŋanda ya kwa Yahweh.”

Bene na basambi bambi basondwelele ukuti umulumbu mu kutendekelako wakwete amakalata yane aya ciHebere aye shina lya kwa Lesa ilya pa lwakwe—Yehova. E co cifwile calilumbwile ati “iŋanda ya kwa Yehova,” ilongo lya mashiwi ilyaseeka muli Baibolo.—Ukufuma 23:19; 1 Ishamfumu 8:10, 11.

Abengi bacili bayumfwa ukuti iyi nkoli ya mulumbu pambi yali ya kwa shimapepo pe tempele Solomone akuulile nelyo ukuti yasangwililwe kwi tempele lilya. Ku ca kusekesha, ukwelenganya kwa mupomegranate ilingi line kwamwenwe pe tempele lya kwa Lesa.—Ukufuma 28:31-35; 1 Ishamfumu 7:15-20.

[Abatusuminishe Ukubomfya Icikope pe bula 32]

Israel Museum Jerusalem