Lengeni Ulubuuto Lwenu Lubalike!

MU KUPELAKO inshita yalifikile ku mwaume umukote ukumona Mesia walaiwe! Ukupitila mu kusokolola kwa bulesa Sumeone alishibe ukuti “tali na kumone mfwa kano abala amona Kristu wa kwa Shikulu.” (Luka 2:26) We kucincimushiwa we lintu Sumeone aingile mwi tempele kabili Maria na Yosefe batambike umwana Yesu mu maboko yakwe! Alumbenye Lesa, pa kusoso kuti: “Nomba, we Mwine Lubanda, muleke umusha wenu aye, aye umutende . . . pa kuti amenso yandi yamone pusukilo lyenu . . . ku kubo lubuuto lwa kusokolwela Abena fyalo, no bukata bwa bantu benu abena Israele.”—Luka 2:27-32; linganyako Esaya 42:1-6.

Ukutula pa nshita yakwe iya lubatisho pa mushinku wa myaka 30 ukufika pa mfwa yakwe, Yesu ashininkishe ukuba e “lubuuto” ku calo. Mu nshila nshi? Asalangenye ulubuuto lwa ku mupashi pa kushimikila pa lwa Bufumu bwa kwa Lesa ne mifwaile Yakwe. Na kabili asansalike ifisambilisho fya bufi ifya mipepele no kwishibisha mu kulengama icaampana ne mfiifi. (Mateo 15:3-9; Abena Galatia 5:19-21) E ico, Yesu mu kulungika kuti asoso kuti: “Ni ’ne lubuuto lwa calo.”—Yohane 8:12.

Yesu alifwile mu mwaka wa 33 C.E. Bushe ulubuuto lyene lwalishimine? Nakalya! Lintu acili pe sonde, Yesu aebele abasambi bakwe ati: “Ulubuuto lwenu lengeni lubalikile ku cinso ca bantu.” (Mateo 5:16) Mu kukonkapo, pa numa ya mfwa ya kwa Yesu ulubuuto lwa bakonshi bakwe lwatwalilile ukubalika.

Mu kupashanya Yesu, Abena Kristu ilelo babelebesha ulubuuto lwa kwa Yehova pa kuibimba mu mulimo wa kushimikila. Baishininkisha ukuba ifya kumwenako fya lubuuto mu mikalile ya Bwina Kristu pa ‘kwenda nga ’bana ba lubuuto.’—Abena Efese 5:8.