Icitabo ca Nyimbo ico Irina Atemwisha

TAPAKOKWELE sana, ukutula apo umukashana wa myaka 9 uwa ku Sofia, Bulgaria, uwe shina lya Irina, abatishiwilwe nga umo uwa Nte sha kwa Yehova. Alitemwa ukwimba kabili alaipakisha sana inyimbo sha mu citabo ca Imbileni Yehova Amalumbo. Irina muli fyo aimike ubuyo bwa kusambililako inyimbo shimo shimo no kushisungila ku mutwe cila mweshi.

Cimo ica fisambilisho Irina atemwisha ku sukulu caba kusambilila ukwimba. E co kafundisha wa kwa Irina alisungwike lintu Irina akeene ukwimbako muli bakemba ba pa sukulu. Mulandu nshi akaanine? Ailwike fyo inyimbo ishingi isho aali no kufwaikwa ukwimbako ni sho ishilumbanya impalume sha calo na maholide kabili sha cisenshi. Inyimbo shimo shafwilisha fye no kupondoka no lukaakala ku kupakamisha ubusuma bwa calo. Kafundisha alifililwe ukumfwikisha imimwene ya kwa Irina iya uyu mulandu. Irina asalilepo ukulembela kafundisha wakwe kalata ku kulondolola ifisumino fyakwe ifya mipepele—lelo tacayafwile.

Lyene wishi kwa Irina atontonkenyepo ica kucita. Apeeleko kafundisha icitabo ca Imbileni Yehova Amalumbo, umwaba inyimbo isho Irina atemwa ukwimba. Pati papite nshiku shinono, kafundisha aitile Irina ukuya mu muputule basambililamo ukwimba. Alombele Irina ukuti embeko inyimbo shimo isho atemwa ukufuma mu citabo—ilyo bambi bonse balekutika—na kafundisha ali no kukonkamo alelisha piyano. Balimbile ukucila pe awala limo! Kafundisha aali fye no kusumina ukuti icitabo ca nyimbo ico Irina atemwa cabamo inyimbo ishisuma.