Bushe Uleibukisha?

Bushe walisanga ishafuma isha nomba line isha Ulupungu lwa kwa Kalinda ukuba isha mutengo ubomba kuli iwe? Lyene mulandu nshi te kwesha nga uleibukisha ukupitila mu fipusho fyakonkapo:

▫ Mulandu nshi Inte sha kwa Yehova batwalilila ukutandalila abena mupalamano babo?

Inte sha kwa Yehova baifwaila abene ipaalo lya kwa Lesa ukupitila mu Bufumu bwalaiwa, kabili pa mulandu wa kutemwa kwabo ukwa bena mupalamano babo, bafwaila bene ipaalo limo line. Muli fyo, ukukonka ica kumwenako ca kwa Yesu, balayumfwa ukukuntwa ku kutemwa kwabulwa akaso ukutandalila abena mupalamano babo. (Mateo 6:9, 10; 22:37-39)—8/15, amabula 8, 9.

▫ Mulandu nshi ukusumina mu kusanguka kwabela mulandu wa citetekelo?

Basayantisti tabatala abamonapo ukwaluka—nelyo fye ni uko ukwabulamo ubusanso—uko kuletako imisango ipya iya bumi, nalyo line abasumina mu kusanguka batungo kuti ifi e fyo imisango ipya iya bumi yaishileko. Abasumina mu kusanguka tabaikalilako bunte ku nkulo sha kuicitikilako fye isha bumi, nalyo line bapampamina pa kuti ifi e fyo ubumi bwatendeke.—9/1, ibula 5.

▫ Ni shani fintu twingacimfya ukufuupulwa uko kwingesako ukufuma ku fibindo fya mu bumi mu nshila yacilapo kuwama?

Te mulandu ne mibele yesu, nga ca kuti twakosela pa cintu twingaba na maka ya kucita ukucila ukukalifiwa pa lwa cintu tushingaba na maka ya kucita, ubumi bukacilapo kuba ubwa kwikusha, kabili tukasanga ubuseko mu mulimo wa kwa Lesa. (Ilumbo 126:5, 6)—9/1, ibula 28.

▫ Bunonshi nshi ubwa kulekelela?

Ukulekelela bambi kulundulula ukwampana kusuma (Abena Efese 4:32); kuletako te mutende fye na bantunse banensu lelo na kabili umutende wa lwa nkati (Abena Roma 14:19; Abena Kolose 3:13-15); ukulekelela bambi kukungule nshila ku membu shesu ukulekelelwa (Mateo 6:14); na kabili, kutwaafwa ukwibukisho kuti na ifwe bene tulakabila ukulekelelwa. (Abena Roma 3:23)—9/15, ibula 7.

▫ Ni shani fintu ica kumwenako ca kwa kasesema Amose citwaafwa mu mibombele yesu iya kushimikila?

Ukupala Amose, tatwalula nelyo ukusundula ubukombe bwa kwa Lesa. Mu cifulo ca ico, mu cumfwila tulabilisha bwene te mulandu no kwankulako kwa bakomfwa besu.—9/15, ibula 17.

▫ Mibele nshi iya kwa Lesa iyo tulingile ukupashanya?

Iyapulishamo ibili yaba maka ya kwa Yehova aya kuteyanya ne nsansa shakwe. (1 Abena Korinti 14:33; 1 Timote 1:11, NW) Iyi mibele ya kwa Lesa ilalinganishiwa, pa kuti imo tailengelwe ukupulamo pa kufumyapo imbi.—10/1, ibula 10.

▫ Ni ntampulo nshi shimo ishashininkishiwa isho abafyashi babuula ku kwaafwa abana babo ukubombela Yehova?

Ulufungulo lwakatama kutampa mu kubangilila. Ukwebekesha kupokelelwa na masambililo yasambililwa pa mushinku uuteku yakabelelela inshita yonse iya bumi. (Amapinda 22:6) Caliba icacindama ukubasambilisha icumfwila no mucinshi kuli Yehova no kupepa kwakwe pa kulongana konse. Abafyashi batunguluka balasambilila ukwishiba ukukongama kwalubana, kabili balaafwa abana babo ukulungika kwene. (Amapinda 22:15) Mu kupelako, tampeni mu kubangilila ukwimika amabuyo ya teokratiki ayo umwana engafikilisha.—10/1, amabula 27-8.

▫ Mibele nshi iyaibela iya kulekelela kwa kwa Yehova iyo tulingile ukwesha ukubomfya?

Yehova alalekelela no kulabako. (Yeremia 31:34) Ici caliba icaafya ku fibumbwa fya buntunse ukucita. Ubucindami bwa kucite fyo bwalikomailwepo na Yesu, nga fintu calembwa pali Mateo 6:14, 15.—10/15, amabula 25-6.

▫ Fipindami nshi fitatu fingacilikila ukuba kwesu aba nkumbu?

Pa mulandu wa cifyalilwa cesu ica buntunse ica lubembu, ukuyumfwa kwa kafindwe kuti mu kwanguka kwalimbe mishila. Nga tuli aba kafindwe ku muntu umo, ni shani fintu twingamusunga mu kuba no mutima wa nkumbu? Ukuisansalika kushakabilwa ku lukaakala kwaba cipindami na cimbi. Ici cikongamina ku kutulenga ukuba ababulwe cililishi ku kucula kwa bambi. Mu kulundapo, umuntu wa bumano kuikwatila mu kupalishako te kuti akwate nkumbu. (1 Yohane 3:17)—11/1, amabula 19, 20.

▫ Masambililo nshi yengasambililwa ukufuma ku bulondoloshi bwa mu Malembo ukukuma kuli Yobo?

Ubulondoloshi bwa kwa Yobo butulenga ukuba abacilapo kwibukila ulwa mapange ya kwa Satana kabili butwaafwa ukumona fintu bumulopwe bwa mu kubumbwa konse ubwa kwa Yehova bwayampana kuli bumpomfu bwa bantunse. Ukupala Yobo, bonse abatemwa Lesa bakeshiwa. Na ifwe bene kuti twashipikisha nga fintu Yobo acitile, ukushinina Satana uwa bufi, no kuipakisha amapaalo ya Bufumu bwa kwa Lesa.—11/15, ibula 20.

▫ Ni shani fintu ceyamani we bumba lya baeluda engalangisha ukuti mu kulinga alapendelako eluda umo umo?

Ilyo lyonse cingacitika ceyamani alingile ukupayanya umutande wa fili no kulanshanishiwapo mu kubangililako ku kusuminisha baeluda bambi inshita ya kutontonkanyapo kwasakamanisha kabili ukwabamo ipepo pa cishinka cimo na cimo icitantikwe. Pa kukumana kwa baeluda, takeshe ukumumunga amatontonkanyo ya baeluda lelo akabakoselesha ukukwata “ubuntungwa bwa kusosa” pa milandu ilelangulukwapo. (1 Timote 3:13, NW)—12/1, ibula 30.