Ifilembo mu Kuba no Bupilibulo Bwaibela
“IEHOVA SIT TIBI CUSTOS”
AYA mashiwi yalembwa pa ntanshi ya cibumba ca ŋanda ya mu mwanda wa myaka walenga 17 mu Celerina, ku kabanga ka Switzerland, yapilibula ukuti “Yehova abe kacingilila obe.” Muli iyi ncende ya mpili, tacaba icishaseeka ukusanga ishina lya kwa Lesa ukulembwa nelyo ukupentwa pa mayanda yaikalako pa myanda ya myaka, amacalici, na mayanda ya bashimapepo. Ni shani fintu ishina Yehova lyaishileishibikwa bwino ifyo?
Rhaetia wa pa kale (uwapangilwe ne mbali sha caba nomba pa kati ka kapinda ka ku kulyo na kabanga aka Germany, Austria, na kabanga ka Switzerland) yasangwike icitungu ca bena Roma mu 15 B.C.E. Abekashi baishiletendeka ukulanda iciRomansh, ululimi lwashimpwa pa ciLatin ulo lwalundulukile mu ndimi shafulilako isho shicili shilalandwa muli imo iya mikonko ya Alpine iya Switzerland na kapinda ka ku kuso aka Italy.
Mu kupita kwa nshita, ifiputulwa fya Baibolo fyalipilibwilwe mu ciRomansh. Ukulembwa kumo, ukwa Biblia Pitschna, kwakwetemo Amalumbo na Amalembo ya Bwina Kristu aya ciGreek. Muli iyi Baibolo, iyasabankanishiwe mu 1666, ishina Iehova lyalimoneke imiku iingi ukupulinkana Amalumbo. Apantu Baibolo yali e fyebo fya kubelenga ifya kutendekelako mu ŋanda, bakabelenga ba Biblia Pitschna baishilebeleshanya ne shina lya kwa Kabumba.
Nangu cibe fyo, inko shakonkelepo shalufishe ubuseko mu milandu ya mu Baibolo. Abengi tabasakamene ukwipusha cintu ishiwi “Iehova” lyapilibwile, kabili bashibutotelo tabacitileko kubombesha ukuli konse ku kulondolola lyene. E ico, ifi filembo fyabele makalata fye ya kuyemfya aya kwishibisha inshita yapita.
Mu makumi ya myaka aya nomba line amasomo yamonekesha ayapya yalacitika. Inte sha kwa Yehova balyenda ukufuma mu nika, ukupoosa inshita sha kutuusha muli iyi mikonko yayemba no kucito kubombesha kwa kusambilisha abekashi pa lwa kwa Lesa untu ishina lyakwe ni Yehova. Inte shimo shalikala fye no kwikala muli ici cifulo pa kuti shingapoosa inshita yakulilako ukweba abantu pa lwa mifwaile ya kwa Kabumba iya kupapusha iye sonde no muntu. Muli fyo, ifi ifilembo fya kale ifya ciRomansh filekwata ubupilibulo bupya ilyo abantu balesambilila pa lwa kwa Lesa wa cine, Yehova.
[Ifikope pe bula 32]
IEHOVA PORTIO MEA: Yehova e cakaniko candi.—Mona Ilumbo 119:57