‘Nalengelwe mu musango wa kupapa’

“NI KWI nafumine?” Ici cili cipusho abacaice abengi bepusha pa nshita imo nelyo iinankwe. Lintu abana bakula, icipusho cabo ilingi line cilashikilako ica kuti: “Ni kwi ubumi bwafumine?” Ici cipusho calilandwapo pa makana ya myaka, kabili pali nomba line basayantisti abengi bamona ukusanguka pamo nge casuko cacilapo kubamo kupelulula ku bwile bwa ntuntuko ya bumi. Mu kutendekelako, ubulondoloshi bwa wasumina mu kusanguka bwa kuti ubumi bwafumine ku mankumanya.

Mupepi ne myaka 3,000 iyapitapo, Imfumu Davidi yalembele ukuti: “Nalengelwe mu musango wa kutiinya kabili uwa kupapa.” (Ilumbo 139:14) Ilintu tucililako ukusambilila pa lwa bumi, e lintu tucililako ukumone cine muli aya mashiwi. Mu cituntulu, uwasambilila physics Fred Hoyle alembele ukuti: “Nga fintu abaishibishe fya miti ya kutumbinkanya iya bumi baasanga mu kulundulukilako pa lwa kupikana kwa kutiinya ukwa bumi, cili icamonekesha ukuti amashuko ya buko ukutuntuka ukupitila mu mankumanya yali ayacepesha nga nshi ica kuti kuti yafumishiwapo. Ubumi te kuti butuntuke ukupitila mu mankumanya.”

E co cinshi caba e ntulo ya bumi? Ifipande fya kwiswila fibili ifya uno magazini filelanda pali ico cipusho. Nga mwingatemwa ukukwata ifyebo fyalundwapo, twapaapaata lembeleni ku Watch Tower, Box 33459, Lusaka 10101, nelyo kuli adresi walinga pa batantikwe pe bula 2.