‘Imilimo Yakwe Ilemukonka’

PA 08:50 hrs. pali Cine, July 28, 1994, George D. Gangas apwishishe ubumi bwakwe ubwa pe sonde. Aali ne myaka ya bukulu 98. Pamo nga umo uwa basubwa, George Gangas aali cilundwa ce Bumba Litungulula ilya Nte sha kwa Yehova ukutula pa October 15, 1971.

Bonse abo pa lwabo babeleshenye na Munyina Gangas balishibe ulwa ukutemwa kwakwe ukwa bulungami no kupata kwa bubifi. Balebukisha bwino inshila intu mu kubwekeshabwekeshapo alelondolwelamo Satana pamo nga kabepa wabipisha, uwakankala, umubifi, uwabotelela, kabili uwaseebana. Mu kupusanako, alelanda ulwa kwa Yehova pamo nga Wishi wakwato kutemwa, uwa cikuuku, uwa cililishi, uwabondoka, kabili uusakamana. Abengi na kabili balebukisha ukutemwa kwakwe ukwa kwipusha ifipusho fya mu Baibolo. Mu kulanshanya ukuli konse, aali no kwipushapo ifipusho lyonse—fimo ifya fyene ifyayanguka, fimo ifya fyene ifyacilapo kupelenganyo muntontonkanya. Mu cituntulu, alitemenwe icine ca Baibolo.

Munyina Gangas abatishiwe pa July 15, 1921. Atendeke umulimo wakwe mu butumikishi bwa kushimikila ubwa nshita yonse (bupainiya) mu March 1928. Kanshi aali mu mulimo wa nshita yonse ubwingi bonse pamo ubwa myaka 66. Abele icilundwa ca bakabomba ba pa maofesi yakalamba aya pa Brooklyn aya Watch Tower Bible and Tract Society pa October 31, 1928.

Ilyashi lya bumi bwakwe lyamoneke muli The Watchtower uwa October 15, 1966. Lilondolola umwaume wa kwa Lesa uwa ku mupashi icine cine. Muli cilya cipande, apeele ukulumbulula kwa kukafyo mutima ukwakonkapo ukuti: “Nalitemwo bumi kabili mfwaya bamunyinane ukunonka ubumi. Nanguluka, capamo no mutumwa Paulo, ukuti ifintu fimbi fyonse fyaba ‘kulufya, pa mulandu wa cuma icapulamo ica kwishiba Kristu Yesu.’”—Abena Filipi 3:8.

Munyina Gangas alangishe ku ncitilo shakwe ukuti mu cituntulu alitemenwe ubumi, kabili mu kucincila ayakene “ukwishiba Kristu Yesu” kwakwe na bambi. Akulafulukwa, lelo fintu tuli abasekelela ukuti nomba napokelela icilambu cakwe ica ku muulu! Nomba, ‘akatuusha ku kucucutika kwakwe, pantu imilimo yakwe ilemukonka.’—Ukusokolola 14:13, New International Version.