Ukupala Icimuti

“IMISHIKAKULO ishikwa ne fiwelewele ukupala ine, lelo ni Lesa fye ewingapanga icimuti.” Ukusansabika ubulumba ubwingi ubwa fimiti, kemba wa mishikakulo Joyce Kilmer muli fyo apeele Lesa umucinshi pa kubumbwa kwa fiko.

Yehova Lesa alipanga ifimuti ifya misango yalekanalekana, ukululubala, no kubomfiwa kwa fiko. Ifinono ne fikalamba mu kupalako, kuti fyabe fyayemba nga nshi ica kuti fyalengo kulondolola ukwafya. Mu kulundapo, ifimuti fipayanya ifya kulya, inkuni, ne cintelelwe. Kabili bakelenganya batwalilila ukusanga imibomfeshe ipya iya mbao.

Muli Baibolo, ifimuti inshita shimo shimo filabomfiwa mu mampalanya ukwimininako amabufumu, bakateka, na bantu umo umo. (Esekiele 31:1-18; Daniele 4:10-26) Ifimuti fyalilumbulwa mu kulundana ne mibele ya buseko, iya mutende, ne ya kusandulula iifuma muli bumfumu bwa kwa Yehova no kubweshiwa kwa bantu bakwe. (1 Imilandu 16:33; Esaya 55:12; Esekiele 34:27; 36:30) Amalembo na kabili yalayo kuti inshiku sha bantu ba kwa Lesa shikaba nga shilya isha muti. (Esaya 65:22) Ici calikwata ubupilibulo bukalamba lintu twailuka ukuti ifimuti fimo filekalako imyanda ya myaka iingi.

Kemba wa malumbo uwa mu Baibolo asosele ukuti umuntu uubekelwa mu malango ya kwa Lesa “aba ngo muti uwalimbwa pa tumilonga twa menshi, uutwale fisabo fya uko mu nshita ya fiko, kabili amabuula ya uko tayalokota; conse ico acita cikalengwo kushuka.” Icimuti catemfuma icalimbwa pa ntulo ya menshi ayengi cacinkwileko kemba wa malumbo ulwa lubanda lwa ku mupashi uluipakisha umo uyo “mu malango ya kwa Yehova e mwabo kubekwa kwakwe.” (Ilumbo 1:1-3) Nga ca kuti mu cine cine wabekelwa mu malango ya kwa Lesa ne Cebo Cashila, inshiku shobe kuti shaba nga shilya isha muti. Na kuba, pa kubomba mu kumfwana no kwishiba kwalungikwa ukwa kwa Yehova Lesa na Yesu Kristu, kuti wakwata isubilo lya bumi bwa muyayaya.—Yohane 17:3.