“Inte sha kwa Yehova Balincingilile!”

MULI shino nshiku sha kulekelesha, abengi baliishininkisha abene ukuba “abankalwe; . . . abashatemwa busuma.” (2 Timote 3:1, 3) Isaac, umutumikishi wa kuitemenwa pe ofesi lya musambo wa Watch Tower Society mu West Africa, asangile ici ukuba ica cine. Ashimiko kuti:

“Mu January 1992, nali pa lwendo mu musebo mushali bantu muli takisi wa cintubwingi na bayendo bambi basano. Natendeke ukulanshanya no mwanakashi uwaikele mupepi na ine, kabili mu buseko apokelele broshuwa washimpwa pali Baibolo ukufuma kuli ine.

“Mu kupumikisha, mupepi na 4 koloko mu cungulo kasuba, motoka ipya iyabulapo inambala yaishilepitila ku ntanshi yesu, kabili motoka twalimo aishileiminina mu kuba ne congo ca kutelela kwa mipeto. Abaume batatu abatuuluka, umo umo ne mfuti, balitolweke ukufuma muli uyo motoka no kwisula ifiibi fyesu na maka. ‘Fumeni, bonse,’ e fyabulwime umo uwa bene.

“Umwaume umbi afumpwile icola candi ica fitabo. Lintu amwene ukuti mwali fye ifitabo fya Baibolo, asukwise icola. ‘Cinshi cimbi ukwete?’ e fintu anjipwishe, lintu ansontele imfuti. Mu kwangufyanya namupeele indalama shali mu cikwama candi. ‘E fintu fye ukwete?’ e fintu aipwishe. Namwebele ukuti nali umo uwa Nte sha kwa Yehova no kuti Inte tababepa bufi. Asompwele icikwama candi, no kumona kardi wa kwishibikilwapo uwa Watch Tower, ‘Citawala, cisuma. Lolela apa.’

“Mu kukonkapo, ayalukile ku mukashana uo nali nandile nankwe muli takisi. Mu kwangufyanya afuulile umunyololo wa mu mukoshi no kumupeela indalama shali mu cikwama cakwe. Lintu icipondo camwene broshuwa mu kuboko kwakwe ukwaletutuma, catungenye ukuti twali bonse, e co camusontele ukwiminina uko nali.

“Pali iyo nshita, ifipondo fya mfuti fimbi fyasanshile abayendo banensu mu bukatu. Balipumine namutekenya no kumwibila no mwaume umbi uwali na ifwe pa lwendo. Icipondo cimo casompwele umunyololo wa mu mukoshi uwa mwanakashi walenga bubili. Lintu acincintile, balimupamine icabipisha ku mutwe na mu cifuba ku fitako fya mfuti ukufikila afwile. Umwanakashi walenga butatu balimukulwile ukufuma muli motoka no kumupika mu cifuba. Ku ca bulanda, na o wine alifwile. Ni ne fye no mukashana fwe bashele abashacenwa nangu panono.

“Pa numa lintu twasendelwe kuli motoka alepita, umwanakashi watulumushiwa alebwekeshapo fye ukuti, ‘Inte sha kwa Yehova balincingilile!’”