Sengauka Umupashi wa Miya!

Ipinda lya mano ilya mu Baibolo litila: “Onse uusumbula ubwingililo bwakwe alefwayo kushonaulwa.” (Amapinda 17:19, NW) Cinshi calubana no bwingililo bwasumbuka? Kabili cinshi caba e cishinka cikalamba ica ili ipinda?

MU NSHITA sha pa kale abantu umo umo ne mpuka sha fita abaletentema pali bakabalwe bali abaseeka. Amayanda yashacingililwa mu mushi wapabuka yali ayasansalikwa ku bapupu. Pa kulesha ukwibwa kwa fikwatwa fyabo, abene ba mayanda bamo bakuulile ilinga mu kuba ne cipata caibela. Ilinga lyali ilyasumbuka, lelo impongolo yali lwa pa nshi. Na kuba, shimo tashacilile pali mita umo ukusumbuka—apaipipisha ku kwingilapo kabalwe no watentemapo. Abo abashacitile ubwingililo ku mansa shabo ukuba ishipi bali mu busanso bwa kukwata abaume baletentema pali bakabalwe ukucilukilamo no kutape fipe fyabo.

Mu misumba amengililo ya kuya ku lubansa yaleba ilingi line ayepi kabili ayashaba ya kucebusha, ukukanapeela icilangililo ca cuma ico cingaba mu kati ka mushi wakwate linga. Nangu cibe fyo, mu Persia icipata calulubala cali ni cimo ica filangililo fya cifumu, cintu bamo abatekwa baleesha ukupashanya ku kuibika mu kaposa mweo kakalamba. Uuli onse uwacitile icipata icasumbuka ku ŋanda yakwe aleita ukwibilwa pa mulandu wa mataki yakwe aya lubanda.

Amapinda 17:19 muli fyo yalanga ukuti abo bacita ubwingililo bwabo ubwasumbuka balesonsomba akayofi pa kuibika pa muulu ukucila pa kukatama kwabo kwa cine cine. Ili ipinda kuti na kabili lyalosha ku kanwa pamo ngo bwingililo bwasansabalikwa ku milandile ya kuitakisha no kuininikisha. Ukulanda kwa musango yo kutuninkisha ulubuli kabili kuti mu kupelako kwatungulula umuntu wa cilumba ku kayofi. Fintu cabe ca mano, lyene, ukusengauka umupashi wa miya!

[Abatusuminishe Ukubomfya Icikope pe bula 30]

Picturesque Palestine, Sinai and Egypt, Volyumu 1, kuli Colonel Wilson (1881)