Nga Maapele ya Golde

AMAAPELE—fintu yatemuna ilinso no lulimi! Baibolo ibomfya ici citwalo cawamisha mu mampalanya ya kusonsomba itontonkanyo lintu itila: “Nga maapele ya golde mu fipe ifyacekwa fya silfere, icebo icasoswa apayene e fyo caba.” (Amapinda 25:11) Cinshi capilibulwa kuli ici cebo?

“Amaapele ya golde mu fipe ifyacekwa fya silfere” kuti pambi yaimininako umulimo wa kubasa, pamo nga trei wabaswa uwa silfere mu kuba ne citwala ca golde pali wene. Apantu ifikomo fya kubangilila muli ici cipandwa filelumbula ukubinga imfumu, ici cikomo kuti calosha ku fya bupe ifipeelwa kuli kateka—ifibekobeko fya golde mu mipangilwe ya maapele ifyabikwa pali batrei ba silfere. (Amapinda 25:6, 7) Ifyayemba fya kulenga insansa, mu cine cine!

Mwaba ukuyemba kwapalako mu mashiwi yalinga, aya mucinshi, aya pa nshita yalinga, nampo nga yalembwa fye nelyo ayalesoswa. Yaliba aya kutemuna, aya kukoselesha, kabili aya kunonsha mu nshila ishingi. Ifyaba ifyo ukucilisha fintu fyaba muli Baibolo ifyapuutwamo na bulesa ifyaba nga “maapele ya golde mu fipe ifyacekwa fya silfere” ku kuyemba.

Nga fintu calangililwa ku mashiwi ya mano aya Mfumu Solomone pa Amapinda 25:11, “afwaile ukusange fyebo fya kutemuna, no kulembo kwalondoka ifyebo fya cine.” (Lukala Milandu 12:10; Amapinda 25:1) Imyanda ya myaka pa numa, umutumwa wa Bwina Kristu Paulo alembele ati: “Amalembo yonse yantu yapuutwamo kuli Lesa, kabili ya mulimo.” (2 Timote 3:16) Ee, Baibolo yabamo ukufunda kwa mulimo, amasesemo, ukulondolola kwamonekesha, ne cine ica kupeshima kwa musango yo no kuyemba ica kuti fyalicila apakalamba imilimo ya ntukushi shawamisha. Mu kulundapo, uuli onse uunonka amano ukufuma mu Cebo ca kwa Lesa, Baibolo, anonka icikwatwa caumisho mutengo kabili kuti akwata isubilo lya bumi bwa ciyayaya.—Amapinda 4:7-9; Yohane 17:3.