“Nge nshiku sha muti”

UKUCILA pa myaka amakana yatatu iyapitapo, Mose alembele ati: “Inshiku sha myaka yesu shabe myaka amakumi cinelubali, kabili imyaka amakumi cinekonsekonse nga tuli aba mapiki; lelo isasa lya lupi lya iko kucucutika no bucushi.”—Ilumbo 90:10.

Te mulandu no kulunduluka kwa fya miti ya cipatala, ukulepa kwa bumi bwa muntu kucili kumo kwine nga fintu kwali mu kasuba ka kwa Mose. Nangu ni fyo, abantunse tabakabe lyonse abashama fye ku kubako kwa musango yo ukwa mu lupita. Mwi buuku lya Baibolo ilya kwa Esaya, Lesa atile: “Inshiku sha bantu bandi shikaba nge nshiku sha muti, ne milimo ya minwe yabo abasalwa bandi bakasekelamo pa myaka iingi.”—Esaya 65:22.

Umo uwa miti yalekokwesha mu mpanga shalembwa mu Baibolo waba muolife. Umuti uulangililwe pano ni umo uwa miolife yabako pa makana ya myaka iicili iletemfuma mu Galili. Ni lilali abantunse bakatendeka ukwikalako inshita yalepe fyo? Ubusesemo bumo bwine bulondolola ukuti cikaba lintu Lesa akalenge “myulu ipya, ne calo cipya!”—Esaya 65:17.

Ibuuku lya Ukusokolola na lyo lisesema ukwimikwa kwa “muulu upya ne calo cipya” uko e kuti kamfulumende mupya uwa ku muulu na sosaite mupya uwa bantunse lintu Lesa “akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka.”—Ukusokolola 21:1, 4.

Ubu bulayo bwa bulesa mu kwangufyanya buli no kufikilishiwa. Pali iyo nshita, nangu fye ni nshiku sha cimuti ca muolife shikamoneka ngo bushiku fye ubwa maawala 24. Kabili tukakwata inshita yakumanina ku kuipakisha ku mwisulo umulimo wa minwe yesu.