Ni Finshi Wingapeela Pali Ici?

BUSHE walishibapo icili conse icakwatisha umutengo ica kuti mu kuitemenwa kuti waipusula fyonse ifyo wakwata pa kuti wingacinonka? Yesu alishibe, kabili alandile pa lwa cene ku bakonshi bakwe.

Atile: “Ubufumu bwa mu muulu bwapalo muntu wa makwebo uwalefwaya bamargariti basuma; kabili pa kusanga margariti umo uwaumo mutengo, ailepoosa fyonse ifyo akwete no kumushita.”—Mateo 13:45, 46.

Ulya muntu wa makwebo ali uwaitemenwa ukupoosa fyonse pa kuti engakwata ulya “margariti,” Ubufumu bwa kwa Lesa. Mulandu nshi? Pa mulandu wa kuti takwaba icili conse mu calo ica kulinganya kuli bwene. Ubufumu bwa kwa Lesa bukapikulula impika isho umuntu afilwa ukupikulula, pamo nge nkondo, insala, imisoka, no lumanimani. (Ilumbo 72:4-8, 13, 14) Pe samba lya Bufumu, nelyo fye lubembu, amalwele, ne mfwa tafyakabeko kabili. (Ukusokolola 21:4, 5) Te ca kupapa ukupaapaata kwa bubili ukwe Pepo lya kwa Shikulu (ilya “Shifwe wa mu Muulu”) kwa kuti, “Ubufumu bwenu bwise”!—Mateo 6:9, 10.

Cinshi wingapeela ku kwakana mu mapaalo ya Bufumu? Na kuba, amapaalo ya pa fye. Lelo pa kuti wingaipakisha yene, uli no kwishiba ico Ubufumu bwaba, ukusumino kuti bwa cine cine, no kubupeela icifulo ca ntanshi mu bumi bobe. Bushe kuti wacite co? Kwaliba ifyebo muli Baibolo ifikakwaafwa. Mulandu nshi te kusuminishisha Inte sha kwa Yehova ukukwaafwa mu kusambilila pa lwa Ubufumu nomba na fintu bwingakunonsha nelyo fye ni nomba.