Ukusabankanishiwa pa Nshita Imo Ine pa Myaka Ikumi!
LINTU aipushiwe ifyo ayumfwile imyaka ikumi iyapitapo lintu ukulembwa kwa ciSpanish ukwa Ulupungu lwa kwa Kalinda kwatampile ukusabankanishiwa pa nshita imo ine ne ciNgeleshi, nkashi wa ciSpanish umo uwatemwikwa ayankwileko ukuti: ‘Tuleyumfwa ukuti cili lipaalo pantu nomba tuli pamo, kuti nati shani, tuleendela pamo ne ciNgeleshi. Lintu nasosa nati iciNgeleshi, inshita shonse ntontonkanya pa lwa kuteyanya. Tulosha ku kuteyanya pamo nga “Mama.” Tuyumfwa abapalamisha, mupepi. Caba icayembesha. Icawamisha!’
Uyu nkashi wa busumino alumbulwile ukuyumfwa kwa bakabelenga abashibelenga iciNgeleshi abengi. Mu myaka yapita, ifipande fyalemoneka mu kulembwa kwa ciSpanish ukwa Ulupungu lwa kwa Kalinda imyeshi mupepi na mutanda pa numa fyasabankanishiwe mu ciNgeleshi. Mu ndimi shimbi ukucelwa kwali cimo cine. Mu kumfwika, kwali ukufwaisha kwaluma ukwa kusabankanya ifyebo fimo fine, pa nshita imo ine, mu ndimi ishingi.
E co ukutendeka no lwafumine ulwa April 1, 1984, ukulembwa kwa ciSpanish kwali e kutanshi ukutampa ukusabankanishiwa pa nshita imo ine no kulembwa kwa ciNgeleshi. Indimi shimbi mu kwangufyanya shalikonkelepo. Ukufika pa kutendeka kwa 1985, ukulembwa mu ndimi 23 ukusabankanishiwa pa nshita imo ine. Ilyo bakapilibula balesangwa no kukanshiwa, ukulembwa mu ndimi shafulilako kwalitendeke ukwendela pamo ne ciNgeleshi.
Luno ulwafuma Ulupungu lwa kwa Kalinda luleishibisha umwaka walenga ikumi uwa kusabankanishiwa pa nshita imo ine. Ulupungu lwa kwa Kalinda nomba lusabankanishiwa mu ndimi 116, ukusabankanishiwa pa nshita imo ine mu ndimi 85. Ici cilepilibula ukuti amaperesenti 99.3 aya avareji onse uwa makope yapangwa 16,100,000 aya Ulupungu lwa kwa Kalinda yapangwa mu kuba ne mimonekele ya pa nkupo imo ine ne fipande. Kuli abo abasangwa kwi Sambililo lya Ulupungu lwa kwa Kalinda ilya cila mulungu, ukucila pa maperesenti 95 balanguluka ifyebo fimo fine pa nshita imo ine.
Loleni!, magazini unankwe uwa Ulupungu lwa kwa Kalinda, afumina pamo mu ndimi 37 pa ndimi asabankanishiwamo 74. Yearbook of Jehovah’s Witnesses iya cila mwaka isabankanishiwa mu ndimi 18. Ukusabankanya kwa pa nshita imo ine ukwa musango yo kubomba ku kwikatanya abantu ba kwa Lesa ‘ukulundikana mu mucetekanya umo wine na mu kulinga kumo kwine.’—1 Abena Korinti 1:10.