‘Iye, Kanshi Ngo Uli Onse Aali Nga Bene!’

Aya yali e mashiwi ya kwa kalemba wa mikululo mu nyunshipepala ya mu Luxembourg iya Letzebuerger Journal. Ni bani alelandapo?

Aile ku Poland ku kusangwa ku kusefya kwa pa caka ukwalenga 50 ukwa kulubulwa kwa Auschwitz kabili amwene ukuti ibumba limo ilyaculile apakalamba nga nshi kulya talyalumbwilwenapo. Mu mukululo wakwe uwa pa February 2, 1995, alondolwele ili bumba nge Nte sha kwa Yehova kabili alembele ukuti: “Nangu kulindikwa kwatapatisha nelyo inkambi ya kucushiwilwamo, nangu icintiinya ca kuloba icabipisha mu kamba kabulwamo ifya kulya nelyo ukuputulwa imitwe ku tusembe nelyo kuli fimashini tafyabalengele ukukaana icitetekelo cabo.” Atwalilile ukuti: “Nangu fye balinshi bakaluka aba SS balisungwike pa bukose bwakwete Inte sha kwa Yehova lintu baleipaiwa.”

Inte sha kwa Yehova tabalefwaya imfwa. Lelo, ukupala Abena Kristu mu mwanda wa myaka uwa kubalilapo, amakana yabo basalilepo imfwa ukucila ukusuusuka ku fishinte fya Bwina Kristu. Icitetekelo ca musango yo cabalengele ukuba abapusanako nga nshi muli shilya nshiku shabipisha isha Kuteka kwa ciNazi.

Kalemba wa mikululo asondwelele ukuti: “Iye, kanshi nga abantu bonse baali nge Nte sha kwa Yehova!” Nga ca kuti e fyo baali, inkondo ya calo iyalenga bubili nga tayacitikeko.